ꓶꓽ ꓖꓪꓽ ꓐꓰ ꓖꓪ ꓛꓲꓹ ꓡꓰ ꓫꓸ ꓕꓱˍ ꓟ (Dialogue with Culture)

 

ꓡꓲꓽ ꓒꓲꓼ ꓐꓰ ꓫꓸ ꓕꓱꓹ ꓕꓯ ꓖꓪ ꓛꓲꓹ ꓐꓰ ꓡꓲꓽ ꓒꓲꓼ ꓡꓰ ꓫꓸ ꓕꓱ ꓠꓹ ꓟ ꓬꓳꓸ ꓚꓵˍ ꓡꓳ= ꓞꓳ ꓫꓵꓽ ꓕꓲꓽ ꓫꓵꓽ ꓡꓰꓸ ꓕꓲꓽ ꓫꓵꓽ ꓗꓪ ꓖꓪ ꓛꓲꓹ ꓛꓲꓹ ꓔ ꓟ ꓮ ꓟꓬ ꓫꓵꓽ ꓙꓳˍꓡꓳ= ꓣꓳꓽ ꓡꓲ-ꓢꓴ ꓠꓯꓸꓼ ꓗꓪ ꓠꓬ ꓗꓼˍ ꓟ꓾ ꓕꓱˍ ꓟ꓾ ꓕꓲꓳꓽ ꓔ ꓟ꓾ ꓪ ꓘꓲꓹ ꓳꓣ ꓖꓪ ꓛꓲꓹ ꓛꓲꓹ ꓔ ꓟ꓾ ꓛꓯꓸ ꓥꓳꓽ ꓛꓯꓸ ꓔ ꓟ꓾ ꓛꓲ ꓡꓵ ꓡꓯꓽ ꓡꓵˍ ꓟ ꓐꓰ ꓔꓯ ꓐꓱꓽ ꓔꓶꓹ ꓔ ꓟ ꓕꓱ ꓡꓰ ꓮ ꓟꓬ ꓫꓵꓽ ꓙꓳˍ ꓟ ꓥ ꓪ= ꓠꓬꓲꓽ ꓟ ꓡꓽ ꓞꓳ ꓝꓱˍ ꓑꓮꓲꓽ ꓗꓪ꓾ ꓜ ꓫꓵꓼ ꓑꓮꓲꓽ ꓗꓪ꓾ ꓘꓳꓼ ꓫꓵꓼ ꓑꓮꓲ ꓗꓪ꓾ ꓟꓬꓱ ꓧꓪꓸ ꓡꓰˍ ꓟ ꓑꓮꓲ ꓗꓪ꓾ ꓫꓸ ꓙˍ ꓟ ꓗꓪ ꓕꓱ ꓡꓰˍ ꓫꓵꓽ ꓑꓮꓲꓽ ꓮ ꓟꓬꓹ ꓫꓵꓽ ꓗꓪ ꓖꓪ ꓛꓲꓹ ꓛꓲꓹ ꓔ ꓟ ꓥ ꓪ= ꓞꓳ ꓜꓴ ꓡꓰ ꓛꓲꓹ ꓔ ꓟ ꓙꓳ꓾ ꓬꓲ ꓜꓱ ꓛꓲꓹ ꓔ ꓟ ꓙꓳ꓾ ꓕꓲꓽ ꓣꓳ ꓡꓰꓽ ꓛꓲꓹ ꓔ ꓟˍ ꓟꓲ ꓙꓳˍ ꓡꓳ= ꓖꓪ ꓛꓲꓹ ꓛꓲꓹ ꓕꓯ ꓛꓵ ꓒꓯꓹ ꓔꓯ ꓟꓬꓽ ꓠꓬꓲ ꓣꓱˍ ꓟ ꓥ ꓡꓳ= ꓕꓲꓽ ꓐꓽ 2 ꓑꓲꓹ꓾ ꓕꓲꓽ ꓐꓽ 3ꓑꓲꓹ꓾ ꓡꓯꓽ ꓟꓲꓹ ꓡꓽ꓾ ꓗꓸ ꓠꓯꓸ ꓢ ꓫꓳ ꓕꓱ ꓡꓰ ꓛꓲꓹ ꓔ ꓟ ꓮ ꓟꓬꓹ ꓫꓵꓽ ꓙꓳ ꓡꓳ= ꓖꓪ ꓛꓲꓹ ꓛꓲꓹ ꓔ ꓟ ꓠꓬ ꓕꓲꓽ ꓟꓵꓽ ꓡꓰ ꓕꓲꓽ ꓟꓵꓽ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳ ꓐꓶ= ꓮ ꓠꓱ ꓕꓯꓽ ꓠꓬ ꓠꓲꓽ ꓔꓯ ꓖꓴ ꓢꓲ ꓖꓪ ꓛꓲꓹ ꓛꓲꓹ ꓔ ꓟ ꓥˍ ꓡꓳ=

ꓡꓲ ꓢꓴ ꓶꓽ ꓖꓪꓽ ꓠꓬ ꓮ ꓘꓶꓸ ꓡꓳꓸ ꓐꓲˍ ꓟ ꓥˍ ꓡꓳ= ꓶꓽ ꓖꓪꓽ ꓠꓬ ꓕꓲꓽ ꓟꓵꓽ ꓡꓰ ꓕꓲꓽ ꓟꓵꓽ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳˍ ꓟ ꓙꓳˍ ꓡꓳ= ꓕꓱ ꓟ ꓠꓬ ꓟꓬꓽ ꓠꓬꓲ ꓐꓲ ꓜꓲꓼ ꓡꓰ ꓝꓲˍ ꓟ ꓥˍ ꓡꓳ= ꓶꓽ ꓖꓪꓽ ꓠꓯꓸꓼ ꓗꓪ ꓪꓴꓸ ꓕꓶꓹ꓾ ꓟꓶ ꓛꓲ꓾ ꓙ ꓡꓽˍ ꓮꓸ ꓕꓽ ꓓꓱꓼ꓾ ꓛꓬ ꓔꓯꓹ ꓕꓱ ꓡꓰ ꓬꓰˍ ꓟ ꓠꓬ ꓫꓱꓹ ꓡꓯꓽ ꓘꓳˍ ꓡꓳ= ꓤꓽ ꓟꓶꓼ ꓤꓼ ꓥˍ ꓟꓲ ꓪꓴꓸ ꓕꓶꓹ꓾ ꓳꓸ ꓙ꓾ ꓐꓵ ꓞꓲꓽ꓾ ꓟꓶ ꓛꓲ꓾ ꓬꓯꓼ ꓖꓪꓽ꓾ ꓪꓴꓸ ꓡꓶ ꓕꓱ ꓡꓰ ꓮ ꓟꓬꓹ ꓫꓵꓽ ꓖꓪˍ ꓟ ꓥ ꓪ = ꓡꓲ-ꓢꓴ ꓶꓽ ꓖꓪꓽ ꓖꓪꓽ ꓢꓲ ꓖꓪ ꓛꓲꓹ ꓛꓲꓹ ꓠꓬ ꓮ ꓘꓶꓸ ꓡꓳꓸ ꓐꓲˍ ꓟ ꓥ ꓪ= ꓠꓲꓹ ꓟ ꓥˍ ꓟꓲ ꓢ꓾ ꓗꓹ ꓛꓲ ꓥˍ ꓟꓲ ꓗꓹ ꓛꓲꓽˍ ꓳꓸ ꓠꓬꓱ ꓥˍ ꓟꓲ ꓳꓸ ꓠꓬꓱˍ ꓡꓳ= ꓠꓬꓲꓹ ꓠꓬꓲ ꓠꓬ ꓣꓳꓽ ꓙꓲ-ꓢꓴ ꓢꓲ ꓤꓽ ꓒꓬꓱꓼ ꓡꓺꓳ= ꓪꓴ-ꓢ ꓔꓯ ꓫꓱꓸ ꓖꓶˍ ꓟ ꓗꓪ ꓣꓳꓽ ꓶꓽ ꓖꓪꓽ ꓖꓪꓽ ꓢꓲ ꓖꓪ ꓛꓲꓹ ꓛꓲꓹ ꓡꓯ= ꓣꓳꓽ ꓡꓲꓽ ꓒꓲꓼ ꓠꓬ ꓬꓰ-ꓢꓴ ꓠꓯꓸꓼ ꓗꓪ ꓝꓮꓲ ꓕꓲꓽ ꓧꓪꓹ ꓥꓵ ꓗꓶ ꓢꓲ ꓙꓲ-ꓢꓴ ꓢꓲ ꓤꓽ ꓡꓲ-ꓢꓴ ꓡꓲꓽ ꓒꓲꓼ ꓗꓶ ꓡꓰꓺ ꓳ= ꓣꓳꓽ ꓡꓲꓽ ꓒꓲꓼ ꓠꓬ ꓙꓵ ꓠꓲꓹ ꓐꓰ ꓫꓸ ꓕꓱ ꓠ ꓗˍ ꓡꓳ= ꓐꓯ ꓟꓵ ꓫꓱˍ ꓟ ꓠꓬ ꓣꓳꓽ ꓡꓲꓽ ꓒꓲꓼ ꓠꓬ ꓙꓵ ꓠꓲꓹ ꓠꓯꓸꓼ ꓗꓪ ꓝꓮꓲ ꓕꓲꓽ ꓧꓪꓹ ꓦꓵ ꓠ ꓗꓹ ꓡꓳ= ꓙꓵ ꓠꓲꓹ ꓠꓯꓸꓼ ꓗꓪ ꓣꓱꓽ ꓠ ꓗˍ ꓡꓳ= ꓠꓲꓽ ꓖꓴ ꓢꓴ ꓣꓳꓽ ꓠꓬ ꓙꓲ-ꓢꓴ ꓠꓯꓸꓼ ꓗꓪ ꓝꓴꓲꓸ ꓔꓲꓹ ꓟꓶ ꓡꓰ ꓠꓬ ꓙꓲ-ꓢꓴ ꓢꓲ ꓤꓼ ꓒꓬꓱꓼ ꓡꓺ ꓳ= ꓡꓲꓽ ꓒꓲꓼ ꓥˍ ꓟꓲ ꓪꓽ ꓘꓴ ꓗꓶˍ ꓠꓬ ꓙꓲ-ꓢꓴ ꓢꓲ ꓤꓼ ꓐꓴ ꓣꓱˍ ꓟ ꓡꓲ-ꓢꓴ ꓡꓲꓽ ꓒꓲꓼ ꓒꓬꓱꓼ ꓡ ꓪ= ꓶꓽ ꓖꓪꓽ ꓖꓪꓽ ꓢꓲ ꓖꓪ ꓛꓲꓹ ꓗꓪ ꓐꓰ ꓪꓴ-ꓢ ꓔꓯ ꓫꓱꓸ ꓖꓶ ꓓꓴ ꓬꓰ ꓡꓯ= 

Add new comment

3 + 2 =