ꓮ-ꓡ ꓪꓴ-ꓢ ꓐꓰ ꓬꓲ ꓝꓲ ꓓꓴ ꓐꓴ(2) (Dialogue with other Religions)

ꓮ-ꓡ ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤꓽ ꓔꓯ ꓟꓸ ꓠꓹ ꓟ ꓐꓱ ꓶ ꓬꓲ ꓝꓲ ꓓꓴ ꓐꓴ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓡˍ ꓡꓳ= ꓬꓲ ꓝꓲ ꓓꓴ ꓐꓴ 2 ꓫꓵꓽ ꓙꓳˍ ꓡꓳ= ꓮ-ꓡ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓔꓯ ꓟꓲ ꓠꓯ ꓗꓪ ꓔꓯꓹ ꓡ ꓢꓴ ꓟꓯ ꓡ ꓢꓴ 2ꓸ ꓶꓽ ꓓꓳꓽ ꓫꓱꓸ ꓓꓳꓽ ꓔꓯꓹ ꓡˍ ꓟ ꓟꓽ ꓙꓳ ꓙꓳ ꓝꓲ ꓩꓴ ꓡꓸ ꓟ ꓝꓲ ꓓꓴ ꓐꓴ ꓕꓲꓽ ꓫꓵꓽ 2 ꓫꓵꓽ ꓙꓳˍꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓶꓽ ꓓꓳꓽ ꓫꓱꓸ ꓓꓳꓽ ꓔꓯ ꓔꓯꓹ ꓡ ꓢꓴ ꓟꓯ ꓡ ꓢꓴ ꓔꓯ ꓠꓬ ꓣ-ꓢꓴꓡ ꓐꓰ ꓐꓯ ꓢꓲ ꓶꓽ ꓓꓳꓽ ꓫꓱꓸ ꓓꓳꓽ ꓟꓯ ꓡ ꓢꓴ ꓟꓽ ꓥ ꓟꓶꓽ ꓠꓶꓹ  ꓝꓲ ꓢꓴ ꓔꓯ ꓠꓬ ꓠ-ꓐꓲ ꓐꓰ ꓕꓯ ꓡꓰ ꓐꓯꓹ ꓐꓶ= ꓖꓳ ꓟ ꓪꓴꓸ ꓠꓬꓲ ꓝꓲ ꓓꓴ ꓐꓯꓹ ꓕꓯ ꓠꓬ ꓕꓲꓽ ꓐꓱ ꓠꓬ ꓠ-ꓐꓲ ꓥ ꓢꓲ ꓕꓲꓽ ꓐꓱ ꓠꓬ ꓣ-ꓢꓴꓡ ꓥˍ ꓡꓳ= ꓣꓳꓽ ꓙꓰ-ꓢꓴ ꓢꓲ ꓤꓽ ꓐꓴ ꓕꓲꓽ ꓛꓱꓽ ꓗꓪ ꓐꓰ ꓛꓳꓽ ꓠꓬꓲ ꓠꓬ ꓮꓽ ꓙꓵꓽ ꓠꓬ ꓟꓶꓽ ꓠꓶꓹ ꓝꓸ ꓢꓴꓹ ꓡꓰ ꓥˍ ꓡꓳ= ꓝꓲ ꓓꓴ ꓐꓴ ꓠꓬ ꓟꓲ ꓠꓯ ꓞꓳ ꓤꓽ ꓐꓱ ꓶ ꓟꓸ ꓒꓽ ꓥꓹ ꓟ ꓡꓰ ꓟꓽ ꓞꓲ ꓟꓴ ꓗꓪ ꓝꓲ ꓓꓴ ꓐꓴ ꓟꓸ ꓒꓽ ꓥˍ ꓟꓲ ꓥˍ ꓡꓳ= ꓝꓲ ꓓꓴ ꓐꓴ ꓠꓬ ꓟꓲ ꓠꓯ ꓞꓳ ꓤꓽ ꓥ ꓥˍ ꓟꓲ ꓟꓴ ꓗꓪ ꓝꓲ ꓓꓴ ꓐꓴ ꓕꓯ ꓢꓲ ꓟꓬꓽ ꓠꓬꓲ ꓪꓽ ꓠꓬꓲꓹ ꓟ ꓟꓲ ꓓꓳꓽ ꓙꓳˍ ꓟ ꓥˍ ꓡꓳ= 

ꓝꓲ ꓓꓴ ꓐꓯꓹ ꓟ ꓢꓷꓸ ꓡꓰ ꓓꓴ 7 ꓙꓳꓹ ꓐꓶ= 

1ꓸ ꓟꓲ ꓠꓯ ꓞꓳ ꓤꓽ ꓮꓽ ꓙꓵꓽ ꓦ ꓡꓱ ꓐꓳ ꓐ ꓡꓹ ꓢꓴ꓾

2ꓸ ꓮ-ꓡ ꓪꓴ-ꓢ ꓡꓰ ꓠꓱꓸ ꓐꓯꓼ ꓞꓳ ꓤꓽ ꓕꓯ ꓢꓲ ꓟꓬꓽ ꓠꓬꓲ ꓒꓵꓽ ꓗꓹ ꓬꓰˍ ꓟ ꓕꓯ ꓑꓯꓹ ꓟꓶ ꓢꓴ꓾

3ꓸ ꓮ-ꓡ ꓪꓴ-ꓢ ꓐꓰ ꓮꓽ ꓕꓯꓽ ꓥˍ ꓟꓲ ꓝꓸ ꓡꓯꓽ ꓘꓳ ꓢꓴ꓾

4ꓸ ꓔꓱꓹ ꓚꓵꓸ ꓟ ꓔꓯ ꓠꓲꓹ ꓫꓵ ꓢꓴ꓾

5ꓸ ꓢꓲꓽ ꓫꓬ ꓢꓴ꓾

6ꓸ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓐꓲ ꓞꓹ ꓢꓴ꓾ 

7ꓸ ꓝꓲ ꓓꓴ ꓐꓯꓹ ꓟ ꓟꓬꓱ ꓓꓳꓽ ꓮ ꓕꓯꓽ ꓥˍ ꓟꓲ ꓟꓽ ꓐꓬ ꓡꓰ ꓢꓴ ꓕꓱ ꓡꓰ ꓙꓳ ꓕꓯꓽ ꓢꓲ ꓮ-ꓡ ꓪꓴ-ꓢ ꓝꓲ ꓓꓴ ꓥˍ ꓡꓳ ꓐꓰ ꓕꓱ ꓡꓰ ꓙꓵ ꓔꓬꓹ ꓟ ꓥ ꓪ= 

  ꓮ-ꓡ ꓪꓴ-ꓢ ꓝꓲ ꓓꓴ ꓒꓬꓱꓼ ꓡ ꓠꓹ ꓟ ꓐꓱ ꓶ ꓠꓬ ꓜ ꓚꓵꓸ ꓚꓴꓸꓪꓽ ꓘꓴ ꓢꓯꓼ ꓕꓵꓼ꓾ ꓢꓲꓺ ꓡꓲ ꓐꓰ ꓔꓬ ꓢꓲ ꓪꓽ ꓘꓴ ꓢꓯꓼ ꓕꓵꓼ꓾ ꓪꓴ-ꓢ ꓔꓯ ꓠꓲꓹ ꓡꓱ ꓢꓲ ꓮꓽ ꓡꓴ ꓮꓽ ꓔꓮꓠ ꓗꓷ ꓥˍ ꓟꓲ ꓮ-ꓡ ꓝꓲ ꓓꓴ ꓠꓬ ꓒꓬꓱꓼ ꓟꓽ ꓐ ꓡ= ꓦ ꓕꓲꓽ ꓒꓳꓹ ꓔꓯ ꓢꓲ ꓗꓪ ꓮ ꓟꓬ ꓢꓯꓼ ꓕꓵꓼ ꓥˍ ꓟꓲ ꓮ-ꓡ ꓪꓴ-ꓢ ꓟꓽ ꓢꓲ ꓔ ꓠꓬ ꓬꓲ ꓝꓲ ꓓꓴ ꓒꓬꓱꓼ ꓟꓽ ꓐ ꓡ= ꓝꓲ ꓓꓴ ꓐꓴ ꓠꓬ ꓮ-ꓡ ꓪꓴ-ꓢ ꓐꓯ ꓘꓶꓽ ꓔꓯ ꓟꓲ ꓠꓯ ꓞꓳ ꓤꓽ ꓐꓴ ꓔꓯ ꓐꓯ ꓟꓸ ꓖꓶ ꓢꓲ ꓬꓲ ꓟꓶꓽ ꓕꓲꓽ ꓠꓬꓲ ꓗꓪ ꓟꓲ ꓠꓯ ꓞꓳ ꓤꓽ ꓮꓽ ꓙꓵꓽ ꓠꓬ ꓚꓬꓴꓹ ꓙ ꓟ ꓣꓱꓽ ꓛꓲ ꓑꓯꓹ ꓟꓶ ꓠꓹ ꓟ ꓐꓱ ꓶ ꓟꓬꓱꓽ ꓓꓽ ꓟ ꓠꓬ ꓬꓲ ꓪꓽ ꓟꓯ ꓠꓬꓲ ꓔ ꓟ ꓟꓬꓱꓽ ꓥˍ ꓡꓳ= ꓬꓲ ꓟꓶ ꓕꓲꓽ ꓠꓬꓲ ꓗꓪ ꓟꓲ ꓠꓯ ꓞꓳ ꓤꓽ ꓐꓱ ꓶ ꓟꓬꓽ ꓠꓬꓲ ꓐꓶꓹ ꓠꓬꓲ ꓝꓴꓲ ꓙꓳ ꓢꓴ ꓐꓱ ꓶ ꓮ-ꓡ ꓪꓴ-ꓢ ꓟꓲ ꓙꓬ ꓗꓪ ꓔꓱꓹ ꓥ ꓚꓽ ꓥ ꓐꓰ ꓦꓲꓼ ꓙ ꓠꓹ ꓟ ꓐꓱ ꓶ ꓥˍ ꓡꓳ= ꓬꓲ ꓪ ꓠꓬ ꓫꓵ ꓥˍ ꓟꓲ ꓬꓲ ꓪꓽ ꓠꓲꓹ ꓟ ꓠꓬ ꓮ ꓕꓯ ꓥˍ ꓟꓲ ꓟꓽ ꓫꓵ= ꓡꓱ ꓜꓳ ꓗꓪ ꓮ ꓕꓯ ꓥˍ ꓟꓲ ꓪꓽ ꓘꓴ ꓢꓲ ꓔꓬ ꓡꓳ= ꓝꓲ ꓓꓴ ꓐꓴ ꓠꓬ ꓬꓲꓽ ꓟꓶ ꓔꓬ ꓥˍ ꓟꓲ ꓬꓲ ꓪꓽ ꓠꓲꓹ ꓟ ꓠꓬ ꓮ ꓕꓯꓽ ꓥˍ ꓟꓲ ꓬꓲꓽ ꓟꓶ ꓔꓬ ꓟ ꓟꓽ ꓙꓳ= ꓝꓲ ꓓꓴ ꓐꓴ ꓠꓯꓸꓼ ꓗꓪ ꓚꓳꓸ ꓟꓴ-ꓧꓮꓟ-ꓟꓴꓓ ꓠꓬ ꓮ-ꓡ ꓪꓴ-ꓢ ꓝꓲ ꓓꓴ ꓗꓪ ꓚꓳꓸ ꓟꓽ ꓓ ꓪꓴꓽ ꓖꓴ ꓡꓰꓹ ꓟ ꓝꓲ ꓓꓴ ꓥˍ ꓡꓳ= ꓮ-ꓡ ꓪꓴ-ꓢ ꓝꓲ ꓓꓴ ꓐꓴ ꓮ ꓟꓬ ꓣꓳ ꓔꓬ ꓟꓹ ꓔꓯ ꓮꓽ ꓟ ꓥˍ ꓟꓲ ꓚꓵ ꓚꓵ ꓢꓷꓸ ꓟꓽ ꓐ ꓡ= ꓕꓲꓽ ꓐꓱ ꓐꓯꓹ ꓟ ꓠꓬ 124ꓹ000 ꓣꓳ ꓙꓳꓹ ꓟ ꓥˍ ꓡꓳ= ꓝꓲ ꓓꓴ ꓠꓯꓸꓼ ꓗꓪ ꓚꓳꓸ 313 ꓥˍ ꓠꓬ 315 ꓣꓳ ꓠꓬ ꓣ-ꓢꓴꓡ ꓐꓯꓹ ꓟ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓟꓯ ꓢꓴ ꓐꓴ ꓥˍ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓞꓲꓹ ꓟ ꓝꓲ ꓓꓴ ꓐꓴ ꓠꓬ ꓠ-ꓐꓲ ꓐꓯꓹ ꓟ ꓟꓶꓽ ꓠꓶꓹ ꓝꓸ ꓢꓴ ꓐꓴ ꓥˍ ꓡꓳ= ꓠ-ꓐꓲ ꓐꓯꓹ ꓟ ꓟꓶꓽ ꓠꓶꓹ ꓝꓸ ꓒꓽ ꓐꓴ ꓠꓬ ꓣ-ꓢꓴꓡ ꓐꓯꓹ ꓟ ꓝꓲ ꓓꓴ ꓐꓴ ꓠꓯꓸ ꓘꓪ ꓗꓪ ꓣꓳꓹ ꓡꓳ=        

   ꓣ-ꓢꓴꓡ ꓐꓯꓹ ꓟꓝꓲ ꓓꓴ ꓐꓴ 300 ꓣꓳ ꓗ ꓔꓯ ꓗꓪ ꓚꓳꓸ 6 ꓣꓳ ꓠꓬ ꓟꓽ ꓓ ꓟꓴ ꓖꓴ ꓡꓰꓹ ꓟ ꓝꓲ ꓓꓴ ꓐꓴ ꓥˍ ꓡꓳ= 1ꓸ ꓮ-ꓓꓯ꓾ 2ꓸ ꓠꓳ-ꓪ꓾ 3ꓸ ꓮꓐꓣꓮꓧꓲꓟ ꓐꓯꓹ ꓟ ꓮ-ꓐ-ꓡ-ꓦ꓾ 4ꓸ ꓟꓳ-ꓢ ꓐꓯꓹ ꓟ ꓟꓳ-ꓫꓵ꓾ 5ꓸ ꓲ-ꓢ ꓐꓯꓹ ꓟ ꓙꓰ-ꓢꓴ ꓙꓲ-ꓢꓴ 6ꓸ ꓟꓴ-ꓧꓮꓟ-ꓟꓮꓓ ꓥˍ ꓡꓳ= ꓟꓬꓱ ꓟꓽ ꓓ ꓪꓴ ꓖꓴ ꓡꓰ ꓟ ꓝꓲ ꓓꓴ 33 ꓣꓳ ꓥˍ ꓟꓲ ꓣꓳꓽ ꓙꓲ-ꓢꓴ ꓢꓲ ꓤꓼ ꓐꓴ ꓐꓰ ꓬꓴ-ꓓ ꓙꓵ ꓠꓲꓹ ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓚꓳꓸ ꓟꓶꓽ ꓠꓶꓹ ꓝꓸ ꓒꓽ ꓐꓴ ꓐꓰ ꓝꓲ ꓓꓴ ꓐꓴ ꓟꓬꓱ ꓥˍ ꓡꓳ= ꓝꓲ ꓓꓴ ꓐꓴ ꓠꓯꓸꓼ ꓗꓪ ꓚꓳꓸ ꓟꓴ-ꓧꓮꓟ-ꓟꓮꓓ ꓠꓬ ꓟꓽ ꓓ ꓪꓴꓽ ꓖꓴ ꓡꓰꓹ ꓟ ꓥ ꓢꓲ ꓬꓲ ꓠꓬ ꓪꓴ-ꓢ ꓡꓰ ꓝꓲ ꓩꓴ ꓡꓹ ꓟ ꓝꓲ ꓓꓴ ꓗꓪ ꓚꓳꓸ ꓬꓲ ꓟꓶꓽ ꓕꓲꓽ ꓣꓳ ꓟ ꓥˍ ꓡꓳ= ꓬꓲ ꓗꓸ ꓠꓯꓸ ꓢ ꓗꓪ ꓠꓬ ꓝꓲ ꓓꓴ ꓐꓯꓹ ꓟ ꓛꓲ ꓡ ꓓꓴ ꓟꓽ ꓥ= ꓟꓴ-ꓧꓮꓟ-ꓟꓮꓓ ꓠꓬ ꓮ-ꓡ ꓪꓴ-ꓢ ꓟꓽ ꓓ ꓠꓲꓹ ꓠꓵ ꓖꓴ ꓡꓰ ꓟ ꓝꓲ ꓓꓴ ꓬꓲ ꓔꓯ ꓠꓬ ꓟꓬꓱ ꓓꓳꓽ ꓟꓽ ꓓ ꓙꓳ ꓖꓴ ꓡꓰ ꓢꓴ ꓥ ꓢꓲ ꓮ-ꓡ ꓪꓴ-ꓢ ꓠꓲꓹ ꓠꓵ ꓖꓴ ꓡꓰ ꓟ ꓐꓯꓹ ꓟ ꓧ-ꓐꓲ-ꓐꓴ-ꓡ ꓟꓬꓱ ꓥˍ ꓟꓲ ꓬꓲ ꓔꓯ ꓖꓶ ꓔ ꓡꓳ=