ꓑꓰ-ꓙꓲꓹ ꓡꓳ ꓒꓱ ꓬꓲꓻ ꓙꓬ ꓙꓵꓽ ꓟꓷꓸˍ ꓟ ꓗꓪ ꓟꓯꓼ ꓐꓴ ꓣꓱꓽˍ ꓟ ꓐꓬꓱꓻ ꓦꓲꓻ ꓣꓱꓽ ꓢꓲ ꓬꓰ ꓙ ꓪ ꓡꓰꓳ

ꓟꓶꓽ ꓦ ꓬꓲ ꓓꓽ ꓟ ꓦ ꓗꓷ ꓟ ꓧꓶꓽ ꓗꓴꓷꓼ꓾ ꓑꓰ-ꓙꓲꓹ ꓡꓳ ꓒꓱ ꓗꓪ ꓬꓲꓼ ꓙꓰ ꓟꓽ ꓐ ꓡ ꓗꓷ ꓡꓰ ꓟ ꓧꓳꓺ ꓛꓱ ꓜꓶꓽ ꓢꓴ ꓐꓴ ꓔꓯ ꓬꓰ ꓙ ꓠꓹ ꓟ ꓐꓱ ꓶ ꓟꓯꓼ ꓐꓬꓱꓻ ꓦꓲ ꓐꓴ ꓔꓯ ꓣꓱꓽ ꓪ ꓡꓰꓳ ꓐꓰ ꓢꓷꓸ ꓪ ꓡꓳ=

ꓒꓲ-ꓡꓲ-ꓒꓲ ꓗꓴꓷꓼ ꓗꓪ ꓓꓵꓽ ꓙꓰ ꓢꓲ ꓬꓲ ꓢꓯꓼ ꓮ ꓔꓲꓸ ꓡꓱ ꓡꓰ ꓟ ꓢꓴ-ꓑ ꓟꓲꓽ ꓦꓲ ꓕꓳꓽ ꓥꓳꓽ ꓓꓮꓪ-ꓢꓴ-ꓣꓲ ꓠꓬ ꓠꓽ-ꓥꓪꓽ-ꓠꓬꓲ ꓕꓯ ꓧꓶꓽ ꓗꓴꓷꓼ ꓖꓴ ꓟꓶꓸ ꓒꓴ-ꓚꓬꓯꓹ ꓗꓴꓷꓼ ꓫꓴ ꓗꓪ ꓓꓵꓽ ꓙꓰ ꓢꓲ ꓧꓶꓽ ꓗꓴꓷꓼ ꓬꓲ ꓘꓴꓽ ꓗꓪ ꓓꓵꓼ ꓡ ꓗꓷ ꓟ ꓥ ꓡꓳ=

ꓑꓰ-ꓙꓲꓹ ꓡꓳ ꓒꓱ ꓗꓪ ꓠꓬ ꓠꓽ ꓛꓳꓼ ꓠꓬꓲ ꓕꓯ ꓟꓶꓽ ꓦ ꓓꓽ ꓟ ꓦ ꓗꓷ ꓢꓲ ꓬꓲ ꓙꓵꓹ 40 ꓟ ꓘꓴꓽ ꓗꓪ ꓡꓰꓽ 7 ꓦ ꓕꓲ ꓦ ꓡꓱꓸꓼ ꓐꓱ ꓶ ꓟꓬ ꓛꓲꓺ ꓦ ꓗꓷ ꓟ ꓥ ꓡꓳ= ꓕꓱ ꓡꓱ ꓬꓲꓻ ꓙꓬ ꓙꓵꓽ ꓟꓷꓸ ꓡ ꓟ ꓑꓶꓸ ꓓꓴ ꓑꓰ-ꓙꓲꓹ ꓡꓳ ꓒꓱ ꓗꓪ ꓞꓳ ꓤ ꓠꓬꓲꓽ ꓣꓳ ꓫꓵꓻ ꓗꓷ ꓢꓲ꓾ ꓐꓶꓻ ꓓꓳ ꓖꓴ ꓪꓴꓸ ꓗꓪ ꓟ ꓡꓲꓮꓳꓠꓲꓠꓖ ꓗꓴꓷꓼ ꓫꓴ ꓗꓪ ꓥ ꓟꓲ ꓞꓳ ꓤ ꓫꓵꓽ ꓣꓳ ꓫꓵꓻ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓠꓽ ꓠꓬꓲꓽ ꓠꓬꓲ ꓠꓯꓼ ꓗꓪ ꓠꓬ ꓬꓲꓻ ꓙꓬ ꓮ ꓟꓬꓹ ꓙꓵꓽ ꓟꓶꓸˍ ꓟ ꓔꓳꓹ ꓜꓳꓽ ꓔꓬ ꓟ ꓟꓯ-ꓔꓳ-ꓖꓴ ꓧꓳꓺ ꓛꓱ ꓠꓽ ꓖꓴ ꓕꓲ ꓟ ꓗꓪ ꓓꓳ ꓙꓰ ꓟꓽ ꓐ ꓡ ꓢꓴ ꓐꓴ ꓐꓱ ꓶ ꓣꓱꓽ ꓞꓹ ꓟ ꓐꓴ ꓔꓯ ꓟꓯꓼ 36 ꓣꓳ ꓐꓹ ꓟ ꓟꓯꓼ ꓐꓬꓱꓻ ꓦꓲ 4 ꓟ ꓗꓪ ꓐꓰ ꓣꓱꓽ ꓞꓹ ꓟ ꓖꓶ ꓠ ꓗꓷ ꓡꓰꓳ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓓꓳꓽ ꓦ ꓔꓶꓸ ꓥ ꓟ ꓚꓚꓔꓦ ꓗꓪ ꓐꓰ ꓢꓷꓸ ꓪ ꓡꓳ=

ꓡꓲꓽ ꓡꓲꓽ ꓡꓰꓽ ꓙꓳꓺ ꓗꓽ ꓖꓶ ꓔ ꓟ ꓟꓲꓽ ꓦꓲ ꓕꓳꓽ ꓥꓳꓽ ꓑꓶꓸ ꓓꓴ ꓫꓵꓻ ꓢꓴ 27 ꓣꓳ ꓙꓳ ꓢꓲ꓾ ꓐꓬꓱꓽ ꓦꓲꓻ ꓗꓪ ꓐꓰ ꓓꓴ ꓓꓳ ꓙꓰˍ ꓟ 40 ꓟ ꓛꓲꓺ ꓔꓯ ꓥˍ ꓟꓲ ꓠꓽ ꓪ ꓡꓰꓳ꓾ ꓐꓰ ꓢꓷꓸ ꓪ ꓡꓳ=