ꓫꓸ ꓢꓴ ꓟꓶꓽ ꓢꓴ ꓔꓯ ꓪꓴ-ꓢ ꓟꓬ ꓠꓬꓲ ꓠꓲꓹ ꓠꓵ_ ꓟ

ꓘꓴꓷꓼ ꓙꓵꓽ ꓚꓱ꓾ ꓞꓳ ꓙꓳ ꓢꓯꓸ ꓔꓬ ꓚꓱ꓾ ꓶ ꓡꓯꓼ ꓟꓴ ꓚꓱ꓾ ꓕꓱ ꓡꓰꓳ ꓫꓵꓽ ꓠꓯꓸꓼ ꓗꓪ ꓟꓽ ꓙꓵꓹ ꓟ ꓬꓰˍ ꓟ ꓪꓴꓸ ꓠꓬꓲ ꓫꓸ ꓢꓴ ꓟꓶꓽ ꓢꓴ ꓟꓬ ꓔꓬ ꓟ ꓡꓮꓔꓲꓠ ꓮꓟꓰꓣꓲꓚꓮ ꓗꓪ ꓠꓬ ꓑ ꓫꓬꓽ ꓐꓴ ꓔꓯ ꓗꓽ ꓕꓸ ꓙ ꓖꓶꓽ ꓠꓹ ꓟ ꓡꓳꓸ ꓙ ꓑꓳꓽ ꓙ ꓔ ꓙ ꓖꓶꓽ ꓠꓹ ꓟ ꓐꓱ ꓶꓽ ꓡꓮꓔꓲꓠ ꓮꓟꓰꓣꓲꓚꓮ ꓗꓪ ꓟ ꓔꓲ ꓒꓽ ꓓ ꓐꓴꓹ ꓐꓰ ꓪꓴ-ꓢ ꓚꓱꓹ ꓔꓯ ꓢꓲ ꓢꓷꓸ ꓠꓲꓹ ꓙꓳ ꓒ ꓐꓴ ꓖꓪ ꓚꓱ ꓜꓲꓼ ꓓꓴ ꓓꓽ ꓟ ꓕꓲꓽ ꓟ ꓬꓰ ꓗꓷꓳ= ꓖꓳ ꓟ ꓔꓯ ꓑꓣꓰꓝꓰꓣꓰꓠꓔꓲꓮꓡ ꓳꓑꓔꓲꓳꓠ ꓝꓳꓣ ꓔꓧꓰ ꓑꓳꓳꓣ ꓐꓰ ꓟꓬꓱ ꓖꓶꓽ ꓔ ꓟ ꓥˍ ꓡꓳ=

 ꓫꓸ ꓢꓴ ꓟꓶꓽ ꓢꓴ ꓔꓯ ꓢꓲ ꓚꓰ ꓔ ꓟ ꓪꓴꓸ ꓓꓵ ꓛꓹ ꓠˍ ꓟ ꓐꓯˍ ꓟ ꓬꓰ ꓟꓸ ꓟꓲ ꓥˍ ꓡꓳ= ꓮ ꓡꓰꓳꓸꓼ ꓐꓯ ꓠꓬ ꓪꓴ-ꓢ ꓠꓬ ꓫꓸ ꓢꓴ ꓟꓶꓽ ꓢꓴ ꓔꓯ ꓢꓲ ꓚꓰ ꓔ ꓟ ꓥ ꓢꓲ ꓫꓸ ꓢꓴ ꓟꓶꓽ ꓢꓴ ꓔꓯ ꓪꓴꓸ ꓓꓵ ꓛꓹ ꓔ ꓟ ꓥˍ ꓡꓳ ꓐꓰ ꓕꓱ ꓡꓰ ꓓꓵ ꓙˍ ꓟ ꓪꓴꓸ ꓠꓬꓲ ꓕꓱ ꓡꓰ ꓬꓰˍ ꓟ ꓥ ꓪ= ꓖꓳ ꓡꓰ ꓢꓲ ꓫꓸ ꓢꓴ ꓟꓶꓽ ꓢꓴ ꓠꓬ ꓥꓲꓸ ꓞꓹ ꓢꓴ ꓡꓯꓽ ꓒꓯꓹ ꓗꓪ ꓐꓰ ꓡꓰ ꓙꓰ ꓢꓲ ꓫꓸ ꓙꓵ ꓟꓶꓽ ꓙꓵ ꓓꓴ ꓗꓪ ꓐꓰ ꓡꓰꓹ ꓙꓵ ꓠꓹ ꓟ ꓕꓱ ꓡꓰ ꓥꓲꓸ ꓞꓹ ꓟ ꓗꓪ ꓐꓰ ꓗꓽ ꓕꓸ ꓙ ꓖꓶꓽ ꓠꓹ ꓟ ꓘꓴ ꓜꓲꓼ ꓞꓳ ꓠꓬ ꓢꓯꓼ ꓕꓵꓼ ꓡꓳ ꓬꓰ ꓫꓵꓽ ꓥ ꓐꓷ=

ꓮ ꓡꓰꓳꓸꓼ ꓐꓯ ꓠꓬ ꓘꓴ ꓜꓲꓼ ꓞꓳ ꓠꓬ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓟ ꓑ ꓫꓬ ꓐꓴ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓗꓴꓷꓼ ꓚꓱꓹ ꓶ ꓡꓯꓼ ꓟꓴ ꓚꓱꓹ ꓫꓵꓽ ꓪꓴ ꓥ ꓕ ꓑꓳꓸ ꓔꓯ ꓫꓬ ꓡꓰ ꓠꓹ ꓟ ꓮ ꓕꓯꓽ ꓥˍ ꓟꓲ ꓠꓲꓹ ꓟ ꓐ ꓢꓲ ꓬꓰ ꓠꓹ ꓟ ꓶ ꓓꓽ ꓟ ꓟꓯ ꓠ ꓗꓹ ꓡꓳ= ꓖꓳ ꓡꓱ ꓶ ꓓꓽ ꓟ ꓟꓯ ꓠꓹ ꓐꓱ ꓶꓽ ꓚꓵꓸ ꓛꓬ ꓞꓲꓼ ꓔꓯ ꓔꓳꓹ ꓙˍ ꓟ ꓟꓬꓱꓽ ꓠꓯꓸꓼ ꓗꓪ ꓡꓯꓼ ꓙꓱ ꓠ ꓗꓹ ꓡꓳ= ꓑ ꓫꓬ ꓫꓸ ꓔ ꓟ ꓔꓯ ꓡꓳ ꓦ ꓟꓽ ꓙꓵ= ꓘꓴ ꓜꓲꓼ ꓞꓳ ꓠꓬ ꓫꓸ ꓢꓴ ꓟꓶꓽ ꓢꓴ ꓐꓰ ꓕꓲ ꓪꓼ ꓮ ꓕꓯ ꓥˍ ꓟꓲ ꓢꓯꓸ ꓔꓬ ꓠꓹ ꓟ ꓐꓱ ꓶ ꓬꓲ ꓪꓽ ꓟꓬꓱ ꓓꓳꓽ ꓔꓯ ꓡꓳꓸ ꓙ ꓑꓳꓽ ꓙ ꓗꓽ ꓕꓸ ꓙ ꓖꓶꓽ ꓠꓹ ꓟ ꓐꓱ ꓶ ꓬꓲ ꓪꓽ ꓪ ꓙꓵ ꓪ ꓙꓳˍ ꓟ ꓔꓯ ꓪ ꓠꓹ ꓟ ꓐꓱ ꓶ ꓮ ꓕꓯ ꓥˍ ꓟꓲ ꓓꓰ ꓙ ꓗꓽ ꓕꓸ ꓙ ꓖꓶꓽ ꓡꓳꓸ ꓙ ꓑꓳꓽ ꓙ ꓔ ꓙ ꓖꓶ ꓠꓹ ꓟ ꓐꓱ ꓶ ꓬꓳꓸ ꓙꓵˍ ꓡꓳ=

 

Add new comment

4 + 5 =