Islam ꓙꓵꓻ ꓠꓲꓹ ꓠꓯꓸꓼ ꓗꓪ ꓟ ꓰꓲꓓ ꓑꓮꓲꓽ ꓚꓱꓹ

ꓧꓪꓸ ꓧꓪꓸꓼ ꓕꓱ ꓕꓲ ꓙꓵꓹ ꓠꓬ Islam ꓙꓵꓻ ꓠꓲꓹ ꓠꓯꓸꓼ ꓗꓪ ꓟ Eid ꓑꓮꓲꓽ ꓚꓱꓹ ꓔꓯ ꓟꓳꓸ ꓐꓯ ꓟ ꓖꓶ ꓓꓴ ꓥꓳ=

Eid ꓐꓯ ꓟ ꓠꓬ ꓑꓮꓲꓽ꓾ ꓟꓽ ꓥ ꓠꓬ ꓗꓹ ꓛꓲꓽˍ ꓟ ꓑꓮꓲꓽ꓾ ꓜꓽ ꓪꓳꓽ ꓡꓳ ꓪꓳꓽ ꓜꓽ ꓢꓲ ꓬꓰˍ ꓟ ꓗꓹ ꓛꓲꓽ ꓚꓱꓹ꓾ ꓐꓰ ꓕꓱ ꓡꓰ ꓬꓲ ꓟꓸ ꓟꓲꓽ ꓙꓳˍ ꓡꓳ= Islam ꓙꓵꓻ ꓠꓲꓹ ꓔꓯ ꓙꓵꓻ ꓔꓬ ꓢꓴ Muslim ꓐꓴ ꓠꓯꓸꓼ ꓗꓪ Eid ꓐꓯ ꓟ ꓑꓮꓲꓽ ꓠꓬꓲꓽ ꓑꓮꓲꓽ ꓙꓳˍ ꓡꓳ= ꓕꓲꓽ ꓑꓮꓲꓽ ꓠꓬ Eid al-Fitr ꓐꓯ ꓟ꓾ ꓠꓬꓲꓽ ꓑꓮꓲꓽ ꓕꓲꓽ ꓑꓮꓲꓽ ꓠꓬ Eid al-Adha ꓐꓯ ꓟ ꓑꓮꓲꓽ ꓠꓬꓲꓽ ꓟ ꓕꓱ ꓡꓰ ꓙꓳˍ ꓡꓳ= Eid al-Fitr ꓐꓯ ꓟ ꓠꓬ ꓜꓽ ꓚꓲꓸ ꓚꓲꓸ ꓓꓳ ꓡꓰˍ ꓟ ꓑꓮꓲꓽ ꓐꓯ ꓟ ꓥ ꓡꓳ= ꓣꓳ ꓙꓲ-ꓢꓴ ꓢꓲꓺ ꓤ ꓐꓴ ꓠꓯꓸꓼ ꓗꓪ ꓐꓯ ꓠꓬ ꓢꓯꓸ ꓬꓲꓼ ꓡ ꓑꓮꓲꓽ ꓐꓰ ꓕꓲ ꓡꓰꓹ ꓥ ꓪ= ꓦꓲꓻ ꓘꓳꓼ ꓑꓮꓲꓽ ꓐꓯ ꓟ ꓕꓱ ꓟ ꓥ ꓪ=

ꓕꓱ ꓟ ꓡꓰ ꓐꓰ ꓕꓲ ꓡꓰꓹ Eid al-Adha ꓐꓯ ꓟ ꓠꓬ ꓛꓴ ꓔꓲˍ ꓟ ꓑꓮꓲꓽ ꓐꓯ ꓟ ꓥ ꓪ= ꓕꓱ ꓟ ꓠꓬ ꓮ-ꓐ-ꓡ-ꓦ ꓡꓰ ꓬꓲ-ꓢ ꓔꓯ ꓛꓴ ꓔꓲˍ ꓟ ꓡꓰ ꓐꓰ ꓛꓴ ꓔꓲˍ ꓟ ꓔꓯ ꓓꓵꓽ ꓙ ꓟꓶ ꓓꓴ ꓚꓲꓸ ꓟꓶ ꓓꓴ ꓥ ꓡꓳ= ꓖꓳ ꓡꓱ ꓥˍ ꓟꓲ Islam ꓙꓵꓻ ꓠꓲꓹ ꓗꓪ ꓠꓬ ꓮ-ꓐ-ꓡ-ꓦ ꓠꓬ ꓬꓲ-ꓢ ꓔꓯ ꓛꓴ ꓔꓲˍ ꓟ ꓟꓽ ꓥ= ꓬꓲ-ꓫꓵ-ꓟ-ꓡꓲ ꓔꓯ ꓛꓴ ꓔꓲˍ ꓟ ꓚꓱꓹ ꓥ ꓡꓳ= ꓣꓳ ꓢꓲꓽ ꓫꓬ ꓕꓳ ꓶ ꓗꓪ ꓚ ꓟꓲꓽ ꓠꓬ ꓬꓲ-ꓢꓷ-ꓡꓰ ꓐꓴ ꓚ ꓟꓲꓽ ꓥ ꓢꓲ ꓬꓲ-ꓢꓷ-ꓡꓰ ꓐꓴ ꓠꓬ ꓮ-ꓐ-ꓡ-ꓦ ꓡꓰ ꓬꓲ-ꓢ ꓔꓯ ꓛꓴ ꓔꓲˍ ꓟ ꓥ ꓪ= ꓖꓳ ꓡꓱ ꓥ ꓟꓲ Islam ꓙꓵꓻ ꓠꓲꓹ ꓗꓪ ꓠꓬ ꓬꓲ-ꓢ ꓔꓯ ꓛꓴ ꓔꓲˍ ꓟ ꓟꓽ ꓥ꓾ ꓬꓲ-ꓫꓵ-ꓟ-ꓡꓲ ꓔꓯ ꓢꓲ ꓛꓴ ꓔꓲˍ ꓟ ꓥ ꓡꓳ꓾ ꓐꓰ ꓕꓰ ꓡꓰ ꓐꓯ ꓡꓳ=

ꓬꓲ-ꓫꓵ-ꓟ-ꓡꓲ ꓠꓬ ꓚꓳ ꓑ ꓟ ꓥ ꓟ ꓫꓬ-ꓚꓬꓹ ꓠꓯꓸꓼ ꓗꓪ ꓐꓰ ꓑꓯꓹ ꓟꓶˍ ꓟ ꓤ ꓠꓵ ꓮ ꓐꓲꓻ ꓥ ꓡꓳ= ꓖꓳ ꓡꓱ ꓢꓲ ꓠꓬꓲ ꓮ-ꓐ-ꓡ-ꓦ ꓠꓬ ꓬꓲꓼ ꓟꓬ ꓘꓴꓽ ꓗꓪ ꓪꓴ-ꓢ ꓡꓰ ꓟꓳꓸ ꓖꓶ ꓡˍ ꓡꓳ= ꓪꓴ-ꓢ ꓟꓳꓸ ꓖꓶ ꓡˍ ꓟ ꓔꓯ ꓬꓲ ꓤ ꓬꓲ-ꓫꓵ-ꓟ-ꓡꓲ ꓔꓯ ꓐꓯ ꓟꓸ ꓖꓶˍ ꓡꓳ= “ꓥꓪ ꓤꓽꓳ꓾ ꓮ ꓟꓰ ꓟꓶꓽ ꓘꓶꓼ ꓥꓪ ꓠꓬ ꓬꓲꓼ ꓟꓬ ꓘꓳ ꓪ= ꓪꓴ-ꓢ ꓡꓰ ꓥꓪ ꓤ ꓠꓴ ꓔꓯ ꓛꓴ ꓔꓲꓺ ꓠꓹ ꓟ ꓐꓱ ꓶ ꓐꓯ ꓟ ꓬꓲꓼ ꓟꓬ ꓘꓳ ꓗꓷꓳ꓾ ꓐꓰ ꓕꓱ ꓡꓱ ꓐꓯ ꓠꓬ ꓬꓲ ꓤ ꓬꓲ-ꓫꓵ-ꓟ-ꓡꓲ ꓡꓰ ꓐꓹ ꓐ ꓪꓴ-ꓢ ꓠꓬ ꓥꓪ ꓔꓯ ꓛꓴ ꓔꓲ ꓠꓹ ꓟ ꓓꓰꓽˍ ꓟ ꓥ ꓐꓭˍ ꓥꓳ= ꓖꓳ ꓟ ꓪꓴꓸ ꓠꓬꓲ ꓐꓹ ꓐ ꓠꓴ ꓠꓲꓹ ꓡꓶꓽ ꓡꓰ ꓐꓰ ꓕꓲ ꓡꓰꓹ ꓬꓰ ꓕꓲ ꓖꓼ ꓥꓳ꓾ ꓐꓰ ꓐꓯ ꓠꓬ ꓬꓲ ꓐꓹ ꓐ ꓠꓬ ꓪꓴ-ꓢ ꓡꓰ ꓓꓰꓽˍ ꓟ ꓡꓰ ꓐꓰ ꓕꓲ ꓡꓰꓹ ꓬꓲ ꓤ ꓔꓯ ꓕꓰ ꓡꓰ ꓛꓴ ꓔꓲˍ ꓟ ꓥ ꓡꓳ꓾ ꓐꓰ ꓕꓱ ꓡꓱ ꓐꓯ ꓡꓳ=

ꓖꓳ ꓡꓰ ꓛꓴ ꓔꓲꓺ ꓓꓴ ꓬꓰˍ ꓕꓯ꓾ ꓢꓰꓼ ꓓꓴ ꓬꓰˍ ꓕꓯ ꓖꓳ ꓕꓲ ꓘꓴ꓾ ꓖꓳ ꓕꓲ ꓔꓳꓸ ꓒ ꓕꓲ ꓗꓪ ꓮ ꓣꓳ ꓕꓲ ꓘꓹ ꓕꓱ ꓡꓰ ꓬꓲ ꓪꓴꓸ ꓛꓲ ꓠꓬ ꓛꓴꓽ ꓘꓶꓻ ꓗꓪ ꓪꓴꓻ ꓓꓹ ꓢꓲ ꓖꓳ ꓟ ꓔꓯ ꓬꓲ ꓤ ꓔꓯ ꓟꓽ ꓛꓴ ꓔꓲꓺ ꓖꓳ ꓟ ꓔꓯ ꓛꓴ ꓔꓲꓺ ꓠꓹ ꓟ ꓪꓴ-ꓢ ꓡꓰ ꓐꓯ ꓟ ꓪꓴꓸ ꓠꓬꓲ ꓖꓳ ꓟ ꓔꓯ ꓢꓲꓸ ꓛꓴ ꓔꓲˍ ꓥ ꓐꓰ ꓕꓱ ꓡꓰ ꓐꓯ ꓡꓳ= ꓕꓱ ꓕꓲ ꓘꓴ ꓗꓪ Islam ꓙꓵꓻ ꓠꓲꓹ ꓗꓪ ꓠꓬ ꓢꓲꓺ ꓒ ꓬꓰ-ꓢꓴˍ ꓡꓰ ꓐꓰ ꓬꓲ-ꓫꓵ-ꓟ-ꓡꓲ ꓠꓬ ꓐꓹ ꓐ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓢꓲ ꓬꓲ ꓔꓯ ꓛꓴ ꓔꓲꓺ ꓠꓹ ꓟ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓛꓴ ꓔꓲꓺ ꓑꓶ.ˍ ꓟ ꓥ ꓡꓳ꓾ ꓐꓰ ꓕꓱ ꓡꓰ ꓐꓯ ꓟ ꓥ ꓡꓳ= ꓪꓴ-ꓢ ꓠꓲꓹ ꓡꓶꓽ ꓔꓯ ꓢꓯꓼ ꓟꓬ ꓖꓶ ꓐ ꓡˍ ꓡꓳ ꓐꓯ ꓟ ꓬꓲ ꓪ ꓚꓺ ꓟꓲꓽ ꓗꓪ ꓕꓱ ꓡꓰ ꓙꓳˍ ꓡꓳ=

ꓖꓳ ꓟ ꓡꓰꓽ ꓟꓽ ꓞꓲꓺ ꓬꓲ ꓤ ꓬꓲ-ꓫꓵ-ꓟ-ꓡꓲ ꓠꓬ ꓬꓲ ꓐꓹ ꓐ ꓮ-ꓐ-ꓡ-ꓦ ꓠꓲꓹ ꓡꓶꓽ ꓔꓯ ꓥˍ ꓟꓲ ꓛꓳ ꓢꓲ ꓬꓲ ꓢꓯꓼ ꓟꓬ ꓔꓯ ꓖꓶꓽ ꓢꓲ ꓪꓴ-ꓢ ꓠꓯꓸꓼ ꓗꓪ ꓛꓴ ꓔꓲꓺ ꓠꓹ ꓟ ꓐꓯ ꓟ ꓥ ꓡꓳ= ꓕꓱ ꓟ ꓠꓬ ꓮ-ꓐ-ꓡ-ꓦ ꓡꓰ ꓮ-ꓡ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓢꓲ ꓛꓴ ꓔꓲˍ ꓟ ꓥ ꓪ= ꓕꓰ ꓡꓰ ꓬꓲ-ꓫꓵ-ꓟ-ꓡꓲ ꓔꓯ ꓢꓰꓼ ꓠ ꓟꓽ ꓗꓷ ꓡꓰ꓾ ꓮ ꓣꓳ ꓔꓯ ꓢꓰꓼ ꓠꓹ ꓟ ꓗꓷ ꓡꓰ ꓢꓲ ꓠꓬꓲ ꓖꓳ ꓟ ꓔꓯ ꓠꓬ ꓢꓽ ꓐꓱ ꓐꓱ꓾ ꓕꓲ ꓐꓱ ꓔꓯ ꓕꓲ ꓦꓲꓻ ꓢꓴ ꓠꓬ ꓕꓲ ꓠꓲꓹ ꓕꓲ ꓪ ꓜꓽˍ ꓟ ꓕꓱ ꓡꓰ ꓬꓰ꓾ ꓖꓳ ꓟ ꓡꓰꓽ ꓟꓽ ꓞꓲꓺ ꓤꓰꓻˍ ꓟ ꓔꓯ ꓠꓬ ꓢꓴ ꓔꓯ ꓐꓱ ꓖꓶ ꓛꓴ ꓔꓲꓺ꓾ ꓟꓬꓽ ꓠꓬꓲ ꓠꓬ ꓫꓸ ꓢꓴ ꓔꓯ ꓐꓱ ꓖꓶˍ ꓟ ꓬꓰˍ ꓡꓳ꓾ ꓐꓰ ꓕꓱ ꓡꓱ ꓐꓯ ꓡꓳ=

ꓖꓳ ꓟ ꓪꓴꓸ ꓠꓬꓲ ꓕꓱ ꓟ Eid ꓐꓯ ꓟ ꓑꓮꓲꓽ ꓗꓪ ꓠꓬ ꓲꓢꓡꓮꓟ ꓙꓵꓻ ꓠꓲꓹ ꓔꓯ ꓙꓵꓻ ꓔꓬ ꓟ Muslim ꓐꓴ ꓠꓬ ꓮ ꓠꓬꓲꓽ ꓮ ꓛꓵꓼ ꓮ ꓣꓳ ꓕꓰ ꓡꓰ ꓢꓰꓼ ꓢꓲ ꓠꓬꓲ ꓑꓮꓲꓽ ꓓ ꓟ ꓬꓰˍ ꓟ ꓥ ꓪ= ꓖꓳ ꓟ ꓡꓰꓽ ꓟꓽ ꓞꓲꓺ ꓖꓳ ꓡꓰ ꓢꓰꓼˍ ꓕꓯ ꓬꓲ ꓠꓻ ꓓꓴ ꓟꓽ ꓙꓳ ꓟ꓾ ꓬꓲ ꓠꓸ ꓟꓽ ꓠꓸ ꓦˍ ꓟ ꓮ ꓠꓬꓲ ꓮ ꓛꓵꓼ ꓮ ꓣꓳ ꓔꓯ ꓢꓲ ꓢꓰꓼˍ ꓟ ꓥ ꓪ= ꓮ ꓡꓲꓳ ꓐꓯ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓐꓴ꓾ ꓮ-ꓣ ꓞꓳ ꓫꓵꓽ ꓐꓴ ꓪꓴ-ꓢ ꓔꓯ ꓛꓴ ꓔꓲˍ ꓕꓯ ꓬꓲ ꓠꓻ ꓓꓴ ꓟꓽ ꓓꓴ ꓟ꓾ ꓬꓲ ꓠꓸ ꓟꓽ ꓠꓸ ꓦˍ ꓟ ꓕꓱ ꓡꓰ ꓫꓵꓽ ꓙꓱꓽ ꓤ ꓔꓯ ꓢꓲ ꓣꓱꓽˍ ꓟ ꓥ ꓪ=

ꓐꓯ ꓡꓳꓹ ꓬꓰˍ ꓟ ꓡꓰ ꓐꓰ ꓕꓲ ꓡꓰꓹ ꓰꓲꓓ ꓐꓯ ꓟ ꓠꓬꓲꓽ ꓟ ꓙꓳˍ ꓟ ꓠꓯꓸꓼ ꓗꓪ ꓠꓬꓲꓽ ꓟ ꓡꓱꓸꓼ ꓠꓬ ꓮ ꓠꓬꓲꓽ ꓮ ꓛꓵꓼ ꓮ ꓣꓳ ꓢꓰꓼ ꓢꓲ ꓑꓮꓲꓽ ꓬꓰˍ ꓟ ꓥ ꓡꓳ= ꓖꓳ ꓡꓰ ꓬꓰˍ ꓕꓯ ꓬꓲ ꓪ ꓬꓰˍ ꓟ ꓖꓳ ꓕꓲ ꓠꓬꓲ ꓗꓪ ꓧꓪꓽ ꓔꓯ ꓕꓲ ꓦꓲꓻ ꓢꓴ ꓮ ꓙꓵꓽ ꓜꓽ꓾ ꓖꓳ ꓡꓱ ꓢꓲ ꓠꓬꓲ ꓢꓴ ꓔꓯ ꓐꓱ ꓖꓶ꓾ ꓟꓬꓽ ꓠꓬꓲ ꓠꓬ ꓫꓸ ꓢꓴ ꓟꓷꓼ ꓢꓴ ꓔꓯ ꓮ ꓔꓳꓺ ꓖꓶ ꓜꓽˍ ꓟ ꓕꓱ ꓡꓱ ꓬꓰˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓐꓬꓽ ꓡꓴꓸ ꓡꓴꓸ꓾ ꓛꓵˍ ꓟ ꓕꓲ ꓫꓵꓽ ꓕꓲ ꓫꓵꓽ ꓔꓯ ꓞꓳ ꓤ ꓔꓯ ꓖꓶˍ ꓟ ꓥˍ ꓟꓲ ꓬꓰˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲꓺ ꓡꓯ ꓫꓴ ꓡꓯ ꓟꓲ ꓥˍ ꓟꓲ ꓖꓶˍ ꓡꓳ꓾ ꓐꓰ ꓕꓰ ꓡꓰ ꓐꓯ ꓡꓳ= ꓟꓬꓽ ꓠꓬꓲ ꓞꓳ ꓪꓴꓽ ꓞꓳ ꓔꓲ ꓐꓴ ꓠꓬ ꓖꓳ ꓕꓲ ꓠꓬꓲ ꓗꓪ ꓤ ꓠꓱ ꓤ ꓐꓴ꓾ ꓞꓳ ꓡꓯꓸ ꓐꓴ ꓔꓯ ꓡꓯꓼ ꓫꓴ ꓖꓶˍ ꓡꓳ꓾ ꓐꓰ ꓕꓱ ꓡꓰ ꓐꓯ ꓡꓳ= ꓕꓱ ꓟ ꓠꓬ Eid ꓑꓮꓲꓽ ꓗꓪ ꓬꓰˍ ꓟ ꓚꓱꓹ ꓥ ꓡꓳ= ꓠꓬꓲꓽ ꓟ ꓡꓱꓸꓼ ꓕꓱ ꓡꓰ ꓬꓰˍ ꓟ ꓥ ꓡꓳ=

ꓖꓳ ꓡꓱ ꓥ ꓟꓲ Eid al-Adha ꓐꓯ ꓟ ꓮ-ꓐ-ꓡ-ꓦ ꓡꓰ ꓛꓴ ꓔꓲˍ ꓟ ꓑꓮꓲꓽ ꓔꓯ꓾ ꓚꓲꓸ ꓟꓶ ꓓꓴ ꓬꓰˍ ꓟ ꓑꓮꓲꓽ ꓕꓱ ꓟ ꓔꓯ ꓠꓬ ꓟꓬꓽ ꓠꓬꓲ ꓪꓴꓽˍ ꓟ Eidꓑꓮꓲꓽ ꓦꓬꓼ ꓠꓬꓲ ꓐꓰ ꓕꓰ ꓡꓰ ꓐꓯ ꓐꓷ= Eid ꓑꓮꓲꓽ ꓔꓯ ꓠꓬ ꓢꓽ ꓠꓬꓲ ꓡꓲꓸ ꓠꓬꓲ ꓕꓱ ꓡꓰ ꓬꓰˍ ꓟ ꓥ ꓡꓳ=