ꓧꓲꓠ-ꓓꓴ ꓙꓵ ꓠꓲꓹ ꓚꓱꓹ

ꓪꓴ-ꓢ ꓕꓲꓽ ꓟ ꓠꓯꓸꓼ ꓗꓪ 3 ꓣꓳ ꓙꓳˍ ꓡꓳ= ꓣꓳ ꓙꓲ-ꓢꓴ ꓢꓲ ꓤꓼ ꓐꓴ ꓙꓵ ꓔꓬ ꓟ ꓡꓰ ꓐꓰ 3 ꓣꓳ ꓕꓲ ꓗꓳ ꓓꓱ ꓐꓯꓹ ꓟ ꓙꓳ ꓐꓶ= ꓖꓳ ꓟ 3 ꓣꓳ ꓠꓬ ꓪꓴ-ꓢ ꓢꓯꓼ ꓪꓽ ꓔꓯ ꓐꓱ ꓦꓹ ꓟ ꓒꓯꓽ ꓦ ꓟ ꓥˍ ꓡꓳ= ꓚꓰꓼ ꓔ ꓟ ꓢꓯꓼ ꓪꓽ ꓙꓳꓹ ꓟ ꓔꓯ ꓐꓣꓮꓧꓟꓮ(ꓐ-ꓣ-ꓟ) ꓟꓬꓱ ꓖꓶ ꓔ ꓢꓲ꓾ ꓞꓳ ꓤꓽ ꓔꓯ ꓙꓲꓹ ꓟ ꓚꓱꓹ ꓣꓱ ꓛꓲ ꓖꓶꓹ ꓟ ꓔꓯ ꓠꓬ ꓦꓲꓢꓧꓮꓠꓴ (ꓪꓲ-ꓫ-ꓠꓴ) ꓐꓰ ꓕꓱ ꓡꓱ ꓐꓯˍ ꓡꓳ= ꓐꓯ ꓟꓵ ꓘꓶꓽ ꓫꓵꓽ ꓘꓶꓽˍ ꓟ ꓙꓵꓽ ꓪꓽ ꓙꓳ ꓢꓴ ꓔꓯ ꓠꓬ ꓢꓲꓦꓮ(ꓢꓲ-ꓪ) ꓥ ꓠꓬ ꓢꓧꓲꓦꓮ(ꓫ-ꓪ) ꓐꓰ ꓕꓱ ꓡꓱ ꓟꓬꓱ ꓖꓶꓽ ꓔ ꓡꓳ= ꓕꓱ ꓟ 3 ꓣꓳ ꓠꓯꓸꓼ ꓗꓪ ꓟ ꓦꓲꓢꓧꓮꓠꓴ (ꓪꓲ-ꓫ-ꓠꓴ) ꓐꓯꓹ ꓟ ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤꓽ ꓫꓸ ꓙꓲ ꓟꓶꓽ ꓙꓲ ꓓꓴ ꓔꓳꓹ ꓜꓳꓽ ꓔꓬ ꓕꓯꓽ ꓮ ꓕꓯꓽ ꓥˍ ꓟꓲꓻ ꓟꓲ ꓠꓯ ꓗꓪ ꓬꓯꓼ ꓡ ꓢꓲ ꓚꓧꓬꓴ ꓙꓹ ꓟ ꓬꓰˍ ꓡꓳ= ꓠꓱ ꓐꓯꓼ ꓕꓲ ꓛꓱꓽ ꓔꓲꓸ ꓢꓲ ꓣꓳ ꓐꓯ ꓥ ꓐꓯ ꓠꓬ ꓬꓲ ꓠꓬ ꓚꓬꓴ-ꓢꓲ-ꓒꓽ ꓥ ꓡꓳ= ꓖꓳ ꓡꓰ ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤꓽ ꓒꓬꓱꓼ ꓡꓹ ꓟ ꓔꓯ ꓙꓵ ꓔꓬ ꓟ ꓙꓳ ꓐꓶ= ꓖꓳ ꓡꓱ ꓥ- ꓟꓲ ꓧꓲꓠ-ꓓꓴ ꓙꓵ ꓠꓲꓹ ꓗꓪ ꓠꓱꓸ ꓐꓯꓼ ꓢꓲ ꓫꓬ ꓢꓴ ꓐꓴ ꓮ ꓟꓬ ꓔꓯ ꓥˍ ꓟꓲ ꓙꓵ ꓔꓬ ꓟ ꓙꓳ ꓐꓶ=

ꓟꓲ ꓠꓯ ꓗꓪ ꓢꓲ ꓫꓬ ꓕꓳꓽ ꓶꓽ ꓗꓪ ꓟ ꓠꓳ-ꓪ ꓕꓲꓽ ꓞꓲꓼꓹ ꓗꓪ ꓡꓰ ꓐꓰ ꓬꓲ ꓙꓬ ꓙꓵꓹ ꓟ ꓔꓯ ꓧꓲꓠ-ꓓꓴ ꓙꓵ ꓠꓲꓹ ꓗꓪ ꓥ_ ꓟꓲ ꓟꓳ ꓪ ꓓˍ ꓡꓳ= ꓖꓳ ꓟ ꓑꓶꓸ ꓓꓴ ꓠꓲ ꓡꓳ ꓬꓰ ꓟ ꓙꓵꓹ ꓗꓪ ꓮꓽ ꓠꓵ ꓕꓯꓽ ꓚꓵ ꓚꓵꓻ ꓲꓠꓓꓲꓮ ꓟꓵꓽ ꓒ ꓕꓲ ꓗꓪ ꓮꓢꓲꓮ ꓟꓵꓽ ꓗꓪ ꓬꓲ ꓙꓬ ꓙꓵꓽ ꓡꓳꓹ ꓟ ꓚꓵ ꓚꓵ ꓙꓳ ꓐꓶꓺ ꓐꓯ ꓟ ꓬꓲ ꓢꓷ ꓡꓰ ꓓꓴ ꓕꓲꓽ ꓟ ꓥ ꓐꓶ= ꓧꓲꓠ-ꓓꓴ ꓙꓵ ꓠꓲꓹ ꓠꓯꓸꓼ ꓗꓪ ꓐꓳ ꓔ ꓟ ꓠꓬ ꓲꓠꓓꓲꓮ ꓟꓵ ꓗꓪ ꓓꓽ ꓪꓴꓸ ꓪꓸ ꓔꓲꓸ ꓠꓬ ꓟꓮꓠꓴ(ꓟ-ꓠꓴꓼ) ꓥ ꓢꓲ ꓐꓚ 3100 ꓘꓳꓼ ꓛꓲ ꓕꓯꓽ ꓙꓵꓽ ꓡꓳꓹ ꓡꓰ ꓫꓵꓽ ꓥ ꓐꓶ= ꓖꓳ ꓡꓰ ꓢꓲ ꓠꓬꓲ ꓖꓳ ꓕꓲꓽ ꓙꓵꓹ ꓗꓪ ꓬꓲ ꓙꓬ ꓙꓵꓽ ꓡꓳꓹ ꓡꓰ ꓫꓵꓽ ꓥ ꓐꓶ= ꓖꓳ ꓡꓰ ꓢꓲ ꓲꓠꓓꓲꓮ ꓖꓳ ꓟꓶꓸ ꓕꓲꓽ ꓛꓱꓽ ꓔꓲꓸ ꓢꓲ ꓪꓽ ꓜꓱ ꓕꓯꓽ ꓢꓲꓽ ꓡꓲ ꓓꓽ ꓟ ꓦꓽ ꓠ ꓗꓪ ꓛꓲ ꓬꓲ ꓙꓬ ꓙꓵꓽ ꓡꓳꓹ ꓡꓰ ꓫꓵꓽ ꓥ ꓐꓶ=

ꓧꓲꓠ-ꓓꓴ ꓙꓵ ꓠꓲꓹ ꓠꓯꓸꓼ ꓗꓪ ꓟꓲ ꓠꓯ ꓕꓱ ꓟ ꓠꓬ ꓐꓬ ꓡꓰ ꓝꓲꓹ ꓟ ꓬꓲ ꓙꓵꓹ ꓙꓳ꓾ ꓝꓮꓲ ꓕꓲꓽ ꓧꓪꓹ ꓫꓬ ꓑꓱꓹ ꓟ ꓬꓲ ꓙꓵꓹ ꓙꓳ ꓥꓺ ꓐꓰ ꓕꓱ ꓡꓱ ꓐꓯˍ ꓡꓳ= ꓪꓴ-ꓢ ꓠꓬ ꓟꓲ ꓠꓯ ꓗꓪ ꓟꓽ ꓙꓲꓹ ꓟ ꓞꓳ ꓤꓽ ꓟꓬ ꓡꓹ ꓠꓬ ꓟꓲ ꓠꓯ ꓔꓯ ꓐꓬ ꓡꓰ ꓝꓲ ꓢꓲ ꓝꓮꓲ ꓕꓲ ꓧꓪꓹ ꓟꓲ ꓠꓯ ꓔꓯ ꓫꓬ ꓑꓱꓹ ꓟ ꓞꓲ ꓒꓴ ꓗꓷꓹ ꓟ ꓙꓳ ꓐꓶ= ꓪꓴ-ꓢ ꓖꓳ ꓡꓰ ꓟꓲ ꓠꓯ ꓔꓯ ꓫꓬ ꓑꓱꓹ ꓕꓯ ꓟꓲ ꓠꓯ ꓞꓳ ꓤꓽ ꓮꓽ ꓙꓵ ꓔꓯ ꓐꓣꓮꓧꓟꓮ( ꓐ-ꓣ-ꓟ) ꓬꓲ ꓠꓯꓸꓼ ꓗꓪ ꓮꓽ ꓙꓲ ꓔꓯꓻ ꓘꓴ ꓜꓲꓼ ꓔ ꓬ ꓜꓲꓼ ꓔ ꓡꓳ= ꓖꓳ ꓟ ꓠꓬ ꓟꓬꓱꓽ ꓬꓰ ꓢꓴ ꓪꓴꓽ ꓧꓶ ꓢꓲ ꓪꓴꓽ ꓧꓶ ꓠꓹ ꓟ ꓡꓰ ꓐꓰ ꓕꓲꓽ ꓡꓰ ꓥˍ ꓡꓳ= ꓟꓲ ꓠꓯ ꓞꓳ ꓤꓽ ꓠꓬ ꓟꓽ ꓙꓲꓹ ꓟ ꓬꓰꓹ ꓟ ꓪꓴꓸ ꓠꓬꓲ ꓪꓴꓽ ꓧꓶ ꓡꓰ ꓪ= ꓖꓳ ꓡꓰ ꓠꓬꓲ ꓪꓴ-ꓢ ꓠꓬ ꓬꓲ ꓠꓯꓸꓼ ꓗꓪ ꓕꓲꓽ ꓑꓹ ꓜꓼ ꓬ ꓜꓲꓼ ꓢꓲ ꓘꓴ ꓜꓲꓼ ꓢꓲ ꓠꓬꓲꓻ ꓟꓲ ꓠꓯ ꓔꓯ ꓞꓲꓽ ꓩꓴˍ ꓟ ꓥ_ ꓡꓳ= ꓟꓲ ꓠꓯ ꓔꓯ ꓞꓲ ꓒꓴ ꓗꓷ ꓬꓲ ꓫꓵꓼ ꓫꓬꓹ ꓑꓱ ꓓꓳ ꓡꓰ ꓠꓬ ꓞꓳ ꓤꓽ ꓦ ꓮ ꓙꓲ ꓔꓯ ꓟꓲ ꓠꓯ ꓗꓪ ꓝꓮꓲ ꓕꓲ ꓧꓪꓹ ꓔꓬ ꓝꓲꓹ ꓟ ꓥˍ ꓡꓳ=

ꓧꓲꓠ-ꓓꓴ ꓙꓵ ꓠꓲꓹ ꓠꓯꓸꓼ ꓗꓪ ꓞꓳ ꓤꓽ ꓕꓲꓽ ꓣꓳ ꓠꓬ ꓦ ꓐꓰ ꓧꓪꓽ ꓖꓳ ꓓꓱꓽ ꓠꓬꓲꓽ ꓫꓵꓽ ꓐꓯꓹ ꓡꓰꓽ ꓘꓳ ꓢꓲ ꓞꓳ ꓤꓽ ꓒꓬꓱ ꓡꓹ ꓟ ꓥˍ ꓡꓳ= ꓦ ꓠꓬ ꓮ ꓕꓯꓽ ꓥˍ ꓟꓲ ꓫꓵꓹ ꓟ ꓐꓯꓹ ꓟ ꓟꓽ ꓙꓳ= ꓕꓱ ꓟ ꓦ ꓠꓬ ꓢꓯꓼ ꓟꓬ ꓟꓽ ꓙꓳꓹ ꓟ ꓞꓳ ꓤꓽ ꓧꓪꓽ ꓗꓳ ꓓꓱ ꓗꓪ ꓓꓵꓽ ꓡꓰ ꓠꓬ ꓢꓯꓸ ꓡꓹ ꓟ ꓕꓱ ꓡꓰ ꓒꓬꓱꓼ ꓡꓹ ꓟ ꓥˍ ꓡꓳ= ꓦ ꓢꓲ ꓫꓬ ꓡꓰ ꓠꓹ ꓟ ꓝꓴꓲꓸ ꓬꓓꓠ ꓔ ꓟ ꓙꓳ ꓠꓬꓲ ꓔ ꓟ ꓡꓰ ꓟꓽ ꓞꓲꓺ ꓪꓴ-ꓢ ꓐꓱ ꓶꓽ ꓬꓲ ꓙꓵꓹ ꓡꓯꓼ ꓙꓱ ꓢꓲ ꓟꓬꓱꓽ ꓬꓰ ꓠꓬꓲ ꓔ ꓥꓻ ꓐꓰ ꓕꓱ ꓡꓱ ꓐꓯˍ ꓡꓳ=

Add new comment

4 + 4 =