ꓡꓲꓽ ꓒꓲꓼ ꓐꓰ ꓫꓸ ꓕꓱˍ ꓟ ꓮ ꓟꓬ ꓬꓳꓸ ꓚꓵˍ ꓟ (Dialogue with Culture)

 ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓘꓴ ꓜꓲꓼ ꓞꓳ ꓕꓲꓽ ꓟ ꓡꓰ ꓕꓲꓽ ꓟ ꓢꓯꓼ ꓕꓵꓼ ꓡˍ ꓟ ꓚꓱꓹ ꓠꓬ ꓓꓲꓮꓡꓳꓖꓴꓰ ꓐꓯꓹ ꓟ ꓫꓸ ꓕꓱꓹ ꓟ ꓚꓱꓹ ꓥ ꓡꓳ= ꓕꓱ ꓕꓲꓽ ꓘꓴꓸ ꓗꓪ ꓫꓸ ꓕꓱꓹ ꓟ ꓐꓯˍ ꓟ ꓕꓱ ꓕꓲꓽ ꓘꓶꓽ ꓠꓬ ꓟꓶꓽ ꓠꓶꓹ ꓘꓶꓽ ꓗꓪ ꓐꓰ ꓡꓰ ꓫꓸ ꓕꓱˍ ꓟ ꓟꓽ ꓥ꓾ ꓬꓰˍ ꓟ ꓟꓬꓱꓽ ꓗꓪ ꓐꓰ ꓫꓸ ꓕꓱˍ ꓟ꓾ ꓢꓳ ꓬꓰˍ ꓟ ꓙꓲˍ ꓟ ꓔꓯ ꓣꓴ ꓢꓲ ꓬꓰˍ ꓟ ꓕꓱ ꓡꓰꓳ ꓫꓵꓽ ꓮꓽ ꓙꓵꓽ ꓔꓯ ꓐꓯ ꓠꓲꓹ ꓫꓵꓹ ꓟ ꓥ ꓪ= ꓖꓳ ꓕꓯꓽ ꓓꓲꓮꓡꓳꓖꓴꓰ ꓐꓯˍ ꓟ ꓫꓸ ꓕꓱˍ ꓟ ꓚꓱꓹ ꓔꓯ ꓟꓳꓸ ꓟꓽ ꓓ ꓢꓽ ꓟ ꓕꓱ ꓡꓰ ꓐꓯ ꓔ ꓟ ꓙꓳ ꓡꓳ=

1ꓸ ꓓꓲꓮꓡꓳꓖꓴꓰ ꓪꓲꓔꓧ ꓔꓧꓰ ꓑꓳꓳꓣ ꓐꓯˍ ꓟ ꓫꓸ ꓢꓴ ꓟꓶꓽ ꓢꓴ ꓐꓰ ꓫꓸ ꓕꓱˍ ꓟ ꓐꓯꓹ ꓟ ꓥ ꓡꓳ= ꓢꓲꓺ ꓒꓽ ꓬꓰ-ꓢꓴ ꓠꓬ ꓫꓸ ꓢꓴ ꓟꓶꓽ ꓢꓴ ꓔꓯ ꓮꓽ ꓘꓶꓸ ꓫꓱꓸ ꓤ ꓡꓳ= ꓮ ꓣꓳ ꓡꓳꓸ ꓢꓴ ꓟꓽ ꓙꓳˍ ꓟ ꓮꓸ ꓣꓳ ꓡꓰ ꓐꓰ ꓗꓹ ꓡꓳ ꓐꓰ ꓢꓲꓺ ꓒꓽ ꓬꓰ-ꓢꓴ ꓡꓰ ꓕꓱ ꓡꓰ ꓐꓯ ꓔ ꓟ ꓙꓳˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲ ꓫꓸ ꓢꓴ ꓟꓶꓽ ꓢꓴ ꓠꓬ ꓶꓽ ꓙꓳ ꓫꓱꓸ ꓙꓳˍ ꓡꓳ ꓐꓰ ꓕꓱ ꓡꓰ ꓐꓯ ꓔ ꓟ ꓙꓳˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓲ ꓢꓲꓺ ꓒꓽ ꓬꓰ-ꓢꓴ ꓠꓬ ꓫꓸ ꓢꓴ ꓟꓶ ꓢꓴ ꓔꓯ ꓮ ꓟꓬ ꓗꓪ ꓛꓲ ꓢꓪꓼ ꓟ꓾ ꓮ ꓟꓬ ꓗꓪ ꓛꓲ ꓒꓵꓽ ꓗꓹ ꓬꓰˍ ꓟ꓾ ꓪꓴꓸ ꓓꓵ ꓛꓹ ꓔ ꓟ ꓚꓱꓹ ꓔꓯ ꓟꓳꓸ ꓣꓳꓽ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓥˍ ꓟꓲ ꓢꓲꓺ ꓒꓽ ꓬꓰ-ꓢꓴ ꓶꓽ ꓓꓳꓽ ꓫꓱꓸ ꓓꓳ ꓕꓯ ꓐꓯ ꓟꓸ ꓖꓶꓹ ꓟ ꓚꓱꓹ ꓪꓴꓸ ꓠꓬꓲ ꓠꓲ ꓫꓸ ꓢꓴ ꓟꓶꓽ ꓢꓴ ꓕꓯ ꓪꓴꓸ ꓓꓵ ꓛꓹ ꓢꓲ ꓟꓬꓱꓽ ꓬꓰ ꓠ ꓡꓳꓼ ꓥ= ꓕꓱ ꓟ ꓠꓬ ꓫꓸ ꓙꓵ ꓟꓶꓽ ꓙꓵ ꓓꓴ ꓢꓳ ꓡꓰ ꓥꓲꓸ ꓔ ꓟ ꓗꓪ ꓐꓰ ꓢꓳ ꓡꓰ ꓞꓳꓹ ꓔ ꓟ ꓗꓪ ꓐꓰ ꓡꓲꓹ ꓙꓲ ꓠꓹ ꓟ ꓐꓱ ꓶꓽ ꓢꓯꓼ ꓕꓵꓼ ꓟ ꓚꓱꓹ ꓥˍ ꓡꓳ= ꓕꓱ ꓟ ꓠꓬ ꓶꓽ ꓓꓳꓽ ꓫꓱꓸ ꓓꓳꓽ ꓬꓰˍ ꓟ ꓟꓬꓱꓽ ꓥˍ ꓡꓳ=    

2ꓸ ꓠꓬꓲꓽ ꓫꓵꓽ ꓕꓲꓽ ꓫꓵꓽ ꓓꓲꓮꓡꓳꓖꓴꓰ ꓪꓲꓔꓧ ꓳꓔꓧꓰꓣ ꓣꓰꓡꓲꓖꓲꓳꓠꓢ ꓐꓯꓹ ꓟ ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓫꓸ ꓕꓱꓹ ꓟ ꓐꓯꓹ ꓟ ꓥˍ ꓡꓳ= ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓫꓸ ꓕꓱꓹ ꓟ ꓐꓯˍ ꓟ ꓠꓬ ꓟꓬꓽ ꓠꓬꓲ ꓐꓶꓹ ꓠꓬꓲ ꓡꓳꓹ ꓬꓰ ꓟ ꓕꓲꓽ ꓙꓵꓹ ꓗꓪ ꓙꓲ-ꓢꓴ ꓢꓲ ꓤꓼ ꓟꓽ ꓒꓬꓱꓼ ꓡꓹ ꓢꓰꓼ ꓧꓶꓸ ꓕꓯ ꓗꓪ ꓙꓵ ꓡꓳꓹ ꓬꓰ ꓟ ꓠꓯꓸꓼ ꓗꓪ ꓟ ꓙꓵꓹ ꓟ ꓚꓱꓹ ꓔꓯ ꓣꓴ ꓢꓲ ꓣꓳ ꓙꓲ-ꓢꓴ ꓢꓲꓺ ꓤꓼ ꓘꓴ ꓗꓪ ꓕꓱ ꓟ ꓚꓱꓹ ꓔꓯ ꓐꓯˍ ꓟ ꓥ ꓪ= ꓮ ꓡꓰꓳ ꓐꓯꓹ ꓠꓬ ꓖꓳ ꓙꓵ ꓠꓲꓹ ꓠꓯꓸꓼ ꓗꓪ ꓣꓳꓽ ꓚꓽ ꓡꓰꓹ ꓟ ꓣꓳꓽ ꓠꓲꓹ ꓟ ꓠꓯꓸꓼ ꓗꓪ ꓟꓯ ꓔ ꓟ ꓮꓽ ꓟꓬꓹ ꓙꓳ ꓡꓳ= ꓮ ꓡꓰꓳ ꓐꓯ ꓠꓬ ꓞꓳ ꓫꓵꓽ ꓕꓲꓽ ꓫꓵꓽ ꓓꓵꓽ ꓙꓹ ꓟ ꓟꓽ ꓪꓽ ꓡꓯꓽ ꓘꓳ= ꓮꓽ ꓫꓱꓹ ꓡꓯꓽ ꓘꓳ= ꓖꓳ ꓟ ꓡꓰ ꓐꓰ ꓕꓲꓽ ꓡꓰ ꓙꓵ ꓠꓲꓹ ꓥˍ ꓟꓲ ꓖꓳ ꓟ ꓡꓰ ꓐꓰ ꓥ ꓐꓶ=

3ꓸ ꓓꓲꓮꓡꓳꓖꓴꓰ ꓪꓲꓔꓧ ꓚꓴꓡꓔꓴꓣꓰ ꓐꓯꓹ ꓟ ꓥˍ ꓡꓳ= ꓡꓲꓽ ꓒꓲꓼ ꓐꓰ ꓫꓸ ꓕꓱꓹ ꓟ ꓐꓯˍ ꓟ ꓥ ꓪ= ꓡꓲꓽ ꓒꓲꓼ ꓐꓰ ꓫꓸ ꓕꓱ ꓥ ꓐꓯꓹ ꓕꓯ ꓠꓬ ꓣꓳꓽ ꓢꓲꓺ ꓒꓽ ꓬꓰ-ꓢꓴ ꓔꓯ ꓙꓵ ꓔꓬꓹ ꓢꓴ ꓙꓵ ꓠꓲꓹ ꓠꓯꓸꓼ ꓗꓪ ꓡꓲꓽ ꓒꓲꓼ ꓪꓴ ꓡꓰ ꓠꓹ ꓟ ꓐꓱ ꓶꓽ ꓐꓯ ꓠꓲꓹ ꓫꓵˍ ꓟ ꓥ ꓪ= ꓪꓽ ꓘꓴꓹ ꓟ ꓙꓵꓹ ꓗꓪ ꓡꓲꓽ ꓒꓲꓼ ꓚꓱꓹ ꓔꓯ ꓣꓱꓽ ꓠꓹ ꓟ ꓙꓵ ꓠꓲꓹ ꓚꓱꓹ ꓗꓪ ꓡꓲꓽ ꓒꓲꓼ ꓚꓱꓹ ꓔꓯ ꓣꓱꓽ ꓠꓹ ꓟ ꓐꓱ ꓶꓽ ꓐꓯ ꓠꓲꓹ ꓫꓵˍ ꓟ ꓥ ꓪ= ꓮ ꓡꓲꓳ ꓐꓯ ꓠꓬ ꓮꓽ ꓠꓵ ꓕꓯꓽ ꓝꓲ ꓓꓴ ꓐꓴ ꓕꓲ ꓞꓲꓼ ꓗꓪ ꓚꓳ ꓓꓽ ꓪꓴꓸ ꓔꓴ ꓡ ꓢꓲ ꓮꓽ ꓟꓬ ꓘꓳꓼ ꓗꓪ ꓛꓲ ꓡꓲꓽ ꓒꓲꓼ ꓚꓱꓹ ꓪꓴꓸ ꓓꓵ ꓛꓹ ꓢꓲ ꓣꓱꓽ ꓡꓹ ꓟ ꓙꓳ ꓐꓶ= ꓡꓲꓽ ꓒꓲꓼ ꓔꓯ ꓪꓴꓸ ꓓꓵ ꓟꓽ ꓛꓹ ꓔ ꓕꓯ ꓠꓬ ꓕꓲ ꓐꓱ ꓞꓳ ꓤꓽ ꓐꓴ ꓠꓬ ꓣꓳ ꓔꓯ ꓠꓲꓸ ꓜꓳ ꓡꓹ ꓟ ꓕꓱ ꓡꓰ ꓒꓬꓱꓼ ꓡꓹ ꓐꓶ=