ꓡꓲꓽ ꓒꓰꓼ ꓐꓰ ꓫ. ꓕꓱ ꓟ (Dialogue with Culture)

ꓡꓲꓽ ꓒꓰꓼ ꓐꓰ ꓫ. ꓕꓱ ꓟ

ꓠꓬꓲ. ꓠꓬꓲ ꓡꓲꓽ ꓒꓰꓼ ꓐꓰ ꓫ. ꓕꓱ ꓟ ꓙꓵ, ꓗꓪ ꓐꓰ ꓡꓲꓽ ꓒꓰꓼ ꓐꓰ ꓘꓴ ꓜꓲꓼ ꓞꓳ ꓡꓰ ꓟ. ꓖꓶ ꓡ ꓟ ꓚꓱ, ꓔꓯ ꓐꓯ ꓟ. ꓖꓶ ꓓꓴ ꓥꓳ꓿ ꓟꓲ ꓠꓯ ꓤꓶ  ꓐꓰ ꓡꓲꓽ  ꓒꓰꓼ ꓠꓬ ꓧ, ꓟꓽ ꓓꓽ ꓟ ꓡꓰ ꓐꓰ ꓕꓲ ꓟ ꓥ ꓡꓳ꓿ ꓟꓲ ꓠꓯ ꓕꓯ ꓢꓲ ꓗꓪ ꓟꓽ ꓪꓽ ꓡꓯ ꓘꓳ ꓟ ꓞꓳ ꓫꓵꓽ ꓮ ꓟꓬ, ꓢꓯ. ꓔꓬ ꓟ ꓥ ꓢꓲ ꓠꓬꓲ ꓟꓽ ꓫꓱ, ꓡꓯ ꓘꓳ ꓟ ꓡꓲꓽ ꓒꓰꓼ ꓮ ꓟꓬ, ꓙꓳˍ ꓟ ꓥ ꓡꓳ꓿

ꓢꓯꓼ ꓐꓽ ꓢꓲ ꓠꓬꓲ ꓝꓴꓲ ꓙꓳˍ ꓢꓴ ꓟꓲ ꓠꓯ ꓞꓳ ꓤ ꓡꓰ ꓫꓬ, ꓔ ꓟ ꓡꓲꓽ ꓒꓰꓼ ꓥ ꓢꓲ ꓠꓬꓲ ꓡꓲꓽ ꓒꓰꓼ ꓥ ꓔ ꓑꓳ ꓗꓪ ꓝꓴꓲ ꓢꓯꓼ ꓥ ꓟꓲ ꓶꓻ ꓞ, ꓟ ꓥ ꓡꓳ꓿ ꓢꓯꓼ ꓐꓽ ꓟ ꓐꓰ ꓟꓽ ꓐꓲ ꓜꓲꓻ ꓟ ꓥ ꓟꓲ ꓙꓳˍ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓪꓴ‐ꓢ ꓶꓽ ꓓꓳ, ꓫꓱ ꓓꓳ ꓔꓯ ꓡꓲꓽ ꓒꓰꓼ ꓠꓯ, ꓗꓪ ꓚꓺ ꓕꓯ ꓠꓬ ꓐꓯ ꓥꓳꓽ ꓟ ꓟꓽ ꓡꓳꓼ ꓟ ꓙꓳˍ ꓟ ꓥ ꓡꓳ꓿

ꓡꓲꓽ ꓒꓰꓼ ꓢꓯꓼ ꓐꓽ ꓟ ꓔꓯ ꓒꓳ, ꓡꓶ. ꓢꓲ ꓠꓬꓲ ꓡꓲꓽ ꓒꓰꓼ ꓔꓯ ꓟꓬ, ꓠꓬꓲˍ ꓬꓲ. ꓒꓵꓽ ꓒꓵꓽ ꓠ, ꓟ ꓣꓳ ꓠꓬ ꓮ ꓕꓯ ꓥ ꓟꓲ ꓢꓯꓼ ꓕꓵꓼ ꓠ, ꓔ ꓡꓳ꓿ ꓫꓬ, ꓑꓱ ꓠ, ꓟ ꓔ ꓡꓳ ꓡꓳ. ꓙ ꓔꓳ, ꓙ ꓠ, ꓔ ꓟ ꓔꓯ ꓢꓷ. ꓪ ꓡꓳ꓿ ꓝꓴꓲ ꓐꓰ ꓐꓲ ꓤ ꓟ ꓡ ꓞꓳ ꓥ ꓟ ꓪꓴ. ꓠꓬꓲ ꓡꓲꓽ ꓒꓰꓼ ꓥ ꓔ ꓑꓳ ꓗꓪ ꓢꓯꓼ ꓐꓽ ꓟ ꓟꓽ ꓐꓲ ꓜꓲꓼ ꓟ ꓕꓱ ꓟ ꓐꓰ ꓐꓲ ꓤ ꓟ ꓥ ꓡꓳ꓿

ꓪꓴ‐ꓢ ꓶꓼ ꓓꓳꓽ ꓫꓱ ꓓꓳ ꓚꓺ ꓢꓲ ꓠꓬꓲ ꓡ ꓞꓳ ꓔꓯ ꓒꓳ, ꓡꓶ. ꓡ ꓠ, ꓟ ꓢꓯꓼ ꓕꓵꓼ ꓟ ꓙꓵ, ꓕꓯ ꓥ ꓟꓲ ꓝꓴꓲ ꓐꓰ ꓶꓺ ꓤ ꓟ ꓡꓲꓽ ꓒꓰꓼ ꓥ ꓔ ꓑꓳ ꓔꓯ ꓠꓬ ꓡꓳꓻ ꓗꓷ ꓠ, ꓟ ꓔ ꓡꓳ꓿ ꓪꓴ‐ꓢ ꓐꓯ ꓘꓶꓽ ꓚꓺ ꓢꓲ ꓠꓬꓲ ꓡ ꓞꓳ ꓝꓴꓲ ꓞꓲꓻ ꓫꓬ, ꓕꓯ ꓝꓴꓲ ꓠꓯ ꓗꓪ ꓓꓲ. ꓞ, ꓟ ꓡꓲꓽ ꓒꓰꓼ ꓥ ꓔ ꓑꓳ ꓔꓯ ꓠꓬ ꓞꓲꓻ ꓫꓬ, ꓩꓴ ꓠ, ꓔ ꓡꓳ꓿

ꓠꓬꓲꓽ ꓧꓪ, ꓕꓲ ꓧꓪ, ꓦꓮꓔꓲꓚꓮꓠ ꓖꓪꓽ ꓙꓱ ꓜꓲꓼ ꓓꓴ ꓗꓪ ꓠꓬ ꓡꓲꓽ ꓒꓰꓼ ꓐꓯ ꓟ. ꓠꓬ ꓡ ꓞꓳ ꓡꓰ ꓫꓬ, ꓟ ꓐꓰ ꓔꓶ. ꓔ ꓟ  ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓡꓲꓽ ꓒꓰꓼ ꓔꓯ ꓬꓲ. ꓒꓵꓽ ꓒꓵꓽ ꓡꓰ ꓠ, ꓛꓲ ꓫꓬ, ꓔꓶ. ꓟ ꓐꓲ ꓜꓲꓽ ꓡꓰ ꓝꓲ ꓟ ꓣꓳꓺ ꓚꓵ. ꓡꓳ ꓐꓰ ꓐꓯ ꓔ ꓡꓳ꓿

ꓖꓳ ꓟ ꓖꓴ. ꓡꓰ ꓕꓯ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓠꓬ ꓟꓲ ꓠꓯ ꓕꓲ ꓛꓳ ꓡꓳ ꓗꓪ ꓪꓴ‐ꓢ ꓐꓯ ꓘꓶꓽ ꓔꓯ ꓚꓺ ꓕꓯ ꓟꓽ ꓫꓱ, ꓡꓯ ꓘꓳ ꓟ ꓡꓲꓽ ꓒꓰꓼ ꓐꓰ ꓮ ꓕꓯ ꓥ ꓟꓲ ꓔꓳ, ꓜꓳ ꓡ ꓟ ꓥ ꓢꓲ ꓠꓬꓲ ꓡꓲꓽ ꓒꓰꓼ ꓔꓯ ꓮ ꓘꓶ. ꓛꓲ ꓒꓵ ꓘ. ꓬꓰ ꓢꓲ ꓶꓼ ꓓꓳꓽ ꓫꓱ ꓓꓳ ꓔꓯ ꓟꓬꓽ ꓠꓬꓲˍ ꓬꓲ ꓟ. ꓟꓲ ꓙꓳˍ ꓡꓰ ꓠ, ꓟ ꓢꓯꓼ ꓕꓵꓼ ꓟ ꓥ ꓪ꓿

ꓕꓱ ꓡꓱ ꓐꓰ ꓶꓼ ꓓꓳꓽ ꓫꓱ ꓓꓳ ꓚꓺ ꓕꓯ ꓘꓴ ꓜꓲꓼ ꓞꓳ ꓠꓬ ꓬꓲ. ꓪ ꓡꓲꓽ ꓒꓰꓼ ꓔꓯ ꓟꓬ, ꓠꓬꓲ ꓬꓲ ꓒꓵꓽ ꓒꓵꓽ ꓡꓰ ꓠ, ꓟꓬ, ꓠꓬꓲ ꓟꓬꓱꓺ ꓓꓳꓽ ꓙꓳˍ ꓡꓰ ꓠ ꓬꓰ ꓖꓶ ꓡ ꓟ ꓟꓽ ꓛꓲ ꓡꓲꓽ ꓒꓰꓼ ꓠ, ꓟ ꓬꓲ ꓒꓵꓽ ꓒꓵꓽ ꓟ ꓔꓯ ꓧꓪ, ꓢꓲ ꓠꓬꓲ ꓟꓬꓽ ꓠꓬꓲˍ ꓙꓲꓻ ꓖꓴ ꓙꓳˍ ꓟ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓔꓬ ꓟ ꓥ ꓡꓳ꓿ ꓮ ꓙꓵꓽ ꓢꓴ ꓔꓯ ꓮ ꓘꓶ. ꓫ. ꓟꓳ ꓪ꓿