ꓲ-ꓢ-ꓡꓮꓟ ꓙꓵ ꓠꓲꓹ ꓚꓱꓹ (Dialogue with Religions)

ꓟꓴ-ꓧꓮꓓ-ꓟꓮꓓ ꓡꓰ ꓟꓸ ꓖꓶ ꓡꓹ ꓟ ꓠꓯꓸꓼ ꓗꓪ ꓙꓵ ꓠꓲꓹ ꓠꓬ 3 ꓕꓱ ꓙꓳˍ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= 1ꓸ ꓠꓬ ꓲ-ꓢ-ꓡꓮꓟ ꓐꓯꓹ ꓟ ꓥ ꓢꓲ꓾ 2 ꓠꓬ ꓲ-ꓟꓮꓠ ꓐꓯꓹ ꓟ꓾ 3 ꓠꓬ ꓲ-ꓢꓮꓠ ꓥ ꓠꓬ ꓲ-ꓢ-ꓡꓮꓧ ꓐꓰ ꓕꓱ ꓡꓰ ꓐꓯˍ ꓡꓳ= ꓲ-ꓢ-ꓡꓮꓟ ꓐꓯꓹ ꓟ ꓠꓬ ꓚꓵ ꓛꓬ ꓕꓲꓽ ꓞꓲꓼ ꓡꓱꓸꓼ ꓔꓯ ꓪꓴ-ꓢ ꓠꓯꓸꓼ ꓗꓪ ꓡꓯꓽ ꓙꓱꓹ ꓟ꓾ ꓣꓱꓽ ꓙꓹ ꓟ ꓟꓬꓱꓽ ꓬꓰꓹ ꓟ꓾ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓢꓲ ꓬꓰꓹ ꓟ ꓚꓱꓹ ꓔꓯ ꓐꓯꓹ ꓟ ꓥ ꓐꓶ= ꓲ-ꓢ-ꓡꓮꓟ ꓙꓵ ꓠꓲꓹ ꓔꓯ ꓙꓵ ꓔꓬ ꓢꓴ ꓟꓴ-ꓢ-ꓡꓲꓟ ꓐꓴ ꓠꓬ ꓚꓵꓸ ꓛꓬ ꓕꓲꓽ ꓞꓲꓼ ꓡꓱꓸꓼ ꓔꓯ ꓪꓴ-ꓢ ꓠꓯꓸꓼ ꓗꓪ ꓡꓯꓼ ꓙꓱ ꓠ ꓗꓹ ꓡꓳ= ꓣꓱꓽ ꓙꓹ ꓟ ꓟꓬꓱꓽ ꓬꓰ ꓠ ꓗˍ ꓡꓳ= ꓮ-ꓡ ꓪꓴ-ꓢ ꓡꓰ ꓟꓸ ꓖꓶ ꓡꓹ ꓟ ꓔꓱ ꓚꓵꓹ ꓟ ꓛꓳ ꓚꓱꓹ ꓥ ꓕ ꓑꓳꓸ ꓕꓯ ꓛꓳ ꓠꓹ ꓗˍ ꓡꓳ=

2 ꓫꓵꓽ ꓕꓲꓽ ꓫꓵꓽ ꓠꓬ ꓲ-ꓟꓮꓠ ꓐꓯꓹ ꓟ ꓥ ꓐꓶ= ꓲ-ꓟꓮꓠ ꓐꓯꓹ ꓟ ꓠꓬ ꓙꓵ ꓠꓲꓹ ꓐꓯˍ ꓟ ꓥˍ ꓡꓳ= ꓙꓵ ꓠꓲꓹ ꓠꓬ ꓟꓬ ꓢꓷꓽ ꓡꓰ ꓟꓳ ꓪ ꓟꓽ ꓓꓹ ꓟ ꓕꓲꓽ ꓫꓵꓽ ꓥˍ ꓡꓳ= ꓮ-ꓡ ꓪꓴ-ꓢ ꓡꓰ ꓟꓸ ꓖꓶ ꓡꓹ ꓟ ꓮꓽ ꓙꓵꓽ ꓕꓯ ꓛꓳꓹ ꓟ ꓚꓱꓹ ꓔꓯ ꓐꓯ ꓠꓲꓹ ꓫꓵꓹ ꓟ ꓥ ꓪ= ꓲ-ꓟꓮꓠ ꓐꓯꓹ ꓟ ꓙꓵ ꓠꓲꓹ ꓠꓯꓸꓼ ꓗꓪ ꓫꓵꓽ ꓫꓵꓽ ꓙꓳꓹ ꓥ ꓐꓰ ꓕꓱ ꓡꓰ ꓐꓯˍ ꓡꓳ= 1ꓸ ꓠꓬ ꓮ-ꓡ ꓪꓴ-ꓢ ꓔꓯ ꓙꓵ ꓔꓬꓹ ꓟ꓾ 2ꓸ ꓟꓴ ꓗꓪ ꓝꓲ ꓓꓴ ꓔꓬꓹ ꓟ ꓔꓯ ꓙꓵˍ ꓟ꓾ 3ꓸ ꓮ-ꓡ ꓪꓴ-ꓢ ꓟꓶꓽ ꓠꓶꓹ ꓝꓸ ꓒꓽ ꓐꓴ ꓝꓲ ꓓꓴ ꓐꓴ ꓔꓯ ꓙꓵ ꓔꓬ ꓟ꓾ 4ꓸ ꓢꓲꓽ ꓫꓬ ꓕꓳꓽ ꓶ ꓔꓯ ꓙꓵ ꓔꓬ ꓟ꓾ 5ꓸ ꓛꓵ ꓡꓹ ꓟ ꓙꓵꓹ ꓗꓪ ꓕꓲ ꓞꓲꓼ ꓕꓲꓽ ꓑ ꓐꓯꓹ ꓟ ꓙꓳꓹ ꓟ ꓔꓯ ꓙꓵ ꓔꓬˍ ꓟ 6ꓸ ꓙꓳꓹ ꓟ ꓥ ꓕ ꓑꓳꓸ ꓠꓬ ꓮ-ꓡ ꓪꓴ-ꓢ ꓠꓯꓸꓼ ꓗꓪ ꓐꓰ ꓓꓳ ꓡꓹ ꓟ ꓔꓯ ꓙꓵ ꓔꓬ ꓟ꓾ 7ꓸ ꓛꓵ ꓡꓹ ꓟ ꓕꓲꓽ ꓤꓶ ꓗꓪ ꓮ-ꓡ ꓪꓴ-ꓢ ꓟꓲꓽ ꓙꓬ ꓗꓪ ꓐꓯ ꓟꓵ ꓘꓶꓽꓹ ꓟ ꓔꓯ ꓔꓳ ꓜꓳ ꓡ ꓓꓴ ꓥꓳ ꓐꓰ ꓙꓵ ꓔꓬ ꓟ ꓕꓱ ꓡꓰ ꓙꓵ ꓔꓬ ꓟ 7 ꓫꓵꓽ ꓙꓳ ꓐꓶ= ꓲ-ꓟꓮꓠ ꓥ ꓠꓬ ꓙꓵ ꓠꓲꓹ ꓐꓯꓹ ꓟ ꓔꓯ ꓙꓵ ꓔꓬ ꓟ ꓟꓽ ꓙꓳ ꓢꓴ ꓔꓯ ꓗ-ꓒꓲꓣ ꓐꓯˍ ꓐꓶ= ꓗ-ꓒꓲꓣ ꓐꓯꓹ ꓟ ꓠꓬ ꓪꓴ-ꓢ ꓔꓯ ꓟꓽ ꓙꓵ ꓢꓴ ꓐꓶꓽ ꓞꓳ꓾ ꓪꓴ-ꓢ ꓐꓯ ꓘꓶꓽ ꓔꓯ ꓟꓽ ꓘꓳꓹ ꓣꓴ ꓢꓴ꓾ ꓠꓲꓹ ꓜꓳ ꓢꓴ ꓐꓯꓹ ꓟ ꓬꓲ ꓟꓸ ꓟꓲ ꓙꓳ ꓡꓳ=

3ꓸ ꓲ-ꓢꓮꓠ ꓥꓹ ꓠꓬ ꓲ-ꓢ-ꓡꓮꓧ ꓐꓯꓹ ꓟ ꓠꓬ ꓙꓵꓹ ꓟ ꓚꓱꓹ ꓔꓯ ꓐꓯꓹ ꓟ ꓥ ꓪ= ꓮ-ꓡ ꓪꓴ-ꓢ ꓬꓲ ꓡꓰ ꓖꓶ ꓡꓹ ꓟ ꓙꓵꓽ ꓗ ꓠꓬ ꓙꓲꓹ ꓟ ꓥ ꓢꓲ ꓕꓱ ꓟ ꓙꓲꓹ ꓟ ꓔꓯ ꓣꓳꓽ ꓢꓯꓸ ꓔꓬ ꓟ ꓕꓲꓽ ꓤꓶ ꓡꓱꓸꓼ ꓗꓪ ꓮ ꓕꓯꓽ ꓥˍ ꓟꓲ ꓟꓽ ꓐꓬ ꓡꓰ ꓠ ꓡꓳꓸ ꓙ ꓐꓳꓽ ꓙ ꓔ ꓙ ꓠ ꓡꓳꓼ ꓥ ꓐꓰ ꓕꓱ ꓡꓰ ꓐꓯˍ ꓡꓳ= ꓐꓯ ꓟꓵ ꓫꓱꓹ ꓟ ꓠꓬ ꓢꓯꓼ ꓟꓬ ꓑ ꓢꓲ ꓪꓴ-ꓢ ꓙꓵ ꓗ ꓔꓯ ꓡꓳꓸ ꓙ ꓠ ꓡꓳꓼ ꓥ ꓕꓱ ꓡꓰ ꓐꓯ ꓟ ꓥˍ ꓡꓳ= ꓚꓵꓸ ꓛꓬ ꓙꓲꓹ ꓟ ꓫꓶꓹ ꓗꓪ ꓐꓰ ꓪꓴ-ꓢ ꓕꓱꓹ ꓚꓵꓹ ꓟ ꓙꓲꓹ ꓟ ꓚꓱꓹ ꓔꓯ ꓮ ꓕꓯꓽ ꓥˍ ꓟꓲ ꓡꓳꓸ ꓙ ꓐꓳꓽ ꓙ ꓔ ꓙ ꓠ ꓡꓳꓹ ꓥ= ꓖꓳ ꓟ ꓪꓴꓸ ꓠꓬ ꓟꓴ-ꓢ-ꓡꓲꓟ ꓐꓴ ꓠꓬ ꓙꓵ ꓠꓲꓹ ꓐꓱ ꓶ ꓫꓵ ꓙꓹ ꓟ ꓡꓰ ꓟꓽ ꓞꓲ꓾ ꓙꓵ ꓠꓲꓹ ꓔꓯ ꓟꓽ ꓙꓲꓹ ꓐꓯ ꓡ ꓢꓴ ꓥ ꓕꓽ ꓑꓳ ꓔꓯ ꓬꓲ ꓪ ꓠꓬ ꓓꓶꓽ ꓡꓯ ꓘꓳ ꓠꓹ ꓟ ꓟꓽ ꓙꓳ=