ꓫꓸ ꓕꓱˍ ꓟ ꓐꓰ ꓪꓴ-ꓢ ꓟꓸ ꓟꓲ ꓚˍ ꓟ

ꓓꓲꓮꓡꓳꓖꓴꓰ ꓮꓠꓓ ꓑꓣꓳꓚꓡꓮꓲꓟꓮꓔꓲꓳꓠ ꓐꓯ 1991 ꓕꓯꓽ ꓔꓲ ꓒꓽ ꓪꓸ ꓔꓲꓸ ꓬꓳ-ꓦ ꓒꓳ-ꓡꓳ ꓲꓲ ꓡꓰ ꓐꓳ ꓛꓱ ꓩꓴ ꓡˍ ꓟ ꓕꓳꓽ ꓶꓽ ꓗꓪ ꓐꓳ ꓔ ꓟ ꓥˍ ꓡꓳ= ꓑꓳꓠꓔꓲꓝꓲꓚꓮꓡ ꓚꓳꓴꓠꓚꓲꓡ ꓝꓳ ꓲꓠꓔꓰꓣꓣꓰꓡꓲꓖꓲꓳꓴꓢ ꓓꓲꓮꓡꓳꓖꓴꓰ ꓜꓴ ꓔꓯ ꓐꓯˍ ꓟ 1984 ꓘꓳꓼ ꓕꓯꓽ ꓐꓳ ꓛꓱ ꓩꓴ ꓡˍ ꓟ ꓕꓳꓽ ꓶꓽ ꓥꓵ ꓠꓬꓲ ꓢꓴ ꓠꓬ ꓓꓵꓽ ꓙꓽ ꓮ ꓡꓰ ꓓꓴ ꓗꓷ ꓡꓰꓳ= ꓖꓳ ꓟ ꓑꓶ ꓓꓴ ꓠꓲ ꓖꓳ ꓔꓯ ꓝꓮꓲ ꓬꓲ ꓟꓸ ꓟꓲ ꓐꓯ ꓟꓸ ꓖꓶꓹ ꓟ ꓚꓱ 1991 ꓘꓳꓼ ꓕꓯꓽ ꓐꓳ ꓛꓱ ꓩꓴ ꓡꓹꓟ ꓕꓳꓽ ꓶꓽ ꓥ ꓡꓳ= ꓖꓳ ꓟ ꓕꓳꓽ ꓶꓽ ꓗꓪ ꓠꓬ ꓪꓴ-ꓢ ꓗꓴꓷ ꓐꓯꓹ ꓟ ꓚꓱꓹ ꓔꓯ ꓟꓳ ꓟꓸ ꓟꓲ ꓒꓶ ꓟꓸ ꓖꓶꓹ ꓟ ꓚꓱꓹ ꓔꓯ ꓟꓳ ꓐꓳ ꓔ ꓡꓳ= ꓘꓴ ꓜꓲꓼ ꓞꓳ ꓠꓬ ꓪꓴ-ꓢ ꓗꓴꓷ ꓐꓯꓹ ꓟ ꓬꓲ ꓫꓵꓸ ꓔꓯ ꓫꓵꓸ ꓢꓲ ꓪꓴꓽ ꓡ ꓟꓴ ꓡ ꓠ ꓬꓰꓹ ꓟ ꓥ ꓡꓳ= ꓠꓱꓸ ꓐꓯꓼ ꓙꓵ ꓠꓲꓹ ꓠꓯꓸꓼ ꓗꓪ ꓥˍ ꓟꓲ ꓪꓴ-ꓢ ꓗꓴꓷ ꓐꓯꓹ ꓟ ꓙꓳ ꓢꓲ ꓪꓴ-ꓢ ꓙꓵꓽ ꓪꓽ ꓐꓯꓹ ꓟ ꓠꓬ ꓖꓳ ꓗꓪ ꓛꓲ ꓙꓳ ꓡꓳ= ꓟꓲ ꓠꓯ ꓞꓳ ꓣ ꓐꓴ ꓬꓲ ꓪꓽ ꓪꓴ-ꓢ ꓐꓱ ꓶꓽ ꓐꓯ ꓢꓲ ꓚꓵꓸ ꓚꓬ ꓕꓲꓽ ꓞꓲꓼ ꓔꓯ ꓡꓯꓼ ꓙꓱ ꓢꓲ ꓟꓬꓱꓽ ꓢꓯꓼ ꓕꓵˍ ꓟ ꓚꓱꓹ ꓠꓬ ꓢꓲ-ꓫꓬ-ꓟ-ꓦ ꓟꓬꓱꓽ ꓬꓰꓹ ꓟ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓠꓲ ꓠꓱꓸ ꓐꓯꓼ ꓙꓵ ꓠꓲꓹ ꓔꓯꓹ ꓟꓲ ꓣꓳꓽ ꓒꓵꓽ ꓗꓹ ꓬꓲ ꓠꓬꓲ ꓔ ꓥ= ꓖꓳ ꓟ ꓪꓴꓸ ꓠꓬꓲ ꓠꓲ ꓖꓳ ꓟ ꓐꓳ ꓛꓱ ꓩꓴ ꓡꓹ ꓟ ꓕꓳꓽ ꓶꓽ ꓗꓪ ꓠ ꓠꓲ ꓮ ꓡꓰ ꓐꓳ ꓔ ꓥꓻ ꓐꓯ ꓠꓬ ꓪꓴ-ꓢ ꓚꓬꓴ ꓙꓹ ꓟ ꓟꓬꓱꓽ ꓬꓰ ꓐꓯꓹ ꓟ ꓠꓬ ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓫꓸ ꓕꓱ ꓡꓯꓽ ꓘꓳˍ ꓟ ꓥˍ ꓡꓳ=

ꓙꓲꓹ ꓟ ꓐꓯ ꓘꓶꓽ ꓔꓯ ꓛꓳ ꓢꓴ ꓐꓴ꓾ ꓚꓵꓸ ꓛꓬ ꓠꓲꓹ ꓟ ꓗꓪ ꓐꓰ ꓙꓲꓹ ꓥ ꓓꓵꓽ ꓙꓽ ꓢꓲ ꓛꓳ ꓢꓴ ꓐꓴ꓾ ꓙꓲꓹ ꓟ ꓚꓱꓹ ꓔꓯ ꓬꓰꓹ ꓢꓴ ꓮꓽ ꓙꓵꓽ ꓠꓬ ꓚꓬꓴ ꓙꓹ ꓟ ꓟꓬꓱꓽ ꓠꓯꓸꓼꓗꓪ ꓐ ꓢꓴ ꓐꓴ ꓥ ꓢꓲ ꓚꓬꓴ ꓙꓹ ꓟ ꓣꓱ ꓛꓲ ꓚꓵ ꓚꓵ ꓐꓯꓹ ꓟꓶ ꓡ ꓓꓴ ꓥꓳ= ꓢꓲ-ꓫꓬ-ꓟ-ꓦ ꓢꓯꓼ ꓪꓽ ꓗꓪ ꓐꓰ ꓢꓲ-ꓒꓽ ꓬꓰ-ꓢꓴ ꓚꓬꓴ ꓙꓹ ꓟ ꓚꓵ ꓘꓶꓽ ꓓꓽ ꓟ ꓠꓯꓸꓼ ꓗꓪ ꓐ ꓢꓴ ꓮꓽ ꓙꓵꓽ ꓠꓬ ꓚꓬꓴ ꓙꓹ ꓟ ꓣꓱ ꓛꓲ ꓔꓯ ꓐꓯꓹ ꓟꓶ ꓡ ꓓꓴ ꓥꓳ= ꓙꓵ ꓠꓲꓹ ꓕꓲ ꓞꓶ ꓡꓰ ꓕꓲ ꓞꓶ ꓕꓲꓽ ꓞꓲꓼ ꓡꓰ ꓕꓲꓽ ꓞꓲꓼ ꓡꓲꓽ ꓒꓲꓼ ꓚꓱꓹ ꓐꓰ ꓫꓸ ꓪ ꓔꓯ ꓛꓳ ꓢꓴ ꓐꓴ ꓠꓬ ꓚꓵ ꓚꓵꓺ ꓚꓵꓸ ꓛꓬ ꓕꓵꓹ ꓚꓵ ꓛꓬ ꓙꓲꓹ ꓟ ꓠꓯꓸꓼ ꓗꓪ ꓛꓳ ꓢꓴ ꓐꓴ ꓥ ꓢꓲ ꓪꓴ-ꓢ ꓚꓬꓴ ꓙꓹ ꓟ ꓠꓯꓸꓼ ꓗꓪ ꓐ ꓢꓴ ꓐꓴ ꓥˍ ꓡꓳ= ꓕꓱ ꓟ ꓕꓳꓽ ꓶꓽ ꓗꓪ ꓣꓳ ꓔꓯ ꓟꓸ ꓖꓶꓽ ꓡꓹ ꓟ ꓠꓬ ꓠꓱꓸ ꓐꓯꓼ ꓙꓵ ꓠꓲꓹ ꓠꓯꓸꓼ ꓗꓪ ꓚꓬꓴ ꓙꓹ ꓟ ꓣꓱꓽ ꓛꓲꓽ ꓙꓳˍ ꓥ ꓐꓯꓹ ꓟ ꓔꓯ ꓔꓲꓸ ꓒꓳꓹ ꓡꓰꓸ ꓒꓳꓹ ꓓꓵꓽ ꓙꓽ ꓠꓬꓲ ꓢꓲ ꓙ ꓜꓲꓼ ꓠꓲꓹ ꓠꓲꓹ ꓟ ꓗꓪ ꓐꓰ ꓟꓸ ꓟꓲ ꓔꓯ ꓢꓷꓸ ꓠꓬꓲ ꓔ ꓥ= ꓬꓲ ꓪ ꓠꓯꓸꓼ ꓗꓪ ꓚꓬꓴ ꓙꓹ ꓟ ꓣꓱꓽ ꓛꓲꓽ ꓙꓳꓺ ꓐꓯꓹ ꓟ ꓠꓬ ꓮꓽ ꓙꓵꓽ ꓐꓲ ꓜꓲꓼ ꓥ ꓒ ꓐꓲꓺ ꓐꓲ ꓜꓲꓼ ꓥꓻ ꓐꓯ ꓠꓲꓹ ꓫꓵꓹ ꓟ ꓠꓽ ꓟꓽ ꓥ= ꓟꓲ ꓠꓯ ꓞꓳ ꓤꓽ ꓐꓴ ꓠꓬ YI Cꓰ ꓬꓲ ꓪꓴꓸ ꓝꓴꓲꓸ ꓗꓪ ꓐꓰ ꓡꓰ ꓙꓲ ꓟꓽ ꓐ ꓡꓹ ꓟ ꓡꓰ ꓐꓰ ꓬꓲ ꓪꓽ ꓙꓵ ꓠꓲꓹ ꓠꓯꓸꓼ ꓗꓪ ꓥˍ ꓟꓲ ꓡꓲꓽ ꓒꓲꓼ ꓐꓰ ꓛꓳ ꓙꓱ ꓠꓯꓸꓼ ꓗꓪ ꓟ ꓐꓲ ꓜꓲꓼ ꓟ ꓮ ꓟꓬ ꓙꓳ ꓐꓶˍ ꓥꓳ= ꓖꓳ ꓑꓶ ꓓꓴ ꓠꓲ ꓠꓱ ꓐꓯꓼ ꓙꓵ ꓠꓲꓹ ꓐꓰ ꓙꓲ-ꓢꓴ ꓢꓲ ꓤꓼ ꓐꓴ ꓙꓵ ꓠꓲꓹ ꓠꓬꓲ ꓗꓴꓸ ꓚꓸ ꓗꓪ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳˍ ꓟ ꓙꓲˍ ꓟ ꓚꓱꓹ ꓮꓽ ꓟꓬ ꓙꓳ ꓡꓳ=

ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓫꓸ ꓕꓱ ꓠꓬꓲ ꓔ ꓥꓻ ꓐꓯꓹ ꓟ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓬꓲ ꓪꓽ ꓠꓯꓸꓼ ꓗꓪ ꓒꓴ ꓒꓵ ꓡꓬ ꓡꓬ ꓚ ꓐ ꓡ ꓠꓹ ꓟ ꓟꓬꓱꓼ ꓗꓹ ꓘꓶꓽ ꓬꓲ ꓪꓴꓸ ꓒꓴ ꓩꓴ ꓡ ꓟ ꓚꓱꓹ ꓥˍ ꓡꓳ= ꓕꓱ ꓡꓱ ꓗꓸ ꓘꓶꓽ ꓒꓴꓹ ꓐꓯ ꓟ ꓠꓬ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳ ꓔꓯ ꓚꓹ ꓟ ꓚꓱ ꓚꓵ ꓛꓵ ꓥˍ ꓡꓳ= RO Tꓯ ꓢꓷꓸ ꓙ ꓟꓴ ꓙ ꓟ ꓠꓬ ꓠꓱꓸ ꓐꓯꓼ ꓙꓵ ꓠꓲꓹ ꓐꓰ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓫꓸ ꓕꓱ ꓡꓯ ꓘꓳꓹ ꓟ ꓗꓪ ꓐꓰ ꓣꓳ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳ ꓚꓹ ꓟ ꓟꓬꓱꓽ ꓠꓬ ꓮ ꓕꓯ ꓥˍ ꓟꓲ ꓖꓴ ꓡꓰꓳꓺ ꓓꓳ ꓡꓰꓳ ꓐꓯꓹ ꓟ  ꓬꓲ ꓢꓷꓸ ꓡꓰ ꓓꓴ ꓕꓲ ꓟ ꓥˍ ꓡꓳ=

Add new comment

10 + 6 =