ꓓꓳꓽ (News)

1.  ꓬꓴ-ꓗ-ꓣꓲꓸ ꓟꓯꓼ ꓛꓰꓹ ꓑꓬ ꓢꓴ ꓐꓴ ꓐꓱ ꓶ ꓔꓲꓺ ꓟ ꓙꓳꓽ ꓦꓲꓻ 1000 ꓟꓽ ꓛꓲꓺ ꓒꓴ ꓔ ꓢꓲ ꓬꓰ ꓙˍ ꓔꓬ ꓟ ꓓꓳꓽ

ꓑꓳ-ꓡꓮꓠ ꓐꓰ ꓬꓴ-ꓗ-ꓣꓲꓸ ꓗꓴꓷꓼ ꓐꓴ ꓗꓪ ꓔꓲꓺ ꓟ ꓙꓳꓽ ꓦꓲꓻ 1000 ꓟ ꓛꓲꓺ ꓙꓳˍ ꓠꓬꓲ ꓣ-ꓫ ꓗꓪ ꓐꓰ ꓬꓴ-ꓗ-ꓣꓲ ꓔꓯ ꓟꓯꓼ ꓓꓶꓽ ꓪꓴꓸ ꓔꓴˍ ꓟ ꓗꓪ ꓐꓰ ꓬꓴ-ꓗ-ꓣꓲꓸ ꓑ ꓫꓬ ꓐꓴ ꓠꓬ ꓚꓲ ꓛꓬ ꓔꓬ ꓟꓵꓽ ꓔꓯ ꓡꓳ ꓔꓲ ꓬꓰ ꓢꓲ ꓛꓰꓹ ꓑꓬ ꓔꓬ ꓪˍ ꓡꓳ= ꓑꓳ-ꓡꓮꓠ ꓗꓴꓷꓼ ꓗꓪ ꓔꓲꓺ ꓟ ꓙꓳꓽ ꓦꓲ 924 ꓟ ꓐꓰ ꓬꓴ-ꓗ-ꓣꓲꓸ ꓗꓪ ꓟ ꓔꓲꓺ ꓟ ꓙꓳꓽ ꓦꓲ 98 ꓟ ꓐꓴ ꓗꓪ ꓟꓯꓼ ꓛꓰꓹ ꓔꓬ ꓢꓴ ꓐꓴ ꓔꓯ ꓦꓻ ꓕꓲ ꓒꓳꓹ꓾ ꓠꓲꓹ ꓟ ꓟꓽ ꓙꓬ ꓡꓰ ꓠ ꓢꓯꓼ ꓖꓶˍ ꓟ꓾ ꓠꓯꓻ ꓞꓲꓼ ꓐꓰ ꓠꓱꓸ ꓐꓯꓼ ꓣꓱꓽ ꓞꓹ ꓟ ꓔꓯ ꓖꓶ ꓢꓲ ꓬꓰ ꓙ ꓔꓬ ꓟ ꓥ ꓡꓳ=

ꓣꓴ-ꓫ ꓐꓴ ꓟꓯꓼ ꓓꓶꓽ ꓡˍ ꓟ ꓦꓬꓼ ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ ꓟꓯꓼ ꓛꓰꓹ ꓑꓬ ꓔꓬ ꓟ ꓑ ꓫꓬ ꓐꓴ ꓔꓯ ꓚꓲ ꓛꓬ ꓔꓲꓺ ꓟ ꓙꓳꓽ ꓦꓲꓻ ꓗꓪ ꓘꓳꓹ ꓣꓴ ꓢꓲ ꓡꓳꓸ ꓙ ꓔꓬ ꓟ꓾ ꓮ ꓟꓶ ꓠꓬ ꓑꓳ-ꓡꓮꓠ ꓗꓴꓷꓼ ꓗꓪ 148 ꓟ꓾ ꓬꓴ-ꓗ-ꓣꓲꓸ ꓗꓴꓷꓼ ꓗꓪ ꓔꓲꓺ ꓟ ꓙꓳꓽ ꓦꓲ 76 ꓟ ꓗꓪ ꓟꓯꓼ ꓛꓰꓹ ꓑꓬ ꓔꓬ ꓟ ꓞꓳ ꓦꓲꓻ 2400 ꓦꓲꓻ ꓔꓯ ꓘꓳꓹ ꓣꓴ ꓖꓶ ꓔ ꓢꓲ꓾ ꓕꓱ ꓟ ꓘꓴꓽ ꓗꓪ ꓤ ꓠꓱ ꓤ 3000 ꓣꓳ ꓟꓽ ꓛꓲꓺ ꓙꓳˍ ꓟ ꓥ ꓡꓳ꓾ ꓐꓰ ꓢꓷꓸ ꓪˍ ꓡꓳ=

ꓔꓲꓺ ꓟ ꓐꓴ ꓠꓬ ꓟꓯꓼ ꓛꓰꓹ ꓑꓬ ꓢꓴ ꓐꓴ ꓔꓯ ꓜꓽ ꓓꓴ꓾ ꓠꓯꓻ ꓞꓲꓼ꓾ ꓐꓵꓻ ꓞꓶꓽ꓾ ꓕꓱ ꓟꓬ ꓫꓵꓽ ꓬꓰ ꓙ ꓖꓶˍ ꓟ ꓡꓰꓽ ꓟꓽ ꓞꓲꓺ ꓬꓲ ꓪ ꓛꓲꓺ ꓬꓰ ꓟ ꓗꓪ ꓟꓬꓱꓽ ꓪ ꓬꓰ ꓠꓹ ꓟ꓾ ꓬꓴ-ꓗ-ꓣꓲ ꓗꓴꓷꓼ ꓗꓪ ꓐꓰ ꓢꓳꓻ ꓤ ꓐꓴ ꓔꓯ ꓑꓳ-ꓡꓮꓠ ꓗꓪ ꓢꓷꓸ ꓠꓲꓹ ꓪ ꓢꓳ ꓡꓰ ꓠ ꓢꓯꓼ ꓕꓵꓼ ꓖꓶ ꓔꓬ ꓡꓳ= ꓑꓳ-ꓡꓮꓠ ꓗꓴꓷꓼ ꓗꓪ ꓟ ꓔꓲꓺ ꓟ ꓓꓽ ꓟ ꓐꓴ ꓜꓴꓻ ꓗꓪ ꓐꓰ ꓬꓴ-ꓗ-ꓣꓲ ꓗꓴꓷꓼ ꓘꓴꓽ ꓗꓪ ꓪꓴ-ꓢ ꓟꓬꓱꓽ ꓬꓰ ꓔꓬ ꓟ ꓑꓳ-ꓡꓮꓠ ꓔꓲꓺ ꓟ ꓜꓴꓻ 330 ꓟ ꓙꓳˍ ꓡꓳ ꓐꓰ ꓐꓯ ꓟ ꓔꓯ Vatican ꓓꓳꓽ ꓗꓪ ꓐꓯ ꓔ ꓡꓳ=

1.  ꓲ-ꓓꓲ-ꓬ ꓞꓳ ꓫꓵꓽ ꓔꓲꓺ ꓒ ꓕꓲ ꓣꓳ ꓠꓬ ꓟꓬ-ꓟ ꓗꓴꓷꓼ ꓗꓪ ꓟ Jesuit ꓔꓲꓺ ꓒ ꓜꓴꓻ ꓗꓪ ꓟꓽ ꓓ ꓪꓴꓽˍ ꓟ ꓙꓵꓽ ꓪ ꓘꓳꓹ ꓣꓴ ꓟꓶ ꓡꓰ ꓟ

ꓟꓶ-ꓚꓲ-ꓠꓽ ꓗꓪ ꓪꓴ-ꓢ ꓟꓬꓱꓽ ꓬꓰ ꓔꓬ ꓟ Jesuit ꓔꓲꓺ ꓒ Garish Santiago ꓠꓬ ꓟꓬ-ꓟ ꓗꓴꓷꓼ ꓗꓪ ꓟ Jesuit ꓔꓲꓺ ꓒ ꓜꓴꓻ ꓗꓪ ꓟꓽ ꓓ ꓪꓴꓽˍ ꓟ ꓙꓵꓽ ꓪ ꓘꓳꓹ ꓣꓴ ꓟꓶ ꓡꓰꓳ=

ꓔꓲꓺ ꓒ Garish ꓠꓬ ꓟꓶ-ꓚꓲ-ꓠꓽ ꓗꓪ ꓮ ꓟꓬꓹ ꓘꓳꓼ ꓪꓴ-ꓢ ꓟꓬꓱꓽ ꓬꓰ ꓗꓷ ꓢꓲ ꓮ ꓟꓶ ꓠꓬ ꓔꓲꓺ ꓒ ꓜꓴꓻ ꓔꓯ ꓙꓵꓽ ꓠꓹ ꓟ ꓬꓮ-ꓖꓳ ꓗꓪ ꓚꓵꓸ ꓙꓰ ꓠꓹ ꓟ ꓥ ꓡꓳ=

ꓬꓲ ꓟꓶꓽ-ꓚꓲ-ꓠꓽ ꓗꓪ ꓔꓬ ꓕꓯ ꓰ-ꓓꓰ ꓗꓪ ꓟ ꓙꓲꓻ ꓫꓬ ꓢꓴ ꓡꓴ-ꓘ ꓟꓸ ꓒ ꓟꓸ ꓟ ꓢꓳ ꓦꓲꓻ (St Luke college) ꓗꓪ ꓔꓬ ꓢꓲ ꓢꓳꓻ ꓦꓲ ꓗꓪ ꓟꓸ ꓖꓶ ꓗꓷꓳ= ꓝꓮꓲ ꓲꓓꓑ ꓟꓯꓹ ꓘꓰꓹ ꓑꓬ ꓢꓴ ꓐꓴ ꓠꓽ ꓔꓶꓸ ꓗꓪ ꓟ ꓫ ꓔꓬ ꓟ ꓤ ꓠꓱ ꓤ ꓐꓴ ꓐꓱ ꓶ ꓢꓷꓸ ꓠꓲꓹ ꓢꓳ ꓪ ꓡꓰ ꓠ ꓬꓰ ꓙˍ ꓟ ꓟꓬꓱꓽ ꓬꓰ ꓗꓷ ꓟ ꓥ=

ꓲ-ꓓꓲ-ꓬ ꓗꓴꓷꓼ ꓗꓪ ꓟ ꓔꓲꓺ ꓒ ꓕꓲ ꓣꓳ ꓐꓯˍ ꓥ ꓟꓲ ꓛꓳꓽ ꓥꓳꓽ (Jinghpaw) ꓔꓯ ꓢꓳ ꓣꓴ ꓗꓷ ꓢꓲ ꓠꓬꓲ ꓛꓳꓽ ꓥꓳꓽ (Jinghpaw) ꓗꓪ ꓐꓰ ꓟꓲ-ꓢ ꓛꓴꓺ ꓔꓲ ꓖꓶ ꓢꓲ ꓪꓴ-ꓢ ꓟꓬꓱꓽ ꓬꓰ ꓗꓷ ꓟ ꓥ ꓡꓳ=

1.  ꓬꓴ-ꓗ-ꓣꓲꓸ ꓗꓪ ꓟꓯꓼ ꓓꓶꓽ ꓔꓬ ꓟ ꓔꓯ ꓞꓽ ꓞꓽ ꓠꓽ ꓗꓷ ꓠꓹ ꓟ ꓣ-ꓫ ꓔꓯ ICJ ꓡꓰ ꓕꓵꓼ ꓪ ꓖꓶˍ ꓟ

ꓠꓬꓲꓽ ꓦ 24 ꓠꓬꓲ ꓕꓯ ꓬꓴ-ꓗ-ꓣꓲꓸ ꓗꓪ ꓪꓴꓸ ꓔꓴ ꓗꓷ ꓟ ꓟꓯꓼ ꓓꓶꓽ ꓡꓯ ꓘꓳꓹ ꓟ ꓔꓯ ꓞꓼ ꓐꓰ ꓠꓽ ꓗꓷ ꓠꓹ ꓟ ꓐꓱ ꓶ ꓟꓵꓽ ꓗꓳꓹ ꓓꓵꓺ ꓓꓵꓺ ꓐꓯ ꓟꓴ ꓫꓬꓹ ꓖꓴ ꓣꓳꓸ ICJ ꓡꓰ ꓣ-ꓫ ꓔꓯ 3 ꓦ 16 ꓠꓬꓲ ꓕꓯ ꓕꓵꓼ ꓪ ꓖꓶ ꓗꓷꓳ=

ꓬꓴ-ꓗ-ꓣꓲ ꓗꓴꓷꓼ ꓘꓴꓽ ꓗꓪ ꓠꓬꓲꓽ ꓦ 24 ꓠꓬꓲ ꓕꓯ ꓡꓰ ꓪꓴꓸ ꓔꓴ ꓗꓷ ꓟ ꓟꓯꓼ ꓓꓶꓽ ꓡꓯ ꓘꓳꓹ ꓟ ꓔꓯ ꓣ-ꓫ ꓐꓴ ꓡꓰ ꓠꓽ ꓗꓷ ꓠ ꓗˍ ꓡꓳ꓾ ꓐꓰ ICJ ꓐꓯ ꓟꓴ ꓫꓬꓹ ꓢꓴ ꓐꓴ ꓡꓰ ꓐꓯ ꓗꓷꓳ꓾ ꓐꓰ MyanmarPlatform ꓓꓳꓽ ꓗꓪ ꓐꓯ ꓔ ꓡꓳ=

1.  ꓐ-ꓟꓮꓪ ꓢ-ꓢꓶ-ꓠꓽ ꓟꓳ-ꓟꓳꓴꓔ ꓗꓪ ꓘꓴ ꓜꓲ ꓞꓳ ꓟꓸ ꓒ Stephen Nhkum Zau Tang ꓪꓴ-ꓢ ꓟꓬꓱꓽ ꓬꓰˍ ꓟ 25 ꓘꓳꓼ ꓐꓲˍ ꓟ ꓙꓴ-ꓐꓲ-ꓡꓲ ꓑꓮꓲꓽ ꓬꓰˍ ꓟ

ꓗ-ꓛꓲ ꓗꓴꓷꓼ ꓫꓴ ꓐ-ꓟꓮꓪ ꓢ-ꓢꓶ-ꓠꓽ ꓟꓳ-ꓟꓳꓴꓔ ꓡꓳ ꓒꓱ ꓗꓪ ꓪꓴ-ꓢ ꓟꓬꓱꓽ ꓬꓰ ꓔꓬ ꓟ ꓟꓸ ꓒ Stephen Nhkum Zau Tang ꓬꓲ ꓪꓴ-ꓢ ꓟꓬꓱꓽ ꓬꓰˍ ꓟ 25 ꓘꓳꓼ ꓐꓲ ꓡꓰ ꓟ ꓒꓴꓻ ꓙꓴ-ꓐꓲ-ꓡꓲ ꓑꓮꓲꓽ ꓔꓯ ꓮ ꓟꓰ 3 ꓦ 17 ꓠꓬꓲ꓾ ꓠꓯꓼ 8ꓽ00 ꓕꓯ ꓟꓳ-ꓟꓳꓴꓔ ꓗꓪ ꓡꓳ ꓒꓱ꓾ ꓘ-ꓠ ꓘꓹ ꓙꓲꓻ ꓫꓬ ꓢꓴ Patrick ꓪꓽ ꓘꓴ ꓦꓲꓻ ꓗꓪ ꓬꓰ ꓗꓷꓳ꓾ ꓐꓰ ꓢꓷꓸ ꓪˍ ꓡꓳ=

ꓒꓴꓻ ꓙꓴ-ꓐꓲ-ꓡꓲ ꓟꓲ-ꓢ ꓪꓽ ꓘꓴˍ ꓟ ꓔꓯ ꓐ-ꓟꓮꓪ ꓢꓽ-ꓢꓶ-ꓠꓽ ꓔꓲꓺ ꓒ ꓓꓽ ꓬꓲ ꓛꓲꓺ ꓟꓳ-ꓟꓳꓴꓔ ꓔꓲꓺ ꓒ Stephen Zaw Min Lat ꓧꓳꓽ ꓪꓴꓸ ꓟꓴ ꓢꓲ ꓬꓰ ꓗꓷ ꓟ ꓥ ꓡꓳ=

ꓮ ꓟꓰ 3 ꓦ 17 ꓠꓬꓲ ꓠꓬ ꓟꓳ-ꓟꓳꓴꓠꓔ ꓪꓽ ꓘꓴ ꓦꓲꓻ ꓟꓬꓱꓻ ꓥ ꓟ ꓙꓲꓻ ꓫꓬ ꓢꓴ Patrick ꓑꓮꓲꓽ ꓦꓬꓼ ꓠꓬꓲˍ ꓟꓲ ꓥ ꓡꓳ꓾ ꓐꓰ ꓢꓷꓸ ꓪˍ ꓡꓳ=