ꓮ-ꓡ ꓪꓴ-ꓢ ꓐꓰ ꓟꓴꓽ ꓗꓪ ꓝꓲ ꓓꓴ ꓐꓴ (Dialogue with other Religions)

ꓮ-ꓡ ꓐꓯꓹ ꓟ ꓫꓸ ꓪ ꓘꓶꓽ ꓠꓬ ꓯ-ꓣꓮꓐ ꓫꓸ ꓪ ꓘꓶꓽ ꓗꓪ ꓐꓰ ꓥ ꓢꓲ ꓥ ꓢꓲ ꓰꓡꓮꓧ ꓐꓯꓹ ꓟ ꓫꓸ ꓪ ꓘꓶꓽ ꓗꓪ ꓐꓰ ꓡꓹ ꓟ ꓥˍ ꓡꓳ= ꓰ-ꓡ ꓐꓯꓹ ꓟ ꓫꓸ ꓪ ꓘꓶꓽ ꓠꓬ ꓪꓴ-ꓢ ꓐꓯꓹ ꓟ ꓫꓸ ꓪ ꓘꓶꓽ ꓗꓪ ꓐꓰ ꓡꓹ ꓟ ꓥ ꓐꓶ= ꓖꓳ ꓟ ꓪꓴꓸ ꓠꓬꓲ ꓮ-ꓡ ꓐꓯꓹ ꓟ ꓠꓬ ꓪꓴ-ꓢ ꓐꓯꓹ ꓟ ꓬꓲ ꓟꓸ ꓟꓲꓽ ꓥˍ ꓡꓳ= ꓲ-ꓢ-ꓡꓮꓟ ꓗꓴꓷꓼ ꓗꓪ ꓔꓬꓹ ꓟ ꓙꓲ-ꓢꓴ ꓢꓲ ꓤꓼ ꓐꓴ ꓥˍ ꓟꓲ ꓪꓴ-ꓢ ꓔꓯ ꓮ-ꓡ ꓐꓰ ꓣꓱꓽ ꓔꓬꓹ ꓟ ꓮꓽ ꓟꓬꓹ ꓙꓳˍ ꓡꓳ= ꓮ-ꓡ ꓪꓴ-ꓢ ꓠꓬ ꓬꓲ ꓒꓵ ꓥˍ ꓟꓲ ꓥ ꓢꓲ ꓬꓲ ꓟ ꓥˍ ꓟꓲ ꓥˍ ꓡꓳ= ꓬꓲ ꓟꓸ ꓟꓲꓽ ꓠꓬ ꓮ-ꓡ ꓪꓴ-ꓢ ꓠꓬ ꓐꓹ ꓐꓽ ꓥˍ ꓟꓲ ꓥ ꓢꓲ ꓟꓹ ꓟ ꓥˍ ꓟꓲ ꓥˍ ꓡꓳ= ꓐꓰ ꓕꓱ ꓡꓰ ꓐꓯ ꓠꓲꓹ ꓫꓵꓹ ꓟ ꓥˍ ꓪ= ꓖꓳ ꓡꓰ ꓥˍ ꓟꓲ ꓲꓢꓡꓮꓟ ꓙꓵ ꓠꓲꓹ ꓠꓯꓼ ꓗꓪ ꓠꓬ ꓬꓲ ꓒꓵ ꓥˍ ꓟꓲ ꓟꓽ ꓥ꓾ ꓬꓲ ꓟ ꓥˍ ꓟꓲ ꓟꓽ ꓥ ꓠꓬꓲꓽ ꓗꓴꓸ ꓚꓸ ꓕꓯꓹ ꓫꓵ ꓗꓪ ꓟ ꓐꓯ ꓟꓵ ꓫꓰꓹ ꓟ ꓠꓬ ꓐꓹ ꓐꓽ ꓥˍ ꓟꓲ ꓟꓽ ꓟ ꓥˍ ꓟꓲ ꓟꓽ ꓥ ꓕꓯ ꓫꓵ ꓗꓪ ꓟ ꓥˍ ꓡꓳ ꓐꓰ ꓐꓯˍ ꓡꓳ= ꓮ-ꓡ ꓪꓴ-ꓢ ꓔꓯ ꓤꓽ ꓑꓸ ꓤꓼ ꓕꓯ ꓡꓰꓹ ꓣꓱꓹ ꓥˍ ꓟꓲ ꓒꓵꓽ ꓗꓹ ꓬꓰ ꓟ ꓡꓰ ꓢꓲ ꓥˍ ꓡꓳ= ꓮ-ꓡ ꓪꓴ-ꓢ ꓔꓯ ꓕꓲꓽ ꓣꓳꓹ ꓐꓯˍ ꓟ ꓬꓲ ꓟꓸ ꓟꓲꓽ ꓓꓳˍ ꓟ ꓫꓸ ꓪ ꓘꓶꓽ ꓡꓰ ꓣꓱˍ ꓡꓳ= ꓬꓲ ꓟꓸ ꓟꓲꓽ ꓠꓬ ꓮ-ꓡ ꓪꓴ-ꓢ ꓠꓬ ꓠꓱꓸ ꓐꓯꓼ ꓟꓽ ꓙꓳ꓾ ꓕꓲꓽ ꓟꓹ ꓡꓰ ꓥˍ ꓡꓳ=

ꓙꓰ-ꓢꓴ ꓢꓲꓺ ꓤꓼ ꓐꓴ ꓙꓵ ꓔꓬ ꓟ ꓡꓰ ꓐꓰ ꓪꓴ-ꓢ ꓠꓬ ꓕꓲ ꓟꓹ ꓥ ꓢꓲ ꓢꓼ ꓣꓳ ꓕꓲꓽ ꓗꓳ ꓓꓱ ꓐꓯꓹ ꓟ ꓔꓯ ꓠꓬ ꓙꓵ ꓔꓬ ꓟ ꓟꓽ ꓙꓳ= ꓙꓰ-ꓢꓴ ꓢꓲꓺ ꓤꓼ ꓐꓴ ꓙꓵ ꓔꓬ ꓟ ꓡꓰ ꓐꓰ ꓪꓴ-ꓢ ꓠꓬ ꓕꓲ ꓟꓹ ꓥ ꓢꓲ ꓢꓼ ꓣꓳ ꓕꓲꓽ ꓗꓳ ꓓꓱ ꓐꓯꓹ ꓟ ꓔꓯ ꓠꓬ ꓖꓣꓰꓰꓗ ꓐꓯꓹ ꓟ ꓦꓲ-ꓡꓰ ꓡꓽ ꓞꓳ ꓐꓴ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓗꓪ ꓐꓰ ꓓꓵꓽ ꓙꓽ ꓢꓲ ꓓꓳ ꓡꓹ ꓟ ꓥ ꓪ= ꓢꓲꓽ ꓫꓬ ꓕꓳꓽ ꓶ ꓗꓪ ꓠꓬ ꓢꓼ ꓣꓳ ꓕꓲꓽ ꓗꓳ ꓓꓱ ꓐꓯꓹ ꓟ ꓮꓽ ꓙꓳ ꓐꓰ ꓐꓯˍ ꓡꓳ= ꓮ ꓡꓰꓳꓼ ꓐꓯ ꓠꓬ ꓙꓰ-ꓢꓴ ꓢꓲꓺ ꓤꓼ ꓐꓴ ꓙꓵ ꓠꓲꓹ ꓓꓽ ꓪꓴꓸ ꓫꓶꓸ ꓡꓹ ꓟ ꓬꓴ-ꓓ ꓙꓵ ꓠꓲꓹ ꓗꓪ ꓠꓬ ꓢꓼ ꓣꓳ ꓕꓲꓽ ꓗꓳ ꓓꓱꓽ ꓐꓯˍ ꓟ ꓟꓽ ꓙꓳ= ꓮ-ꓡ ꓪꓴ-ꓢ ꓠꓬ ꓮꓸ ꓫꓵꓽ ꓐꓰ ꓬꓰ ꓐ ꓡ ꓢꓴ ꓪꓴ-ꓢ ꓬꓰ-ꓧꓳ-ꓧꓪꓼ ꓐꓰ ꓕꓲꓽ ꓟꓹ ꓥˍ ꓡꓳ= ꓮ-ꓡ ꓪꓴ-ꓢ ꓠꓬ ꓬꓲ ꓚꓰ ꓬꓲ ꓪꓴꓸ ꓟꓽ ꓙꓳ ꓮꓸ ꓫꓵꓽˍ ꓟꓲ ꓬꓲ ꓐ ꓡ ꓢꓴ ꓬꓲ-ꓧꓳ-ꓧꓪꓼ ꓪꓴ-ꓢ ꓐꓰ ꓕꓲꓽ ꓟ꓾ ꓬꓲ ꓟꓶꓽ ꓕꓲꓽ ꓠꓬꓲ ꓗꓪ ꓐꓯ ꓟꓵ ꓘꓶꓽ ꓢꓴ ꓥ_ ꓡꓳ ꓐꓰ ꓙꓵ ꓔꓬ ꓡꓳ=  ꓮ-ꓡ ꓪꓴ-ꓢ ꓠꓬ ꓬꓴ-ꓓ ꓙꓵ ꓠꓲꓹ ꓐꓰ ꓙꓰ-ꓢꓴ ꓢꓲ ꓤꓼ ꓐꓴ ꓙꓵ ꓠꓲꓹ ꓠꓯꓸꓼ ꓗꓪ ꓪꓴ-ꓢ ꓐꓰ ꓕꓲꓽ ꓟꓹ ꓥˍ ꓡꓳ= ꓫꓸ ꓪ ꓘꓶꓽ ꓟꓽ ꓪ ꓡꓰ ꓘꓳ ꓟ ꓪꓴꓸ ꓠꓬ ꓘꓴˍ ꓟ ꓟꓽ ꓪꓽ ꓡꓯ ꓘꓳ ꓟ ꓥˍ ꓡꓳ=

ꓬꓴ-ꓓ ꓙꓵ ꓠꓲꓹ ꓐꓰ ꓙꓰ-ꓢꓴ ꓢꓲ ꓤꓼ ꓐꓴ ꓙꓵ ꓠꓲꓹ ꓠꓯꓸꓼ ꓗꓪ ꓪꓴ-ꓢ ꓐꓰ   ꓕꓲꓽ ꓟꓹ ꓥˍ ꓟ ꓕꓯ ꓛꓳ ꓠꓬꓲ ꓠꓬ ꓬꓲ ꓚꓰ ꓬꓲ ꓪꓴꓸ ꓕꓳꓽ ꓶ ꓔꓯ ꓣꓳ ꓛꓳꓽ ꓠꓬꓲ ꓔ ꓡꓳ= ꓮ-ꓐ-ꓡ-ꓦ ꓠꓯꓼ ꓗꓪ ꓤꓽ 2 ꓫꓵꓸ ꓙꓳˍ ꓡꓳ= ꓕꓲꓽ ꓣꓳ ꓠꓬ ꓫꓬ-ꓚꓬ ꓬꓲ ꓤꓽ ꓲ-ꓫꓵ-ꓟ-ꓡꓲ ꓕꓲꓽ ꓣꓳ ꓠꓬ ꓢ-ꓣ-ꓬꓼ ꓬꓲ ꓤꓽ ꓬꓲ-ꓢ ꓥˍ ꓡꓳ= -ꓢ-ꓣ-ꓬꓼ ꓠꓬ ꓞꓲꓼ ꓪꓴꓽ ꓡꓹ ꓥˍ ꓟꓲ ꓤꓼ ꓠꓱ ꓟꓽ ꓪꓸ ꓟ ꓪꓴ ꓠꓬꓲ ꓮ-ꓐ-ꓡ-ꓦ ꓖꓴꓽ ꓙꓵꓽ ꓠꓲꓸ ꓫꓬꓸ ꓐꓰ ꓬꓲ ꓫꓵꓽ ꓬꓲ ꓪꓳꓸ ꓔꓯ ꓝꓸ ꓠꓹ ꓟ ꓢ-ꓣ-ꓬꓼ ꓠꓬ ꓛꓳ ꓑꓸ ꓟ ꓥˍ ꓟ ꓫꓬ-ꓚꓬ ꓔꓯ ꓮ-ꓐ-ꓡ-ꓦ ꓐꓰ ꓕꓲꓽ ꓪꓼ ꓬꓲꓹ ꓔ ꓝꓲˍ ꓡꓳ= ꓖꓳ ꓡꓰ ꓢꓲ ꓫꓬ-ꓚꓬ ꓠꓯꓸꓼ ꓗꓪ ꓗꓳ ꓓꓱꓽ ꓠꓬꓲꓽ ꓕꓱꓹ ꓗꓶ ꓡꓰ ꓢꓲ ꓬꓲ-ꓫꓵ-ꓟ-ꓡꓲ ꓔꓯ ꓛꓱꓽ ꓟꓳꓹ ꓟ ꓥˍ ꓡꓳ= ꓖꓳ ꓡꓰ ꓥˍ ꓟꓲ ꓗꓸ ꓠꓯꓸ ꓠꓬ ꓢ-ꓣ-ꓬꓼ ꓠꓯꓸꓼ ꓗꓪ ꓤꓽ ꓶ ꓡꓰ ꓢꓲ ꓬꓲ-ꓢ ꓕꓯ ꓛꓱꓽ ꓟꓳ ꓗꓷꓳ= ꓖꓳ ꓕꓯ ꓢ-ꓣ-ꓬꓼ ꓠꓬ ꓬꓲ-ꓫꓵ-ꓟ-ꓡꓲ ꓐꓰ ꓬꓲ-ꓢ ꓠꓬꓲ ꓗꓴꓸ ꓚꓸ ꓗꓪ ꓫꓵꓽ ꓪꓴ ꓙꓳ ꓡ ꓫꓸ ꓪ ꓟꓬꓽ ꓡˍ ꓫꓵ ꓙꓳ ꓡ ꓖꓴꓽ ꓙꓴꓽ ꓠꓲꓸ ꓫꓯꓸ ꓐꓹ ꓡꓯꓽ ꓘꓳꓽ ꓟ ꓠꓯꓼ ꓗꓪ ꓫꓸ ꓡ ꓐꓯ ꓢꓲ ꓠꓬ ꓫꓬ-ꓚꓬ ꓐꓰ ꓬꓲ ꓤꓽ ꓬꓲ-ꓫꓵ-ꓟ-ꓡꓲ ꓔꓯ ꓖꓼ ꓓꓳ ꓗꓷˍ ꓟ ꓥˍ ꓡꓳ= ꓖꓳ ꓡꓰ ꓥˍ ꓟꓲ ꓲ-ꓢ-ꓡꓮꓟ ꓙꓵ ꓠꓲꓹ ꓠꓯꓸꓼ ꓗꓪ ꓟꓴ-ꓢ-ꓡꓲꓟ ꓐꓴ ꓣꓱꓹ ꓟ ꓗꓳ-ꓣꓮꓠ ꓢꓲꓽ ꓫꓬ ꓕꓳꓽ ꓶ ꓗꓪ ꓠꓬ ꓮ-ꓐ-ꓡ-ꓦ ꓠꓬ ꓬꓲ-ꓫꓵ-ꓟ-ꓡꓲ ꓔꓯ ꓮꓽ ꓘꓶꓸ ꓠꓵꓹ ꓟ ꓪꓴ ꓠꓬꓲ ꓪꓴ-ꓢ ꓔꓯ ꓛꓴ ꓔꓲ ꓠꓹ ꓟ ꓐꓱ ꓶ ꓬꓲ-ꓫꓵ-ꓟ-ꓡꓲ ꓔꓯ ꓧꓳꓽ ꓔꓯꓹ ꓙꓰˍ ꓟ ꓥˍ ꓡꓳ ꓐꓰ ꓐꓯˍ ꓡꓳ= ꓮ-ꓐ-ꓡ-ꓦ ꓠꓬ ꓫꓬ-ꓚꓬ ꓐꓰ ꓬꓲ ꓤꓽ ꓬꓲ-ꓫꓵ-ꓟ-ꓡꓲ ꓔꓯ ꓟꓰꓗ-ꓗ ꓡꓳ ꓒꓱ ꓗꓪ ꓛꓲ ꓛꓳ ꓙꓰ ꓢꓲ ꓖꓳ ꓗꓪ ꓟꓶ ꓤ ꓔꓬ ꓡꓳ= ꓬꓲ-ꓢ ꓬꓲ ꓤꓽ ꓬ-ꓗꓴ꓾ ꓬ-ꓗꓴꓹ ꓠꓬ ꓟꓴ ꓗꓪ ꓝꓲ ꓓꓴ ꓐꓰ ꓣꓴ ꓙꓵꓽ ꓡꓯꓽ ꓘꓳ ꓗꓸ ꓠꓯꓸ ꓬꓲ-ꓢꓷ-ꓡꓲꓼ ꓟꓬꓱ ꓐꓯꓹ ꓟꓶ ꓡꓰ꓾ ꓬꓲ-ꓢꓷ-ꓡꓲꓼ ꓞꓳ ꓫꓵꓽ ꓒꓬꓱꓼ ꓡꓹ ꓟ ꓥˍ ꓡꓳ= ꓬꓲ-ꓫꓵ-ꓟ-ꓡꓲ ꓬꓲ ꓞꓲꓼ ꓤꓼ ꓡꓯꓸ ꓤꓼ ꓐꓴ ꓠꓬ ꓮ-ꓣꓮꓐ ꓞꓳ ꓫꓵꓽ ꓐꓴ ꓒꓬꓱꓼ ꓡꓹ ꓟ ꓥˍ ꓡꓳ= ꓖꓳ ꓟ ꓑꓶꓸ ꓓꓴ  ꓮ-ꓣꓮꓐ ꓞꓳ ꓫꓵꓽ ꓐꓴ ꓠꓬ ꓮꓸ ꓫꓵꓹ ꓟꓲ ꓬꓲ ꓐ ꓡ ꓢꓴ ꓪꓴ-ꓢ ꓔꓯ ꓙꓵ ꓔꓬ ꓢꓴ ꓥˍ ꓡꓳ=