ꓡꓲꓽ ꓒꓰꓼ ꓬꓲ ꓟꓸ ꓟꓲꓽ ꓐꓰ ꓘꓴ ꓜꓲꓼ ꓞꓳ (1) Dialogue with Culture

ꓦꓮꓔꓲꓚꓮꓠ ꓲꓲ ꓖꓪ ꓙꓱ ꓜꓲꓼ ꓓꓴ ꓗꓪ ꓖꓪ ꓙꓱ ꓞꓲꓹ ꓦˍ ꓟ ꓠꓯꓸꓼ ꓗꓪ ꓠꓳꓸ53 ꓗꓪ ꓠꓬ ꓡꓲꓽ ꓒꓰꓼ ꓚꓱꓹ ꓔꓯ ꓟꓳꓸ ꓕꓱ ꓡꓰ ꓐꓯ ꓔ ꓟ ꓙꓳ ꓐꓶ=

1ꓸ ꓞꓳ ꓤꓽ ꓕꓲ ꓤꓳ ꓧꓪ ꓗꓳ ꓓꓱˍ ꓐꓰ ꓠꓲꓹ ꓟ ꓓꓵꓽ ꓙˍ ꓟ ꓔꓯ ꓟꓳꓸ ꓟꓬꓽ ꓠꓬꓲ ꓐꓶꓹ ꓠꓬꓲꓐꓰ ꓜꓲꓼ ꓡꓰ ꓠ ꓪꓴꓽ ꓡ ꓟꓴ ꓡ ꓝꓲˍ ꓟ ꓚꓱꓹ ꓥ ꓕ ꓑꓳꓸ ꓔꓯ ꓡꓲꓽ ꓒꓲꓼ ꓐꓯˍ ꓟ ꓥˍ ꓡꓳ ꓐꓰ ꓕꓱ ꓡꓰ ꓐꓯ ꓔ ꓡꓳ=

2ꓸ ꓟꓲ ꓠꓯ ꓕꓱ ꓟ ꓔꓯ ꓡꓳꓸ ꓐꓰ ꓠ ꓮꓽ ꓘꓶꓸ ꓐꓲ ꓠ ꓮꓽ ꓘꓡꓸ ꓙꓲ ꓠ ꓡꓳꓸ ꓙ ꓑꓳꓽ ꓙ ꓗꓽ ꓕꓸ ꓙˍ ꓟ ꓠꓯꓸꓼ ꓗꓪ ꓢꓯꓼ ꓕꓵꓼ ꓐ ꓡ ꓠꓹ ꓟ ꓐꓱ ꓶ ꓢꓳ ꓣꓴˍ ꓟ ꓟꓬꓱꓽ ꓚꓱꓹ ꓥ ꓕ ꓑꓳꓸ ꓔꓯ ꓐꓯˍ ꓟ ꓥ ꓐꓭ= 

3ꓸ ꓟꓲ ꓠꓯ ꓞꓳ ꓤꓽ ꓐꓯˍ ꓟ ꓠꓯꓸꓼ ꓗꓪ ꓟꓬꓽ ꓠꓬꓲ ꓐꓲ ꓜꓲꓼ ꓡꓰ ꓠꓹ ꓟ ꓐꓱ ꓶ ꓬꓲ ꓜꓴ ꓬꓲ ꓟꓯꓼ ꓔꓶˍ ꓟ ꓕꓲꓽ ꓦꓲꓺ ꓡꓽ ꓞꓳ ꓔꓶˍ ꓟ ꓘꓹ ꓖꓴ ꓡꓳ ꓛꓳꓽ ꓞꓳ ꓘꓹ ꓕꓱ ꓡꓰ ꓔꓶ ꓢꓲ ꓠꓬꓲ ꓚꓵꓸ ꓛꓬꓽ ꓡꓲꓽ ꓒꓰꓼˍ ꓐꓰ ꓛꓳ ꓚꓱꓹ ꓔꓯ ꓟꓬꓽ ꓠꓬꓲ ꓛꓳ ꓫꓱꓽ ꓐ ꓡ ꓠꓹ ꓟ ꓢꓯꓼ ꓕꓵꓼ ꓟ ꓔꓯ ꓐꓯˍ ꓟ ꓥ ꓐꓭ=

4ꓸ ꓚꓵꓸ ꓛꓬꓽ ꓞꓲꓼˍ ꓐꓰ ꓞꓳ ꓫꓵꓽ ꓞꓳ ꓙꓵꓽ ꓮꓽ ꓙꓵꓽ ꓐꓱ ꓶ ꓕꓲꓽ ꓦꓲꓺ ꓡꓽ ꓞꓳˍ ꓡꓰ ꓐꓰ ꓒꓬꓱ ꓡ ꓠꓹ ꓟ ꓐꓱ ꓶ ꓪꓴꓽ ꓡ ꓟꓴ ꓡ ꓠ ꓪ ꓙꓵꓽ ꓪꓽ ꓐꓱ ꓶ ꓣꓳꓽ ꓬꓰˍ ꓟ ꓠꓯꓸꓼ ꓗꓪ ꓦ ꓕꓲꓽ ꓒꓳꓹ ꓢꓲ ꓔꓳꓹ ꓜꓳˍ ꓟ ꓚꓵꓸ ꓛꓬꓽ ꓒꓬꓱꓼ ꓠꓲꓹ ꓫꓵˍ ꓟ ꓐꓱ ꓶ ꓬꓲ ꓙꓵ ꓖꓶˍ ꓟ ꓝꓸ ꓡꓯꓽ ꓘꓳˍ ꓟ ꓡꓳꓸ ꓙ ꓑꓳꓽ ꓙ ꓗꓽ ꓕꓸ ꓙ ꓖꓶˍ ꓟ ꓮꓽ ꓙꓵꓽ ꓔꓯ ꓡꓲꓽ ꓒꓰꓼ ꓐꓯˍ ꓟ ꓥ ꓪ ꓐꓰ ꓕꓱ ꓡꓰ ꓐꓯ ꓔ ꓡꓳ= 

ꓦꓮꓔꓲꓚꓮꓠ ꓲꓲ ꓖꓪ ꓙꓱ ꓜꓲꓼ ꓓꓴ ꓗꓪ ꓠꓬ ꓡꓲꓽ ꓒꓰꓽ ꓔꓯ 4 ꓫꓵꓽ ꓕꓱ ꓡꓰ ꓙꓳˍ ꓡꓳ ꓐꓰ ꓐꓯ ꓟꓸ ꓖꓶˍ ꓡꓳ= 

1ꓸ ꓞꓳ ꓤꓽ ꓠꓬ ꓟꓬ ꓠꓬꓲ ꓐꓶˍ ꓠꓬꓲ ꓐꓲ ꓜꓲꓼˍ ꓟ ꓠꓯꓸꓼ ꓗꓪ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓪꓴꓽ ꓡ ꓟꓴ ꓡ ꓠꓹ ꓟ ꓐꓱ ꓶ ꓦꓺ ꓕꓲꓽ ꓒꓳꓹ ꓔꓯ ꓢꓲ ꓗꓪ ꓥˍ ꓟꓲ ꓧꓪꓽ ꓗꓳ ꓓꓱꓽ ꓕꓲꓽ ꓒꓳꓹ ꓔꓯ ꓢꓲ ꓗꓪ ꓥˍ ꓟꓲ ꓢꓯꓼ ꓕꓵꓼˍ ꓟ ꓮꓽ ꓙꓵꓽ ꓔꓯ ꓐꓯˍ ꓟ ꓥ ꓐꓭ= ꓕꓱ ꓡꓰ ꓐꓯˍ ꓟ ꓠꓯꓸꓼ ꓗꓪ ꓧꓪꓽ ꓗꓳ ꓓꓱꓽ ꓡꓲꓽ ꓒꓰꓼ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓔꓯ ꓟꓳꓸ ꓡꓲꓽ ꓒꓰꓼ ꓠꓲꓹ ꓟ ꓠꓯꓸꓼ ꓗꓪ ꓔꓳꓹ ꓜꓳˍ ꓟ ꓔꓯ ꓟꓳꓸ ꓕꓱ ꓟ ꓔꓯ ꓪꓴꓸ ꓓꓵ ꓛꓹ ꓔ ꓟ ꓔꓯ ꓡꓳꓸ ꓟꓳˍ ꓡꓳ=

2ꓸ ꓪꓴ-ꓢ ꓡꓰ ꓚꓰꓼ ꓔ ꓟ ꓥ ꓕ ꓑꓳꓸ ꓟꓴ ꓗꓳꓹ ꓓꓵ ꓓꓵ ꓗꓪ ꓙꓳˍ ꓟ ꓮꓽ ꓙꓵꓽ ꓔꓯ ꓞꓳ ꓤꓽ ꓢꓷꓸ ꓠꓲꓹ ꓞꓳ ꓤꓽ ꓢꓯꓼ ꓪꓽ ꓞꓳ ꓤꓽ ꓠꓱ ꓠꓲꓹ ꓗꓪ ꓐꓰ ꓡꓳꓸ ꓙ ꓑꓳꓽ ꓙ ꓗꓽ ꓕꓸ ꓙ ꓢꓲ ꓟꓲ ꓠꓯ ꓕꓱ ꓟ ꓔꓯ ꓮꓽ ꓘꓶꓸ ꓗꓹ ꓛꓲ ꓠ ꓙꓳ ꓢ ꓔꓬꓹ ꓢ ꓠˍ ꓟ ꓐꓱ ꓶ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓒꓳꓹ ꓡꓶꓸ ꓔ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓐꓭ= ꓖꓳ ꓟ ꓡꓰ ꓟꓽ ꓞꓲ ꓚꓰꓼ ꓢꓴ ꓢꓲꓺ ꓒꓽ ꓠꓬ ꓟꓲ ꓠꓯ ꓕꓱ ꓟ ꓔꓯ ꓟꓲ ꓠꓯ ꓞꓳ ꓤꓽ ꓐꓱ ꓶ ꓚꓰꓼ ꓔ ꓟ ꓥ ꓢꓲ ꓕꓱ ꓟ ꓔꓯ ꓙꓳ ꓢ ꓔꓬꓹ ꓢ ꓟ ꓒꓬꓱꓼ ꓡ ꓠˍ ꓟ ꓐꓱ ꓶ ꓮ ꓕꓯ ꓥˍ ꓟꓲ ꓡꓳꓸ ꓙ ꓑꓳꓽ ꓙ ꓗꓽ ꓕꓸ ꓙ ꓖꓶ ꓢꓲ ꓟꓬꓽ ꓠꓬꓲ ꓙꓲ ꓠ ꓒꓳꓹ ꓡꓶꓸ ꓠˍ ꓟ ꓐꓰ ꓟꓲ ꓠꓯ ꓕꓱ ꓟ ꓔꓯ ꓙꓵꓽ ꓠꓹ ꓟ ꓐꓱ ꓶ ꓙꓵꓽ ꓪꓽ ꓒ ꓐꓲ ꓖꓶ ꓔ ꓡꓳ ꓐꓰ ꓬꓲ ꓚꓰ ꓬꓲ ꓪꓴꓸ ꓕꓳ ꓶ (1 ꓽ 28) ꓗꓪ ꓐꓯ ꓔ ꓡꓳ= 

3ꓸ  ꓞꓳ ꓤꓽ ꓮꓽ ꓟꓬꓹ ꓐꓱ ꓶ ꓓꓵꓽ ꓙꓽ ꓢꓲ ꓚꓵꓸ ꓛꓬꓽ ꓐꓱ ꓶ ꓡꓰ ꓟꓽ ꓥ ꓬꓲ ꓜꓴ ꓬꓲ ꓟꓯꓼ ꓐꓱ ꓶ ꓞꓳ ꓤꓽ ꓮꓽ ꓟꓬꓹ ꓐ ꓪ ꓠ ꓬꓰˍ ꓟ ꓚꓱꓹ ꓥ ꓪ= ꓖꓳ ꓡꓰ ꓬꓰˍ ꓕꓯ ꓠꓬ ꓙꓲ ꓖꓴ ꓙꓳˍ ꓟ ꓛꓳ ꓚꓱꓹ ꓡꓰ ꓡꓲꓽ ꓒꓰꓽ ꓗ ꓫꓵ ꓛꓳ ꓚꓱꓹ ꓕꓱ ꓡꓲꓳ ꓫꓵꓽ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ=

4ꓸ ꓡꓲꓽ ꓒꓰꓼ ꓐꓯˍ ꓟ ꓠꓬ ꓟꓬꓱꓽ ꓬꓰˍ ꓟ ꓟꓬꓱꓽ ꓮ ꓟꓬ ꓗꓪ ꓛꓲ ꓒꓵꓽˍ ꓟ ꓔꓳꓹ ꓜꓳˍ ꓟ ꓮ ꓟꓬ ꓗꓪ ꓛꓲ ꓒꓵꓽˍ ꓟ ꓦꓺ ꓕꓲꓽ ꓒꓳꓹ ꓔꓯ ꓢꓲ ꓮ ꓟꓬ ꓗꓪ ꓛꓲ ꓒꓵꓽˍ ꓟ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓮ ꓟꓬ ꓗꓪ ꓛꓲ ꓒꓵꓽˍ ꓟ ꓕꓱ ꓟ ꓔꓯ ꓟꓸ ꓖꓶˍ ꓟ ꓕꓱ ꓟ ꓔꓯ ꓐꓳ ꓛꓱ ꓩꓴˍ ꓟ ꓕꓱ ꓟ ꓔꓯ ꓡꓳꓸ ꓙ ꓑꓳꓽ ꓙ ꓗꓽ ꓕꓸ ꓙ ꓖꓶˍ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓕꓱ ꓡꓰ ꓬꓰˍ ꓕꓯ ꓠꓬ ꓛꓲ ꓡˍ ꓟ ꓤꓶ ꓗꓪ ꓟ ꓤꓽ ꓠꓱ ꓤꓼ ꓐꓴ ꓔꓯ ꓟꓸ ꓖꓶˍ ꓟ ꓚꓱꓹ ꓥˍ ꓡꓳ= ꓖꓳ ꓡꓰ ꓬꓰˍ ꓟ ꓗꓪ ꓐꓰ ꓟꓲ ꓠꓯ ꓞꓳ ꓤꓽ ꓮꓽ ꓙꓵꓽ ꓠꓬ ꓪꓴꓽ ꓡ ꓟꓴ ꓡ ꓠꓹ ꓟ ꓐꓱ ꓶ ꓬꓰ ꓙ ꓔ ꓙˍ ꓟ ꓔꓯ ꓡꓲꓽ ꓒꓰꓼ ꓐꓰ ꓕꓱ ꓡꓰ ꓐꓯˍ ꓟ ꓥ ꓐꓭ=                                                                       

Add new comment

4 + 1 =