ꓑꓰꓣꓴ ꓗꓴꓷꓼ ꓗꓪ ꓐꓬꓱ ꓦꓲꓻ ꓐꓰ ꓮ ꓔꓳꓸ ꓢꓰꓼ ꓟꓳ ꓓꓳ ꓕꓯꓼ ꓡꓯ ꓘꓳ ꓗꓷ ꓢꓲ ꓮ ꓔꓳꓸ ꓢꓰꓼ ꓢꓴ ꓠꓬꓲꓽ ꓣꓳ ꓫꓵꓻ ꓟ

ꓑꓰꓣꓴ ꓗꓴꓷꓼ ꓗꓪ ꓐꓬꓱ ꓦꓲꓻ ꓐꓰ ꓮ ꓔꓳꓸ ꓢꓰꓼ ꓟꓳ ꓓꓳ ꓕꓯꓼ ꓡꓯ ꓘꓳ ꓗꓷ ꓢꓲ ꓮ ꓔꓳꓸ ꓢꓰꓼ ꓢꓴ ꓠꓬꓲꓽ ꓣꓳ ꓫꓵꓻ ꓟ

ꓡꓮꓔꓮꓟ ꓐꓬꓱ ꓦꓲꓻ ꓚꓱꓹ ꓗꓪ ꓟ ꓐꓬꓱ ꓦꓲꓻ ꓕꓲ ꓒꓽ ꓠꓬ 11 ꓦ 18 ꓠꓬꓲ ꓠꓯꓼ ꓕꓯ ꓑꓰꓣꓴ ꓗꓴꓷꓼ ꓡꓳ ꓒꓱ ꓥ ꓟ ꓡꓲ-ꓟ ꓐꓬꓱ ꓦꓲꓻ ꓠꓽ ꓔꓶꓸ ꓗꓪ ꓐꓬꓱ ꓓꓯꓻ ꓙꓰ ꓔꓬ ꓕꓯ ꓐꓬꓱ ꓦꓲꓻ ꓙ ꓖꓴ ꓗꓪ ꓟ ꓮꓸ ꓔꓳꓸ ꓢꓰꓼ ꓟꓳ ꓓꓳ ꓐꓰ ꓕꓯꓼ ꓡꓯ ꓘꓳ ꓡꓰ ꓢꓲ ꓮꓸ ꓔꓳꓸ ꓢꓰꓼ ꓢꓴ ꓠꓬꓲꓽ ꓣꓳ ꓫꓵꓳ꓾ ꓐꓰ ꓐꓬꓱ ꓦꓲꓻ ꓚꓱꓹ ꓗꓪ ꓐꓰ ꓐꓯ ꓑꓶ ꓔ ꓡꓳ=

ꓫꓵꓽ ꓪꓴ ꓕꓱ ꓟ ꓑꓶꓸ ꓓꓴ ꓐꓬꓱꓻ ꓦꓲ ꓜꓶꓽ ꓢꓴ ꓐꓰ ꓐꓬꓱ ꓦꓲꓻ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓫꓵꓻ ꓟ ꓟꓽ ꓙꓳ ꓥˍ ꓟꓲ꓾ ꓐꓬꓱ ꓦꓲꓻ ꓜꓶꓽ ꓢꓴ 20 ꓣꓳ ꓔꓯ ꓠꓬ ꓒ ꓕꓲꓺ ꓗꓪ ꓟ ꓠꓯꓻ ꓞꓲꓼ ꓦꓲꓻ ꓗꓪ ꓠꓯ ꓞꓲꓼ ꓫꓬꓹ ꓔꓬ ꓟ ꓥ ꓢꓲ꓾ 6 ꓣꓳ ꓠꓬ ꓮ ꓘꓶꓸ ꓠꓻ ꓔꓬ ꓡꓳ ꓐꓰ ꓢꓷꓸ ꓪ ꓡꓳ=

ꓐꓬꓱ ꓦꓲꓻ ꓠꓽ ꓖꓴ ꓗꓪ ꓟ ꓞꓳ ꓤ 61 ꓣꓳ ꓔꓯ ꓥˍ ꓟꓲ ꓒ ꓕꓲꓺ ꓗꓪ ꓟ ꓠꓯꓻ ꓞꓲꓼ ꓦꓲ ꓗꓪ ꓧꓳꓽ ꓔ ꓡꓳ ꓐꓰ ꓠꓯ ꓞꓲꓼ ꓢꓲꓽ ꓒ ꓡꓰ ꓐꓯ ꓗꓷ ꓥˍ ꓟꓲ꓾ ꓬꓲ ꓪ ꓐꓴ ꓠꓻ ꓓꓴ ꓓꓴ ꓡꓰ ꓡ꓾ ꓟꓽ ꓓꓴ ꓡꓰ ꓡ ꓐꓯ ꓟ ꓔꓯ ꓠꓬ ꓫꓬꓽ ꓫꓬꓽ ꓡꓰꓽ ꓟꓽ ꓢꓷꓸ ꓡꓰ ꓢꓰꓽ꓾ ꓐꓰ ꓐꓯ ꓔ ꓡꓳ=

ꓐꓬꓱ ꓦꓲꓻ ꓐꓬꓱ ꓓꓯꓻ ꓙꓰ ꓔꓬ ꓕꓯ ꓮꓸ ꓔꓳꓸ ꓢꓰꓼ ꓟꓳ ꓓꓳ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓐꓬꓱ ꓦꓲ ꓙ ꓖꓴ ꓗꓪ ꓓꓵꓽ ꓙꓰ ꓟ ꓔꓯ ꓟꓽ ꓢꓷꓸ ꓟ ꓪꓴꓸ ꓠꓬꓲ ꓫꓵꓽ ꓪꓴ ꓕꓱ ꓟ ꓔꓯ ꓚꓬꓹ ꓠꓬꓲ ꓔꓬ ꓡꓳ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓐꓯ ꓡꓳ=

ꓑꓰꓣꓴ ꓗꓴꓷꓼ ꓢꓲꓽ ꓒ ꓑꓯꓸꓼ-ꓓ-ꓣꓳ ꓡꓰ ꓫꓵꓽ ꓪꓴ ꓘꓴꓽ ꓗꓪ ꓫꓵꓻ ꓗꓷ ꓢꓴ ꓮꓸ ꓔꓳꓸ ꓢꓰꓼ ꓢꓴ ꓠꓬꓲꓽ ꓣꓳ ꓬꓲ ꓪ ꓕꓲ ꓦꓲꓻ ꓢꓴ ꓐꓴ ꓐꓰ ꓕꓲ ꓡꓰꓹ ꓠꓲꓹ ꓟ ꓫꓸ ꓔꓬ ꓟ ꓔꓯ ꓬꓲ ꓔꓪꓲꓔꓔꓰꓣ ꓗꓪ ꓐꓳ ꓗꓷ ꓢꓲ꓾ ꓠꓻ ꓓꓴ ꓓꓴ ꓡꓰ ꓢꓴ ꓐꓴ ꓔꓯ ꓥˍ ꓟꓲ ꓠꓲꓹ ꓞꓼ ꓓꓻ ꓡꓰ ꓠꓹ ꓟ ꓪꓽ ꓘꓴ ꓙ ꓖꓶ ꓗꓷꓳ꓾ ꓐꓰ ꓢꓷꓸ ꓪ ꓡꓳ=