ꓡꓲꓽ ꓒꓰꓼ ꓐꓰ ꓫꓸ ꓕꓱˍ ꓟ (Dialogue with culture)

ꓓꓳꓼ ꓠꓬꓹ ꓐꓰ ꓮꓸ ꓠꓯꓸꓸ ꓟꓽ ꓫꓱꓹ ꓡꓯꓼ ꓘꓳ=ꓓꓳꓼ ꓠꓬꓹ ꓠꓬ ꓓꓳꓼ ꓠꓬꓹ ꓥ ꓡꓳ= ꓮꓸ ꓠꓯꓸꓸ ꓠꓬ ꓮ ꓠꓯꓸꓸ ꓥ ꓡꓳ= ꓬꓲꓸ ꓤ ꓠꓬꓲ ꓤ ꓐꓴ ꓕꓱ ꓕꓲ ꓠꓽ ꓡꓲꓽ ꓒꓰꓼ ꓐꓰ ꓫꓸ ꓕꓱˍ ꓟ ꓗꓪ ꓠꓬ ꓣꓳ ꓔꓯ ꓪꓴ-ꓢ ꓡꓰ ꓖꓶ ꓔꓽ ꓟ ꓕꓲ ꓚꓱꓹ ꓐꓯˍ ꓠꓬ ꓣꓳ ꓒꓬꓱꓼ ꓟꓳ ꓡ ꓕꓯ ꓡꓰ ꓣꓳ ꓔꓯ ꓶꓸꓹ ꓕꓱ ꓟ ꓙꓳ ꓟ ꓠꓬ ꓣꓳ ꓮ ꓫꓵꓽ ꓫꓵ ꓗꓪ ꓐꓰ ꓒꓬꓱꓼ ꓟꓳ ꓡ ꓡ? ꓐꓯˍ ꓟ ꓠꓸ ꓠꓬꓲ ꓘꓶꓸ ꓥ ꓡꓳ= ꓣꓳ ꓠꓬ ꓡꓲ-ꓢꓴ ꓕꓲ ꓣꓳ ꓡꓰ ꓐꓰ ꓒꓬꓱꓼ ꓟꓳ ꓡ ꓥꓳ꓾ꓐꓯ ꓠꓬ ꓕꓱ ꓡꓱ ꓡꓲ-ꓢꓴ ꓫꓵꓽ ꓠꓯꓼꓸ ꓗꓪ ꓠꓴ ꓮ ꓡꓰ ꓐꓰ ꓣꓱꓽ ꓙ ꓐ ꓡ ꓡ? ꓡꓲꓽ ꓒꓱꓼ ꓕꓱ ꓟ ꓔꓯ ꓠꓴ ꓮ ꓡꓰ ꓐꓰ ꓫꓸ ꓔꓽ ꓐ ꓡ ꓡ? ꓣꓳ ꓓꓵ ꓙ ꓠꓬꓲ ꓠꓹ ꓗꓸ ꓡꓳ= ꓮ ꓫꓵꓽ ꓑꓶꓸ ꓓꓴ ꓥ ꓡ ꓐꓯ ꓠꓬ ꓠꓴ ꓠꓬ ꓡꓲ-ꓢꓴ ꓡꓰ ꓐꓰ ꓦꓵꓸꓹ ꓡ ꓟ ꓑꓶꓸ ꓓꓴ ꓶꓸꓹ ꓕꓲ ꓟ ꓡꓰ ꓐꓰ ꓕꓱ ꓡꓱ ꓙꓳ ꓡꓳ= ꓣꓳ ꓠꓬ ꓚꓲꓽ ꓛꓬ ꓫꓵꓽ ꓔꓯ ꓡꓳꓸ ꓟꓽ ꓟꓳ ꓬꓰ ꓢꓲꓽ ꓠꓬꓲ ꓠꓱꓸ ꓐꓯ ꓫꓵꓽ ꓔꓯ ꓡꓰ ꓠꓲꓹ ꓠꓵ ꓢꓲꓽ ꓡꓲ-ꓢꓴ ꓒꓬꓱꓼ ꓗꓷ ꓟ ꓔꓯ ꓫꓸ ꓕꓳꓸ ꓥꓳ ꓐꓯ ꓠꓬ ꓣꓳ ꓟꓯꓼ ꓠꓹ ꓗꓸ ꓟ ꓔꓯ ꓡꓳ ꓩꓴ ꓗꓷ ꓟ ꓔꓯ ꓫꓱꓹ ꓡꓳ= ꓖꓳ ꓡꓰ ꓠꓬ ꓣꓳ ꓠꓬ ꓡꓲ-ꓢꓴ ꓥ ꓟ ꓑꓶꓸ ꓓꓴ ꓡꓲ-ꓢꓴ ꓶꓸꓹ ꓖꓪꓼ ꓖꓪˍ ꓟ ꓔꓯ ꓫꓸ ꓔꓳꓸ ꓟ ꓛꓲ ꓡꓲ-ꓢꓴ ꓥꓳꓽ ꓕꓱ ꓟ ꓔꓯ ꓓꓵ ꓙ ꓫꓸ ꓟꓽ ꓛꓲ= ꓮ ꓡꓰꓳ ꓐꓯ ꓠꓬ ꓢꓲꓽ ꓒ ꓬꓰ-ꓢꓴ ꓠꓬ ꓬꓳ-ꓔ ꓡ ꓞꓳ ꓐꓴ ꓓꓵ ꓙ ꓟ ꓓꓵ ꓙ ꓚꓱꓹ ꓠꓯꓼ ꓗꓪ ꓬꓲ ꓠꓬ ꓛꓳ ꓙꓳ ꓢꓲꓽ ꓠꓬꓲ ꓡꓲꓽ ꓒꓱꓼ ꓖꓳ ꓟ ꓔꓯ ꓬꓲ ꓠꓬ ꓫ ꓔꓽ ꓡꓳ= ꓬꓲꓸ ꓠꓬ ꓬꓳ-ꓔ ꓡ ꓞꓳ ꓐꓴ ꓕꓱꓼ ꓟ ꓫꓸ ꓪ ꓕꓱ ꓢꓲ꓾ ꓟꓵ ꓗꓪ ꓗꓴꓷꓼ ꓚꓱꓹ ꓟꓸ ꓖꓶ ꓡꓳ= ꓖꓳ ꓟ ꓑꓶꓸ ꓓꓴ ꓚꓲ ꓛꓬ ꓫꓵꓽ ꓔꓯ ꓠꓲꓹ ꓠꓵ ꓗꓴꓸ ꓠꓹ ꓟ ꓮ ꓘꓶꓸ ꓣꓳꓸꓸ ꓚꓵꓸꓸ ꓡꓳ= ꓤ ꓠꓱ ꓤ ꓐꓴ ꓡꓲꓽ ꓒꓱꓼ ꓚꓱꓹ ꓗꓪ ꓛꓳ ꓫꓱꓹ ꓐ ꓡ ꓠꓹ ꓟ ꓢꓷꓸ ꓠꓲꓹ ꓔꓯ ꓢꓳ ꓢꓯꓼ ꓕꓵꓼ ꓝꓲ ꓡꓯ= ꓖꓳ ꓕꓯ ꓢꓲ꓾ ꓡꓲꓽ ꓒꓱꓼ ꓔꓯ ꓥˍ ꓟꓲ ꓞꓳ ꓒꓴꓽ ꓗꓴꓸ ꓡ ꓥꓳ=