ꓲ-ꓢ-ꓡꓮꓟ ꓙꓵ ꓠꓲꓹ ꓢꓷꓸ ꓡꓰ ꓓꓴ ꓐꓬꓱꓽˍ ꓐꓰ ꓢꓴꓠ-ꓠ ꓚꓱꓹ (Dialogue with other Religions)

ꓟꓴ-ꓢ-ꓡꓲꓟ ꓐꓴ ꓣꓱˍ ꓟ ꓲ-ꓢ-ꓡꓮꓟ ꓙꓵ ꓠꓲꓹ ꓬꓲ ꓢꓷꓸ ꓡꓰ ꓓꓴ ꓠꓬ ꓦꓺ ꓐꓺ ꓦꓺ ꓫꓵꓼ 4 ꓦꓬꓼ 5 ꓦꓬꓼ ꓛꓲꓹ ꓡꓰ ꓡꓳꓼˍ ꓟ ꓦꓺ ꓐꓺ ꓐꓬꓱꓽ ꓥ ꓢꓲ꓾ ꓖꓳ ꓟ ꓬꓲ ꓕꓯꓹ ꓫꓵ ꓗꓪ ꓗꓴꓺ ꓤꓼ ꓕꓲꓽ ꓢꓷꓽ ꓠꓷꓼˍ ꓟ ꓥˍ ꓡꓳ= ꓮ ꓡꓰ ꓪꓴꓸ ꓠꓬꓲ ꓕꓱ ꓡꓰ ꓬꓲ ꓢꓷꓸ ꓡꓰ ꓓꓴ ꓒꓬꓱꓼ ꓡꓹ ꓡ ꓐꓯˍ ꓠꓬ -ꓣꓮꓐ ꓫꓵꓽ ꓐꓴ ꓠꓬ ꓓꓽ ꓪꓴꓸ ꓦꓺ ꓐꓺ ꓔꓯ ꓪꓴꓸ ꓓꓵ ꓕꓵꓼ ꓢꓴ ꓦꓺ ꓐꓺ ꓔꓯ ꓠꓲꓽ ꓖꓴ ꓢꓴ ꓐꓴ ꓥˍ ꓡꓳ= ꓬꓲ ꓪꓽ ꓔꓬ ꓟꓵꓽ ꓠꓬ ꓗꓷꓽ ꓛꓵ ꓟꓲ ꓟꓬꓹ ꓟ ꓪꓴꓸ ꓠꓬꓲ ꓙ ꓫꓱꓹ ꓕꓯ ꓟꓳꓼ ꓡꓳ ꓗꓪ ꓙ ꓫꓱꓽ ꓟ ꓙꓲ= ꓮ ꓡꓲꓳ ꓐꓯ ꓠꓬ ꓟꓳꓼ ꓡꓳ ꓗꓪ ꓠꓬ ꓛ ꓘꓴꓸ ꓔ ꓟ ꓔꓶꓸ ꓟꓽ ꓙꓳ꓾ ꓢꓲ ꓜꓲ ꓡꓳ ꓜꓲ ꓟꓽ ꓙꓳ꓾ ꓬꓲ ꓙꓬ ꓟꓽ ꓙꓳ ꓮ ꓘꓶꓸ ꓫꓸ ꓔ ꓟ ꓪꓴ ꓠꓬꓲ ꓢ ꓘꓪ ꓕꓯ ꓢꓲ ꓙ ꓫꓱꓹ ꓟ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓬꓲ ꓪꓽ ꓐꓱ ꓶ ꓢ ꓘꓪ ꓠꓬ ꓬꓳꓸ ꓚꓵˍ ꓟ ꓡꓰ ꓐꓰ ꓢ ꓘꓪ ꓕꓯ ꓡꓬ ꓖꓶ ꓡꓹ ꓟ ꓦꓺ ꓐꓺ ꓥˍ ꓟꓲ ꓮ ꓘꓶꓸ ꓬꓳꓸ ꓚꓵˍ ꓟ ꓥˍ ꓪ= ꓖꓳ ꓟ ꓪꓴꓸ ꓠꓬꓲ ꓦꓺ ꓐꓺ ꓔꓯ ꓪꓴꓸ ꓓꓵ ꓕꓵꓼ ꓪꓽ ꓘꓴ ꓡꓹ ꓟ ꓠꓲꓽ ꓖꓴꓹ ꓟ ꓥˍ ꓡꓳ= ꓖꓳ ꓟ ꓓꓳ ꓡꓰ ꓕꓯ ꓢꓲ ꓡꓳꓺ ꓓꓲ ꓠꓯ ꓔꓯ ꓪꓴꓸ ꓓꓵ ꓕꓵꓼ ꓡꓹ ꓟ ꓥ ꓪ= ꓖꓳ ꓕꓲꓽ ꓘꓴ ꓗꓪ ꓙꓵ ꓢꓲ ꓪꓽ ꓘꓴꓹ ꓟ ꓠꓲꓽ ꓖꓴˍ ꓟ ꓔꓯ ꓔꓱ ꓡꓰ ꓬꓰꓹ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓟꓴ-ꓧ-ꓟꓮꓓ ꓠꓬ ꓖꓳ ꓟ ꓡꓳꓺ ꓓꓲ ꓠꓯ ꓔꓯ ꓮ-ꓡ ꓪꓴ-ꓢ ꓐꓱ ꓶ ꓟꓽ ꓓ ꓬꓳꓸ ꓚꓵˍ ꓟ ꓪꓽ ꓘꓴ ꓔꓶꓸ ꓕꓱ ꓡꓰ ꓒꓳꓹ ꓗꓶˍ ꓟ ꓥˍ ꓡꓳ꓾ ꓖꓳ ꓡꓰ ꓡꓶꓸ ꓩꓴˍ ꓟ ꓥˍ ꓡꓳ= ꓖꓳ ꓟ ꓡꓳꓺ ꓓꓲ ꓠꓯ ꓙꓳˍ ꓟ ꓔꓶꓸ ꓔꓯ ꓢꓲꓽ ꓫꓬꓹ ꓟ ꓟꓵ ꓐꓰ ꓕꓱ ꓡꓰ ꓒꓳꓹ ꓡꓶꓸ ꓗꓶˍ ꓟ ꓥ ꓪ= ꓬꓲ ꓪꓽ ꓣꓱꓹ ꓟ ꓢꓷꓸ ꓡꓰ ꓓꓴ ꓠꓯꓸꓼ ꓗꓪ ꓗꓴꓺ ꓤꓼ ꓠꓬ ꓮ-ꓡ ꓪꓴ-ꓢ ꓥˍ ꓟ  ꓢꓷꓸ ꓡꓰ ꓓꓴ ꓥ ꓢꓲ꓾ ꓗꓴꓺ ꓤꓼ ꓠꓬ ꓬꓲ ꓗꓴ 5 ꓗꓴ ꓙꓳˍ ꓟ ꓪꓴꓸ ꓠꓬ ꓲ-ꓢ-ꓡꓮꓟ ꓐꓴ ꓙꓵ ꓠꓲꓹ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵˍ ꓟ ꓛꓳ ꓚꓱ 5 ꓟ ꓔꓯ ꓬꓲ ꓢꓷꓸ ꓡꓰ ꓓꓴ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓦꓺ ꓐꓺ ꓠꓬ ꓮ-ꓣꓮꓐ ꓞꓳ ꓫꓵꓽ ꓐꓴ ꓬꓲ ꓢꓷꓸ ꓡꓰ ꓓꓴ ꓥ ꓢꓲ꓾ ꓗꓴꓺ ꓤꓼ ꓠꓬ ꓮ-ꓡ ꓪꓴ-ꓢ ꓬꓲ ꓢꓷꓸ ꓡꓰ ꓓꓴ ꓗꓴꓺ ꓤꓽ ꓠꓯꓸꓼ ꓗꓪ 5 ꓗꓴ ꓙꓳꓹ ꓟ ꓠꓬ ꓛꓳ ꓚꓱꓹ 5 ꓟ ꓬꓲ ꓢꓷꓸ ꓡꓰ ꓓꓴ ꓥˍ ꓡꓳ= 

ꓲ-ꓢ-ꓡꓮꓟ ꓙꓵ ꓠꓲꓹ ꓠꓯꓸꓼ ꓗꓪ ꓢꓴꓠ-ꓠ ꓐꓯꓹ ꓟ ꓙꓳˍ ꓡꓳ= ꓢꓴꓠ-ꓠ ꓐꓯ ꓟ ꓠꓬ ꓮ-ꓡ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓠꓹ ꓟ ꓐꓱ ꓶ ꓮ-ꓡ ꓪꓴ-ꓢ ꓠꓲꓹ ꓡꓶꓽˍ ꓡꓰ ꓐꓰ ꓟꓴ-ꓢ-ꓡꓲꓟ ꓐꓴ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓛꓳ ꓠꓹ ꓟ ꓛꓳ ꓚꓱꓹ ꓥ ꓢꓲ꓾ ꓖꓳ ꓟ ꓞꓳ ꓤꓽ ꓫꓱꓹ ꓐꓯꓹ ꓟ ꓖꓳ ꓬꓲ ꓢꓷꓸ ꓡꓰ ꓓꓴ ꓥˍ ꓡꓳ= ꓖꓳ ꓡꓰ ꓟꓴ-ꓢ-ꓡꓲꓟ ꓐꓴ ꓠꓬ ꓕꓽ ꓠꓬꓲ ꓡꓰ ꓕꓲꓽ ꓠꓬꓲ ꓛꓳ ꓡ ꓢꓲ ꓖꓳ ꓟ ꓠꓬ ꓫꓱꓹ ꓒꓬꓱꓼ ꓡꓹ ꓟ ꓥ ꓪ= ꓖꓳ ꓟ ꓪꓴꓸ ꓠꓬ ꓢꓴꓠ-ꓠ ꓐꓯꓹ ꓟ ꓬꓲ ꓟꓸ ꓟꓲꓽ ꓠꓬ ꓫꓱꓹ ꓐꓯꓹ ꓟ ꓬꓲ ꓟꓸ ꓟꓲꓽ ꓥ ꓪ= ꓔꓯ ꓥꓳꓽ ꓐꓯ ꓠꓬ ꓮ-ꓡ-ꓟꓴ ꓮ-ꓡꓮꓲ-ꓗꓴ꓾ ꓪ-ꓮ-ꓡꓮꓲ-ꓗꓴ ꓮ-ꓢ-ꓡꓮꓟ ꓐꓯꓹ ꓟ ꓕꓱ ꓟ ꓔꓯ ꓟꓴ-ꓢ-ꓡꓲꓟ ꓐꓴ ꓠꓬ ꓞꓳ ꓤꓽ ꓐꓰ ꓜꓲꓽ ꓡꓯ ꓘꓳꓹ ꓕꓯ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓐꓯ ꓠ ꓗꓹ ꓡꓳ= ꓖꓳ ꓡꓰ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓛꓳ ꓠꓬꓲ ꓔ ꓟ ꓫꓱꓹ ꓗ ꓡꓹ ꓟ ꓥˍ ꓪ= ꓖꓳ ꓟ ꓡꓰ ꓐꓰ ꓕꓲꓽ ꓡꓰ ꓤꓽ ꓑ ꓤꓼ ꓮꓽ ꓙꓵꓽ ꓠꓬ ꓶꓹ ꓟ ꓗ ꓫꓵ ꓔꓯ ꓘꓳꓹ ꓣꓴ ꓠ ꓡꓳ꓾ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓑ-ꓡꓲ ꓟꓳ-ꓢꓲ ꓪꓽ ꓘꓴ ꓦꓲ ꓗꓪ ꓚꓳꓸ ꓪꓽ ꓘꓴ ꓢꓯꓼ ꓗꓪ ꓚꓳꓸ ꓘꓴ ꓖꓶˍ ꓟ ꓕꓲꓽ ꓦꓬꓼ ꓡꓰ ꓕꓲꓽ ꓦꓬ ꓬꓲ ꓠꓹ ꓗˍ ꓡꓳ= ꓖꓳ ꓟ ꓠꓬ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓛꓳ ꓡꓹ ꓟ ꓪꓴꓸ ꓠꓬꓲ ꓠꓲ ꓫꓱꓹ ꓒꓬꓱꓼ ꓡꓹ ꓟ ꓥ ꓪ= ꓕꓱ ꓟ ꓢꓴꓠ-ꓠ ꓐꓯꓹ ꓟ ꓫꓱꓹ ꓕꓱ ꓟ ꓠꓬ ꓟꓴ-ꓧ-ꓟꓮꓓ ꓫꓱꓹ ꓐꓯꓹ ꓟ ꓬꓲ ꓢꓷꓸ ꓡꓰ ꓓꓴ ꓥ ꓐꓶ= ꓬꓲ ꓮ ꓕꓯ ꓥˍ ꓟꓲ ꓛꓳ ꓔꓬꓹ ꓟ ꓥ ꓐꓶ= ꓖꓳ ꓟ ꓪꓴꓸ ꓠꓬꓲ ꓟꓴ-ꓢ-ꓡꓲꓟ ꓐꓴ ꓕꓱ ꓡꓰ ꓛꓳˍ ꓟ ꓠꓬ ꓟꓴ-ꓧ-ꓟꓮꓓ ꓫꓱꓹ ꓔꓯ ꓛꓳˍ ꓟ ꓥˍ ꓡꓳ= ꓟꓴ-ꓧ-ꓟꓮꓓ ꓠꓬ ꓗꓳ-ꓣꓮꓠ ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓛꓳ ꓚꓱꓹ ꓪꓴꓽ ꓪꓴꓽ ꓣꓳ ꓣꓳ ꓮꓽ ꓙꓵ ꓔꓯ ꓕꓲꓽ ꓢꓯꓸ ꓡꓰ ꓟꓽ ꓞꓲ ꓡꓰ ꓠ ꓛꓳ ꓢꓴ ꓥˍ ꓡꓳ= ꓟꓴ-ꓢ-ꓡꓲꓟ ꓐꓴ ꓮꓽ ꓙꓵꓽ ꓐꓱ ꓶ ꓛꓳ ꓚꓱꓹ ꓠꓯꓸꓼ ꓗꓪ ꓢꓷꓸ ꓙ ꓟꓳ ꓙ ꓢꓴ ꓥˍ ꓡꓳ= ꓧ-ꓓꓲꓔ ꓐꓯˍ ꓟ ꓟꓴ-ꓧ-ꓟꓮꓓ ꓫꓱꓹ ꓔꓯ ꓐꓳ ꓔ ꓟ ꓕꓳꓽ ꓶ ꓑꓷꓠ ꓗꓪ ꓲ-ꓢ-ꓡꓮꓟ ꓙꓵ ꓠꓲꓹ ꓡꓰ ꓐꓰ ꓕꓲꓽ ꓡꓰ ꓛꓳ ꓐ ꓡꓹ ꓟ ꓛꓳ ꓚꓱꓹ 2000 ꓟ ꓔꓯ ꓐꓳ ꓔ ꓟ ꓙꓳˍ ꓡꓳ=