ꓮ-ꓠꓲꓗ-ꓝ ꓐꓰ ꓓꓴꓗ-ꓘ ꓚꓱꓹ (ꓓꓲꓮꓡꓳꓖꓴꓰ ꓪꓲꓔꓧ ꓳꓔꓧꓰꓣ ꓣꓰꓡꓲꓖꓲꓳꓠꓢ)

ꓮ-ꓠꓲꓗ-ꓝꓼ ꓔꓯ ꓮ-ꓠꓲꓗ-ꓔꓲ-ꓬ ꓥˍ ꓟꓲ ꓐꓯˍ ꓡꓳ= ꓬꓲ ꓟꓸ ꓟꓲ ꓠꓬ ꓐꓲ ꓞꓹ ꓟ ꓮ ꓙꓳˍ ꓟ꓾ ꓮ ꓕꓯꓽ ꓥˍ ꓟꓲ ꓤꓲ ꓞꓹ ꓟ ꓟꓽ ꓙꓳˍ ꓟ꓾ ꓕꓲꓽ ꓧꓪꓹ ꓧꓪꓹ ꓓꓰ ꓢꓲ ꓙꓳˍ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥˍ ꓡꓳ= ꓟꓲ ꓠꓯ ꓗꓪ ꓙꓳꓹ ꓟ ꓙꓳꓹ ꓟ ꓮꓽ ꓙꓵꓽ꓾ ꓝꓮꓲ ꓟꓽ ꓞꓲ ꓟꓲ ꓠꓯ ꓗꓪ ꓒꓬꓱꓼ ꓔꓬ ꓟ ꓮꓽ ꓙꓵꓽ꓾ ꓝꓮꓲ ꓟ ꓞꓲ ꓠꓲꓹ ꓟ ꓗꓪ ꓓꓵꓽ ꓙꓹ ꓟ ꓮꓽ ꓙꓵꓽ꓾ ꓠꓲꓹ ꓟ ꓠꓯꓸꓼ ꓗꓪ ꓔꓳꓹ ꓜꓳꓹ ꓟ ꓮꓽ ꓙꓵꓽ ꓠꓬ ꓮ ꓕꓯꓽ ꓥˍ ꓟꓲ ꓜꓲ ꓞꓹ ꓟ ꓟꓽ ꓙꓳˍ ꓡꓳ= ꓙꓳꓹ ꓟꓽ ꓙꓳꓹ ꓟ ꓮꓽ ꓙꓵꓽ ꓠꓬ ꓜꓲ ꓞꓹ ꓟ ꓮꓽ ꓙꓳˍ ꓟ ꓡꓰ ꓐꓰ ꓕꓲꓽ ꓡꓰꓻ ꓐꓲ ꓜꓲꓼ ꓔ ꓟ ꓟꓽ ꓙꓳ= ꓟꓲ ꓠꓯ ꓗꓪ ꓙꓳꓹ ꓟꓹ ꓙꓳꓹ ꓟ ꓮꓽ ꓙꓵꓽ ꓠꓬ ꓮ ꓕꓯꓽ ꓥˍ ꓟꓲ ꓧꓳꓽ ꓡꓰꓹ ꓟ ꓙꓳˍ ꓡꓳ= ꓟꓲ ꓠꓯ ꓗꓪ ꓙꓳꓹ ꓟꓽ ꓙꓳꓹ ꓟ ꓮꓽ ꓙꓵꓽ ꓠꓬ ꓕꓲꓽ ꓧꓪꓹ ꓠꓬ ꓙꓳꓹ ꓡ ꓓꓳ ꓡ ꓕꓲꓽ ꓧꓪꓹ ꓠꓬ ꓐꓬ ꓡꓰ ꓟ ꓕꓲꓽ ꓧꓪꓹ ꓠꓬ ꓠꓽ ꓡꓰˍ ꓟ ꓦꓽ ꓡꓰꓹ ꓟ ꓕꓱ ꓡꓰꓳ ꓫꓵꓽ ꓙꓳˍ ꓡꓳ= ꓕꓱ ꓡꓰ ꓤꓲ ꓞꓹ ꓟ ꓮꓽ ꓙꓳꓹ ꓟ ꓕꓯ ꓮ ꓕꓯ ꓥˍ ꓟꓲ ꓓꓵꓽ ꓙꓽ ꓢꓲ ꓢꓯꓼ ꓕꓵꓼ ꓠꓹ ꓟ ꓐꓱ ꓶꓽ ꓖꓳ ꓡꓰ ꓢꓲ ꓬꓲ ꓟꓶ ꓗꓪ ꓤꓲ ꓞꓹ ꓟ ꓐꓯꓹ ꓟ ꓠꓲ-ꓦ-ꓠ ꓐꓯꓹ ꓟ ꓠꓯꓸꓼ ꓗꓪ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓠ ꓗˍ ꓡꓳ= ꓕꓱ ꓡꓰ ꓢꓯꓼ ꓕꓵꓼ ꓠꓹ ꓟ ꓠꓬ ꓠꓲ ꓠꓯ ꓡꓽ ꓞꓳ ꓮꓽ ꓙꓵꓽ ꓟꓯ ꓠꓹ ꓟ ꓶ ꓥˍ ꓡꓳ=

ꓓꓴꓗ-ꓘ ꓐꓯꓹ ꓟ ꓠꓬ ꓫꓸ ꓙꓵ ꓟꓶꓽ ꓙꓵ ꓓꓴ꓾ ꓫꓵꓹ ꓟ ꓒꓲꓼ ꓡꓰꓹ ꓟ꓾ ꓟꓶꓽ ꓡꓰꓹ ꓟ꓾ ꓠꓲꓹ ꓟ ꓠꓯꓸꓼ ꓗꓪ ꓠꓲꓹ ꓟ ꓢ ꓓꓴ ꓟꓽ ꓙꓳˍ ꓟ꓾ ꓮ ꓫꓵꓽ ꓙꓱꓹ ꓗꓪ ꓥˍ ꓟꓲ ꓢꓯꓼ ꓕꓵꓼ ꓠ ꓗꓸ ꓟ ꓚꓱꓹ ꓥ ꓕ ꓑꓳꓸ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓣꓳꓽ ꓠꓲꓹ ꓫꓵꓹ ꓟ ꓔꓯ ꓪ ꓠꓹ ꓟ ꓢꓯꓼ ꓕꓵꓼ ꓔꓬˍ ꓟ ꓙꓵꓹ ꓗꓪ ꓢꓯꓼ ꓕꓵꓼ ꓪꓴꓽ ꓧꓶ ꓠ ꓔ ꓟ꓾ ꓫꓸ ꓙꓵ ꓟꓶꓽ ꓙꓵ ꓓꓴ ꓔꓳꓹ ꓜꓳꓹ ꓟ ꓕꓱ ꓡꓰꓳ ꓫꓵꓽ ꓮ ꓕꓯ ꓥˍ ꓟꓲ ꓙꓳˍ ꓡꓳ= ꓕꓱ ꓡꓰ ꓫꓸ ꓙꓵ ꓟꓶ ꓙꓵ ꓓꓴ ꓙꓳˍ ꓟ ꓔꓯ ꓓꓴꓗ-ꓘ ꓐꓯꓹ ꓟ ꓥ ꓪ= ꓣꓳ ꓠꓲꓹ ꓫꓵꓹ ꓟ ꓔꓯ ꓪ ꓠꓹ ꓟ ꓐꓱ ꓶꓽ ꓢꓯꓼ ꓕꓵꓹ ꓕꓯ ꓧꓪꓹ ꓡꓰ ꓟ ꓙꓳꓹ ꓥˍ ꓟꓲ ꓬꓲ ꓟꓶꓽ ꓗꓪ ꓠꓬ ꓕꓱ ꓟ ꓠꓬ ꓚꓽ ꓡꓰ ꓢꓲ ꓐꓴ ꓡꓰ ꓢꓲ ꓟꓽ ꓠꓲꓹ ꓫꓵꓹ ꓟ ꓕꓱ ꓡꓰꓳ ꓫꓵꓽ ꓬꓲ ꓟꓶ ꓗꓪ ꓠꓬ ꓘꓷ ꓡꓰ ꓙꓲ ꓐꓶ= ꓖꓳ ꓡꓰ ꓓꓽ ꓪꓴꓸ ꓕꓯ ꓮ ꓘꓶꓸ ꓪ ꓠꓲꓹ ꓫꓵꓹ ꓥˍ ꓟꓲ ꓬꓲ ꓟꓶꓽ ꓗꓪ ꓚꓵ ꓚꓵ ꓪ ꓠꓬ ꓟꓽꓠꓲꓹ ꓫꓵ ꓗꓷ ꓡꓰꓹ ꓟ ꓔꓯ ꓣꓳꓽ ꓛꓳ ꓠꓬ ꓠꓬ ꓣꓳꓽ ꓠꓲꓹ ꓟ ꓠꓯꓸꓼ ꓗꓪ ꓐꓲ ꓜꓲꓹ ꓟ ꓟꓽ ꓙꓳˍ ꓟ ꓬꓲꓸ ꓢꓷꓸ ꓡꓰ ꓓꓴ ꓥˍ ꓡꓳ= ꓐꓯ ꓟꓴ ꓫꓱꓹ ꓟ ꓠꓬ ꓟꓲ ꓠꓯ ꓗꓪ ꓮꓸ ꓫꓵꓽ ꓟꓲ ꓤꓲ ꓞꓹ ꓟ ꓟꓽ ꓙꓳ= ꓔꓯ ꓥꓳ ꓕꓲꓽ ꓟ ꓐꓯ ꓠꓬ ꓑꓧꓳꓠꓰ ꓕꓲꓽ ꓟ ꓔꓯ ꓠꓴ ꓪ ꓡꓰꓳ ꓐꓯ ꓓꓲ ꓖꓼ ꓥꓳ= ꓖꓳ ꓟ ꓔꓯ ꓣꓱꓽ ꓡꓹ ꓟ ꓟꓶ ꓤ ꓡꓳꓼ ꓡꓰ ꓕꓯ ꓟꓽ ꓠꓲꓹ ꓫꓵꓹ ꓟ ꓬꓲ ꓙꓵꓹ ꓛꓲ ꓡꓺꓳ= ꓮ ꓡꓰꓳꓼ ꓐꓯ ꓠꓬ ꓐꓬ ꓡꓰꓹ ꓟ ꓐꓯꓹ ꓟ ꓬꓲ ꓙꓵꓹ ꓛꓲ ꓡꓹ ꓟ ꓪꓴꓸ ꓠꓬꓲ ꓠꓲ ꓖꓳ ꓟ ꓡꓰꓽ ꓟꓽ ꓞꓲ ꓠꓱꓸ ꓐꓯꓼ ꓕꓲꓽ ꓫꓵꓽ ꓕꓯ ꓠꓲꓹ ꓠꓵ ꓡꓹ ꓟ ꓪꓴꓸ ꓠꓬꓲ ꓠꓲ ꓕꓱ ꓟ ꓠꓬ ꓟꓽ ꓠꓲꓹ ꓫꓵꓹ ꓟ ꓕꓱ ꓡꓰ ꓗꓷ ꓡꓰꓹ ꓟ ꓥ ꓪ= ꓖꓳ ꓡꓰ ꓟꓽ ꓠꓲꓹ ꓫꓵꓹ ꓟ ꓗꓷ ꓡꓰꓹ ꓠꓬ ꓠꓲꓹ ꓫꓵꓹ ꓟ ꓐꓰ ꓠꓲꓹ ꓟ ꓢ ꓓꓴ ꓐꓱ ꓶꓽ ꓬꓲꓸ ꓫꓵꓼ ꓕꓲꓽ ꓟ ꓧꓪ ꓡꓹ ꓓꓴ ꓟ ꓥ ꓪ=

ꓟꓽꓠꓲꓹ ꓫꓵꓹ ꓟ ꓗꓷ ꓡꓰꓹ ꓟ ꓠꓬ ꓑ ꓡꓰꓹ ꓟ ꓡꓶꓸ ꓡꓰꓹ ꓟ ꓕꓱ ꓡꓰ ꓗꓷ ꓡꓰ ꓢꓲ ꓡꓶꓸ ꓡꓰꓹ ꓟ ꓐꓯꓹ ꓟ ꓬꓲ ꓟꓸ ꓟꓲꓽ ꓥ ꓪ= ꓕꓱ ꓡꓰ ꓠꓲꓹ ꓟ ꓠꓯꓸꓼ ꓗꓪ ꓠꓲꓹ ꓟ ꓟꓽ ꓢꓹ ꓟ ꓠꓲꓹ ꓟ ꓠꓯꓸꓼ ꓗꓪ ꓐꓲ ꓜꓲꓼ ꓟ ꓟꓽ ꓙꓳˍ ꓟ ꓠꓬ 3 ꓫꓵꓽ ꓗꓪ ꓐꓰ ꓓꓳ ꓡꓹ ꓡꓳ ꓐꓰ ꓐꓯˍ ꓡꓳ= 1ꓸ ꓣꓱꓽ ꓐꓴ ꓡꓰꓹ ꓟ ꓪꓴꓸ ꓠꓬꓲ 2ꓸ ꓐꓬ ꓡꓰꓹ ꓟ ꓐꓲꓽ ꓡꓰꓹ ꓟ ꓪꓴꓸ ꓠꓬꓲ 3ꓸ ꓐꓬ ꓡꓰ ꓠꓹ ꓟ ꓔꓯ ꓙꓳꓹ ꓟ ꓪꓴꓸ ꓠꓬꓲ ꓥˍ ꓡꓳ=