ꓡꓲꓽ ꓒꓲꓼ ꓐꓯˍ ꓟ ꓟꓸ ꓟꓲ (Dialogue with Culture)

ꓡꓲꓽ ꓒꓲꓼ ꓐꓯˍ ꓟ ꓬꓲ ꓟꓸ ꓟꓲ ꓔꓯ ꓐꓯ ꓥꓳ ꓐꓯ ꓠꓬ ꓞꓳ ꓫꓵꓽ ꓕꓲꓽ ꓫꓵꓽ ꓐꓰ ꓕꓲꓽ ꓫꓵ ꓘꓴꓹ ꓣꓴˍ ꓟ ꓥˍ ꓟꓲ ꓟꓽ ꓪꓽ ꓡꓯꓽ ꓘꓳ ꓐꓶ= ꓖꓳ ꓡꓰ ꓥˍ ꓟꓲ ꓡꓲꓽ ꓒꓲꓼ ꓐꓯꓹ ꓟ ꓔꓯ ꓛꓳꓽ ꓠꓬꓲ ꓠꓬ ꓮꓽ ꓙꓵꓽ ꓔꓯ ꓬꓲ ꓧꓶꓹ ꓚ ꓥꓳ ꓐꓯ ꓠꓬ ꓞꓳ ꓫꓵꓽ ꓕꓲꓽ ꓫꓵꓽ ꓢꓯꓸ ꓔꓬꓹ ꓚꓱꓹ ꓥ ꓐꓶ= ꓡꓲꓽ ꓒꓲꓼ ꓐꓯꓹ ꓟ ꓫꓸ ꓪ ꓘꓶꓽ ꓡ-ꓔꓲꓠ ꓥꓳ ꓗꓪ ꓐꓰ ꓚꓳꓡꓰꓣꓰ꓾ ꓚꓴꓡꓴꓲ꓾ ꓚꓳꓡꓔꓴꓟ꓾ ꓖꓳ ꓟ ꓠꓬ ꓮꓸ ꓫꓵꓽ ꓥꓹ ꓡ ꓐꓯꓹ ꓠꓬ ꓟꓲ ꓠꓯ ꓗꓪ ꓔꓷꓸ ꓜꓽ ꓔꓷ ꓓꓳ ꓢꓲ ꓜꓽ ꓪꓳꓽ ꓡꓳ ꓪꓳꓽ ꓔꓯ ꓫꓹ ꓟ ꓐꓯˍ ꓟ ꓬꓲ ꓟꓸ ꓟꓲ ꓙꓳˍ ꓐꓶ= ꓖꓳ ꓟ ꓪꓴꓸ ꓠꓬꓲ ꓠꓲ ꓡꓲꓽ ꓒꓲꓼ ꓐꓯˍ ꓟ ꓠꓯꓸꓼ ꓗꓪ ꓠꓬ ꓔꓷꓸ ꓫꓵꓽ ꓔꓷ ꓙꓵꓽ ꓢꓷꓸ ꓠꓲꓹ ꓐꓯˍ ꓟ ꓮꓖꓣꓲꓚꓴꓡꓔꓴꓣꓮ ꓢꓲꓹ ꓪꓲ ꓡꓳ ꓪꓲ ꓔꓷˍ ꓟ ꓢꓓ> ꓠꓲꓹ ꓐꓯˍ ꓟ ꓝꓡꓳꓣꓲꓚꓳꓡꓔꓴꓣꓮ ꓤꓼ ꓠꓱ ꓤꓼ ꓐꓴ ꓔꓯ ꓮꓽ ꓙꓲ ꓐꓰ ꓡꓳꓸ ꓙ ꓢꓲ ꓢꓷꓸ ꓠꓲꓹ ꓟꓸ ꓖꓶˍ ꓟ ꓐꓯꓹ ꓟ ꓑꓴꓰꓣꓲꓚꓴꓡꓔꓴꓣꓮ ꓜꓽ ꓪꓳꓽ ꓡꓳ ꓪꓳꓽ ꓪꓳꓽ ꓒꓬꓽ ꓪꓳꓽ ꓟꓲ ꓔꓷ ꓢꓷꓸ ꓠꓲꓹ ꓐꓯˍ ꓟ ꓳꓣꓔꓲꓚꓳꓡꓔꓴꓣꓮ ꓐꓯˍ ꓟ ꓫꓸ ꓪ ꓘꓶꓽ ꓔꓯ ꓡꓳꓸ ꓟꓳˍ ꓡꓳ= ꓟꓲ ꓠꓯ ꓞꓳ ꓤꓽ ꓐꓱ ꓶ ꓡꓲꓽ ꓒꓲꓼ ꓐꓯˍ ꓟ ꓠꓬ ꓞꓳ ꓤꓽ ꓬꓲꓸ ꓠꓲꓹ ꓟ ꓠꓯꓸꓼ ꓗꓪ ꓙꓳˍ ꓟ ꓢꓯꓼ ꓪꓽ꓾ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓔꓳꓹ ꓜꓳ ꓡˍ ꓟ ꓖꓳ ꓟ ꓔꓯ ꓮ ꓤ ꓤ ꓒꓳꓹ ꓡꓶꓸ ꓔ ꓟ꓾ ꓓꓵꓽ ꓙꓽ ꓒꓳꓹ ꓡꓲꓼ ꓡˍ ꓟ ꓕꓱ ꓡꓲꓳ ꓫꓵꓽ ꓗꓷ ꓡ ꓢꓲ ꓠꓬꓲ ꓙꓽ ꓣꓳˍ ꓟ ꓠꓴꓽˍ ꓟ ꓠꓲꓹ ꓟ ꓙꓳ ꓡ ꓢꓲ ꓞꓳ ꓙꓲ ꓞꓳ ꓔꓱꓹ ꓕꓲꓽ ꓣꓳ ꓕꓱ ꓡꓰ ꓒꓬꓱꓼ ꓡ ꓠ ꓗꓪ ꓛꓲ ꓢꓳ ꓣꓴˍ ꓟ ꓐꓯˍ ꓟ ꓬꓲꓸ ꓟꓸ ꓟꓲ ꓙꓳˍ ꓡꓳ= ꓡꓲꓽ ꓒꓲꓼ ꓔꓯ ꓣꓳꓽ ꓟꓲ ꓠꓯ ꓞꓳ ꓤꓽ ꓓꓵꓽ ꓙˍ ꓟ ꓡꓰ ꓐꓰ ꓢꓪ ꓠꓬꓲ ꓠꓬꓜꓽ ꓪꓳꓼ ꓡꓳ ꓪꓳꓽ ꓡꓰ ꓐꓰ ꓕꓲꓽ ꓡꓰꓻ ꓫꓹ ꓟꓶˍ ꓟ ꓞꓳ ꓤꓽ ꓐꓯˍ ꓟ ꓬꓲꓸ ꓟꓸ ꓟꓲ ꓙꓳˍ ꓡꓳ= ꓮ ꓡꓲꓳ ꓐꓯ ꓠꓬ ꓜꓽ ꓪꓳꓽ ꓡꓳ ꓪꓳꓽ ꓡꓰ ꓐꓰ ꓜꓽ ꓪꓳꓽ ꓡꓳ ꓪꓳꓽ ꓠꓬ ꓟꓽ ꓓ ꓙꓲ ꓖꓴ ꓡꓰ ꓟ ꓙꓵꓹ ꓗꓪ ꓫꓹ ꓟ ꓡꓰ ꓐꓰ ꓕꓲꓽ ꓡꓰꓻ ꓞꓳ ꓤꓽ ꓥˍ ꓟꓲ ꓮ ꓤ ꓤ ꓪꓴꓽ ꓡ ꓢꓲ ꓟꓽ ꓓ ꓙꓲ ꓖꓴ ꓡꓰ ꓟ ꓟꓽ ꓓ ꓟ ꓖꓴ ꓡꓰ ꓟ ꓠꓯꓸꓼ ꓗꓪ ꓛꓲˍ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ=

ꓡꓲꓽ ꓒꓲꓼ ꓔꓯ ꓣꓳꓽ ꓟꓲ ꓠꓯ ꓞꓳ ꓤꓽ ꓓꓵꓽˍ ꓙ ꓟ ꓡꓰ ꓐꓰ ꓢꓪ ꓠꓬꓲ ꓠꓬ ꓜꓽ ꓪꓳꓽ ꓡꓳ ꓪꓳꓽ ꓡꓰ ꓐꓰ ꓕꓲꓽ ꓡꓰꓻ ꓫ ꓟꓶˍ ꓟ ꓞꓳ ꓤꓽ ꓐꓯˍ ꓟ ꓬꓲ ꓟꓸ ꓟꓲ ꓙꓳˍ ꓡꓳ= ꓮ ꓡꓲꓳ ꓐꓯ ꓠꓬ ꓜꓽ ꓪꓳꓽ ꓡꓳ ꓪꓳꓽ ꓠꓬ ꓟꓽ ꓓ ꓙꓵ ꓖꓴ ꓡꓰ ꓟ ꓙꓵꓹ ꓗꓪ ꓫꓹ ꓟ ꓡꓰ ꓐꓰ ꓕꓲꓽ ꓡꓰꓻ ꓞꓳ ꓤꓽ ꓥˍ ꓟꓲ ꓮ ꓤ ꓤ ꓪꓴꓽ ꓡ ꓢꓲ ꓟꓽ ꓓ ꓙꓲ ꓖꓴ ꓡꓰ ꓟ ꓟꓽ ꓓ ꓟ ꓖꓴ ꓡꓰ ꓟ ꓠꓯꓸꓼ ꓗꓪ ꓛꓲˍ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥˍ ꓪ= ꓟꓲ ꓠꓯ ꓞꓳ ꓤꓽ ꓟꓬꓽ ꓠꓬꓲ ꓐꓲ ꓜꓲꓼ ꓡꓰ ꓠꓹ ꓟ ꓐꓱ ꓶ ꓢꓷꓸ ꓠꓲꓹ ꓚꓵꓸ ꓛꓬꓽ ꓔꓵꓹ ꓚꓵꓸ ꓛꓬꓽ ꓢꓷꓸ ꓠꓬꓲ ꓔ ꓟ ꓥ ꓕ ꓑꓳꓸ ꓔꓯ ꓢꓳ ꓣꓴ ꓢꓲ ꓟꓬ ꓠꓲ ꓐꓶꓹ ꓠꓬꓲ ꓞꓳ ꓙꓲ ꓞꓳ ꓔꓱ꓾ ꓠꓴˍ ꓟ ꓠꓲꓹ ꓟ ꓙꓽ ꓣꓳˍ ꓟ ꓠꓲꓹ ꓟ ꓙꓳ ꓠ ꓗꓪ ꓛꓲ ꓪꓴꓽ ꓡ ꓟꓴ ꓡˍ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓐꓶ= ꓟꓲ ꓠꓯ ꓞꓳ ꓤꓽ ꓚꓱꓹ ꓔꓯ ꓢꓳ ꓣꓴˍ ꓟ ꓠꓯꓸꓼ ꓗꓪ ꓠꓬ ꓡꓲꓽ ꓒꓲꓼ ꓔꓯ ꓜꓽ ꓪꓳꓽ ꓡꓳ ꓪꓳꓽ ꓫꓸ ꓟ ꓡꓰ ꓐꓰ ꓶꓼ ꓢꓲ ꓫꓸ ꓟ꓾ ꓢꓷꓸ ꓠꓲꓹ ꓖꓶ ꓟ꓾ ꓞꓳ ꓤꓽ ꓔꓯ ꓒꓳꓹ ꓡꓶꓸ ꓔ ꓟ ꓕꓱ ꓡꓰ ꓬꓲ ꓟꓸ ꓟꓲ ꓙꓳˍ ꓟ ꓐꓳ ꓔ ꓟ ꓔꓯ ꓡꓳꓸ ꓟꓳˍ ꓡꓳ=

ꓖꓣꓰꓰꓗ ( ꓦꓲ-ꓡꓲꓹ) ꓥꓳꓽ ꓗꓪ ꓚꓳ ꓡꓲꓽ ꓒꓲꓼ ꓐꓯˍ ꓟ ꓠꓬ ꓞꓳ ꓤꓽ ꓕꓲꓽ ꓣꓳ ꓤꓼ ꓠꓱ ꓗꓪ ꓚꓳꓸ ꓞꓳ ꓡꓱ ꓥˍ ꓠꓬ ꓞꓳ ꓡꓯꓸ ꓒꓬꓱꓼ ꓡ ꓖꓳ ꓗꓪ ꓚꓳꓸ ꓞꓳ ꓪꓴꓽ ꓞꓳ ꓔꓲ ꓒꓬꓱꓼ ꓡ ꓗꓪ ꓛꓲ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓪꓴꓽ ꓡ ꓟꓴ ꓡ ꓢꓲ ꓕꓰꓹ ꓚꓵꓸˍ ꓟ ꓞꓳ ꓪꓴꓽ ꓞꓳ ꓔꓲ ꓠꓯꓸꓼ ꓗꓪ ꓛꓲˍ ꓟ ꓬꓲ ꓟꓸ ꓟꓲ ꓔꓯ ꓐꓯˍ ꓐꓶ= ꓕꓱ ꓕꓲꓽ ꓘꓴꓸ ꓗꓪ ꓕꓱ ꓟ ꓬꓲ ꓟꓸ ꓟꓲ ꓔꓯ ꓛꓳꓽ ꓠꓬꓲ ꓠꓬ ꓞꓳ ꓤꓽ ꓕꓲꓽ ꓣꓳ ꓠꓯꓸꓼ ꓗꓪ ꓙꓳˍ ꓟ ꓙꓽ ꓜꓲꓼ ꓠꓲꓹ꓾ ꓢꓷꓸ ꓠꓲꓹ꓾ ꓠꓲꓹ ꓟ ꓠꓯꓸꓼ ꓗꓪ ꓔꓳꓹ ꓜꓳˍ ꓟ ꓮꓽ ꓙꓵꓽ ꓠꓬ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓒꓳꓹ ꓡꓶꓸ ꓡ ꓢꓲ ꓢꓳ ꓣꓴ ꓦˍ ꓟ ꓥˍ ꓡꓳ ꓐꓰ ꓬꓲ ꓟꓸ ꓟꓲ ꓙꓳˍ ꓡꓳ= ꓖꓳ ꓟ ꓑꓶꓸ ꓓꓴ ꓡꓲꓽ ꓒꓲꓼ ꓐꓯꓹ ꓔꓯ ꓠꓬ ꓣꓳ ꓑ ꓔꓲꓼˍ ꓗꓪ ꓙꓳ ˍ ꓟ ꓣꓳꓽ ꓟꓵꓽ ꓣꓳꓽ ꓡꓳ ꓗꓪ ꓙꓳˍ ꓟ ꓟꓵꓽ ꓘꓳꓼ ꓐꓰ ꓪꓽ ꓡꓯꓽ ꓘꓳ ꓠ ꓫꓬꓹ ꓑꓱ ꓦˍ ꓟ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓮꓽ ꓙꓲ ꓐꓲ ꓢꓳ ꓣꓴ ꓦˍ ꓟ꓾ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓫꓱꓹ ꓟꓬꓽ ꓠꓬꓲ ꓙꓲ ꓠ ꓒꓳꓹ ꓡꓶꓸ ꓦˍ ꓟ ꓕꓱ ꓡꓲꓳ ꓫꓵꓽ ꓬꓲ ꓟꓸ ꓟꓲ ꓙꓳˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓡꓲꓽ ꓒꓲꓼ ꓐꓯꓹ ꓕꓯꓽ ꓠꓬ ꓙꓵꓽ ꓗ ꓛꓳ ꓚꓱꓹ ꓡꓰ ꓡꓳꓸ ꓙ ꓑꓳꓽ ꓙ ꓦˍ ꓟ ꓙꓵꓽ ꓗ ꓛꓳ ꓚꓱꓹ ꓡꓰ ꓙ ꓖꓴ ꓧꓳꓽ ꓟꓳꓸ ꓦˍ ꓟ ꓢꓳ ꓣꓴ ꓦˍ ꓟ ꓐꓯˍ ꓟ ꓬꓲ ꓟꓸ ꓟꓲ ꓙꓳˍ ꓡꓳ=