ꓡꓲꓽ ꓒꓰꓼ ꓬꓲꓸ ꓒꓵꓽ (Dialogue with Culture)

ꓞꓳ ꓫꓵꓽ ꓕꓲꓽ ꓫꓵꓽ ꓡꓲꓽ ꓒꓰꓼ ꓠꓬ ꓬꓲꓸ ꓒꓵꓽ ꓐꓯ ꓞꓰꓹ ꓟꓽ ꓓˍ ꓟ ꓥˍ ꓡꓳ= ꓞꓳ ꓤꓽ ꓠꓬ ꓛꓳ ꓚꓱꓹ ꓙꓳ ꓢꓲ ꓬꓲꓸ ꓗꓳꓸ ꓬꓲꓸ ꓡꓽ ꓟꓽ ꓥˍ ꓟ ꓢꓯꓸ ꓫꓵꓽ ꓕꓲꓽ ꓫꓵꓽ ꓥˍ ꓡꓳ= ꓞꓳ ꓤꓽ ꓠꓬ ꓡꓲꓽ ꓒꓰꓼ ꓒꓬꓱꓼ ꓡ ꓠˍ ꓟ ꓬꓰ ꓢꓴ ꓡꓲꓽ ꓒꓰꓼ ꓚꓱꓹ ꓠꓯꓸꓼ ꓗꓪ ꓣꓱꓽ ꓠˍ ꓟ ꓶ ꓤꓼ ꓔꓯ ꓒꓬꓱꓼ ꓡ ꓠ ꓬꓰ ꓢꓴ ꓡꓲꓽ ꓒꓰꓼ ꓚꓱꓹ ꓔꓯ ꓟꓳꓸ ꓐꓳ ꓢꓴ ꓐꓴ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓞꓳ ꓤꓽ ꓠꓬ ꓡꓲꓽ ꓒꓰꓼ ꓬꓲꓸ ꓝꓳꓹ ꓟꓶˍ ꓐꓰ ꓓꓽ ꓪꓴꓸ ꓥˍ ꓡꓳ= ꓡꓲꓽ ꓒꓰꓼ ꓐꓯˍ ꓟ ꓠꓬ ꓞꓳ ꓤꓽ ꓡꓰ ꓒꓬꓱꓼ ꓡ ꓝꓲˍ ꓟ ꓕꓱ ꓟ ꓮꓽ ꓙꓵꓽ ꓔꓯ ꓡꓲꓽ ꓒꓰꓼ ꓐꓯˍ ꓟ ꓥ ꓪ=

ꓔꓲꓺ ꓒ ꓪꓸ ꓔꓲ ꓬꓳ-ꓦ ꓒꓳ-ꓡꓳ ꓲꓲ ꓡꓰ ꓩ-ꓖꓴꓳ ꓗꓴꓷꓼ ꓗꓪ ꓴꓠꓰꓢꓚꓳ ꓐꓯˍ ꓟ ꓟꓲ ꓠꓯ ꓕꓲꓽ ꓚꓳ ꓡꓳ ꓗꓪ ꓟ ꓮꓽ ꓠꓵ ꓕꓯ ꓡꓰ ꓫꓬ ꓦˍ ꓟ ꓡꓳ ꓒꓱ ꓡꓲꓽ ꓒꓰꓼ ꓕꓲꓽ ꓫꓵꓽ ꓡꓰ ꓕꓲꓽ ꓫꓵꓽ ꓔꓯ ꓧꓪ ꓟꓰꓹ ꓢꓲ ꓟꓽ ꓐꓬ ꓡꓰ ꓠ ꓡꓳꓸ ꓢꓴ ꓕꓱ ꓡꓲꓳ ꓫꓴꓽ ꓬꓲ ꓜꓴ ꓐꓰ ꓫꓸ ꓕꓱ ꓡꓯꓽ ꓘꓳˍ ꓕꓯ ꓡꓲꓽ ꓒꓰꓼ ꓐꓯˍ ꓟ ꓔꓯ ꓕꓱ ꓡꓰ ꓐꓯˍ ꓡꓳ= ꓡꓲꓽ ꓒꓰꓼ ꓐꓯˍꓟ ꓠꓬ ꓞꓳ ”ꓵꓽ ꓕꓲꓽ ꓫꓵꓽ ꓠꓲꓹ ꓟ ꓠꓯꓸꓼ ꓗꓪ ꓔꓳꓹ ꓜꓳˍ ꓟ ꓞꓳ ꓫꓵꓽ ꓕꓲꓽ ꓫꓵꓽ ꓒꓬꓱꓼ ꓡ ꓝꓲˍ ꓟ ꓞꓳ ꓫꓵꓽ ꓕꓲꓽ ꓫꓵꓽ ꓐꓱ ꓶ ꓙꓲ ꓖꓴ ꓙꓳˍ ꓟ ꓕꓱ ꓡꓲꓳ ꓫꓵꓽ ꓟꓽ ꓐꓹ ꓠꓬ ꓡꓲꓽ ꓒꓰꓼ ꓐꓯˍ ꓟ ꓠꓬ ꓢꓷꓸ ꓠˍ ꓟ ꓮꓽ ꓘꓶꓸ ꓫꓸ ꓔ ꓟ ꓗꓶ ꓡꓰ ꓓꓴ ꓥꓳ= ꓐꓯ ꓟꓵ ꓢꓪˍ ꓟ ꓠꓬ ꓡꓲꓽ ꓒꓰꓼ ꓠꓯꓸꓼ ꓗꓪ ꓠꓬ ꓞꓳ ꓤꓽ ꓠꓲꓹ ꓟ ꓠꓯꓸꓼ ꓗꓪ ꓔꓳꓹ ꓜꓳˍ ꓟ ꓐꓰ ꓞꓳ ꓫꓵꓽ ꓒꓬꓱꓼ ꓡˍ ꓟ ꓚꓱꓹ ꓥ ꓕ ꓑꓳꓸ ꓐ ꓠꓬꓲ ꓔ ꓥ ꓐꓯˍ ꓟ ꓥˍ ꓡꓳ= ꓮ ꓡꓲꓳ ꓐꓯ ꓠꓬ ꓞꓳ ꓤꓽ ꓠꓬ ꓡꓲꓽ ꓒꓰꓼ ꓒꓬꓱꓼ ꓡ ꓠˍ ꓟ ꓐꓱ ꓶ ꓟꓽ ꓓ ꓬꓳꓸ ꓚꓵˍ ꓟ ꓬꓲꓸ ꓝꓳꓹ ꓟꓶ ꓥ ꓢꓲ ꓓꓽ ꓪꓴꓸ ꓥˍ ꓟꓲ ꓥˍ ꓟ ꓪꓴꓸ ꓠꓬꓲ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓞꓳ ꓤꓽ ꓠꓬ ꓡꓲꓽ ꓒꓰꓼ ꓒꓬꓱꓼ ꓮ ꓡꓰ ꓢꓲ ꓒꓬꓱꓼ ꓡ ꓠˍ ꓟ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵˍ ꓟ ꓥ ꓪ= ꓞꓳ ꓫꓵꓽ ꓕꓲꓽ ꓫꓵꓽ ꓠꓬ ꓡꓲꓽ ꓒꓰꓼ ꓠꓯꓸꓼ ꓗꓪ ꓡꓰ ꓢꓲ ꓚꓵꓸ ꓛꓬꓽ ꓠꓬ ꓮ ꓡꓲꓳ ꓫꓵꓽ ꓞꓳ ꓫꓵꓽ ꓥˍ ꓟ ꓔꓯ ꓟꓸ ꓖꓶ ꓐ ꓡˍ ꓡꓳ ꓐꓰ ꓔꓲꓺ ꓒ ꓪꓸ ꓔꓲ ꓡꓰ ꓕꓱ ꓡꓰ ꓐꓯˍ ꓟ ꓥ ꓪ= 

ꓞꓳ ꓤꓽ ꓠꓬ ꓡꓲꓽ ꓒꓰꓼ ꓓꓽ ꓪꓴꓸ ꓥ ꓢꓲ ꓠꓬꓲ ꓕꓱ ꓡꓰ ꓡꓲꓽ ꓒꓰꓼ ꓒꓬꓱꓼ ꓡ ꓝꓲˍ ꓟ ꓔꓯ ꓚꓵꓸ ꓚ ꓕꓯ ꓣꓱꓽ ꓫꓶꓸ ꓡˍ ꓟ ꓛꓳ ꓚꓱꓹ ꓶꓽ ꓖꓪꓽ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓬꓰˍ ꓟ ꓟꓬꓱꓽ꓾ ꓫꓶꓹ꓾ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓕꓱ ꓡꓲꓳ ꓫꓵꓽ ꓮꓽ ꓙꓵꓽ ꓠꓬ ꓬꓲ ꓒꓵꓽ ꓒꓵꓽˍ ꓟ ꓥ ꓢꓲ ꓞꓳ ꓫꓵꓽ ꓕ꓾ꓽ ꓫꓵꓽ ꓞꓳ ꓜꓴ ꓕꓲꓽ ꓜꓴ ꓟꓵꓽ ꓕꓲꓽ ꓟꓵꓽ ꓕꓱ ꓡꓰ ꓗꓶꓸ ꓡꓰ ꓠ ꓬꓰ ꓖꓶˍ ꓟ ꓥˍ ꓡꓳ= ꓡꓲꓽ ꓒꓰꓼ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳˍ ꓟ ꓞꓳ ꓫꓵꓽ ꓞꓳ ꓙꓵꓽ ꓠꓯꓸꓼ ꓗꓪ ꓞꓳ ꓫꓵꓽ ꓕ꓾ꓽ ꓫꓵꓽ ꓬꓲ ꓪꓽ ꓙ ꓜꓲꓼ ꓠꓲꓹ ꓢꓷꓸ ꓠꓲꓹ ꓢꓳˍ ꓟ ꓢꓷꓸ ꓠꓲꓹ ꓕꓱ ꓟ ꓔꓯ ꓪꓴꓽ ꓡ ꓟꓴ ꓡ ꓝꓲ ꓢꓲ ꓬꓲꓸ ꓒꓵꓽ ꓐꓯ ꓞꓲꓹ ꓟꓽ ꓓˍ ꓟ ꓠꓲꓹ ꓟ ꓠꓲꓹ ꓟ ꓠꓯꓸꓼ ꓗꓪ ꓔꓳꓹ ꓜꓳˍ ꓟ ꓔꓯ ꓒꓬꓱꓼ ꓡ ꓝꓲˍ ꓟ ꓥ ꓪ=