ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓚꓸ ꓟꓹ ꓐꓰ ꓫꓸ ꓕꓱˍ ꓟ ꓚꓱꓹ

ꓔꓲ ꓒꓽ ꓪꓸ ꓔꓲꓸ ꓬꓳ-ꓦ ꓒꓳ-ꓡꓳ ꓲꓲ ꓡꓰ 1990 ꓘꓳꓼ 12ꓦ ꓟ 7 ꓠꓬꓲ ꓕꓯꓽ ꓐꓳ ꓛꓱ ꓩꓴ ꓗꓶꓹ ꓟ ꓣꓰꓓꓰꓟꓑꓔꓳꓣꓲꓢ ꓟꓲꓢꓢꓲꓳ ꓐꓯꓹ ꓟ ꓕꓳꓽ ꓶꓽ ꓗꓪ ꓠꓬ꓾ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓔꓯ ꓚ ꓠꓹ ꓟ ꓐꓱ ꓶꓽ ꓠꓲꓹ ꓟ ꓓꓵꓽ ꓙꓽ ꓟꓬ ꓔꓬ ꓢꓴ ꓔꓯ ꓮ ꓡꓰ ꓢꓲ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓔꓯ ꓚ ꓠꓹ ꓟ ꓟꓸ ꓖꓶꓽ ꓡꓹ ꓟ ꓕꓳꓽ ꓶꓽ ꓥ ꓡꓳ= ꓟꓬ ꓠꓬꓲ ꓐꓶꓹ ꓠꓬꓲ ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓮ ꓡꓰ ꓢꓲ ꓫꓸ ꓕꓱ ꓠꓹ ꓟ ꓮ ꓡꓰ ꓢꓲ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓢꓷꓸ ꓙ ꓟꓴ ꓙ ꓡꓯꓽ ꓘꓳ ꓠꓬꓲ ꓔ ꓡꓳ= ꓕꓱ ꓡꓱ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓔꓯ ꓚ ꓟꓸ ꓔ ꓕꓯ ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓫꓸ ꓕꓱ ꓠꓹ ꓟ ꓠꓬ ꓟꓽ ꓓ ꓪꓴ ꓓꓲ ꓡꓰꓹ ꓟ ꓟꓬꓱꓽ ꓓꓽ ꓟ ꓥˍ ꓡꓳ= ꓕꓱ ꓟ ꓠꓬ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓔꓯ ꓚ ꓟꓸ ꓠꓹ ꓟ ꓚꓱꓹ ꓥ ꓢꓲ ꓖꓳꓼ ꓧꓶꓸ ꓡꓰꓹ ꓟ ꓚꓱꓹ ꓟ ꓥ= ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓫꓸ ꓕꓱ ꓡꓯꓽ ꓘꓳ ꓠꓹ ꓟ ꓒꓵꓽ ꓗꓹ ꓬꓰ ꓡꓯꓽ ꓘꓳ ꓠꓹ ꓟ ꓬꓰ ꓙ ꓔ ꓙ ꓡꓯꓽ ꓘꓳ ꓠꓹ ꓟ ꓢꓷꓸ ꓙ ꓟꓴ ꓙ ꓡꓯꓽ ꓗꓳꓹ ꓟ ꓐꓰ ꓪꓴ-ꓢ ꓶꓽ ꓓꓳ ꓫꓱꓸ ꓓꓳꓽ ꓔꓯ ꓚ ꓟꓸ ꓔ ꓟ ꓠꓬ ꓟꓸ ꓟꓲꓽ ꓮ ꓘꓶꓸ ꓙꓳꓹ ꓟ ꓙꓲ ꓖꓴ ꓓꓲ ꓡꓰꓹ ꓟ ꓥ ꓡꓳ= ꓟꓽ ꓜꓳꓹ ꓟ ꓕꓲꓽ ꓛꓱꓽ ꓗꓪ ꓐꓰ ꓟꓳꓹ ꓟ ꓮꓽ ꓙꓵꓽ ꓔꓯ ꓕꓱꓹ ꓕꓽ ꓠꓬꓲ ꓢꓲ ꓜꓳꓹ ꓟ ꓕꓲꓽ ꓛꓱꓽ ꓔꓯ ꓢꓲ ꓫꓹ ꓑꓱ ꓖꓶꓽ ꓮꓽ ꓜꓳꓹ ꓟ ꓕꓲꓽ ꓛꓱꓽ ꓔꓯ ꓢꓲ ꓬꓲ ꓟꓸ ꓟꓲ ꓖꓳ ꓔ ꓟ ꓔꓯ ꓫꓯꓹ ꓑꓱ ꓖꓶꓽ ꓠꓹ ꓟ ꓐꓱ ꓶꓽ ꓥ ꓡꓳ= ꓔꓯ ꓥꓳꓽ ꓐꓯ ꓠꓬ ꓚꓬꓴ ꓙꓹ ꓟ ꓣꓱꓽ ꓛꓵꓽ ꓠꓬ ꓢꓲ ꓒꓽ ꓬꓰ-ꓢꓴ ꓡꓰ ꓔꓶ ꓔ ꓟ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓥ ꓡꓳ= ꓢꓲ-ꓒ ꓬꓰ-ꓢꓴ ꓡꓰ ꓔꓶ ꓔ ꓟ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓟꓽ ꓐꓹ ꓠꓬ ꓚꓬꓴ ꓙꓹ ꓟ ꓣꓱꓽ ꓛꓵꓽ ꓟꓽ ꓑꓯꓹ ꓟꓶ= ꓨꓳ ꓡꓱ ꓐꓯ ꓔ ꓟ ꓠꓬ ꓠꓬꓲ ꓠꓬꓲ ꓠꓬ ꓕꓱ ꓡꓱ ꓟꓹ ꓥꓻ ꓐꓰ ꓟꓸ ꓖꓶꓹ ꓟ ꓕꓱ ꓡꓰ ꓫꓵꓽ ꓔꓯ ꓐꓯ ꓠꓲꓹ ꓟ ꓥ ꓪ=

ꓠꓬꓲ ꓧꓪꓹ ꓕꓲꓽ ꓧꓪꓹ ꓟ ꓦꓮꓔꓲꓚꓮꓠ ꓖꓪ ꓙꓱ ꓜꓲꓼ ꓓꓴ ꓟꓽ ꓛꓵꓹ ꓢꓰꓼ ꓟ ꓗꓓ ꓕꓯ ꓗꓪ ꓠꓬ ꓢꓲ-ꓒ ꓬꓰ-ꓢꓴ ꓔꓶ ꓔ ꓟ ꓘꓴ ꓜꓲꓼ ꓞꓳ ꓕꓲꓽ ꓟꓹ ꓙꓳ ꓥ= ꓖꓳ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓟꓽ ꓐ ꓢꓴ ꓠꓬ ꓚꓬꓴ ꓙꓹ ꓟ ꓣꓱꓽ ꓛꓵꓽ ꓟꓽ ꓐꓯꓹ ꓟꓶꓺ ꓐꓰ ꓕꓱ ꓡꓱ ꓐꓯ ꓡꓳꓸ ꓬꓰ ꓟ ꓥ ꓪ= ꓠꓬꓲ ꓠꓬꓲ ꓠꓬ ꓕꓱ ꓟ ꓔꓯ ꓛꓹ ꓗꓶ ꓢꓲ ꓠꓱꓸ ꓐꓯꓼ ꓙꓵ ꓠꓲꓹ ꓠꓱꓸ ꓐꓯꓼ ꓘꓴ ꓜꓲꓼ ꓞꓳ ꓠꓮꓸꓼ ꓗꓪ ꓥˍ ꓟꓲ ꓚꓬꓴ ꓙꓹ ꓟ ꓣꓱꓽ ꓛꓵꓽ ꓙꓳ ꓐꓶꓸꓼ ꓥꓳ ꓐꓰ ꓕꓱ ꓡꓰ ꓟꓸ ꓖꓶꓽ ꓡꓹ ꓟ ꓥ ꓡꓳ= ꓖꓳ ꓡꓰ ꓥˍ ꓟꓲ ꓢꓲ ꓒꓽ ꓬꓰ-ꓢꓴ ꓔꓯ ꓙꓵ ꓢꓲ ꓠꓬꓲ ꓗꓳ ꓓꓱꓽ ꓔꓲꓹ ꓔ ꓟ ꓔꓯ ꓘꓳ ꓣꓴ ꓠꓹ ꓟ ꓬꓳꓸ ꓚꓲꓹ ꓡꓳ= ꓖꓳ ꓟ ꓗꓳ ꓓꓱꓽ ꓔꓲꓹ ꓔ ꓟ ꓔꓯ ꓟꓽ ꓛꓲꓺ ꓐꓯ ꓠꓲꓹ ꓫꓵꓹ ꓟ ꓠꓽ ꓟꓽ ꓥ= ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓫꓸ ꓕꓱ ꓡꓯꓽ ꓘꓳ ꓢꓷꓸ ꓙ ꓟꓴ ꓙ ꓡꓯꓽ ꓘꓳ ꓟꓹ ꓐꓰ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓔꓯ ꓚꓸ ꓟ ꓠꓬ ꓮ ꓕꓯꓽ ꓥˍ ꓟꓲ ꓝꓸ ꓡꓯꓽ ꓘꓳꓹ ꓟ ꓙꓳˍ ꓡꓳ= ꓠꓱꓸ ꓐꓯꓼ ꓙꓵꓽ ꓠꓲ ꓠꓯꓸꓼ ꓗꓪ ꓚꓬꓴ ꓙꓹ ꓟ ꓣꓱꓽ ꓛꓵ ꓙꓳ ꓐꓶꓹꓼ ꓥꓳꓻ ꓐꓯꓹ ꓟ ꓔꓯ ꓘꓳ ꓣꓴ ꓢꓲ ꓬꓲ ꓪꓽ ꓐꓰ ꓝꓸ ꓡꓯꓽ ꓘꓳ ꓫꓸ ꓕꓱ ꓡꓯꓽ ꓘꓳ ꓠꓹ ꓟ ꓐꓯ ꓠꓲꓹ ꓫꓵꓹ ꓟ ꓥˍ ꓡꓳ=

ꓕꓱ ꓔꓲꓽ ꓘꓴꓸ ꓗꓪ ꓬꓲ ꓪꓽ ꓠꓯꓸꓼ ꓗꓪ ꓚꓬꓴ ꓙꓹ ꓟ ꓣꓱꓽ ꓛꓵꓽ ꓙꓳ ꓐꓶꓹꓼ ꓥꓳ ꓐꓯꓹ ꓟ ꓠꓬ ꓚꓲꓽ ꓚꓽ ꓔꓲꓸ ꓙꓳꓹ ꓥ ꓐꓯ ꓠꓲꓹ ꓫꓱꓹ ꓟ ꓟꓽ ꓥ= ꓙꓳ ꓐꓶꓹꓼ ꓥꓳꓺ ꓐꓯ ꓠꓲꓹ ꓫꓵꓹ ꓟ ꓡꓰꓽ ꓢꓲ ꓥ= ꓬꓲ ꓪꓽ ꓔꓯ ꓒꓵꓽ ꓗꓹ ꓬꓰꓹ ꓟ ꓥ ꓡꓳ= ꓖꓳ ꓡꓱ ꓒꓵꓽ ꓗꓹ ꓬꓰ ꓕꓯꓽ ꓢꓲ ꓬꓲ ꓪ ꓐꓰ ꓫꓸ ꓕꓱ ꓡꓯ ꓘꓳ ꓐ ꓡ ꓥ=