ꓡꓲꓽ ꓒꓲꓼ ꓠꓯꓸꓼ ꓗꓪ ꓙꓵ ꓠꓲꓹ ꓔꓳꓹ ꓜꓳꓹ ꓟ ꓚꓱꓹ (Dialogue with Culture)

ꓞꓳ ꓤꓽ ꓟꓬ ꓠꓬꓲ ꓐꓶꓹ ꓠꓬꓲ ꓙꓵ ꓠꓲꓹ ꓠꓯꓸꓼ ꓗꓪ ꓕꓶ ꓡꓰ ꓝꓲꓹ ꓟ ꓚꓱꓹ ꓔꓯ ꓞꓳ ꓤꓽ ꓕꓲ ꓣꓳ ꓙꓵ ꓠꓲꓹ ꓥˍ ꓡꓳ ꓐꓯ ꓟ ꓔꓯ ꓢꓷ ꓠ ꓗꓹ ꓡꓳ= ꓪꓴ-ꓢ ꓡꓰ ꓡꓳꓸ ꓙ ꓑꓳꓽ ꓙ ꓔ ꓙꓹ ꓟ ꓪꓴ-ꓢ ꓡꓰ ꓖꓶ ꓡꓹ ꓟ ꓚꓱꓹ ꓖꓳ ꓟ ꓡꓰ ꓟꓽ ꓞꓲ ꓪꓴ-ꓢ ꓬꓲ ꓟꓹ ꓟ ꓟ-ꓡꓲ ꓐꓰ ꓢꓲ ꓫꓬ ꓢꓴ ꓐꓴ ꓮ ꓙꓵꓽ ꓡꓰ ꓕꓱ ꓟ ꓠꓬ ꓝꓸ ꓡꓯꓽ ꓘꓳꓹ ꓟ ꓙꓳˍ ꓡꓳ ꓐꓯꓹ ꓟ ꓔꓯ ꓢꓷꓸ ꓠꓬꓲ ꓔ ꓥ= ꓕꓱ ꓡꓰ ꓙꓵ ꓠꓲꓹ ꓠꓯꓸꓼ ꓗꓪ ꓦ ꓠꓯꓸꓼ ꓗꓪ ꓙꓵ ꓠꓲꓹ ꓕꓶ ꓡꓰ ꓝꓲꓸ ꓟ ꓠꓬ ꓪꓴ-ꓢ ꓶꓽ ꓓꓳꓽ ꓫꓱꓸꓓꓳꓽ ꓔꓯ ꓚ_ ꓟ ꓠꓯꓸꓼ ꓗꓪ  ꓟꓬ ꓠꓬꓲ ꓐꓶꓹ ꓠꓬꓲ ꓙꓲ ꓖꓴ ꓙꓳ ꓡꓰ ꓝꓲꓹ ꓟ ꓒꓬꓱꓼ ꓡ ꓝꓲꓹ ꓡꓳ= 

ꓖꓳ ꓡꓱ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵˍ ꓟ ꓘꓴ ꓜꓲꓼ ꓞꓳ ꓑꓮꓲꓽ ꓔꓯ ꓬꓲ ꓠ ꓔ ꓟ ꓡꓰ ꓐꓰ ꓕꓲ ꓡꓰ ꓙꓽ ꓣꓳꓹ ꓟ ꓠꓲꓹ ꓟ ꓠꓴꓹ ꓟ ꓠꓲꓹ ꓟ ꓐꓱ ꓶ ꓙ ꓚꓱꓹ ꓧꓳꓽ ꓟꓳ ꓖꓶˍ ꓟ ꓠꓬ ꓞꓳ ꓤꓽ ꓮ ꓙꓵꓺ ꓢꓴ ꓐꓱ ꓶ ꓙꓲ ꓖꓴ ꓙꓳˍ ꓟ ꓥ ꓪ= ꓙꓵ ꓠꓲꓹ ꓔꓯ ꓖꓳꓼ ꓧꓶꓸ ꓡꓰ ꓓꓴ ꓟꓽ ꓙꓳ ꓔꓱ ꓔꓱ ꓦꓲꓼ ꓐ ꓡꓹ ꓟ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓙꓵˍ ꓟ ꓚꓱꓹ ꓠꓯꓸꓼ ꓗꓪ ꓦꓲꓼ ꓠ ꓗꓹ ꓡꓳ= ꓖꓳ ꓟ ꓠꓬꓲ ꓔꓱꓹ ꓚꓵꓹ ꓟ ꓟꓸ ꓒꓽ ꓐꓴ ꓙꓲ-ꓢꓴ ꓢꓲ ꓤꓼ ꓐꓴ ꓠꓯꓸꓼ ꓗꓪ ꓛꓲ ꓡꓰ ꓠꓹ ꓟ ꓔꓯ ꓟꓬ ꓡ ꓠꓹ ꓟ ꓢꓯꓼ ꓕꓵꓼ ꓠ ꓡꓳꓼ ꓥ= 

ꓖꓳ ꓟ ꓡꓰ ꓐꓰ ꓕꓲ ꓡꓰ ꓢꓲ ꓫꓬꓹ ꓟ ꓔꓶꓸ ꓗꓪ ꓪꓽ ꓘꓴ ꓢꓯꓼ ꓕꓵꓼˍ ꓟ ꓕꓱ ꓡꓰꓳ ꓫꓵꓽ ꓙꓳ ꓠꓹ ꓡꓳꓹ ꓥ= ꓪꓽ ꓘꓴˍ ꓟ ꓜ ꓚꓵꓸ ꓚꓵꓸ ꓔ ꓟ ꓕꓱ ꓡꓰꓳ ꓫꓵꓽ ꓪꓽ ꓘꓴ ꓙꓵ ꓕꓲ ꓫꓴꓽ ꓡꓰ ꓕꓲꓽ ꓫꓵꓽ ꓔꓯ ꓬꓰ ꓠ ꓡꓳꓼ ꓥ= ꓖꓳ ꓟ ꓡꓰ ꓟꓽ ꓞꓲ ꓟꓴ ꓕꓲꓸ ꓢꓳ ꓦꓲ ꓗꓪ ꓟ ꓟꓸ ꓒꓽ ꓐꓴ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓮ ꓗꓶꓸ ꓟꓽ ꓥ ꓡꓰ ꓕꓲ ꓘꓳ ꓕꓲ ꓧꓪꓹ ꓛꓲ ꓜꓲ ꓡꓯꓽ ꓘꓳꓹ ꓟ ꓖꓪ ꓙꓱ ꓡꓯꓽ ꓘꓳˍ ꓟ ꓬꓰ ꓠ ꓡꓳꓹ ꓥ=