ꓡꓲ ꓒꓰꓼ ꓐꓰ ꓫ. ꓕꓱ_ ꓟ ꓐꓰ ꓚꓬꓴ ꓙ_ ꓟ

ꓢꓲ-ꓒ ꓬꓰ-ꓢꓴ ꓚꓬꓴ ꓙ ꓟ ꓚꓱꓹ ꓐꓰ ꓟꓲ ꓠꓯ ꓞꓳ ꓤ ꓡꓲꓽ ꓒꓰꓼ ꓚꓱꓹ ꓠꓬ ꓫꓱꓹ ꓡꓯꓼ ꓘꓳ ꓟ ꓙꓳ_ ꓡꓳ= ꓐꓹ ꓐ ꓪꓴ-ꓢ ꓠꓬ ꓬꓲꓸ ꓤ ꓔꓲ ꓬꓰ- ꓢꓴ ꓟꓲ ꓠꓯ ꓞꓳ ꓤ ꓒꓬꓱꓼ ꓡ ꓟ ꓠꓯꓼ ꓗꓪ ꓐꓹ ꓐ ꓪꓴ- ꓢ ꓥ ꓟꓲ ꓐ_ ꓟ ꓔꓯ ꓟꓳꓸ ꓖꓶ ꓟ ꓙꓳ_ ꓡꓳ= ꓤ ꓔꓲꓸ ꓢꓲ-ꓒ ꓬꓰ- ꓢꓴ ꓥ ꓟꓲ ꓟꓲ ꓠꓯ ꓞꓳ ꓤ ꓒꓬꓱꓼ ꓡ ꓕꓯ ꓬꓲ-ꓢꓷ-ꓡꓲ ꓞꓳ ꓫꓵꓽ ꓒꓬꓱꓼ ꓡ ꓢꓲ꓾ ꓬꓲ-ꓢꓷ-ꓡꓲ ꓐꓴ ꓡꓲꓽ ꓒꓰꓼ ꓡꓰ ꓐꓰ ꓕꓲ ꓡꓲꓹ ꓐꓰ ꓢꓯꓸ ꓔꓬ ꓡꓳꓹ ꓬꓰ ꓟ ꓥꓳ= ꓟꓸ ꓟꓲꓽ ꓚꓺ ꓥ ꓟꓲ ꓬꓲ-ꓢꓷ-ꓡꓲ ꓐꓴ ꓡꓲꓽ ꓒꓰꓼ ꓔꓯ ꓪꓴꓸ ꓓꓵ ꓚꓬꓹ ꓢꓲ ꓚꓺ ꓡꓳꓹ ꓬꓰ ꓟ ꓥ ꓡꓳ= ꓟꓽ ꓐꓲ ꓜꓲꓼ_ ꓟ꓾ ꓫꓬꓹ ꓐꓔ ꓟ꓾ ꓙꓵꓻ ꓠꓲꓹ ꓚꓱꓹ ꓔꓯ ꓣꓴ ꓗꓷ ꓢꓲ꓾ ꓟꓬ ꓠꓬꓲ ꓐꓲ ꓜꓲꓼ_ ꓟ ꓛꓳ ꓚꓱꓹ ꓔꓯ ꓟꓸ ꓖꓶ ꓢꓲ ꓠꓬꓲ ꓛꓳ ꓚꓱꓹ ꓮ ꓙꓵ ꓔꓯ ꓐꓲ ꓜꓲꓼ ꓡꓰ ꓝꓲ_ ꓟ ꓥ ꓡꓳ= ꓖꓳ ꓟ ꓗꓪ ꓐꓰ ꓟꓲ ꓠꓯ ꓞꓳ ꓤ ꓮ ꓙꓵ ꓔꓯ ꓚꓬꓴ ꓙ ꓠꓹ ꓟ ꓐꓱ ꓶ ꓬꓲ ꓠꓬ ꓚꓬꓴ ꓙ ꓟ ꓶꓼ ꓓꓳꓽ ꓫꓱꓹ ꓓꓳꓽ ꓔꓯ ꓚꓺ ꓟꓸ ꓖꓶ ꓢꓲ ꓠꓬꓲ ꓬꓲꓸ ꓠꓯꓼ ꓗꓪ ꓛꓳ ꓢꓴ ꓐꓴ ꓮ ꓙꓵ ꓔꓯ ꓟꓲ ꓠꓯ ꓡꓳꓹ ꓬꓰ ꓗꓪ ꓛꓲ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓚꓺ ꓟꓸ ꓖꓶ ꓠꓹ ꓟ ꓐꓱ ꓶ ꓬꓲ ꓡꓰ ꓝꓲ ꓩꓴ ꓗꓷ ꓟ ꓥ ꓡꓳ=

ꓡꓲꓽ ꓒꓰꓼ ꓐꓰ ꓫꓸ ꓕꓱ_ ꓐꓯ ꓠꓬ ꓕꓱ ꓟ ꓔꓯ Dialogue with Culture ꓐꓯ_ ꓟ ꓥꓳ= Inculturation ꓐꓯ ꓟ ꓥꓳ=ꓬꓲꓸ ꓟꓸ ꓟꓲꓽ ꓠꓬ ꓡꓲꓽ ꓒꓰꓼ ꓐꓰ ꓫꓸ ꓕꓱ_ ꓟ ꓡꓰ ꓟꓽ ꓥ꓾ ꓡꓲꓽ ꓒꓰꓼ ꓠꓯꓼ ꓗꓪ ꓐꓰ ꓣꓳ ꓣꓱꓽ ꓠ ꓔ ꓟ ꓙꓲ_ ꓟ ꓚꓱꓹ ꓔꓯ ꓣꓴ ꓢꓲ꓾ ꓟꓽ ꓙꓲ_ ꓟ ꓔꓯ ꓫꓬꓹ ꓐꓱ ꓢꓲ ꓡꓲꓽ ꓒꓰꓼ ꓠꓯꓼ ꓗꓪ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓔꓯ ꓚꓺ ꓟꓸ ꓖꓶ ꓠꓹ ꓟ ꓐꓱ ꓶ ꓐꓯ_ ꓟ ꓥ ꓡꓳ= ꓢꓲ-ꓒ ꓬꓰ-ꓢꓴ ꓠꓬ ꓟꓲ ꓯ ꓞꓳ ꓤ ꓒꓬꓱꓼ ꓡ ꓕꓯ ꓬꓲ-ꓢꓷ-ꓡꓲ ꓡ ꓞꓳ ꓒꓬꓱꓼ ꓡ ꓟ ꓥꓳ= ꓬꓲ-ꓢꓷ-ꓡꓲ ꓡ ꓞꓳ ꓒꓬꓱꓼ ꓡ ꓢꓲ ꓬꓲ-ꓢꓷ-ꓡꓲ ꓡꓲꓽ ꓒꓰꓼ ꓔꓯ ꓛꓳ_ ꓟ ꓥ ꓡꓳ= ꓕꓱ ꓗꓪ ꓐꓰ ꓐꓯ ꓠꓲꓹ ꓫꓵ_ ꓟ ꓠꓬ ꓟꓲ ꓠꓯ ꓞꓳ ꓤ ꓡꓲꓽ ꓒꓰꓼ ꓔꓯ ꓛꓳ ꓡ_ ꓟ ꓥ ꓡꓳ= ꓪꓴ-ꓢ ꓠꓬ ꓡꓲꓽ ꓒꓰꓼ ꓡꓲ ꓐꓰ ꓕꓲ ꓡꓲꓹ ꓬꓰ ꓡ_ ꓟ ꓥ ꓢꓲ꓾ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓠꓬ ꓡꓲꓽ ꓒꓰꓼ ꓡꓲ ꓐꓰ ꓕꓲ ꓡꓲꓹ ꓒꓳꓹ ꓡꓶꓸ ꓠꓹ ꓟ ꓥ ꓡꓳ꓾ ꓐꓰ ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓗꓪ ꓕꓱ ꓡꓱ ꓟꓸ ꓖꓶ ꓡ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓡꓲꓽ ꓒꓰꓼ ꓘꓴꓽ ꓗꓪ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓢꓯꓸ ꓔꓬ ꓠ ꓗꓹ ꓡꓳ= ꓢꓲ-ꓒ ꓬꓰ-ꓢꓴ ꓙꓵꓺ ꓠꓲꓹ ꓪꓴꓸ ꓠꓬꓲ ꓡꓲꓽ ꓒꓰꓼ ꓮ ꓙꓵ ꓔꓯ ꓒꓳꓹ ꓡꓶꓸ ꓠꓹ ꓟ ꓟꓽ ꓥ=ꓪꓴ-ꓢ ꓶꓼ ꓓꓳ ꓫꓱꓹ ꓓꓳꓽ ꓢꓲ ꓠꓬꓲ ꓡꓲꓽ ꓒꓰꓼ ꓘꓴꓽ ꓗꓪ ꓓꓵꓽ ꓡ ꓢꓲ ꓢꓯꓸ ꓔꓬ ꓠꓹ ꓟ ꓥ ꓡꓳ ꓐꓯ_ ꓟ ꓔꓯ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓡꓰ ꓐꓯ_ ꓟ ꓥ ꓡꓳ=

ꓮ ꓫꓵ ꓑꓶ ꓓꓴ ꓐꓯ ꓠꓬ ꓢꓲ-ꓒ ꓬꓰ-ꓢꓴ ꓥ ꓟꓲ ꓬꓲ-ꓢꓷ-ꓡꓲ ꓡ ꓞꓳ ꓒꓬꓱꓼ ꓡ꓾ ꓬꓲ-ꓢꓷ-ꓡꓲ ꓡꓲꓽ ꓒꓰꓼ ꓔꓯ ꓛꓳ꓾ ꓬꓲ-ꓢꓷ-ꓡꓲ ꓐꓴ ꓦ ꓡꓱ_ ꓟ ꓬꓴ-ꓓ ꓙꓵꓻ ꓠꓲꓹ ꓔꓯ ꓙꓵꓻ ꓡꓳꓹ ꓬꓰ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓠꓬꓲꓸ ꓠꓬꓲ ꓣꓳ ꓙꓵꓻ ꓔꓬ ꓟ Christian ꓙꓵꓻ ꓠꓲꓹ ꓐꓯ_ ꓟ ꓙꓲ-ꓢꓴ ꓢꓲ ꓤ ꓐꓴ ꓙꓵꓻ ꓠꓲꓹ ꓔꓯ ꓛꓳ ꓡꓳꓹ ꓬꓰ ꓟ ꓟꓽ ꓥ꓾ꓬꓲ ꓠꓬ ꓬꓴ-ꓷ ꓙꓵꓻ ꓠꓲꓹ ꓔꓯ ꓛꓳ ꓡꓳꓹ ꓬꓰ ꓢꓴ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓠꓬ ꓕꓲ ꓟꓵꓽ ꓡꓲ ꓕꓲ ꓟꓵꓽ ꓗꓪ ꓟ ꓡꓲꓽ ꓒꓰꓼ ꓔꓯ ꓒꓵꓽ ꓠ ꓗꓹ ꓡꓳ=ꓢꓳꓻ ꓣꓴ ꓠ ꓗꓹ ꓡꓳ= ꓖꓳ ꓗꓪ ꓐꓰ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓠꓬ ꓟꓬ ꓠꓬꓲ ꓢꓯꓸ ꓠ ꓢꓯꓼ ꓕꓵꓼ ꓠ ꓔ ꓡꓳ= ꓮ ꓡꓲꓳ ꓐꓯ ꓠꓬ ꓡꓲꓽ ꓒꓰꓼ ꓗꓪ ꓐꓰ ꓫꓸ ꓕꓱ ꓡ ꓟ ꓠꓬ ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓕꓲ ꓧꓪꓹ ꓥ ꓟꓲ ꓟꓽ ꓓꓵꓽ ꓙ ꓠꓬꓲ_ ꓟ ꓙ ꓜꓲꓼ ꓠꓲꓹ ꓢꓷꓸ ꓠꓲꓹ ꓗꓪ ꓐꓰ ꓪꓴ-ꓢ ꓶꓽ ꓓꓳꓽ ꓫꓱꓹ ꓓꓳꓽ ꓔꓯ ꓚꓺ ꓐ ꓡ ꓟ ꓬꓲꓸ ꓟꓸ ꓟꓲꓽ ꓐꓶ ꓐ ꓡ_ ꓟ ꓙꓳ_ ꓡꓳ=ꓖꓳ ꓡꓲ ꓠꓬꓲ ꓞꓳ ꓫꓵ ꓕꓲ ꓫꓵ ꓡꓲ ꓕꓲ ꓫꓵ ꓠꓯꓼ ꓗꓪ ꓬꓲ ꓟꓸ ꓟꓲ ꓮ ꓘꓶꓸ ꓠꓯꓸ ꓟ ꓡꓲꓽ ꓒꓰꓼ ꓗꓪ ꓐꓰ ꓓꓳꓺ ꓡ_ ꓟ ꓪꓴ-ꓢ ꓶꓼ ꓓꓳꓽ ꓫꓱꓹ ꓓꓳꓽ ꓙꓳ_ ꓡꓳ ꓐꓰ ꓠꓬꓲꓸ ꓠꓬꓲ ꓘꓴ ꓜꓲꓼ ꓞꓳ ꓠꓬ ꓕꓱ ꓡꓱ ꓐꓯ ꓔꓬ ꓟ ꓥ ꓡꓳ=