I-ꓢ-ꓡꓮꓟ ꓙꓵ ꓠꓲꓹ (Dialogue with other Religions)

 ꓲ-ꓢ-ꓡꓮꓟ ꓙꓵ ꓠꓲꓹ ꓚꓱꓹ

ꓠꓬꓲꓹ ꓠꓬꓲ ꓟꓲ ꓠꓯ ꓗꓪ ꓠꓬ ꓕꓲꓽ ꓘꓳꓼ ꓡꓰ ꓕꓲꓽ ꓘꓳꓼ ꓕꓲꓽ ꓤꓶ ꓡꓰ ꓕꓲ ꓤꓶ ꓒꓳꓹ ꓡꓰˍ ꓟ ꓠꓬ ꓠꓬ ꓮ ꓘꓶꓸ ꓕꓶꓸ ꓮ ꓘꓶꓸ ꓞꓹ ꓟ ꓥˍ ꓡꓳ= ꓟꓲ ꓠꓯ ꓢꓷꓸ ꓠꓲꓹ ꓡꓰ ꓟꓽ ꓞꓲ ꓙꓵ ꓠꓲꓹ ꓚꓱꓹ ꓥˍ ꓟꓲ ꓧꓶ ꓕꓯ ꓡꓰ ꓐꓰ ꓟꓽ ꓪꓽ ꓡꓰ ꓘꓳ ꓟꓽ ꓫꓱꓹ ꓡꓯꓽ ꓘꓳꓹ ꓟ ꓮꓽ ꓟꓬ ꓕꓱ ꓡꓰ ꓗꓶ ꓡꓰꓹ ꓓꓴ ꓟ ꓥ ꓪ= ꓠꓬꓲꓹ ꓠꓬꓲ ꓠꓬ ꓕꓲ ꓗꓴꓷꓼ ꓡꓰ ꓕꓲꓽ ꓗꓴꓷꓼ ꓙꓵꓹ ꓟ ꓚ ꓚꓱꓹ ꓥˍ ꓟꓲ ꓮꓽ ꓘꓶ ꓢ ꓡꓰ꓾ ꓕꓲꓽ ꓣꓳꓹ ꓐꓰ ꓕꓲꓽ ꓣꓳ ꓝꓸ ꓡꓯꓽ ꓘꓳꓹ ꓠꓹ ꓟ ꓥˍ ꓟꓲ ꓮꓽ ꓘꓶ ꓢ ꓡꓰ꓾ ꓟꓵꓽ ꓕꓲꓽ ꓟꓵꓽ ꓗꓪ ꓐꓰ ꓠꓱꓸ ꓐꓯꓼ ꓕꓲꓽ ꓟꓵꓽ ꓗꓪ ꓙꓵꓹ ꓟ ꓥ_ ꓟꓲ ꓮꓽ ꓘꓶ ꓢ ꓡꓰꓳ= ꓡꓲꓽ ꓒꓲꓼ ꓟꓽ ꓪꓽ ꓡꓯꓽ ꓘꓳꓹ ꓟ ꓕꓲꓽ ꓟꓵꓽ ꓡꓰ ꓕꓲꓽ ꓟꓵꓽ ꓗꓪ ꓣꓳ ꓛꓲ ꓐ ꓡ ꓢꓲ꓾ ꓙꓵ ꓠꓲꓹ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳ ꓢꓴ ꓮꓽ ꓙꓵꓽ ꓕꓲꓽ ꓠꓲꓹ ꓕꓲꓽ ꓪꓼ ꓔꓬ ꓠꓹ ꓟ ꓕꓱ ꓡꓰ ꓫꓵꓽ ꓗꓷ ꓡꓰꓹ ꓟ ꓥˍ ꓟꓲ ꓙꓳˍ ꓡꓳ= ꓠꓬꓲꓹ ꓠꓬꓲ ꓭꓸ ꓦꓲ ꓓꓽ ꓟ ꓗꓪ ꓞꓳ ꓤꓽ 50 ꓦꓲ 60 ꓦꓲ ꓕꓱ ꓡꓰ ꓔꓬ ꓕꓯꓽ ꓙꓵꓽ ꓠꓲꓹ ꓟꓽ ꓪꓽ ꓡꓯ ꓘꓳ ꓟꓽ ꓫꓱꓹ ꓡꓯꓽ ꓘꓳ ꓢꓴ ꓥˍ ꓟꓲ ꓮ ꓘꓶ ꓐꓹ ꓟ ꓪꓴꓸ ꓠꓬꓲ ꓠꓲ ꓠꓴ ꓙꓵ ꓠꓲꓹ ꓥꓪ ꓙꓵ ꓠꓲꓹ ꓢꓷꓸ ꓡ ꓖꓴ ꓪ= ꓖꓳ ꓟ ꓪꓴꓸ ꓠꓬꓲ ꓠꓲ ꓧꓶꓸ ꓕꓯ ꓕꓲꓽ ꓞꓲꓼ ꓡꓰ ꓐꓰ ꓙꓵ ꓠꓲꓹ ꓕꓲꓽ ꓐꓰ ꓕꓲꓽ ꓟ ꓮꓽ ꓘꓶ ꓦꓽ ꓡꓯꓽ ꓘꓳꓹ ꓟ꓾ ꓟꓽ ꓢꓷꓸ ꓡꓯꓽ ꓘꓳꓹ ꓟ ꓟꓽ ꓗꓷ ꓡꓰ ꓕꓲꓽ ꓔꓶ ꓗꓪ ꓡꓰ ꓙꓵ ꓠꓲꓹ ꓮꓽ ꓙꓵꓽ ꓔꓯ ꓡꓳꓸ ꓟꓳ ꓪ ꓓ꓾ ꓫꓸ ꓕꓱ ꓐꓹ ꓟ ꓙꓳˍ ꓡꓳ=

ꓕꓱ ꓡꓰ ꓟꓽ ꓪ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳꓹ ꓟ ꓙꓵ ꓠꓲꓹ ꓔꓯ ꓘꓳ ꓣꓴ ꓔꓬ ꓢꓴ ꓮꓽ ꓙꓵꓽ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓝꓸ ꓡꓯꓽ ꓘꓳ ꓟꓳ ꓡꓯꓽ ꓘꓳ ꓪꓹ ꓟ ꓠꓬ ꓬꓳꓸ ꓚꓵꓹ ꓟ ꓕꓲꓽ ꓫꓵꓽ ꓗꓷ ꓡꓰꓳ= ꓕꓱ ꓡꓰ ꓙꓵꓽ ꓠꓲꓹ ꓟꓽ ꓪꓽ ꓡꓯꓽ ꓘꓳ ꓢꓴ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓜꓲ ꓡꓯꓽ ꓘꓳ ꓝꓸ ꓡꓯꓽ ꓘꓳ ꓪ ꓕꓯ ꓚꓵꓸ ꓛꓬ ꓙꓵ ꓠꓲꓹ ꓔꓯ ꓐꓯ ꓟꓸ ꓖꓶˍ ꓟ ꓚꓵꓸ ꓛꓬ ꓙꓵ ꓠꓲꓹ ꓔꓯ ꓛꓳ ꓟꓸ ꓔ ꓟ ꓕꓱ ꓡꓰꓳ ꓫꓵꓽ ꓔꓯ ꓬꓰ ꓐ ꓡˍ ꓡꓳ= ꓖꓳ ꓕꓯ ꓕꓲꓽ ꓠꓲꓹ ꓕꓲꓽ ꓪꓼ ꓕꓱ ꓡꓰ ꓔꓬ ꓕꓯ ꓢꓲ ꓙꓵ ꓠꓲꓹ ꓮꓽ ꓙꓵꓽ ꓠꓬ ꓮꓽ ꓘꓶꓸ ꓙꓵˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓡꓰ ꓥˍ ꓟꓲ ꓖꓳ ꓟ ꓙꓵ ꓠꓲꓹ ꓔꓯ ꓟꓽ ꓛꓳ ꓢꓴ ꓠꓯꓸꓼ ꓗꓪ ꓟꓽ ꓙꓲˍ ꓟ ꓞꓳ ꓤꓽ ꓥˍ ꓟꓲ ꓙꓵ ꓠꓲꓹ ꓕꓲꓽ ꓟ ꓡꓰ ꓕꓲꓽ ꓟ ꓗꓪ ꓕꓱ ꓡꓰ ꓔꓬ ꓟ ꓔꓯ ꓡꓳ ꓟꓳ ꓪ ꓓꓹ ꓡꓳ= ꓖꓳ ꓟ ꓪꓴꓸ ꓠꓬꓲ ꓪꓴ-ꓢ ꓔꓯ ꓧꓪ ꓢꓴ ꓪꓴ-ꓢ ꓟꓸ ꓟꓲ ꓔꓯ ꓢꓲ ꓟꓳꓸ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓠꓬ ꓑꓡꓴꓣꓮꓡꓲꓢꓟ ꓐꓯˍ ꓟ ꓟꓽ ꓪꓽ ꓡꓯ ꓘꓳ ꓟꓽ ꓫꓱꓹ ꓡꓯꓽ ꓘꓳˍ ꓟ ꓙꓵ ꓠꓲꓹ ꓮꓽ ꓙꓵꓽ ꓔꓯ ꓕꓲꓽ ꓔꓶ ꓗꓪ ꓡꓰ ꓣ ꓜꓲꓼ ꓐ ꓡ ꓠ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓢꓷꓸ ꓡꓯꓽ ꓘꓳ ꓐ ꓡ ꓠ ꓘꓳꓹ ꓣꓴ ꓐ ꓡ ꓠꓹ ꓟ ꓐꓱ ꓶ ꓪꓴꓸ ꓓꓵ ꓛꓹ ꓢꓲ ꓓꓵꓽ ꓙ ꓡꓹ ꓟ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓟꓲ ꓠꓯ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓕꓲꓽ ꓠꓬꓲ ꓡꓰ ꓕꓲ ꓠꓬꓲ ꓪꓴꓽ ꓡ ꓟꓴ ꓡꓹ ꓟ ꓡꓰ ꓐꓰ ꓕꓲꓽ ꓡꓰ ꓢꓳ ꓙꓵ ꓠꓲꓹ ꓔꓯ ꓢꓳ ꓣꓴ ꓠꓹ ꓟ ꓕꓱ ꓡꓰ ꓘꓷ ꓡꓰꓹ ꓓꓴ ꓟ ꓥ ꓪ= ꓮ ꓡꓰꓳꓽ ꓐꓯ ꓠꓬ ꓕꓱ ꓡꓰ ꓢꓳ ꓕꓯ ꓢꓲ ꓢꓳ ꓙꓵ ꓠꓲꓹ ꓠꓯꓸꓼ ꓗꓪ ꓔꓬ ꓢꓴ ꓔꓯ ꓣꓳ ꓘꓳ ꓣꓴ ꓐ ꓡꓹ ꓟ꓾ ꓫꓸ ꓕꓱ ꓐ ꓡꓹ ꓟ ꓒꓬꓱꓼ ꓡ ꓓꓴ ꓥꓳ=

ꓠꓬꓲꓹ ꓠꓬꓲ ꓢꓳ ꓙꓵ ꓠꓲꓹ ꓚꓱꓹ ꓔꓯ ꓢꓳˍ ꓟ ꓠꓬ ꓟꓽ ꓓ ꓬꓳꓸ ꓚꓵˍ ꓟ ꓕꓲꓽ ꓟ ꓗꓷ ꓡꓰꓹ ꓓꓴ ꓟ ꓥ ꓪ= ꓕꓱ ꓕꓲ ꓙꓵꓹ ꓗꓪ ꓚꓳ ꓣꓳꓽ ꓲ-ꓢ-ꓡꓮꓟ ꓙꓵ ꓠꓲꓹ ꓚꓱꓹ ꓔꓯ ꓟꓳꓸ ꓢꓳ ꓝꓸ ꓓꓴ ꓥꓳ=

ꓲ-ꓢ-ꓡꓮꓟ ꓙꓵ ꓠꓲꓹ ꓠꓯꓸꓼ ꓗꓪ ꓙꓵ ꓔꓬ ꓢꓴ ꓔꓯ ꓟꓴ-ꓢ-ꓡꓲꓟ ꓐꓰ ꓕꓱ ꓡꓰ ꓐꓯˍ ꓡꓳ= ꓟꓴ-ꓢ-ꓡꓲꓟ ꓐꓴ ꓠꓬ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓜꓲ ꓡꓯꓽ ꓘꓳ ꓟꓳ ꓡꓯꓽ ꓘꓳꓹ ꓕꓯ “ꓮ-ꓢ-ꓡ-ꓟꓴ ꓮ-ꓡꓮꓲ-ꓗꓴꓟ” ꓐꓰ ꓕꓱ ꓡꓰ ꓐꓯ ꓡꓯꓽ ꓘꓳˍ ꓡꓳ= ꓔꓲ ꓒꓳꓹ ꓢꓲ ꓐꓯ ꓠꓬꓲ ꓔ ꓟ ꓠꓬ “ꓪ-ꓡꓮꓲ-ꓗꓴꓟ ꓮ-ꓢ-ꓡꓮꓟ” ꓐꓰ ꓡꓯꓽ ꓔꓯꓽ ꓠ ꓗꓹ ꓡꓳ= ꓬꓲ ꓟꓸ ꓟꓲ ꓠꓬ ꓢꓲꓺ ꓡꓲ ꓟ ꓠꓬ ꓐꓴ ꓐꓰ ꓕꓲꓽ ꓪꓼ ꓙꓳ ꓔꓬ ꓝꓲ” ꓐꓯꓹ ꓟ ꓥ ꓪ= ꓖꓳ ꓕꓯ “ꓠꓴ ꓐꓰꓹ ꓟꓲ ꓕꓲꓽ ꓪꓼ ꓙꓳ ꓔꓬ ꓝꓲ” ꓐꓯꓹ ꓟ ꓬꓲ ꓟꓸ ꓟꓲ ꓥˍ ꓡꓳ= ꓲ-ꓢ-ꓡꓮꓟ ꓙꓵ ꓠꓲꓹ ꓠꓬ ꓢꓲ-ꓒꓽ ꓻꓰ-ꓢꓴ ꓟꓴ ꓗꓪ ꓗꓪ ꓓꓰ ꓗꓸ ꓠꓯꓸ ꓢꓲ ꓗꓪ ꓮꓓ-500 ꓘꓳꓼ ꓐꓰ 600 ꓘꓳꓼ ꓠꓬꓲ ꓗꓴꓸ ꓚꓸ ꓗꓪ ꓓꓳ ꓡꓹ ꓟ ꓙꓵ ꓠꓲꓹ ꓕꓲꓽ ꓟ ꓥ ꓐꓶ= ꓟꓴ-ꓧꓮꓓ-ꓟꓮꓓ ꓐꓯꓹ ꓢꓴ ꓟ ꓡꓰ ꓔꓶ ꓦꓹ ꓟ ꓙꓵ ꓠꓲꓹ ꓕꓲꓽ ꓟ ꓥ ꓐꓶ= ꓲ-ꓢ-ꓡꓮꓟ ꓐꓯꓹ ꓟ ꓬꓲ ꓟꓸ ꓟꓲꓽ ꓠꓬ ꓣꓱꓽ ꓙꓹ ꓟ꓾ ꓚꓵ ꓛꓬ ꓕꓲꓽ ꓞꓲꓼ ꓡꓱꓸꓼ ꓔꓯ ꓪꓴ-ꓢ ꓠꓯꓸꓼ ꓗꓪ ꓡꓯꓽ ꓙꓱˍ ꓟ꓾ ꓪꓴ-ꓢ ꓐꓱ ꓶ ꓛꓴ ꓔꓲꓹ ꓟ ꓕꓲꓽ ꓠꓲꓹ ꓟ ꓕꓲꓽ ꓶ ꓟꓬ ꓡꓱꓸꓼ ꓮꓽ ꓙꓵꓽ ꓪꓴ-ꓢ ꓔꓯ ꓡꓯꓼ ꓙꓱˍ ꓟ ꓐꓯꓹ ꓟ ꓬꓲ ꓟꓸ ꓟꓲ ꓥ ꓐꓶ= ꓪꓴ-ꓢ ꓔꓯ ꓠꓬ ꓮ-ꓡ ꓐꓰ ꓕꓱ ꓡꓰ ꓐꓯꓹ ꓐꓶ= ꓖꓳ ꓟ ꓪꓴꓸ ꓠꓬꓲ ꓠꓲ ꓙꓵ ꓢꓴ ꓢꓲ ꓤꓼ ꓐꓴ ꓕꓲ ꓐꓱ ꓥˍ ꓟꓲ ꓪꓴ-ꓢ ꓔꓯ ꓮ-ꓡ ꓐꓰ ꓕꓱ ꓡꓰ ꓐꓯꓹ ꓟ ꓥ ꓪ= ꓪꓴ-ꓢ ꓔꓯ ꓕꓲꓽ ꓠꓲꓹ ꓟ ꓡꓱꓸꓼ ꓕꓲꓽ ꓶ ꓟꓬ ꓡꓱꓸꓼ ꓟꓬꓱꓽ ꓥ ꓕ ꓑꓳꓸ ꓢꓯꓼ ꓟꓬ ꓥ ꓕ ꓑꓳꓸ ꓡꓯꓼ ꓙꓱˍ ꓥꓳ ꓐꓯꓹ ꓟ ꓬꓲ ꓟꓸ ꓟꓲ ꓗꓪ ꓐꓰ ꓡꓹ ꓟ ꓥ ꓐꓶ= ꓟꓴ-ꓢ-ꓡꓲꓟ ꓐꓯꓹ ꓟ ꓠꓬ ꓮ-ꓡ ꓪꓴ-ꓢ ꓐꓱ ꓶ ꓕꓲꓽ ꓞꓲꓼ ꓡꓱꓸꓼ ꓡꓯꓼ ꓙꓱ ꓦ ꓢꓴ ꓐꓯꓹꓟ ꓬꓲ ꓟꓸ ꓟꓲꓽ ꓥ ꓐꓶ=  

Add new comment

1 + 3 =