ꓢꓮꓟ-ꓢ-ꓣ

ꓟꓲ ꓠꓯ ꓕꓱ ꓟ ꓗꓪ ꓠꓬ ꓢꓮꓟ-ꓢ-ꓣ ꓐꓯꓹ ꓟ ꓡꓳ-ꓟꓲꓽ ꓥꓳꓽ ꓗꓪ ꓚꓳꓸ ꓔꓮꓠ-ꓔ-ꓬ ꓐꓯꓹ ꓟ ꓬꓲ ꓔꓶ ꓥˍ ꓡꓳ= ꓢꓮꓟ-ꓢ-ꓣ ꓐꓯꓹ ꓟ ꓠꓬ ꓮꓸ ꓫꓵꓽ ꓔꓯ ꓐꓯꓹ ꓡ? ꓐꓯꓹ ꓠꓬ ꓬꓲ ꓚꓳ꓾ ꓬꓲ ꓪꓳꓽ ꓬꓲ ꓛꓯꓸ ꓔꓯ ꓕꓱ ꓡꓰꓳ ꓫꓵꓽ ꓔꓯ ꓐꓯ ꓠꓲꓹ ꓫꓵꓹ ꓟ ꓥ ꓪ= ꓮ ꓡꓰꓳ ꓫꓵꓽ ꓥꓹ ꓡ? ꓐꓯ ꓠꓬ ꓔꓯ ꓥꓳꓽ ꓐꓯ ꓠꓬ ꓞꓳ ꓤ ꓠꓬ ꓛꓱꓽ ꓟꓳ ꓡ ꓢꓯꓸ ꓡ ꓞꓳ ꓡꓯꓸ ꓗ ꓡ ꓖꓳ ꓡꓰ ꓢꓲ ꓞꓳ ꓟꓳꓽ ꓗ ꓡ ꓢꓲ ꓫꓵ꓾ ꓫꓵ ꓗ ꓠꓯ ꓢꓲ ꓗꓪ ꓠꓬ ꓟꓲ ꓠꓯ ꓗꓪ ꓝꓮꓲ ꓕ꓾ꓽ ꓧꓪ ꓬꓯꓼ ꓡ ꓖꓳ ꓡꓰ ꓢꓲ ꓝꓮꓲ ꓕꓲꓽ ꓧꓪ ꓦꓱ ꓡ ꓕꓱ ꓡꓰ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓚꓳ ꓢꓲ ꓛꓲ ꓡꓹ ꓟ ꓔꓯ ꓐꓯ ꓠꓲꓹ ꓫꓵꓹ ꓟ ꓥ ꓪ= ꓖꓳ ꓑꓶꓸ ꓓꓴ ꓠꓬ ꓟꓲ ꓠꓯ ꓗꓪ ꓫꓸ ꓙꓵ ꓟꓶꓽ ꓙꓵ ꓓꓴ ꓐꓬ ꓡꓰ ꓓꓴ ꓫꓵ ꓡꓰ ꓓꓴ ꓟꓽ ꓠꓬ ꓡꓰ ꓓꓴ ꓕꓱ ꓡꓰꓳ ꓫꓵꓽ ꓐꓰ ꓐꓲ ꓞꓹ ꓔꓬ ꓟ ꓕꓲꓽ ꓔꓳ ꓥ ꓡꓳ=

ꓢꓯꓸ ꓔꓬ ꓟ ꓮ ꓙꓵꓽ ꓠꓬ ꓟꓬꓱꓽ ꓢꓯꓼ ꓕꓵꓼ ꓠ ꓗꓹ ꓡꓳ ꓐꓯꓹ ꓟ ꓗ-ꓟꓼ ꓠꓯꓸ ꓘꓪ ꓗꓪ ꓮ ꓕꓯꓽ ꓥˍ ꓟꓲ ꓢꓯꓸ ꓔꓬ ꓠ ꓗˍ ꓡꓳ= ꓗ-ꓟꓼ ꓐꓯꓹ ꓟ ꓠꓬ ꓮ ꓡꓰꓳ ꓫꓵꓽ ꓔꓯ ꓐꓯꓹ ꓡ? ꓐꓯꓹ ꓠꓬ ꓣꓳꓽ ꓟꓬꓱꓽ ꓬꓰꓹ ꓟ ꓫꓸ ꓕꓱꓹ ꓟ ꓣꓳꓽ ꓠꓲꓹ ꓟ ꓠꓯꓸꓼ ꓗꓪ ꓓꓵꓽ ꓙꓹꓟ ꓮ ꓙꓵꓽ ꓠꓬ ꓣꓳꓽ ꓠꓲꓹ ꓟ ꓗꓪ ꓐꓰ ꓒꓬꓱꓼ ꓠꓲꓹ ꓫꓵˍ ꓟ ꓬꓲ ꓘꓴꓽ ꓗꓪ ꓠꓯꓸ ꓘꓪ ꓗꓪ ꓮ ꓕꓯꓽ ꓥˍ ꓟꓲ ꓒꓬꓱꓼ ꓔꓬ ꓟ ꓔꓯ ꓐꓯ ꓠꓲꓹ ꓫꓵꓹ ꓟ ꓥ ꓪ= ꓐꓯ ꓠꓲꓹ ꓫꓵꓹ ꓟ ꓠꓬ ꓮ ꓫꓵꓽ ꓬꓰ ꓥˍ ꓟꓲ ꓣꓳ ꓟꓲ ꓠꓯ ꓞꓳ ꓤꓽ ꓘꓳꓹ ꓣꓴꓹ ꓟ ꓓꓵꓽ ꓙꓹ ꓟ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓬꓲ ꓘꓴꓽ ꓗꓪ ꓣꓱꓽ ꓔꓬꓹ ꓟ ꓥˍ ꓡꓳ= ꓐꓯ ꓠꓲꓹꓫꓵꓹ ꓟ ꓠꓬ ꓟꓲ ꓠꓯ ꓞꓳ ꓤꓽ ꓠꓬ ꓙꓲꓹ ꓟ ꓟꓲ ꓠꓯ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓔꓯ ꓘꓳꓹ ꓣꓴꓹ ꓠꓬ ꓙꓲꓹ ꓟ ꓚꓱꓹ ꓗꓪ ꓟꓬꓱꓽ ꓬꓰ ꓢꓯꓼ ꓕꓵꓼ ꓢꓲ ꓟꓹ ꓙꓲꓹ ꓟ ꓔꓯ ꓘꓳꓹ ꓣꓴ ꓢꓴ ꓠꓬ ꓟꓽ ꓙꓲꓹ ꓟ ꓡꓰ ꓐꓰ ꓟꓬꓱꓽ ꓬꓰꓹ ꓟ ꓥˍ ꓡꓳ= ꓖꓳ ꓟ ꓟꓲ ꓠꓯ ꓞꓳ ꓤꓽ ꓫꓶꓺ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓔꓯ ꓣꓱꓽ ꓢꓲ ꓓꓳ ꓡꓹ ꓟ ꓙꓲ ꓖꓴ ꓙꓳꓹ ꓟ ꓬꓲ ꓢꓷꓽ ꓓꓱꓹ ꓟ ꓔꓯ ꓦꓲ-ꓑ-ꓗ ꓐꓯꓹ ꓐꓶ= ꓦꓲ-ꓑ-ꓗ ꓐꓯꓹ ꓟ ꓠꓬ ꓕꓱ ꓟ ꓦꓲ-ꓑ-ꓗ ꓑꓶꓸ ꓓꓴ ꓟꓲ ꓠꓯ ꓗꓪ ꓢꓯꓸ ꓔꓬ ꓟ ꓙꓵꓹ ꓗꓪ ꓥˍ ꓟꓲ ꓛꓲ ꓡꓹ ꓟ ꓕꓲ ꓤꓲ ꓗꓪ ꓥˍ ꓟꓲ ꓔꓳꓹ ꓜꓳꓹ ꓟ ꓒꓬꓱꓼ ꓡ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓟꓲ ꓠꓯ ꓗꓪ ꓣꓳ ꓢꓯꓸ ꓔꓬ ꓥˍ ꓟꓲ ꓟꓽ ꓙꓲˍ ꓟ ꓬꓰ ꓠꓬ ꓟꓽ ꓙꓲꓹ ꓟ ꓒꓬꓱꓼ ꓡ꓾ ꓙꓲꓹ ꓟ ꓬꓰ ꓠꓬ ꓙꓲꓹ ꓟ ꓒꓬꓱꓼ ꓡ꓾ ꓖꓳ ꓟ ꓡꓰ ꓟꓽ ꓞꓲ ꓛꓲ ꓡꓹ ꓟ ꓕꓲꓽ ꓤꓲ ꓗꓪ ꓥˍ ꓟꓲ ꓖꓳ ꓟ ꓙꓲꓹ ꓟ ꓬꓰ ꓢꓴ ꓠꓬ ꓙꓲꓹ ꓟ ꓠꓯꓸꓼ ꓗꓪ ꓛꓲ ꓡꓰ ꓢꓲ ꓟꓽ ꓢꓴ ꓠꓬ ꓛꓬꓽ ꓟꓵꓽ ꓗꓪ ꓛꓲ ꓬꓰ ꓡꓹ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ=

ꓐꓴꓓ-ꓓ ꓙꓵ ꓠꓲꓹ ꓠꓯꓸꓼ ꓗꓪ ꓝꓮꓲ ꓕꓲꓽ ꓧꓪ ꓦꓱ ꓡꓹ ꓟ ꓐꓯꓹ ꓟ ꓕꓲ ꓝꓸ ꓖꓴ ꓕꓲ ꓝꓸ ꓟꓲ ꓠꓯ ꓗꓪ ꓬꓲ ꓝꓸ ꓐꓯ ꓖꓴ ꓟ ꓓ ꓬꓲ ꓧꓪꓹ ꓐꓯ ꓖꓴ ꓟꓽ ꓓ ꓕꓱ ꓡꓰ ꓦꓱ ꓡꓹ ꓟ ꓕꓰ ꓡꓰ ꓒꓬꓱꓼ ꓡꓹ ꓟ ꓤꓲ ꓮ ꓟꓬꓹ ꓙꓳ ꓡꓳ ꓐꓯꓹ ꓟ ꓔꓯ ꓙꓵ ꓔꓬ ꓟ ꓠꓬ ꓧꓲꓠ-ꓓꓴ ꓙꓵ ꓠꓲꓹ ꓐꓰ ꓪꓽ ꓡꓰ ꓘꓳꓹ ꓥˍ ꓟꓲ ꓟꓽ ꓪꓽ ꓡꓰ ꓘꓳ ꓟꓽ ꓫꓱꓹ ꓡꓯꓹ ꓟ ꓥˍ ꓟꓲ ꓙꓳˍ ꓡꓳ= ꓔꓯ ꓥꓳꓽ ꓐꓯ ꓠꓬ ꓠꓲ-ꓦ-ꓠ ꓐꓯꓹ ꓟ ꓟꓳ ꓗꓪ ꓗꓴꓷꓼ ꓐꓯꓹ ꓟ ꓚꓱꓹ ꓟꓽ ꓪꓽ ꓡꓯ ꓘꓳ ꓐꓶ= ꓐꓴꓓ-ꓓ ꓙꓵ ꓠꓲꓹ ꓠꓯꓸꓼ ꓗꓪ ꓠꓬ ꓠꓲ-ꓦ-ꓠ ꓗꓪ ꓛꓲ ꓡꓰ ꓢꓴ ꓮꓽ ꓟ ꓥˍ ꓟꓲ ꓟꓲ ꓠꓯ ꓗꓪ ꓝꓮꓲ ꓕꓲꓽ ꓧꓪꓹ ꓫꓷꓸ ꓡꓹ ꓟ ꓟꓽ ꓙꓳ= ꓖꓳ ꓡꓰ ꓥˍ ꓟꓲ ꓧꓲꓠ-ꓓꓴ ꓙꓵ ꓠꓲꓹ ꓠꓯꓸꓼ ꓗꓪ ꓠꓬ ꓠꓟꓲ ꓠꓯ ꓞꓳ ꓤꓽ ꓫꓸ ꓙꓵ ꓟꓶꓽ ꓙꓵ ꓓꓴ ꓓꓳ ꓜꓳ꓾ ꓠꓲ ꓫꓸ ꓟꓬ ꓫꓸ ꓓꓴ ꓔꓳꓹ ꓜꓳꓽ ꓟꓴ ꓗꓪ ꓗꓴꓷ ꓗꓪ ꓛꓲ ꓢꓴ ꓥˍ ꓟꓲ ꓟꓲ ꓠꓯ ꓗꓪ ꓚꓬꓴꓹ ꓙꓹ ꓟ ꓟꓬꓱꓽ ꓬꓰ ꓡꓳ ꓐꓰ ꓕꓱ ꓡꓰ ꓙꓵˍ ꓡꓳ=   

Add new comment

2 + 12 =