ꓲ-ꓢ-ꓡꓮꓟ ꓙꓵ ꓠꓲꓹ ꓐꓰ ꓟꓴ ꓗꓪ ꓝꓲ ꓓꓴ ꓐꓴ (Dialogue with other Religions)

ꓲ-ꓢ-ꓡꓮꓟ ꓙꓵ ꓠꓲꓹ ꓠꓯꓸꓼ ꓗꓪ ꓟꓴꓽ ꓗꓪ ꓝꓲ ꓓꓴ ꓐꓴ ꓔꓬꓹ ꓟ ꓔꓯ ꓙꓵ ꓔꓬ ꓟ ꓠꓬ ꓬꓳꓸ ꓚꓵꓹ ꓟ ꓕꓲꓽ ꓟ ꓥˍ ꓡꓳ= ꓗꓳ-ꓣꓮꓠ ꓢꓲꓽ ꓫꓬ ꓕꓳ ꓶ ꓗꓪ ꓙꓲꓹ ꓟ ꓟꓴ ꓗꓪ ꓝꓲ ꓓꓴ ꓐꓴꓹ ꓐꓰ ꓟꓽ ꓙꓲꓹ ꓟ ꓟꓴꓽ ꓗꓪ ꓝꓲ ꓓꓴ ꓐꓴ ꓚꓱꓹ ꓐˍ ꓡꓳ= ꓟꓴꓽ ꓗꓪ ꓝꓲ ꓓꓴ ꓮꓽ ꓟꓬ ꓗꓪ ꓚꓳ ꓟꓴꓽ ꓗꓪ ꓝꓲ ꓓꓴ ꓚꓬ-ꓑꓷ-ꓡꓰ ꓠꓬ ꓟꓽ ꓓ ꓬꓳꓸ ꓚꓵꓹ ꓟ ꓥˍ ꓡꓳ= ꓬꓲ ꓠꓬ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓠꓬꓲ ꓟꓳ ꓓꓴ ꓔꓯ ꓖꓶ ꓢꓴ ꓟꓴꓽ ꓗꓪ ꓝꓲ ꓓꓴ ꓥˍ ꓡꓳ ꓐꓰ ꓔꓱ ꓡꓰ ꓙꓵ ꓔꓬ ꓡꓳ= ꓟꓶꓽ ꓠꓲꓹ ꓝ ꓒꓽ ꓐꓴ ꓔꓯ ꓠꓬꓲ ꓟꓳ ꓓꓴ ꓖꓶ ꓡ ꓟ ꓮꓽ ꓙꓵꓽ ꓔꓯ ꓥˍ ꓟꓲ ꓟꓴ ꓗꓪ ꓝꓲ ꓓꓴ ꓚꓬ-ꓑꓶ-ꓡꓰ ꓡꓰꓽ ꓖꓶꓽ ꓡꓹ ꓟ ꓥ ꓡꓳ ꓐꓰ ꓕꓱ ꓡꓰ ꓙꓵ ꓔꓬ ꓡꓳ= ꓟꓴꓽ ꓗꓪ ꓝꓲ ꓓꓴ ꓚꓬ-ꓑꓷ-ꓡꓰꓼ ꓔꓯ ꓢꓲ-ꓫꓬ-ꓟ-ꓦ ꓐꓰ ꓕꓱ ꓡꓰ ꓢꓪ ꓔꓬ ꓓꓴ ꓟ ꓥ ꓪ= ꓠꓲꓽ ꓪꓸ ꓔꓲ ꓢ ꓓꓯꓼ ꓠꓬ ꓞꓳ ꓤꓽ ꓕꓲꓽ ꓐꓱ ꓔꓯ ꓤꓹ ꓠꓬꓲ ꓫꓵꓽ ꓠꓬꓲꓹ ꓟ ꓙꓳˍ ꓡꓳ= ꓮ-ꓡ ꓪꓴ-ꓢ ꓔꓯ ꓟꓽ ꓙꓵ ꓠꓹ ꓟ꓾ ꓒꓳꓹ ꓔꓴ ꓠꓹ ꓟ꓾ ꓮ-ꓡ ꓪꓴ-ꓢ ꓙꓵꓽ ꓗ ꓔꓯ ꓟꓽ ꓛꓳ ꓠꓹ ꓟ ꓟꓽ ꓠ ꓠꓹ ꓟ ꓐꓱ ꓶ ꓤꓹ ꓠꓬꓲˍ ꓟ ꓙꓳˍ ꓡꓳ=

ꓗꓳ-ꓣꓮꓠ ꓢꓲꓽ ꓫꓬ ꓕꓳꓽ ꓶ ꓗꓪ ꓟꓲ ꓠꓯ ꓕꓯꓽ ꓢꓲ ꓗꓪ ꓟ ꓠꓲꓽ ꓚꓱꓹ ꓦ ꓚꓱꓹ ꓕꓱ ꓡꓰꓳ ꓫꓵꓽ ꓐˍ ꓡꓳ= ꓙꓵˍ ꓟ ꓠꓲꓽ ꓐˍ ꓟ ꓡꓰ ꓐꓰ ꓕꓲꓽ ꓡꓰ ꓟꓽ ꓙꓵˍ ꓟ ꓠꓲꓽ ꓪꓸ ꓔꓲ ꓢ ꓓꓯꓼ ꓥˍ ꓟꓲ ꓙꓳˍ ꓡꓳ ꓐꓯˍ ꓟ ꓕꓯ ꓥˍ ꓟꓲ ꓐꓳ ꓔ ꓡꓳ= ꓙꓲ-ꓢꓴ ꓢꓲ ꓤꓼ ꓐꓴ ꓙꓵˍ ꓟ ꓡꓰ ꓐꓰ ꓕꓲꓽ ꓡꓰ ꓟ-ꓢ-ꓡꓲꓟ ꓐꓴ ꓥˍ ꓟꓲ ꓬꓲ ꓟꓶꓽ ꓕꓲꓽ ꓠꓬꓲ ꓚꓱꓹ ꓔꓯ ꓟꓳꓸ ꓙꓵ ꓔꓬˍ ꓡꓳ= ꓬꓲ ꓟꓶꓽ ꓕꓲꓽ ꓠꓬꓲ ꓠꓬ ꓮ ꓕꓽ ꓛꓲ ꓡ ꓟꓽ ꓢꓷ= ꓖꓳ ꓟ ꓪꓴꓸ ꓠꓬꓲ ꓮ ꓕꓯꓽ ꓥˍ ꓟꓲ ꓧꓪꓸ ꓛꓲꓽ ꓢꓲ ꓡꓳꓸ ꓔꓬ ꓠꓹ ꓟ ꓬꓲꓸ ꓟꓶꓽ ꓕꓲꓽ ꓠꓬꓲ ꓛꓲ ꓡ ꓕꓯꓽ ꓟꓲ ꓠꓯ ꓗꓪ ꓓꓵꓽ ꓙꓽ ꓮ ꓡꓰ ꓓꓴ ꓕꓱ ꓡꓰꓹ ꓫꓵꓽ ꓮꓽ ꓟꓬ ꓓꓳ ꓡ ꓓꓴ ꓥꓳ ꓐꓰ ꓐꓯ ꓔ ꓟ ꓙꓳ ꓐꓶ= ꓬꓲ ꓟꓶꓽ ꓕꓲꓽ ꓠꓬꓲ ꓗꓪ ꓠꓬ ꓟꓯ-ꓓꓲ ꓐꓯꓹ ꓟ ꓟꓯ-ꓫꓵ-ꓬ ꓠꓬ ꓬꓰ-ꓢꓴ ꓙꓲ-ꓢꓴ ꓐꓰ ꓕꓲꓽ ꓪꓼ ꓓ-ꓟ-ꓢꓶ ꓡꓳ ꓒꓱ ꓗꓪ ꓬꓯꓼ ꓡ ꓥꓳ ꓐꓰ ꓕꓱ ꓡꓰ ꓐꓳ ꓔ ꓐꓶ= ꓟꓯ-ꓓꓲ ꓐꓯꓹ ꓟ ꓟꓯ-ꓫꓵ-ꓬ ꓛꓲ ꓡ ꓕꓯꓽ ꓠꓬ ꓞꓳ ꓤꓽ ꓔꓯ 3 ꓐꓱ ꓐꓱ ꓩꓴ ꓡ ꓥꓳ= ꓖꓳ ꓡꓰ ꓐꓱ ꓓꓳ ꓗꓸ ꓠꓯꓸ ꓝꓴꓲꓸ ꓙꓳꓹ ꓟ ꓡꓰ ꓐꓰ ꓕꓲꓽ ꓡꓰꓹ ꓐꓯ ꓟꓵ ꓘꓶꓽ ꓡˍ ꓥꓳ= ꓟꓲ ꓠꓯ ꓗꓪ ꓢꓯꓸ ꓔꓬ ꓟ ꓙꓵꓹ ꓗꓪ ꓚꓵ ꓛꓬꓽ ꓛꓳ ꓗꓷꓹ ꓟ ꓙꓵꓽ ꓗ꓾ ꓚꓵ ꓛꓬ ꓫꓶꓹ ꓔꓯ ꓪꓴꓸ ꓓꓵ ꓛꓹ ꓢꓲ ꓠꓬꓲ ꓐꓯ ꓟꓵ ꓘꓶˍ ꓥꓳ=

ꓛꓯꓽ ꓟꓵꓽ ꓗꓪ ꓛꓲ ꓡꓰ ꓠꓬꓲ ꓔ ꓢꓴ ꓠꓬ ꓮ-ꓡ ꓪꓴ-ꓢ ꓔꓯ ꓟꓽ ꓙꓵ ꓢꓴ꓾ ꓮ-ꓡ ꓪꓴ-ꓢ ꓙꓵꓽ ꓗ ꓔꓯ ꓟꓽ ꓛꓳ ꓢꓴ ꓥ ꓪ= ꓮ-ꓡ ꓪꓴ-ꓢ ꓔꓯ ꓙꓵ ꓢꓲ ꓮ-ꓡ ꓪꓴ-ꓢ ꓙꓵ ꓗ ꓔꓯ ꓛꓳ ꓢꓴ ꓐꓴ ꓕꓲꓽ ꓛꓱꓽ ꓢꓲꓽ ꓫꓬ ꓢꓴ ꓐꓴ ꓕꓲꓽ ꓛꓱꓽ ꓕꓱ ꓡꓰ ꓔꓬ ꓝꓲ ꓡˍ ꓥꓳ= ꓗꓳ-ꓣꓮꓠ 2ꓽ 26 ꓗꓳ-ꓣꓮꓠ 5ꓽ 69 ꓗꓪ ꓮ-ꓡ ꓪꓴ-ꓢ ꓔꓯ ꓙꓵ ꓔꓬ ꓢꓴ ꓬꓴ-ꓓ ꓡꓽ ꓞꓳ ꓐꓴꓹ ꓙꓲ-ꓢꓴ ꓢꓲ ꓤꓼ ꓐꓴ ꓢ-ꓐꓲ-ꓬ ꓞꓳ ꓫꓵꓽ ꓐꓴ ꓠꓬ ꓮ-ꓡ ꓪꓴ-ꓢ ꓙꓵꓽ ꓗ ꓔꓯ ꓛꓳˍ ꓟ꓾ ꓙꓵ ꓔꓬꓹ ꓟ ꓔꓯ ꓟꓳꓸ ꓛꓳ ꓢꓲ ꓪꓴ-ꓢ ꓡꓰ ꓒꓵꓽ ꓗꓹ ꓬꓰꓹ ꓟ ꓚꓬꓴ ꓙꓹ ꓟ ꓣꓱꓽ ꓛꓲꓽ ꓔꓯ ꓐꓯꓹ ꓟꓶ ꓡ ꓓꓴ ꓥꓳ= ꓬꓲ ꓪꓽ ꓐꓱ ꓶ ꓙꓳ ꓠꓬ ꓔ ꓟ ꓮꓸ ꓫꓵˍ ꓟꓲ ꓟꓽ ꓙꓳ=  ꓐꓯ ꓟꓵ ꓫꓱꓹ ꓟ ꓠꓬ ꓬꓴ-ꓓ ꓡꓽ ꓞꓳ꓾ ꓙꓲ-ꓢꓴ ꓢꓲ ꓤꓼ꓾ ꓢ-ꓐꓲ-ꓬ ꓞꓳ ꓫꓵꓽ ꓐꓰ ꓟꓴ-ꓢ-ꓡꓲꓟ ꓐꓴ ꓠꓬ ꓚꓬꓴ ꓙꓹ ꓟ ꓣꓱꓽ ꓛꓲꓽ ꓐꓯꓹ ꓟꓶ ꓡ ꓓꓴ ꓥꓳ ꓐꓰ ꓐꓯꓹ ꓟ ꓬꓲ ꓟꓸ ꓟꓲꓽ ꓥˍ ꓡꓳ=