ꓧꓲꓠ-ꓓꓴ ꓙꓵ ꓠꓲꓹ ꓠꓯꓸꓼ ꓗꓪ ꓟ ꓣ-ꓟ ꓚꓱꓹ

ꓣ-ꓟ ꓬꓲ ꓐꓹꓐ ꓪꓸ ꓔꓲꓸ ꓓ-ꓢ-ꓣ-ꓕ ꓠꓬ ꓣ-ꓟ ꓔꓯ ꓪꓸ ꓔꓲꓸ ꓙꓵꓽ ꓪꓽ ꓖꓶ ꓠꓲꓹ ꓫꓹ ꓟꓲ ꓪꓸ ꓔꓲꓸ ꓟ ꓥꓹ ꓟ ꓗꓮꓲ-ꓗꓰ-ꓬꓲ ꓔꓯ ꓫꓸ ꓪ ꓘꓶꓽ ꓖꓶꓽ ꓦꓹ ꓟ ꓙꓳˍ ꓐꓷ= ꓪꓸ ꓔꓲ ꓟ 3 ꓣꓳ ꓤꓽ 4 ꓣꓳ ꓗꓪ ꓚꓳꓸ ꓗꓮꓲ-ꓗꓰ-ꓬꓲ ꓤꓽ ꓟꓽ ꓓ ꓣꓳ ꓢꓴ ꓐ-ꓣ-ꓔ ꓔꓯ ꓢꓲ ꓪꓸ ꓔꓲ ꓙꓵꓽ ꓪꓽ ꓖꓶꓽ ꓠꓹ ꓟ ꓐꓯ ꓞꓲꓹ ꓔ ꓟ ꓙꓳꓹ ꓟ ꓪꓴꓸ ꓠꓬꓲ ꓣ-ꓟ ꓔꓯ ꓠꓬ ꓟꓵꓽ ꓗꓪ 14 ꓘꓳꓼ ꓔꓬ ꓠꓹ ꓟ ꓐꓱ ꓶꓽ ꓖꓼ ꓓꓳ ꓗꓷꓳ= ꓪꓸ ꓔꓲꓸ ꓟ ꓗꓮꓲ-ꓗꓰ-ꓬꓲ ꓠꓬ ꓪꓸ ꓔꓲꓸ ꓓ-ꓢ-ꓣ-ꓔ ꓔꓯ ꓢꓰꓼ ꓡꓯꓽ ꓘꓳ ꓓꓶꓽ ꓡꓯꓽ ꓘꓳꓹ ꓟ ꓗꓪ ꓚꓬꓴ ꓙ ꓗꓷ ꓟ ꓪꓴꓸ ꓠꓬꓲ ꓐꓯ ꓘꓶꓽ ꓐꓯ ꓞꓲꓹ ꓦˍ ꓟ ꓕꓱ ꓡꓰˍ ꓫꓵꓽ ꓥ ꓪ= ꓖꓳ ꓡꓰ ꓢꓲ ꓠꓬꓲ ꓣ-ꓟ ꓔꓯ ꓠꓬ ꓟꓵꓽ ꓗꓪ ꓕꓱ ꓡꓰ ꓖꓼ ꓓꓳ ꓗꓷˍ ꓠꓬꓲ  ꓣ-ꓟ ꓠꓬ ꓢꓲ-ꓔ ꓐꓰ ꓕꓲꓽ ꓪꓼ ꓬꓲ ꓠꓬꓲ ꓤꓽ ꓡꓮꓗ-ꓫ-ꓟ-ꓠ ꓐꓰ ꓟꓵꓽ ꓗꓪ ꓔꓬ ꓡꓳ= ꓕꓲꓽ ꓠꓬꓲ ꓙꓳꓹ ꓕꓯꓽ ꓐ-ꓣ-ꓔ ꓶꓽ ꓤ ꓟ ꓟꓵꓽ ꓗꓪ ꓙ ꓫꓱꓽ ꓔꓬ ꓕꓯ ꓬꓲ ꓐꓹ ꓐ ꓓ-ꓢ-ꓣ-ꓔ ꓠꓬ ꓫꓵꓳ= ꓖꓳ ꓡꓰ ꓥꓹ ꓟꓲ ꓐ-ꓣ-ꓔ ꓠꓬ ꓪꓸ ꓔꓲꓸ ꓬꓰ ꓠꓲꓹ ꓟ ꓫꓵ= ꓖꓳ ꓟ ꓪꓴꓸ ꓠꓬꓲ ꓬꓲ ꓟꓹ ꓟ ꓥꓹ ꓟ ꓗꓮꓲ-ꓗꓰ-ꓬꓲ ꓔꓯ ꓣ-ꓟ ꓔꓯ ꓢꓲ ꓪꓸ ꓔꓲꓸ ꓬꓲ ꓝꓲ ꓠꓹ ꓟ ꓐꓱ ꓶꓽ ꓐꓯˍ ꓡꓳ= ꓖꓳ ꓟ ꓡꓰ ꓐꓰ ꓕꓲꓽ ꓡꓰ꓾ ꓣ-ꓟ ꓔꓯ ꓟꓵꓽ ꓗꓪ ꓚꓳ ꓧꓳꓽ ꓓꓳ ꓡ ꓢꓲ ꓣ-ꓟ ꓔꓯ ꓪꓸ ꓔꓲꓸ ꓣꓱꓽ ꓝꓲ ꓠꓹ ꓟ ꓬꓰ ꓓꓴ ꓥꓳꓻ ꓐꓰ ꓑ ꓫꓬꓽ ꓐꓴ ꓔꓯ ꓥˍ ꓟꓲ ꓕꓱ ꓡꓰ ꓐꓯ ꓔ ꓟ ꓙꓳˍ ꓡꓳ= ꓖꓳ ꓡꓰ ꓥˍ ꓟꓲ ꓣ-ꓟ ꓠꓬ ꓬꓲ ꓐꓹ ꓐ ꓥꓹ ꓟ ꓪꓸ ꓔꓲꓸ ꓓ-ꓢ-ꓣ-ꓔ ꓐꓯ ꓘꓶꓽ ꓔꓯ ꓠ ꓠꓹ ꓢꓲ ꓟꓵꓽ ꓗꓪ ꓐꓰ ꓡꓳ ꓒꓱ ꓗꓪ ꓡꓽ ꓠꓲꓹ ꓟꓽ ꓫꓵ= ꓬꓲ ꓐꓽ ꓫꓵ ꓥˍ ꓟꓲ ꓬꓲ ꓐꓹ ꓐ ꓐꓯ ꓘꓶꓽ ꓔꓯ ꓠ ꓠꓹ ꓓꓴ ꓥꓻ ꓐꓰ ꓕꓱ ꓡꓰ ꓓꓵ ꓙ ꓢꓲ ꓡꓳ ꓒꓱ ꓗꓪ ꓟꓽ ꓡꓽ ꓡꓹ ꓟ ꓥˍ ꓡꓳ= ꓖꓳ ꓕꓯ ꓐ-ꓣ-ꓔ ꓠꓬ ꓮꓽ ꓡꓰ ꓬꓰ ꓥˍ ꓐꓯ ꓠꓬ ꓣ-ꓟ ꓛꓵ ꓠꓲ ꓔꓯ ꓣꓴ ꓔ ꓢꓲ ꓬꓲ ꓠꓬ ꓖꓳ ꓟ ꓔꓯ ꓓꓱꓼ ꓔ ꓢꓲ ꓣ-ꓟ ꓬꓲ ꓛꓵ ꓬꓲ ꓠꓬ ꓗꓴꓷ ꓔꓯ ꓩꓴˍ ꓡꓳ=

ꓖꓳ ꓡꓰ ꓣ-ꓟ ꓟꓵꓽ ꓗꓪ ꓔꓬ ꓕꓯ ꓪꓽ ꓘꓴ ꓙꓵꓹ ꓗꓪ ꓪꓽ ꓘꓴˍ ꓕꓯ ꓬꓲ ꓔꓯ ꓠꓲꓽ ꓪꓸ ꓔꓲꓸ ꓢ ꓓꓯꓼ ꓡꓰ ꓘꓶ ꓡꓶˍ ꓟ ꓙꓳˍ ꓡꓳ= ꓖꓳ ꓡꓰ ꓘꓶ ꓡꓶ ꓡꓹ ꓟ ꓠꓲꓽ ꓪꓸ ꓔꓲꓸ ꓔꓯ ꓬꓲ ꓠꓬꓲ ꓤꓽ ꓥꓹ ꓟ ꓡꓮꓗ-ꓫ-ꓟ-ꓠ ꓐꓰ ꓬꓲ ꓠꓬ ꓠꓲ ꓪꓸ ꓔꓲˍ ꓐꓰ ꓮ ꓕꓯꓽ ꓥˍ ꓟꓲ ꓠꓲ ꓪꓸ ꓔꓲˍ ꓐꓰ ꓢꓰꓼ ꓡꓯꓽ ꓘꓳ ꓖꓼ ꓓꓳ ꓩꓴꓹ ꓟ ꓮ ꓕꓯꓽ ꓥˍ ꓟꓲ ꓬꓰ ꓔꓬ ꓟ ꓥ ꓪ= ꓢꓰꓼ ꓡꓯꓽ ꓘꓳ ꓓꓶꓽ ꓡꓯꓽ ꓘꓳꓹ ꓟ ꓗꓪ ꓞꓳꓸ ꓡꓰ ꓟ ꓠꓲꓽ ꓟ ꓢꓳ-ꓳ-ꓑ-ꓠ-ꓗ ꓠꓬ ꓡꓮꓠ-ꓗꓼ ( ꓢ-ꓣꓲ-ꓡꓮꓠ-ꓖ) ꓗꓴꓷ ꓪꓸ ꓔꓲꓸ ꓥˍ ꓟ ꓣ-ꓪ-ꓠ ꓔꓯ ꓢꓲ-ꓔ ꓮꓽ ꓘꓶꓸ ꓐꓲꓹ ꓟ ꓚꓱꓹ ꓟꓸ ꓖꓶˍ ꓡꓳ= ꓖꓳ ꓡꓰ ꓢꓲ ꓪꓸ ꓔꓲꓸ ꓪ-ꓣ-ꓠ ꓠꓬ ꓢꓲ-ꓔ ꓔꓯ ꓪ ꓠ ꓗꓪ ꓛꓲ ꓢꓯꓼ ꓕꓵꓼ ꓓꓴ ꓥˍ ꓐꓰ ꓠꓲꓹ ꓟ ꓓꓵꓽ ꓙꓽ ꓞꓲꓹ ꓔ ꓡꓳ= ꓖꓳ ꓡꓰ ꓢꓲ ꓕꓲ ꓠꓬꓲ ꓙꓳˍ ꓕꓯ ꓪꓸ ꓔꓲꓸ ꓪ-ꓣ-ꓠ ꓠꓬ ꓬꓲ ꓕꓲ ꓠꓱ ꓔꓯ ꓮꓽ ꓘꓶꓸ ꓐꓲꓹ ꓟ ꓛꓵ ꓔꓲꓽ ꓟ ꓑꓶꓸ ꓡꓰ ꓝꓲ ꓢꓲ ꓣ-ꓟ ꓐꓰ ꓢꓲ-ꓔ ꓟꓲꓽ ꓕꓯꓽ ꓗꓪ ꓔꓶꓹ ꓝꓲˍ ꓡꓳ= ꓢꓲ-ꓔ ꓠꓬ ꓮꓽ ꓘꓶꓸ ꓐꓲꓹ ꓟ ꓛꓵ ꓖꓳ ꓟ ꓔꓯ ꓣꓴ ꓖꓶꓽ ꓡ ꓠꓹ ꓟ ꓣ-ꓟ ꓔꓯ ꓓꓰˍ ꓡꓳ= ꓚꓵ ꓚꓵ ꓐꓯꓹ ꓠꓬ ꓖꓳ ꓟ ꓠꓬ ꓛꓵ ꓟꓽ ꓥ꓾ ꓠꓲꓽ ꓢ ꓓꓯꓼ ꓘꓶ ꓡꓶꓹꓟ ꓥˍ ꓡꓳ= ꓣ-ꓟ ꓠꓬ ꓖꓳ ꓛꓵ ꓔꓯ ꓪ ꓠꓹ ꓟ ꓛꓵ ꓗ ꓠꓯꓸ ꓢꓲ ꓗꓪ ꓖꓼ ꓙꓰꓳ= ꓖꓳ ꓕꓯ ꓣ-ꓟ ꓓꓵꓽ ꓙꓽ ꓛꓲ ꓡꓹ ꓟ ꓠꓬ ꓕꓱ ꓟ ꓠꓬ ꓛꓵ ꓚꓵ ꓚꓵ ꓟ ꓥ ꓐꓷ= ꓠꓲꓽ ꓪꓸ ꓔꓲꓸ ꓢ ꓓꓯꓼ ꓥˍ ꓟ ꓢꓷ ꓡꓰꓳ= ꓣ-ꓟ ꓕꓱ ꓡꓰ ꓛꓵ ꓔꓯ ꓖꓼ ꓔꓬ ꓕꓯꓽ ꓣ=ꓟ ꓬꓲ ꓠꓬꓲ ꓤꓽ ꓥꓹ ꓟ ꓡꓮꓗ-ꓫ-ꓟ-ꓠ ꓔꓯ ꓣ-ꓟ ꓔꓯ ꓬꓰ ꓙ ꓠꓹ ꓟ ꓐꓱ ꓶꓽ ꓝꓲ ꓩꓴ ꓡꓺꓳ= ꓣ-ꓟ ꓐꓰ ꓡꓮꓗ-ꓫ-ꓟ-ꓠ ꓟꓽ ꓔꓬ ꓕꓯꓽ ꓡꓮꓠ-ꓖꓼ ꓪꓸꓔꓲ ꓪ-ꓣ-ꓠ ꓠꓬ꓾ ꓢꓲ-ꓔ ꓔꓯ ꓘꓴꓽ ꓔꓯꓹ ꓙꓰꓳ= ꓣ-ꓟ ꓐꓰ ꓡꓮꓗ-ꓫ-ꓟ-ꓠ ꓠꓬ ꓢꓲ-ꓔ ꓔꓬ ꓟ ꓗꓪ ꓛꓲ ꓡ ꓠꓬ ꓢꓲ-ꓔ ꓔꓯ ꓟꓼ ꓟꓳ꓾ ꓖꓳ ꓟ ꓔꓯ ꓢꓷ ꓡꓰꓳ=

ꓣ-ꓟ ꓐꓰ ꓡꓮꓗ-ꓫ-ꓟ-ꓠ ꓠꓬ ꓡꓮꓠ-ꓖꓼ ꓗꓴꓷ ꓕꓲꓽ ꓛꓱꓽ ꓔꓯ ꓢꓲ ꓢꓰꓼ ꓡꓯꓽ ꓘꓳ ꓓꓶꓽ ꓡꓯꓽ ꓘꓳ ꓠꓹ ꓟ ꓐꓱ ꓶ ꓢꓲ-ꓔ ꓔꓯ ꓧꓳꓽ ꓔꓯꓹ ꓡ ꓠꓹ ꓟ ꓐꓱ ꓶ ꓙꓰꓳ= ꓡꓮꓠ-ꓖꓼ ꓪꓸ ꓔꓲꓸ ꓐꓰ ꓢꓰꓼ ꓡꓯꓽ ꓘꓳ ꓓꓶꓽ ꓡꓯꓽ ꓘꓳ ꓠꓹ ꓟ ꓠꓬ ꓚꓺ ꓚꓱ ꓡꓳ ꓚꓺ ꓗꓪ ꓟ ꓢꓷ ꓠꓲꓹ ꓙꓳ ꓒꓽ ꓐꓴ ꓦ ꓕꓲꓽ ꓒꓳꓹ ꓔꓯ ꓢꓲ ꓢꓯꓼ ꓕꓵꓼ ꓢꓴ ꓮꓽ ꓟꓬ ꓔꓯ ꓬꓲ ꓙ ꓔ ꓙ ꓡ ꓠꓹ ꓟ ꓐꓱ ꓶ ꓓꓰˍ ꓡꓳ= ꓗꓲ-ꓫ-ꓗꓲꓠ-ꓓ ꓐꓯꓹ ꓟ ꓗꓴꓷ ꓗꓪ ꓛꓲ ꓬꓰ ꓠꓬ ꓙꓹ ꓟꓲꓼ ꓪꓸ ꓔꓲꓸ ꓕꓽ ꓡꓯꓽ ꓘꓳ ꓢꓷ ꓡꓯꓽ ꓘꓳ ꓡꓰꓳ= ꓪꓸ ꓔꓲꓸ ꓢꓴ-ꓖꓣꓲ-ꓪ ꓠꓬ ꓢꓲ-ꓔ ꓠꓬ ꓚꓺꓚꓱꓹ ꓡꓳ ꓚꓺ ꓬꓲ ꓫꓵ ꓡ ꓪꓳꓼ ꓫꓵ ꓡꓯꓽ ꓔꓵꓸ ꓔꓯ ꓞꓰ ꓔꓸ ꓟ ꓙꓳ ꓐꓷꓸꓼ ꓥꓳ ꓐꓯ ꓢꓲ ꓡꓲ ꓛꓱꓽ ꓡꓰꓸ ꓙ ꓗꓪ ꓧꓪ ꓙꓰˍ ꓡꓳ= ꓖꓳ ꓪꓴꓸ ꓕꓲꓽ ꓛꓱꓽ ꓔꓯ ꓢꓲ ꓗꓪ ꓧꓪ ꓙꓰꓹ ꓟ ꓙꓹ ꓟꓲꓼ ꓜꓴ ꓬꓲ ꓓꓵ ꓣꓱꓽ ꓢꓴ ꓠꓬ ꓧꓮꓠ-ꓠꓴ-ꓟꓮꓠ ꓥ ꓐꓷ= ꓧꓮꓠ-ꓠꓴ-ꓟꓮꓠ ꓠꓬ ꓢꓲ-ꓔ ꓔꓯ ꓡꓮꓗ-ꓖꓼ ꓗꓴꓷ ꓗꓪ ꓧꓳꓽ ꓓꓯꓹ ꓙꓰ ꓟ ꓢꓷ ꓡꓰꓳ= ꓧꓮꓠ-ꓠꓴ-ꓟꓮꓠ ꓐꓰ ꓬꓲ ꓗꓸ ꓠꓯꓸ ꓢꓲ ꓗꓪ ꓛꓳ ꓢꓴ ꓟꓯꓼ ꓤꓼ ꓐꓴ꓾ ꓣ-ꓟ ꓐꓰ ꓡꓮꓗ-ꓫ-ꓟ-ꓠ ꓐꓴ ꓠꓬ ꓡꓮꓠ-ꓖꓼ ꓗꓴꓷ ꓗꓪ ꓓꓵꓽ ꓪ ꓡꓰ ꓠꓹ ꓟ ꓢꓯꓼ ꓕꓵꓼˍ ꓡꓳ= ꓡꓮꓠ-ꓖꓼ ꓗꓴꓷ ꓗꓪ ꓛꓲ ꓬꓲ ꓡꓳꓽ ꓐꓱ ꓔꓯ ꓦꓺꓐꓺ 18 ꓟ ꓗꓪ ꓛꓲ ꓐꓶꓽ ꓠ ꓓꓽ ꓖꓴꓽ(ꓘꓳꓽ ꓙꓱ) ꓗꓳ ꓢꓲ ꓠꓬꓲ ꓪꓸ ꓔꓲꓸ ꓣ-ꓪ-ꓠ ꓔꓯ ꓢꓰꓼ ꓧꓪꓸ ꓡꓰꓳ= ꓢꓲ-ꓔ ꓔꓯ ꓥˍ ꓟꓲ ꓝꓮꓲ ꓧꓳꓽ ꓔꓯꓹ ꓡꓺꓳ= ꓢꓲ-ꓔ ꓔꓯ ꓪꓸ ꓔꓲ ꓣ-ꓪ-ꓠ ꓧꓳꓽ ꓔꓯꓹ ꓙꓰ ꓟ ꓙꓵꓹ ꓗꓪ ꓬꓲ ꓠꓬ ꓣ-ꓟ ꓔꓯ ꓮ ꓟꓬ ꓗꓪ ꓛꓲ ꓠꓲꓹ ꓠꓵꓹ ꓟ ꓟꓽ ꓢꓲ ꓟꓽ ꓫꓬ ꓬꓰꓹ ꓟ ꓙꓳꓹ ꓥ ꓡ? ꓐꓰ ꓢꓲ-ꓔ ꓔꓯ ꓮꓸ ꓔꓳꓸ ꓕꓯꓽ ꓢꓲ ꓗꓪ ꓕꓳꓼ ꓝꓲꓹ ꓟ ꓬꓰ ꓝꓲˍ ꓡꓳ= ꓢꓲ-ꓔ ꓛꓵ ꓒꓯꓹ ꓠꓬ ꓮ ꓡꓰ ꓥ-ꓟꓲ ꓟꓽ ꓖꓷ ꓡꓰ ꓐꓷ= ꓣ-ꓟ ꓔꓯ ꓟꓵꓽ ꓗꓪ ꓔꓬ ꓝꓲˍ ꓟ 14 ꓘꓳꓼ ꓥˍ ꓟꓲ ꓐꓲ ꓡꓰ ꓢꓲ ꓣ-ꓟ ꓠꓬ ꓮ-ꓬꓴ-ꓔꓲ-ꓬ ꓡꓳꓺ ꓒꓱ ꓗꓪ ꓡꓽ ꓡꓺꓳ= ꓬꓲ ꓔꓯ ꓑ ꓫꓬꓽ ꓮꓽ ꓙꓵꓽ ꓠꓬ ꓪꓸ ꓔꓲ ꓙꓵꓽ ꓝꓲˍ ꓡꓳ= ꓣ-ꓟ ꓠꓬ ꓖꓳ-ꓢ-ꓡ ꓗꓴꓷ ꓔꓯ ꓔꓱ ꓕˍ ꓐꓰ ꓔꓱꓹ ꓚꓵꓹ ꓟ ꓚꓱꓹ ꓗꓪ ꓐꓰ ꓮꓽ ꓟꓬ ꓘꓳꓼ ꓙꓵꓽ ꓗꓷꓳ= ꓢꓲ-ꓔ ꓥˍ ꓟꓲ ꓬꓲ ꓤꓽ ꓡ-ꓪ ꓐꓰ ꓗꓴ-ꓫ ꓔꓯ ꓛꓱ ꓟꓳ ꓗꓷꓳ= ꓢꓲ-ꓔ ꓠꓬ ꓬꓲ ꓫꓵ ꓠꓹ ꓟ ꓬꓲ ꓙꓵꓹ ꓛꓲ ꓡꓹ ꓟ ꓔꓯ ꓢꓷ ꓡꓰ ꓠꓬ ꓟꓲ ꓠꓯ ꓠꓬꓲ ꓐꓷꓽ ꓑꓳ ꓡ ꓢꓲ ꓬꓲ ꓔꓯ ꓣꓴ ꓔꓯꓹ ꓙꓵ ꓠꓹ ꓟ ꓐꓱ ꓶꓽ ꓪꓽ ꓘꓴˍ ꓡꓳ= ꓪꓲ-ꓫ-ꓠꓴ ꓠꓬ ꓣ-ꓟ ꓟꓬꓱ ꓗꓪ ꓐꓰ ꓟꓲ ꓠꓯ ꓗꓪ ꓬꓯꓼ ꓡ ꓢꓲ ꓪꓸ ꓔꓲꓸ ꓙꓵꓹ ꓟ ꓠꓬ ꓟꓲ ꓠꓯ ꓞꓳ ꓤꓽ ꓔꓯ ꓕꓱ ꓚꓵꓹ ꓟ ꓚꓱ ꓗꓪ ꓐꓰ ꓙꓵꓽ ꓠꓹ ꓟ ꓐꓱ ꓶ ꓥˍ ꓡꓳ=