ꓡꓳꓸ ꓟꓳˍ ꓟ ꓟꓽ ꓪꓽ ꓡꓯꓽ ꓘꓳ꓾ ꓙꓵꓻ ꓠꓲꓹ ꓟꓲꓽ ꓟꓽ ꓫꓱꓸ ꓡꓯꓽ ꓘꓳ꓾

ꓠꓱꓸ ꓐꓯꓼ ꓙꓵꓻ ꓠꓲꓹ ꓐꓰ ꓫꓸ ꓕꓱˍ ꓟ ꓮ ꓫꓵꓸ ꓪꓴꓸ ꓠꓬꓲ ꓣꓱꓽ ꓬꓯꓼ ꓥꓰ? ꓐꓯˍ ꓟ ꓔꓯ ꓣꓳꓽ ꓡꓳꓸ ꓠꓬꓲˍ ꓠꓬ ꓾ ꓟꓲ ꓠꓯ ꓗꓪ ꓙꓵꓻ ꓠꓲꓹ ꓕꓲꓽ ꓟ ꓡꓰ ꓕꓲꓽ ꓟ ꓘꓳꓹ ꓣꓴˍ ꓟ꓾ ꓪˍ ꓟ ꓾ꓢꓷꓸ ꓠ ꓢꓳˍ ꓟ ꓟꓽ ꓪꓽ ꓡꓯꓽ ꓘꓳ꓾ ꓟꓽ ꓫꓱꓸ ꓡꓯ ꓘꓳ꓾ ꓙꓵꓻ ꓔꓬꓹ ꓟ ꓙꓵꓻ ꓠꓲꓹ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓸ ꓡꓯꓽ ꓘꓳ ꓟ ꓑꓶꓸ ꓓꓴ ꓥ ꓡꓳ=

ꓔꓯꓺ ꓥꓳꓽ ꓕꓲꓽ ꓟ ꓐꓯˍ ꓠꓬ꓾ꓢꓷꓸ ꓠꓲꓹ ꓙꓳ ꓒ ꓗꓮꓪ-ꓑꓯ-ꓠꓲ-ꓗꓴ-ꓢ ꓡꓰ ꓟꓲ ꓠꓯ ꓕꓱꓻ ꓟ ꓠꓬ ꓟꓵꓽ ꓗꓳꓹ ꓓꓵꓺ ꓓꓵꓺ ꓬꓲꓸ ꓕꓯꓽ ꓢꓲꓺ ꓟ ꓟꓽ ꓥ꓾ ꓐꓰ ꓐꓯ ꓔ ꓡꓳ=ꓝꓮꓲꓸ ꓬꓲꓸ ꓡꓰ ꓾ꓧꓶꓸ ꓕꓯ ꓕꓲꓽ ꓞꓲꓼ ꓗꓪ ꓟ ꓞꓳ ꓤ ꓡꓰ ꓟꓳˍ ꓟ ꓐꓰ ꓟꓽ ꓫꓱꓸ ꓡꓯꓽ ꓘꓳ= ꓧꓶꓸ ꓕꓯ ꓕꓲꓽ ꓞꓲꓼ ꓠꓬ꓾ ꓟꓲ ꓠꓯ ꓕꓱ ꓟ ꓠꓬ꓾ ꓟꓵꓽ ꓗꓳꓹ ꓓꓵꓺ ꓓꓵꓺ ꓟ ꓬꓲꓸ ꓕꓯ ꓢꓲꓺ ꓥ ꓡꓳ꓾ ꓐꓰ ꓬꓲꓸ ꓐꓯ ꓔ ꓡꓳ=

ꓖꓳ ꓟ ꓡꓰ ꓐꓰ ꓕꓲꓽ ꓡꓰꓹꓼ꓾ ꓠꓬꓴ-ꓔꓯ ꓡꓰ ꓐꓯˍ ꓟ ꓠꓬ꓾ ꓟꓲ ꓠꓯ ꓕꓱ ꓟ ꓠꓬ ꓡꓴꓸ ꓡꓴꓸ ꓡꓰꓽ ꓥ ꓢꓲ ꓠꓬꓲ꓾ ꓟꓲ ꓠꓯ ꓞꓳ ꓤ ꓡꓰ ꓟꓳꓻ ꓪ ꓟꓽ ꓓꓽ ꓟ꓾ ꓚꓵꓹ ꓢꓯꓼ ꓙꓳˍ ꓡꓳ=ꓟꓲ ꓠꓯ ꓚꓱꓹ ꓔꓯ ꓟꓳꓸ ꓬꓲꓸ ꓐꓯ ꓔ ꓟ ꓐꓰ ꓧꓶꓸ ꓕꓯꓽ ꓕꓲꓽ ꓞꓲꓼ ꓟ ꓐꓯˍ ꓟ ꓠꓬ ꓟꓽ ꓪꓽ ꓡꓯꓽ ꓘꓳ꓾ ꓟꓽ ꓫꓱꓸ ꓡꓯꓽ ꓘꓳ= ꓖꓳ ꓟ ꓪꓴꓸ ꓠꓬꓲ ꓟꓲ ꓠꓯ ꓚꓱꓹ ꓔꓯ ꓟꓳꓸ ꓞꓳ ꓤ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓟꓳˍ ꓟ꓾ ꓢꓳˍ ꓟ ꓾ ꓙꓵꓻ ꓔꓬꓹ ꓟ ꓠꓬ ꓟꓽ ꓫꓱꓸ ꓡꓯꓽ ꓘꓳ ꓐꓭꓸ= ꓖꓳ ꓟ ꓐꓰ ꓕꓲꓽ ꓡꓰꓹꓼ ꓙꓵꓻ ꓠꓲꓹ ꓥˍ ꓟꓲ꓾ ꓟꓽ ꓪꓽ ꓡꓯꓽ ꓘꓳ=

ꓖꓳ ꓟ ꓪꓴꓸ ꓠꓬꓲ ꓾ꓣꓳ ꓠꓯꓸꓼ ꓗꓪ ꓙꓵꓻ ꓠꓲꓹ ꓕꓲꓽ ꓟ ꓐꓰ ꓕꓲꓽ ꓟ ꓫꓸ ꓕꓱ ꓡꓯꓽ ꓘꓳ ꓠꓹ ꓟ꓾ ꓢꓷꓸ ꓙ ꓟꓳ ꓙ ꓠꓹ ꓟ ꓣꓳꓸ ꓚꓵˍ ꓐꓭ= ꓔꓯꓺ ꓥꓳꓽ ꓕꓲꓽ ꓟ ꓐꓯˍ ꓠꓬ ꓟꓬ-ꓢꓶꓽ ꓛꓬ ꓓꓴ ꓡꓰ ꓐꓰ ꓥ ꓡꓳ=ꓕꓲꓽ ꓐꓱꓻ ꓔꓯ ꓗꓪꓽ ꓫꓵꓽ ꓗꓷ ꓔ ꓕꓯ ꓕꓲꓽ ꓐꓱꓻ ꓔꓯ ꓠꓬ ꓠꓲꓹ ꓛꓵꓼ ꓗꓷ ꓔ ꓟ ꓡꓰ ꓐꓰ ꓗˍ ꓡꓳ= ꓗꓪꓽ ꓫꓵꓽ ꓟ ꓟꓬ-ꓢꓶꓽ ꓛꓬ ꓓꓴ ꓔꓯ ꓣꓳꓽ ꓛꓬꓹ ꓠꓬ꓾ ꓢꓲꓹ ꓜꓲꓻ ꓡꓳꓺ ꓜꓲꓻ ꓮꓽ ꓙꓵꓽ ꓠꓬ ꓗꓪꓽ ꓫꓵꓽ ꓗꓷ ꓡꓰˍ ꓟ ꓡꓰ ꓐꓰ ꓥ ꓡꓳ=

ꓖꓳ ꓟ ꓡꓰ ꓐꓰ ꓕꓲꓽ ꓡꓰꓹꓼ ꓠꓲꓹ ꓛꓵꓼ ꓟ ꓟꓬ-ꓢꓶꓽ ꓛꓬ ꓓꓴ ꓛꓬ ꓔ ꓕꓯ ꓣꓳꓽ ꓡꓳꓸ ꓟꓳˍ ꓟ ꓮꓽ ꓙꓵꓽ ꓠꓬ ꓠꓲꓹ ꓛꓵꓼ ꓑꓶꓸ ꓡꓰˍ ꓥꓳ=ꓟꓽ ꓪꓽ ꓡꓯꓽ ꓘꓳ ꓟ ꓛꓬ ꓓꓴ ꓛꓬˍ ꓠꓬ ꓟꓳˍ ꓟ ꓟꓲ ꓟꓽ ꓪꓽ ꓡꓯꓽ ꓘꓳ ꓗꓷ ꓡꓰˍ ꓥꓳ꓾ ꓐꓰ ꓐꓯ ꓠꓲꓹ ꓫꓵˍ ꓟ ꓥ ꓡꓳ= ꓖꓳ ꓟ ꓡꓰ ꓐꓰ ꓙꓵꓻ ꓠꓲꓹ ꓕꓲꓽ ꓟ ꓐꓰ ꓕꓲꓽ ꓟ ꓟꓲ ꓟꓽ ꓫꓱꓸ ꓡꓯꓽ ꓘꓳ= ꓪꓴ-ꓢ ꓔꓯ ꓟꓳˍ ꓟ ꓟꓲ ꓟꓽ ꓫꓱꓸ ꓡꓯꓽ ꓘꓳ=

ꓔꓯꓺ ꓥꓳꓽ ꓕꓲꓽ ꓟ ꓐꓯˍ ꓠꓬ꓾ ꓟꓬ-ꓢꓶꓽ ꓟꓽ ꓟꓳ ꓟ ꓞꓳ ꓤ 6 ꓣꓳ ꓠꓬ ꓟ-ꓖꓶꓽ (ꓦ-ꓟ) ꓔꓯ ꓫꓱꓹ ꓟꓶˍ ꓠꓬ꓾ ꓬꓲꓸ ꓪ ꓐꓴ ꓠꓯꓸꓼ ꓗꓪ ꓟ ꓕꓲꓽ ꓣꓳ ꓠꓬ ꓾ ꓛꓲ-ꓒꓯꓹ ꓔꓯ ꓫꓱꓹ ꓟꓶ ꓡꓰ ꓠꓬ꓾“ ꓟ-ꓖꓶꓽ (ꓦ-ꓟ) ꓐꓯˍ ꓟ ꓠꓬ꓾ ꓢꓲꓹ-ꓜꓲꓻ ꓡꓰ ꓐꓰ ꓥ ꓐꓭꓸ”꓾ ꓐꓰ ꓐꓯˍ ꓡꓳ= ꓟ-ꓖꓶꓽ (ꓦ-ꓟ) ꓠꓻ ꓘꓴꓻ ꓔꓯ ꓫꓱꓹ ꓟꓶ ꓢꓴ ꓕꓲꓽ ꓣꓳ ꓠꓬ꓾“ꓟ-ꓖꓶꓽ(ꓦ-ꓟ) ꓟ ꓠꓬ ꓡꓲꓽ ꓩꓴꓻˍ ꓡꓰ ꓐꓰ ꓥ ꓐꓭ”꓾ ꓐꓰ ꓐꓯˍ ꓡꓳ=

ꓟ-ꓖꓶꓽ(ꓦ-ꓟ) ꓠꓸ ꓑꓳꓻ ꓔꓯ ꓫꓱꓹ ꓟꓶ ꓢꓴ ꓝꓮꓲꓸ ꓕꓲꓽ ꓣꓳ ꓠꓬ꓾“ꓟ-ꓖꓶꓽ(ꓦ-ꓟ) ꓐꓯˍ ꓟ ꓠꓽ ꓛ-ꓪ ꓓꓴˍ ꓡꓰ ꓐꓰ ꓗꓹ ꓐꓭꓸ” ꓐꓰ ꓐꓯˍ ꓡꓳ= ꓟꓶ-ꓖꓶꓽ ꓖꓳꓺ ꓓꓱꓽ ꓔꓯ ꓫꓱꓹ ꓟꓶ ꓢꓴ ꓠꓬ꓾ “ꓟ-ꓖꓶꓽ(ꓦ-ꓟ) ꓠꓽ ꓕꓴꓽ ꓔ ꓟ ꓘꓶꓺ ꓞꓲꓻ ꓡꓰ ꓐꓰ ꓗˍ ꓡꓳ”꓾ ꓐꓰ ꓐꓯˍ ꓡꓳ=

ꓬꓲꓸ ꓟꓶꓸ ꓔꓯ ꓫꓱꓹ ꓟꓶ ꓢꓴ ꓠꓬ꓾ “ꓟ-ꓖꓶꓽ(ꓦ-ꓟ) ꓠꓽ ꓬꓲꓸ ꓚꓺ ꓡꓰ ꓐꓰ ꓗˍ ꓢꓲ ꓠꓬꓲ꓾ ꓬꓲꓸ ꓟꓶꓽ ꓗꓪ ꓠꓽ ꓬꓲꓸ ꓟꓵꓻ ꓣꓱˍ ꓡꓳ” ꓾ ꓐꓰ ꓐꓯˍ ꓡꓳ= ꓖꓳ ꓟ ꓠꓬ ꓕꓲꓽ ꓣꓳ ꓡꓰ ꓕꓲꓽ ꓣꓳ ꓫꓱꓹ ꓟꓶˍ ꓟ ꓟꓽ ꓪꓽ ꓡꓯꓽ ꓘꓳ ꓟ ꓕꓲꓽ ꓡꓰꓹꓼ ꓐꓰ ꓪꓴ-ꓢ ꓔꓯ ꓟꓳˍ ꓟ ꓥˍ ꓟꓲ ꓟꓽ ꓪꓽ ꓡꓯꓽ ꓘꓳ꓾ ꓟꓽ ꓫꓱꓸ ꓡꓯꓽ ꓘꓳ= ꓮ ꓡꓰ ꓗˍ ꓠꓬꓲ ꓪꓴ-ꓢ ꓔꓯ ꓟꓳˍ ꓟ ꓟꓽ ꓫꓱꓸ ꓡꓯꓽ ꓘꓳ ꓟ ꓥ ꓢꓲ꓾ ꓮ ꓡꓰ ꓗˍ ꓠꓬꓲ ꓙꓵꓻ ꓠꓲꓹ ꓮꓽ ꓟꓬꓹ ꓙꓳˍ ꓥ ꓐꓯ ꓠꓬ꓾ ꓪꓴ-ꓢ ꓠꓬ ꓪꓽ ꓠꓬꓲˍ ꓟ ꓥ ꓢꓲ꓾ ꓬꓲꓸ ꓔꓯ ꓣꓳꓽ ꓮ ꓙꓵꓽ ꓢꓷꓸ ꓟꓽ ꓐ ꓡ ꓟ ꓪꓴꓸ ꓠꓬꓲ ꓥꓳ=

2 ꓫꓵꓽ ꓕꓲꓽ ꓫꓵꓽ ꓐꓯˍ ꓠꓬ꓾ ꓪꓴ-ꓢ ꓠꓬ ꓣꓳ ꓢꓷꓸ ꓐ ꓡˍ ꓟ ꓔꓯꓸ ꓡꓰꓽ ꓟꓸ ꓖꓶꓽ ꓡˍ ꓟ ꓪꓴꓸ ꓠꓬꓲ ꓥ ꓡꓳ= ꓖꓳ ꓟ ꓡꓰꓽ ꓟꓽ ꓞꓲ ꓪꓴ-ꓢ ꓠꓬ ꓬꓲꓸ ꓐꓯ ꓘꓶꓽ ꓔꓯ꓾ ꓣꓳꓽ ꓟꓲ ꓠꓯ ꓞꓳ ꓤ ꓢꓷꓸ ꓐ ꓡˍ ꓟ ꓔꓯ ꓟꓲ ꓠꓯ ꓫꓸ ꓕꓱ ꓥꓳꓽ ꓡꓰ ꓐꓯ ꓔ ꓟ ꓪꓴꓸ ꓠꓬꓲ ꓥ ꓡꓳ= ꓟꓲ ꓠꓯ ꓗꓪ ꓙꓵꓻ ꓠꓲꓹ ꓮ ꓟꓬꓹ ꓙꓳˍ ꓟ ꓠꓬ꓾ ꓟꓲ ꓠꓯ ꓞꓳ ꓤ ꓚꓲꓸ ꓛꓬꓽ ꓟꓳˍ ꓟ꓾ ꓢꓷꓸ ꓔ ꓟ ꓔꓯ ꓡꓳꓸ ꓢꓲ꓾ ꓙꓵꓻ ꓔꓬꓹ ꓟ ꓪꓴꓸ ꓠꓬꓲ ꓙꓵꓻ ꓠꓲꓹ ꓮꓽ ꓟꓬꓹ ꓙꓳ ꓡ ꓟ ꓥ ꓡꓳ=

ꓟꓲ ꓠꓯ ꓞꓳ ꓤ ꓙꓵꓻ ꓠꓲꓹ ꓠꓬ꓾ ꓚꓲꓸ ꓛꓬꓽ ꓢꓷꓸ ꓐ ꓡˍ ꓟ꓾ ꓘꓳꓹ ꓣꓴ ꓐ ꓡˍ ꓟ ꓕꓯꓽ ꓢꓲꓺ ꓗꓪ ꓡꓳꓸ ꓢꓲ꓾ ꓙꓵꓻ ꓠꓲꓹ ꓥˍ ꓟꓲ ꓟꓽ ꓫꓱꓸ ꓡꓯꓽ ꓘꓳ ꓟ ꓥ ꓡꓳ=

Credit photo

https://bit.ly/2yprcmN