ꓢꓲꓽ ꓫꓬꓹ ꓟ ꓟꓵꓽ ꓗꓪ ꓪꓽ ꓘꓴ ꓙ ꓫꓱꓽˍ ꓟ(2) Dialogue with other Religions

ꓢꓲꓽ ꓫꓬꓹ ꓟ ꓟꓵꓽ ꓗꓪ ꓪꓽ ꓘꓴ ꓙ ꓫꓱˍ ꓟ (2)

ꓡꓳ ꓓꓲ ꓠꓯ ꓓꓽ ꓗꓪ 7 ꓧꓪꓹ ꓪꓽ ꓘꓴ ꓓꓳ ꓡꓰ ꓠꓬ ꓮ-ꓐ-ꓡ-ꓦ ꓦꓲ ꓐꓯꓹ ꓟ ꓪꓽ ꓘꓴ ꓔꓶꓸ ꓗꓪ ꓪꓽ ꓘꓴ ꓠ ꓡꓳꓹ ꓥ= ꓖꓳ ꓕꓲꓽ ꓘꓴꓸ ꓗꓪ ꓪꓽ ꓘꓴ ꓓꓳ ꓠꓬ ꓢ-ꓩ ꓐꓰ ꓟꓲ-ꓪ ꓟꓬꓱ ꓔ ꓟ ꓠꓬꓲꓽ ꓗꓴꓸ ꓚꓸ ꓗꓪ 3 ꓧꓪꓹ ꓡꓽ ꓡꓽ ꓙꓰ ꓙꓰ ꓬꓰ ꓠ ꓡꓳꓹ ꓥ= ꓢ-ꓩ ꓐꓰ ꓟ-ꓪ ꓠꓬꓲꓽ ꓗꓴꓸ ꓚꓸ ꓗꓪ ꓠꓬ 1500 ꓑꓰ ꓛꓲ ꓶꓹ ꓟ ꓥˍ ꓡꓳ= ꓢ-ꓩ ꓗꓪ ꓚꓳꓸ ꓟ-ꓪ ꓕꓲꓽ ꓛꓱꓽ ꓔꓯ ꓢꓲ 4 ꓧꓪꓹ ꓟ-ꓪ ꓗꓪ ꓚꓳꓸ ꓢ-ꓩ ꓕꓲꓽ ꓛꓱꓽ ꓔꓯ ꓢꓲ 3 ꓧꓪꓹ  ꓮꓽ ꓙꓵꓽ ꓠꓬ 7 ꓧꓪꓹ ꓕꓱ ꓡꓰ ꓡꓽ ꓡꓽ ꓙꓰ ꓙꓰ ꓔꓶꓹ ꓠ ꓡꓳꓹ ꓥ= ꓖꓳ ꓟ ꓠꓬ ꓮ-ꓐ-ꓡ-ꓦ ꓠꓬ ꓬꓲ ꓤꓽ ꓬꓲ-ꓫꓵ-ꓟ-ꓡꓲ ꓔꓯ ꓒꓲꓹ ꓗꓶ ꓔ ꓟ ꓪꓴꓸ ꓠꓬꓲ ꓬꓲ ꓤꓽ ꓬꓲ-ꓫꓵ-ꓟ-ꓡꓲ ꓐꓱ ꓶ ꓠꓲꓹ ꓟ ꓙꓽ ꓫꓸ ꓢꓲ ꓬꓲ ꓟꓹ ꓟ ꓫ-ꓚꓬ ꓠꓬ ꓗꓳ ꓑꓳ ꓔꓶꓹ ꓠꓲ ꓕ ꓑꓳꓸ ꓔꓶꓹ ꓠꓲ ꓬꓲ ꓙꓬ ꓧꓪ ꓚꓳꓹ ꓟ ꓔꓯ ꓓꓵꓽ ꓙꓽ ꓛꓲ ꓠꓹ ꓟ ꓐꓱ ꓶ ꓥˍ ꓡꓳ= ꓟꓬꓽ ꓠꓬꓲ ꓐꓶꓹ ꓠꓬꓲ ꓟꓹ ꓟ ꓠꓱ ꓠꓲꓹ ꓔꓯ ꓓꓵꓽ ꓙꓽ ꓛꓲ ꓠꓹ ꓟ ꓐꓱ ꓶ ꓥˍ ꓡꓳ= ꓫ-ꓚꓬ ꓡꓰ ꓡꓯꓽ ꓒꓯꓹ ꓗꓪ ꓐꓰ ꓚꓴꓸ ꓢꓲ ꓬꓲ ꓙꓬ ꓓꓳ ꓡꓹ ꓟ ꓖꓳ ꓕꓲꓽ ꓔꓶꓸ ꓔꓯ ꓜꓮꓟ-ꓜꓮꓟ ꓐꓰ ꓟꓬꓱ ꓖꓶ ꓔ ꓐꓶ= ꓜꓮꓟ-ꓜꓮꓟ ꓬꓲ ꓙꓬ ꓘꓵ (ꓘꓴ) ꓗꓪ ꓛꓲ ꓕꓯ ꓬꓲ ꓙꓬ ꓘꓳꓼˍ ꓟ ꓥˍ ꓟꓲ ꓬꓰ ꓠ ꓗˍ ꓡꓳ= ꓖꓳ ꓟ ꓓꓳ ꓡꓰ ꓠꓬ ꓠꓲꓹ ꓟ ꓒꓳꓹ ꓡꓲꓼˍ ꓟ꓾ ꓠꓲꓹ ꓟ ꓡꓶꓸ ꓔ ꓟ ꓬꓲ ꓢꓷꓸ ꓡꓰ ꓓꓴ ꓥˍ ꓟ ꓪꓴꓸ ꓞꓱ ꓛꓳꓹ ꓔ ꓟ꓾ ꓪꓴꓸ ꓞꓱ ꓞꓶꓽ ꓪꓴꓸ ꓛꓱ ꓠꓬꓱꓹ ꓟ ꓬꓰ ꓠ ꓗˍ ꓡꓳ= ꓖꓳ ꓟ ꓓꓳ ꓡꓰ ꓠꓬ ꓮ-ꓣ-ꓒꓮꓔ ꓪꓽ ꓓꓲ ꓗꓪ ꓦꓲ ꓚꓱ ꓘꓳꓹ ꓢꓲ ꓦꓲ ꓫꓬꓹ ꓢꓲ 3 ꓦꓬ ꓖꓳ ꓕꓲꓽ ꓘꓴꓸ ꓗꓪ ꓔꓬ ꓠ ꓡꓳꓼ ꓥ= ꓖꓳ ꓗꓪ 3 ꓦꓬ ꓔꓬ ꓟ ꓙꓵꓹ ꓗꓪ ꓮ-ꓣ-ꓒꓮꓔ ꓪꓽ ꓜꓱꓽ ꓓꓯꓹ ꓟ ꓔ ꓥˍ ꓟꓲ ꓬꓰ ꓠ ꓡꓳꓹ ꓥ= 

ꓬꓲꓸ ꓟꓶꓽ ꓕꓲꓽ ꓠꓬꓲ ꓟꓳꓹ ꓡꓳ ꓔꓲꓹ ꓫꓵ ꓗꓪ ꓠꓬ ꓪꓽ ꓘꓴꓹ ꓟ ꓙꓵ ꓔꓯ ꓓꓽ ꓪꓴꓸ ꓔꓴ ꓠ ꓗˍ ꓡꓳ= ꓖꓳ ꓟ ꓪꓽ ꓘꓴ ꓙꓵꓹ ꓗꓪ ꓕꓱ ꓡꓰ ꓢꓲꓽ ꓫꓬꓹ ꓟ ꓟꓵꓽ ꓗꓪ ꓪꓽ ꓘꓴ ꓙ ꓫꓱꓽ ꓠꓹ ꓟ ꓡ ꓢꓴ ꓮ ꓙꓵꓽ ꓐ ꓠ ꓡꓳꓹ ꓥ= ꓪꓽ ꓘꓴ ꓠ ꓡꓳꓹ ꓥ= ꓪꓽ ꓘꓴꓹ ꓟ ꓙꓵ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵˍ ꓟ ꓕꓲꓽ ꓙꓵꓹ ꓥ ꓐꓶ= ꓖꓳ ꓟ ꓟꓽ ꓘꓶꓼ ꓗꓪ ꓠꓬ ꓟꓯ-ꓗ ꓡꓳ ꓒꓱ ꓗꓪ ꓟꓴ-ꓜꓲ-ꓓ-ꓡꓲ-ꓩ ꓐꓯꓹ ꓟ ꓕꓲꓽ ꓔꓶꓸ ꓗꓪ ꓬꓲꓼ ꓔ ꓠ ꓡꓳꓼ ꓥ= ꓟꓴ-ꓧ-ꓟꓮꓓ ꓧ-ꓙꓲ(ꓢꓲꓽ ꓫꓬꓹ ꓟ ꓟꓵꓽ ꓗꓪ ꓪꓽ ꓘꓴ ꓙ ꓫꓱˍ ꓟ) ꓬꓰ ꓕꓯ ꓪꓴꓽ ꓧꓶ ꓠꓽ ꓔꓶꓸ ꓔꓯ ꓓꓵꓽ ꓙꓽ ꓛꓲ ꓠꓹ ꓟ ꓐꓱ ꓶ ꓬꓲꓹ ꓔꓸ ꓔꓹ ꓟ ꓥˍ ꓡꓳ= ꓖꓳ ꓟ ꓓꓳ ꓡꓰ ꓠꓬ ꓟꓲ-ꓠ ꓐꓯꓹ ꓟ ꓕꓲꓽ ꓔꓶꓸ ꓗꓪ ꓙꓰ ꓠ ꓡꓳꓹ ꓥ= ꓟꓲ-ꓠ ꓔꓶꓹ ꓗꓪ ꓙꓰꓹ ꓕꓯꓽ ꓡꓳ ꓓꓲ ꓖꓳ ꓢꓲ ꓕꓯꓹ ꓠ ꓡꓳꓹ ꓥ= ꓖꓳ ꓗꓪ ꓟꓲ-ꓠ ꓗꓪ 3 ꓦꓬꓼ ꓔꓬ ꓠꓬꓲ ꓔ ꓡꓳ= ꓖꓳ ꓡꓰ 3 ꓦꓬꓼ ꓔꓬ ꓕꓯꓽ ꓠꓲꓽ ꓪꓸ ꓔꓲꓸ ꓢ ꓓꓯꓼ ꓔꓯ ꓔꓯꓹ ꓔ ꓟ ꓡꓳ ꓓꓲ ꓡꓰ ꓡꓳꓹ ꓟ ꓬꓰ ꓠ ꓡꓳꓹ ꓥ= ꓖꓳ ꓟ ꓠꓬ ꓮ-ꓐ-ꓡ-ꓦ ꓔꓯ ꓪꓴ-ꓢ ꓠꓬ ꓬꓲ ꓤꓽ ꓬꓲ-ꓫꓵ-ꓟ-ꓡꓲ ꓔꓯ ꓛꓴꓽ ꓔꓲꓹ ꓕꓯ ꓠꓲꓽ ꓪꓸ ꓔꓲ ꓢ ꓓꓯꓼ ꓠꓬ ꓬꓲ ꓔꓯ ꓤꓹ ꓠꓬꓲꓹ ꓟ ꓔꓯ ꓓꓵꓽ ꓙꓽ ꓛꓲ ꓠꓹ ꓟ ꓐꓱ ꓶ ꓥˍ ꓡꓳ= ꓮ-ꓐ-ꓡ-ꓦ ꓔꓯ ꓠꓲꓽ ꓪꓸ ꓔꓲ ꓢ ꓓꓯꓼ ꓠꓬ 3 ꓧꓪꓹ ꓤꓹ ꓠꓬꓲˍ ꓡꓳ= 

ꓪꓽ ꓘꓴꓹ ꓟ ꓬꓲ ꓟꓶꓽ ꓕꓲꓽ ꓠꓬꓲ ꓗꓪ ꓠꓬ ꓞꓳ ꓜꓴ ꓞꓳ ꓟꓯꓼ ꓡꓰ ꓥꓹ ꓠꓬ ꓚꓵ ꓛꓬꓽ ꓕꓲꓽ ꓣꓳ ꓔꓵꓹ ꓡꓰ ꓮꓸ ꓣꓳ ꓟꓽ ꓥ ꓠꓬ ꓮꓸ ꓛꓵꓼ ꓕꓲꓽ ꓟ ꓟ ꓕꓯ ꓛꓴ ꓔꓲ ꓠ ꓡꓳꓹ ꓥ= ꓕꓱ ꓟ ꓠꓬ ꓮ-ꓐ-ꓡ-ꓦ ꓬꓲ ꓤꓽ ꓬꓲ-ꓫꓵ-ꓟ-ꓡꓲ ꓬꓲ ꓛꓵꓻ ꓛꓴꓽ ꓘꓶ ꓗꓪ ꓪꓴꓸ ꓛꓵ ꓪꓴ ꓞꓹ ꓟ ꓮꓸ ꓣꓳ ꓔꓯ ꓬꓲ ꓤꓽ ꓬꓲ-ꓫꓵ-ꓟ-ꓡꓲ ꓪꓴꓸ ꓛꓵꓻ ꓛꓴ ꓔꓲꓹ ꓟ ꓕꓯ ꓓꓵꓽ ꓙ ꓛꓲ ꓠꓹ ꓟ ꓐꓱ ꓶ ꓥˍ ꓡꓳ= ꓖꓳ ꓟ ꓓꓳ ꓡꓰ ꓠꓬ ꓟꓯ-ꓗ ꓡꓳ ꓒꓱ ꓗꓪ ꓝꓮꓲ ꓕꓲꓽ ꓧꓪꓹ ꓡꓽ ꓡ ꓢꓲ ꓢ-ꓩ ꓐꓰ ꓟꓲ-ꓪ ꓕꓲꓽ ꓛꓱꓽ ꓔꓯ ꓢꓲ ꓡꓽ ꓡ ꓠ ꓗꓹ ꓡꓳ= ꓮ-ꓣ-ꓒꓮꓔ ꓪꓽ ꓓꓲ ꓗꓪ ꓝꓮꓲ ꓕꓲꓽ ꓧꓪꓹ ꓙꓰ ꓠ ꓡꓳꓹ ꓥ= ꓮ-ꓓꓯ ꓐꓰ ꓯ-ꓪ ꓠꓬ ꓪꓴ-ꓢ ꓡꓰ ꓜꓽ ꓟꓽ ꓓ ꓐꓯ ꓔ ꓟ ꓢꓷꓹ ꓢꓷꓽ ꓔꓯ ꓜꓽ ꓗꓷ ꓗ ꓠꓯ ꓧꓹ ꓡꓯꓽ ꓘꓳ ꓠ ꓗꓷ ꓡꓲꓳ= ꓖꓳ ꓡꓰ ꓥˍ ꓟꓲ ꓪꓴ-ꓢ ꓣꓱꓽ ꓛꓲ ꓗꓪ ꓐꓰ ꓮ-ꓓꓯ ꓐꓰ ꓯ-ꓪꓽ ꓠꓬ ꓮ-ꓣ-ꓒꓮꓔ ꓪꓽ ꓓꓲ ꓗꓪ ꓝꓮꓲ ꓕꓲꓽ ꓧꓪꓹ ꓜꓰ ꓡꓯ ꓘꓳꓹ ꓟ ꓢꓷꓸ ꓡꓰ ꓓꓴ ꓥ_ ꓡꓳ= ꓢꓲꓽ ꓫꓬ ꓟꓵꓽ ꓗꓪ ꓪꓽ ꓘꓴ ꓙ ꓫꓱꓹ ꓟ ꓠꓬ ꓚꓵꓸ ꓛꓬꓽ ꓕꓲꓽ ꓞꓲꓼ ꓡꓱꓸꓼ ꓔꓯ ꓮ ꓕꓯ ꓥˍ ꓟꓲ ꓓꓵꓽ ꓙꓽ ꓛꓵ ꓠꓹ ꓟ ꓥˍ ꓡꓳ= ꓟꓴ-ꓧ-ꓟꓮꓓ ꓡꓰ ꓟꓸ ꓖꓶꓽ ꓡꓹ ꓟ ꓔꓯ ꓓꓵꓽ ꓙꓽ ꓛꓵ ꓠꓹ ꓟ ꓐꓱ ꓶ ꓥˍ ꓡꓳ=                                                    

  

                            

    

Add new comment

7 + 8 =