ꓢꓴ-ꓩꓲ ꓐꓰ ꓙꓲ-ꓧꓮꓓ (2)(Dialogue with other Religions)

ꓢꓴ-ꓩꓲ ꓐꓯꓹ ꓟ ꓠꓬ ꓦꓺ ꓕꓲꓽ ꓒꓳꓹ ꓔꓯ ꓢꓲ ꓢꓯꓼ ꓕꓵꓼ ꓠꓹ ꓟ ꓬꓲ ꓜꓴ ꓬꓲ ꓟꓯꓼ ꓥˍ ꓡꓳ= ꓙꓲ-ꓧꓮꓓ ꓐꓯꓹ ꓟ ꓠꓯꓸꓼ ꓗꓪ ꓛꓳ ꓢꓲ ꓢꓴ-ꓩꓲ ꓐꓴ ꓥˍ ꓟꓲ ꓛꓳ ꓠꓬꓲ ꓔ ꓟ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳˍ ꓡꓳ= ꓕꓲꓽ ꓐꓱ ꓠꓬ ꓧꓶꓸ ꓕꓯꓽ ꓬꓲ ꓡꓵꓺ ꓛꓳ ꓚꓱꓹ ꓔꓯ ꓛꓳꓹ ꓟ ꓬꓲ ꓜꓴ ꓬꓲ ꓟꓯꓼ ꓕꓲꓽ ꓐꓱ ꓠꓬ ꓮ ꓟꓶ ꓕꓲꓽ ꓞꓲꓼ ꓗꓪ ꓟ ꓛꓳ ꓚꓱꓹ ꓔꓯ ꓛꓳꓹ ꓟ ꓬꓲ ꓜꓴ ꓬꓲ ꓟꓯꓼ ꓐꓰ ꓕꓱ ꓡꓰ ꓙꓳˍ ꓡꓳ= ꓕꓲꓽ ꓐꓱ ꓠꓬ ꓟꓽ ꓔꓱꓹ ꓬꓰ ꓢꓴ ꓔꓯ ꓧꓪ ꓡꓰ ꓠꓹ ꓟ ꓐꓱ ꓶ ꓢꓯꓼ ꓕꓵꓼˍ ꓟ ꓜꓴ꓾ ꓕꓲꓽ ꓐꓱ ꓠꓬ ꓥꓲꓸ ꓞꓲꓹ ꓢꓴ ꓔꓯ ꓧꓪꓸ ꓡꓰ ꓠ ꓬꓰꓹ ꓟ ꓜꓴ ꓕꓱ ꓡꓲꓳ ꓫꓵꓽ ꓬꓲ ꓜꓴ ꓬꓲ ꓟꓯꓽ ꓮꓽ ꓟꓬꓹ ꓙꓳˍ ꓡꓳ= ꓖꓳ ꓡꓰ ꓥˍ ꓟꓲ ꓧꓶꓸ ꓕꓯꓽ ꓬꓲ ꓡꓵ ꓔꓯ ꓛꓳ ꓢꓴ ꓐꓴ ꓔꓯ ꓠꓬ ꓟꓽ ꓓ ꓟꓴ ꓖꓴ ꓡꓰꓹ ꓟ ꓙꓲ-ꓧꓮꓓ ꓜꓴ ꓐꓴ ꓐꓰ ꓕꓱ ꓡꓰ ꓐꓯˍ ꓡꓳ= ꓬꓲ ꓪꓽ ꓠꓬ ꓟꓽ ꓓ ꓟꓴ ꓖꓴ ꓡꓰꓹ ꓟ ꓢꓯꓼ ꓗꓶ ꓢꓲ ꓢꓯꓼ ꓕꓴꓼ ꓢꓴ ꓜꓴ ꓐꓴ ꓐꓰ ꓕꓱ ꓡꓰ ꓟꓬꓱ ꓐꓯꓹ ꓟꓶ ꓢꓴ ꓐꓴ ꓜꓴ ꓥˍ ꓡꓳ= ꓬꓲ ꓪꓽ ꓠꓬ ꓪꓴ-ꓢ ꓠꓲꓹ ꓡꓶꓽ ꓪꓴꓸ ꓓꓵ ꓛꓹ ꓢꓲ ꓛꓳꓹ ꓢꓴ ꓜꓴ ꓐꓴ ꓥˍ ꓡꓳ= ꓢꓴ-ꓩꓲ ꓒꓬꓱꓼ ꓡ ꓠꓹ ꓟ ꓠꓬ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓐꓯ ꓘꓶꓽ ꓛꓹ ꓢꓲ ꓛꓳ ꓠ ꓗˍ ꓡꓳ= ꓕꓲꓽ ꓝꓸ ꓔꓯ ꓛꓳ ꓐ ꓡꓹ ꓠꓬ ꓝꓮꓲ ꓟꓬꓽ ꓠꓬꓲ ꓟꓴꓹ ꓟ ꓕꓲꓽ ꓝꓸ ꓗꓪ ꓓꓯ ꓢꓲ ꓛꓳ ꓟꓵ ꓫꓱꓹ ꓠꓬ ꓕꓱ ꓡꓰ ꓛꓳ ꓠꓹ ꓟ ꓬꓲ ꓝꓸ ꓬꓲ ꓝꓸ ꓕꓱ ꓡꓰ ꓙꓳˍ ꓟ ꓥ ꓪ=

ꓗꓳ-ꓣꓮꓠ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓹ ꓟ ꓪꓴ-ꓢ ꓟꓬꓱ ꓓꓳꓽ ꓔꓯ ꓫꓱꓹ ꓖꓶˍ ꓟ 99 ꓧꓪꓹ ꓔꓯ ꓟꓽ ꓠꓽ ꓠꓽꓐꓯꓹ ꓟ ꓙꓳˍ ꓡꓳ= ꓔꓯꓺ ꓥꓳ ꓕꓲꓽ ꓟ ꓐꓯ ꓠꓬ ꓟꓴ ꓗꓪ ꓐꓰ ꓟꓲ ꓠꓯ ꓔꓯ ꓚꓰꓼ ꓢꓴ ꓮꓸ ꓫꓵꓽˍ ꓟꓲ ꓰ ꓐ ꓡ ꓢꓴ ꓕꓱ ꓡꓰ ꓪꓴ-ꓢ ꓟꓬꓱ ꓓꓳꓽ ꓔꓯ ꓫꓱꓸ ꓖꓶˍ ꓟ ꓔꓯ ꓔꓱꓹ ꓕꓽ ꓠꓬꓲꓹ ꓟ ꓬꓰ ꓠ ꓗꓹ ꓡꓳ= ꓗꓳ-ꓣꓮꓠ ꓢꓲꓽ ꓫꓬ ꓕꓳꓽ ꓶ ꓔꓯ ꓵ ꓗꓳ-ꓣꓮꓠ ꓢꓲꓽ ꓫꓬ ꓕꓳꓽ ꓶ ꓔꓯ ꓔꓱꓹ ꓕꓽ ꓠꓬꓲꓹ ꓟ꓾ ꓠꓲꓹ ꓟ ꓠꓯꓸꓼ ꓗꓪ ꓪꓴ ꓡꓰ ꓠ ꓢꓯꓼ ꓕꓵꓼˍ ꓟ ꓕꓱ ꓡꓰꓳ ꓫꓵꓽ ꓬꓰ ꓠ ꓗˍ ꓡꓳ= ꓣꓳ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓠꓬ ꓓ-ꓪꓴ ꓟꓴꓽ ꓖꓪꓽ ꓡꓰꓳ ꓫꓵꓽ ꓕꓱ ꓡꓰ ꓟꓴꓽ ꓖꓪꓽ ꓮꓽ ꓟꓬꓹ ꓔꓯ ꓥˍ ꓟꓲ ꓵ ꓠ ꓗꓹ ꓡꓳ꓾ ꓖꓪ ꓠ ꓗˍ ꓡꓳ=ꓪꓽ ꓘꓴ ꓢꓶꓽ ꓔꓯ ꓥˍ ꓟꓲ ꓐꓯ ꓠ ꓗˍ ꓡꓳ= ꓠꓬꓲꓸ ꓠꓬꓲ ꓕꓲꓽ ꓞꓲꓼ ꓗꓪ ꓟ ꓛꓳ ꓚꓰꓹ ꓔꓯ ꓛꓳ ꓢꓴ ꓢꓴ-ꓩꓲ ꓐꓴ ꓠꓬ ꓢꓳ ꓟꓲꓽ ꓙꓬꓽ ꓗꓪ ꓢꓷꓸ ꓙ ꓟꓳ ꓙꓹ ꓟ ꓔꓯ ꓢꓯꓼ ꓗꓶ ꓢꓲ ꓪꓴꓸ ꓓꓵ ꓛꓹ ꓢꓲ ꓟꓬꓱꓽ ꓬꓰˍ ꓡꓳ= ꓕꓲꓽ ꓐꓱ ꓢꓴ-ꓩꓲ ꓐꓴ ꓠꓬ ꓢꓳ ꓡꓰ ꓟꓽ ꓕꓱꓹ ꓟ ꓠꓯꓸꓼ ꓗꓪ ꓥꓲꓸ ꓢꓴ ꓡꓯꓽ ꓒꓯꓹ ꓗꓪ ꓐꓰ ꓡꓰꓹ ꓙꓰ ꓠꓹ ꓟ ꓢꓯꓼ ꓕꓵꓼ ꓢꓴ ꓥˍ ꓟꓲ ꓙꓳˍ ꓡꓳ= ꓐ ꓡꓹ ꓥꓳ ꓐꓯꓹ ꓠꓬ ꓢꓳ ꓔꓯ ꓠ ꓓꓴ ꓡꓰ ꓠ꓾ ꓢꓳ ꓔꓯ ꓫꓸ ꓡꓰ ꓠ ꓒꓳꓹ ꓔꓴꓹ ꓟ ꓟꓽ ꓬꓰ ꓬꓰ ꓟꓽ ꓙꓲ ꓢꓴ ꓔꓯ ꓟꓽ ꓔꓱꓹ ꓢꓴ ꓔꓯ ꓔꓳꓹ ꓔ ꓟ ꓬꓰ ꓥˍ ꓟꓲ ꓢꓳ ꓔꓯ ꓠ ꓓꓴ ꓡꓰ ꓠ ꓟꓽ ꓬꓰ ꓐꓰ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓢꓲ ꓬꓰꓹ ꓟ ꓥˍ ꓪ= ꓕꓱ ꓡꓰ ꓢꓯꓼ ꓕꓵꓼ ꓢꓲ ꓟꓽ ꓓ ꓡ ꓕꓯꓽ ꓢꓲ ꓡꓽ ꓛꓴꓸ ꓔꓯꓹ ꓮꓸ ꓕꓯꓽ ꓔꓯꓹ ꓢꓲ ꓢꓰꓼ ꓡꓯꓽ ꓘꓳ ꓓꓴ ꓕꓱ ꓡꓰ ꓠꓲꓹ ꓟ ꓠꓯꓸꓼ ꓗꓪ ꓗꓶ ꓔ ꓟ ꓥˍ ꓡꓳ=

ꓕꓲꓽ ꓐꓱ ꓠꓬ ꓕꓱ ꓟ ꓔꓯ ꓙ ꓡꓰ ꓢꓲ ꓞꓳ ꓤꓽ ꓢꓰꓼˍ ꓟ ꓠꓱ ꓐꓯꓼ ꓙꓵ ꓠꓲꓹ ꓠꓱ ꓐꓯꓼ ꓜꓴ ꓗꓪ ꓙꓵ ꓔꓬ ꓢꓴ ꓞꓳ ꓤꓽ ꓯꓽ ꓟꓬꓹ ꓫꓵ ꓠ ꓕꓱ ꓡꓰ ꓬꓰꓹ ꓟ ꓥˍ ꓟꓲ ꓙꓳˍ ꓡꓳ= ꓕꓱ ꓟ ꓠꓬ ꓙꓵ ꓠꓲꓹ ꓠꓯꓸꓼ ꓗꓪ ꓐꓰ ꓮꓽ ꓘꓶꓸ ꓧꓶꓸ ꓡꓰꓹ ꓟ ꓕꓱ ꓡꓰ ꓢꓳꓼˍ ꓡꓳ= ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓕꓱ ꓡꓰ ꓬꓰ ꓢꓴ ꓮꓽ ꓘꓶꓸ ꓙꓳˍ ꓡꓳ= ꓲꓢꓲꓢ ꓜꓴ ꓐꓴꓲ ꓮꓡ-ꓘꓮꓲꓓꓮ ꓜꓴ ꓐꓴ ꓕꓱ ꓡꓲꓳ ꓫꓵꓽ ꓬꓲ ꓜꓴ ꓬꓲ ꓟꓯꓼ ꓮꓽ ꓟꓬꓹ ꓕꓱ ꓡꓰ ꓙꓳˍ ꓡꓳ= ꓖꓳ ꓟ ꓑꓶꓸ ꓓꓴ ꓕꓲꓽ ꓐꓱ ꓠꓬ ꓞꓳ ꓤꓽ ꓢꓰꓼˍ ꓟ ꓚꓰꓹ ꓔꓯ "ꓧꓳꓡꓬ ꓪꓮꓣ" ꓐꓰ ꓢꓲꓽ ꓫꓬꓹ ꓟ ꓢꓰꓼ ꓡꓯꓽ ꓘꓳ ꓓꓶꓽ ꓡꓯꓽ ꓘꓳꓹ ꓟ ꓐꓰ ꓟꓬꓱ ꓖꓶ ꓔ ꓟꓹ ꓟꓲ ꓙꓳ ꓡꓳˍ ꓡꓳ= ꓟꓬꓹ ꓠꓬꓲ ꓐꓶꓹ ꓠꓬꓲ ꓙꓲ-ꓢꓴ ꓢꓲꓺ ꓤꓼ ꓐꓴ ꓐꓰ ꓟꓴ-ꓢ-ꓡꓲꓟ ꓐꓴ ꓠꓬꓲ ꓗꓴꓸ ꓚꓸ ꓗꓪ ꓚꓣꓴꓢꓮꓓꓰ ꓐꓯꓹ ꓟ ꓢꓰꓼ ꓡꓰ ꓘꓳꓹ ꓓꓶꓽ ꓡꓯꓽ ꓘꓳꓹ ꓟ ꓮꓽ ꓟꓬꓹ ꓬꓰ ꓡꓳ ꓡꓲꓳ= ꓖꓳ ꓟ ꓪꓴꓸ ꓠꓬꓲ ꓢꓰꓼ ꓡꓯꓽ ꓘꓳ ꓓꓶꓽ ꓡꓯꓽ ꓘꓳ ꓗꓪ ꓛꓲ ꓗꓶ ꓡꓰꓹ ꓟ ꓠꓬ ꓟꓽ ꓜꓳꓹ ꓟ ꓠꓯꓸꓼ ꓗꓪ ꓧꓶꓸ ꓡꓰꓹ ꓟ ꓠꓯꓸꓼ ꓗꓪ ꓛꓲ ꓡꓰꓹ ꓟ ꓥ ꓪ=

ꓢꓴ-ꓩꓲ ꓐꓴ ꓙꓵ ꓠꓲꓹ ꓠꓯꓸꓼ ꓗꓪ ꓢꓯꓼ ꓕꓵꓼˍ ꓟ 3 ꓝꓸ ꓙꓳ ꓡꓳ= ꓪꓴ-ꓢ ꓣꓱꓽ ꓛꓲꓽ ꓔꓯ꓾ ꓪꓴ-ꓢ ꓶꓽ ꓤꓼ ꓫꓱꓸ ꓤꓼ ꓔꓯ ꓟꓽ ꓑꓯꓹ ꓟꓶ ꓠ ꓗꓽ ꓕꓸ ꓟ ꓮꓽ ꓙꓵꓽ ꓔꓯ ꓣꓴ ꓐ ꓡꓰ ꓠ ꓢꓯꓼ ꓕꓵꓼ ꓠꓹ ꓟ 2ꓸ ꓪꓴ-ꓢ ꓡꓰ ꓖꓶꓽ ꓡꓹ ꓟ ꓣꓱꓽ ꓛꓲꓽ ꓔꓯ ꓘꓳꓹ ꓣꓴ ꓟꓶ ꓠꓹ ꓟ ꓢꓯꓼ ꓕꓵꓼ ꓠꓹ ꓟ 3ꓸ ꓪꓴ-ꓢ ꓐꓯ ꓘꓶꓽ ꓔꓯ ꓔꓱꓹ ꓕꓽ ꓠꓬꓲꓹ ꓟ ꓢꓲꓺ ꓡꓲꓹ ꓐꓰ ꓕꓬ ꓢꓲ ꓪꓽ ꓘꓴꓹ ꓟ ꓕꓱ ꓡꓰ ꓬꓰ ꓠꓹ ꓟ ꓐꓱ ꓶ ꓥˍ ꓡꓳ= ꓕꓲꓽ ꓐꓱ ꓠꓬ 3 ꓦꓬꓼ ꓘꓴꓹ ꓟ꓾ 7 ꓦꓬꓼ ꓘꓴꓹ ꓟ 30 ꓦꓬꓼ ꓘꓴꓹ ꓟ ꓕꓱ ꓡꓰ ꓬꓰꓹ ꓡꓳ= ꓕꓱ ꓡꓰ ꓦꓺ ꓕꓲꓽ ꓒꓳꓹ ꓔꓯ ꓢꓲ ꓢꓯꓼ ꓕꓵꓼ ꓢꓲ ꓕꓲ ꓝꓸ ꓖꓴ ꓕꓲꓽ ꓝꓸ ꓟꓬꓽ ꓠꓬꓲ ꓐꓶꓹ ꓠꓬꓲ ꓪꓴ-ꓢ ꓠꓱ ꓠꓲꓹ ꓚꓱꓹ ꓠꓯꓸꓼ ꓗꓪ ꓮꓽ ꓙꓵꓽ ꓕꓲꓽ ꓠꓲꓹ ꓕꓲꓽ ꓪꓼ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓢꓲ ꓢꓯꓼ ꓕꓵꓼ ꓐ ꓡ ꓠꓹ ꓟ ꓐꓱ ꓶ ꓢꓯꓼ ꓕꓵꓼˍ ꓟ ꓥ ꓪ= ꓪꓴ-ꓢ ꓠꓲꓹ ꓡꓶꓽ ꓔꓯ ꓕꓲꓽ ꓠꓲꓹ ꓕꓲꓽ ꓪꓼ ꓢꓯꓼ ꓕꓵꓼ ꓠꓹ ꓟ ꓔꓯ ꓪꓴꓸ ꓓꓵ ꓛꓹ ꓢꓲ ꓢꓯꓼ ꓕꓵꓼˍ ꓟ ꓥ ꓪ= ꓐꓯ ꓡꓳꓹ ꓡꓰꓹ ꓟ ꓡꓰ ꓐꓰ ꓕꓲꓽ ꓡꓰ ꓪꓴ-ꓢ ꓣꓱꓽ ꓛꓲꓽ ꓪꓴ-ꓢ ꓶꓽ ꓤꓼ ꓫꓱꓸ ꓤꓼ ꓔꓯ ꓟꓽ ꓘꓳꓹ ꓣꓴ ꓪ ꓠ ꓗꓽ ꓕꓸ ꓟ ꓮꓽ ꓙꓵ ꓔꓯ ꓣꓴ ꓡꓳ ꓗꓶ ꓠꓹ ꓟ ꓐꓱ ꓶ ꓐꓯꓹ ꓕꓯ ꓠꓬ ꓠꓲꓹ ꓟ ꓒꓳꓹ ꓡꓰꓼˍ ꓟ ꓠꓲꓹ ꓟ ꓡꓶꓸ ꓔ ꓟ 1 ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓛꓳꓹ ꓟ ꓠ ꓠꓹ ꓔ ꓟ 3ꓸ ꓠꓬ ꓠꓲꓹ ꓟ ꓫꓵ ꓠꓹ ꓟ ꓮ ꓕꓯꓽ ꓥˍ ꓟꓲ ꓠꓲꓹ ꓟ ꓟꓽ ꓐꓬ ꓡꓰ ꓠꓹ ꓟ 4ꓸ ꓲ-ꓢ ꓐꓯꓹ ꓟ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓰ ꓐꓯ ꓘꓶ ꓔꓯ ꓠ ꓠ ꓠꓹ ꓟ ꓢꓯꓼ ꓕꓵꓼ ꓠꓹ ꓟ꓾ ꓙꓽ ꓣꓳꓹ ꓟ ꓠꓲꓹ ꓟ ꓙꓳ ꓠꓹ ꓟ꓾ ꓠꓴꓹ ꓟ ꓠꓲꓹ ꓟ ꓙꓳ ꓠꓹ ꓟ꓾ ꓫꓸ ꓙꓲ ꓟꓶ ꓙꓲ ꓓꓴ ꓔꓯ ꓔꓳꓹ ꓧꓪꓸ ꓡꓰ ꓠꓹ ꓟ ꓔꓱ ꓡꓰ ꓢꓯꓼ ꓕꓵꓼ ꓠꓹ ꓟ ꓐꓱ ꓶ ꓥˍ ꓡꓳ=  ꓖꓳ ꓟ ꓪꓴ ꓠꓬꓲ ꓟꓴ-ꓢ-ꓡꓲꓟ ꓛꓳꓹ ꓟ ꓥ ꓕ ꓑꓳꓸ ꓠꓬ ꓢꓲꓺ ꓒꓽ ꓬꓰ-ꓢꓴ ꓔꓯ ꓪꓴꓸ ꓓꓵ ꓛꓹ ꓢꓲ ꓛꓳꓹ ꓟ ꓥˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓢꓲꓺ ꓒꓽ ꓬꓰ-ꓢꓴ ꓔꓯ ꓬꓲ ꓪꓽ ꓙꓵ ꓠꓲꓹ ꓔꓯ ꓔꓷ ꓢꓴ ꓟꓴ-ꓧ-ꓟꓮꓓ ꓓꓳ ꓡꓰ ꓠꓬ ꓬꓰ-ꓢꓴ ꓠꓬ ꓠꓳꓸ 2 ꓪꓴꓽˍ ꓟ ꓟꓷꓽ ꓠꓷ ꓝꓸ ꓒꓽ ꓓꓽ ꓟ ꓥˍ ꓡꓳ=

ꓦꓺ ꓕꓲꓽ ꓒꓳꓹ ꓔꓯ ꓢꓲ ꓗꓪ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓡꓰ ꓟꓸ ꓖꓶ ꓡꓹ ꓟ ꓐꓯꓹ ꓟ ꓔꓯ ꓕꓲꓽ ꓝꓸ ꓖꓴ ꓕꓲꓽ ꓝꓸ ꓠ ꓠ ꓠꓹ ꓟ ꓛꓳ ꓠꓹ ꓟ ꓐꓱ ꓶ ꓥˍ ꓡꓳ= ꓚꓵꓸ ꓛꓬꓽ ꓠꓲꓹ ꓫꓵꓹ ꓟ ꓡꓰ ꓐꓰ ꓬꓰ ꓟꓽ ꓓ= ꓕꓲꓽ ꓝꓸ ꓧꓪꓸ ꓡꓰ ꓠꓬ ꓕꓲꓽ ꓝꓸ ꓓꓯ ꓢꓲ ꓢꓯꓼ ꓕꓵꓼ ꓠ ꓗˍ ꓡꓳ= ꓢꓴ-ꓩꓲ ꓐꓴ ꓠꓬ ꓢꓲꓺ ꓡꓲꓹ ꓔ ꓟ ꓕꓲꓽ ꓔꓶꓸ ꓗꓪ ꓚꓵꓸ ꓛꓬꓽ ꓕꓲꓽ ꓣꓳ ꓔꓵꓹ ꓡꓰ ꓪꓽ ꓘꓴꓹ ꓟ ꓕꓯ ꓬꓰ ꓠ ꓡꓳꓼ ꓥ= ꓟꓬꓽ ꓠꓬꓲ ꓐꓶꓹ ꓠꓬꓲ ꓠꓯꓼ ꓠꓯꓼ ꓫꓵ ꓫꓵ ꓪꓽ ꓘꓴˍ ꓟ ꓟꓶꓽ ꓘꓶꓼ ꓝꓲꓸ ꓟꓶ ꓟꓲ ꓖꓱ ꓡꓰ ꓕꓯ ꓪꓽ ꓘꓴꓹ ꓟ ꓕꓱ ꓟ ꓔꓯ ꓢꓲꓺ ꓡꓲꓹ ꓟ ꓔꓶꓸ ꓗꓪ ꓙꓰ ꓢꓲ ꓪꓽ ꓘꓴ ꓠꓹ ꓟ ꓐꓱ ꓶ ꓟꓸ ꓔ ꓟ ꓐꓯ ꓔ ꓟ ꓙꓳˍ ꓡꓳ= ꓢꓴ-ꓩꓲ ꓐꓴ ꓠꓬ ꓪꓽ ꓘꓴ ꓢꓶꓽ ꓕꓱ ꓡꓲꓳ ꓫꓵꓽ ꓔꓯ ꓘꓴ ꓠ ꓡꓳꓼ ꓥ= ꓬꓲ ꓪꓽ ꓪꓽ ꓘꓴ ꓢꓶꓽ ꓠꓬ 99ꓹ 66 ꓐꓰ 33 ꓐꓹ ꓟ ꓪꓽ ꓘꓴ ꓢꓶꓽ ꓥˍ ꓡꓳ= ꓬꓲ ꓪꓽ ꓕꓱ ꓟ ꓬꓲ ꓢꓶꓽ ꓔꓯ ꓵꓹ ꓕꓯ ꓠꓬ" ꓪꓴ-ꓢ ꓟꓬꓱ ꓓꓳꓽ ꓠꓬ ꓕꓲꓽ ꓞꓲꓼ ꓕꓲꓽ ꓑ ꓙꓳ ꓔꓬꓹ ꓝꓲ" ꓐꓯꓹ ꓟ ꓔꓯ 33 ꓧꓪꓹ ꓐꓯ "ꓪꓴ-ꓢ ꓟꓬꓱ ꓓꓳꓽ ꓔꓯ ꓫꓱꓸ ꓖꓶꓽ ꓔꓬ ꓡꓳ" ꓐꓯꓹ ꓟ ꓔꓯ 33 ꓧꓪꓹ ꓐꓯ "ꓪꓴ-ꓢ ꓠꓬ ꓙꓳꓹ ꓟꓽ ꓙꓳꓹ ꓟ ꓮꓽ ꓙꓵꓽ ꓕꓯꓽ ꓢꓲ ꓗꓪ ꓟꓴ ꓖꓴ ꓡꓰˍ ꓡꓳ" ꓐꓯꓹ ꓟ ꓔꓯ 33 ꓧꓪꓹ ꓐꓯ ꓠ ꓗˍ ꓡꓳ=                                                                                                                                        

Add new comment

6 + 0 =