ꓔꓲꓸꓸ ꓒ ꓓ ꓟ ꓚꓮꓣꓓꓲꓠꓮꓡ ꓚꓧꓮꓣꓡꓰꓢ ꓐꓳ ꓬꓲꓼ ꓠꓬꓲꓸ ꓘꓶꓽ

Cardinal Charles Maung Bo

ꓟꓶ-ꓚꓲ-ꓠ 3 ꓦ ꓟ 4 ꓠꓬꓲ 2021ꓘꓳꓼ ꓔꓲꓸꓸ ꓒ ꓓ ꓟ ꓚꓧꓮꓣꓡꓰꓢ ꓐꓳ ꓡꓰ꓾ ꓟꓯꓼ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓐꓰ ꓞꓳ ꓪꓴꓽ ꓣꓱꓽ ꓢꓴ ꓐꓴ ꓐꓰ ꓑ ꓫꓬꓼ ꓡꓽ ꓞꓳ ꓐꓴ ꓔꓯ꓾ 3 ꓠꓬꓲ 2 ꓦ 2021 ꓗꓪ ꓬꓲꓼ ꓠꓬꓲꓸ ꓘꓶꓽ ꓕꓲꓽ ꓚꓱ ꓐꓯ ꓒꓬꓱꓸꓸ ꓗꓓꓳ=

            ꓬꓲꓸ ꓡꓰ ꓮ ꓟꓶ ꓟꓬ-ꓟ ꓗꓴꓷꓼ ꓗꓪ ꓟꓯꓼ ꓢꓲꓽ ꓒ ꓐꓴ ꓠꓬ ꓙꓵꓽ ꓪ꓾ ꓟꓽ ꓓ ꓟꓽ ꓞꓽ ꓦꓴꓻ ꓔꓯꓹ ꓙꓰ ꓟ ꓑꓶꓸ ꓓꓴ ꓮ ꓘꓶꓸ ꓠꓲꓹ ꓟ ꓫˍ ꓡꓳ꓾ ꓐꓰ ꓐꓯˍ ꓡꓳ=

            ꓟꓬ-ꓟ ꓑ ꓫꓬ ꓡ ꓞꓳ ꓐꓴ ꓔꓯ ꓬꓲꓸ ꓡꓰ꓾ ꓢꓲ ꓡꓰ ꓡꓰˍ ꓐꓰ ꓬꓰ ꓠꓹ ꓟ꓾ ꓗꓳꓸ ꓡˍ ꓟ ꓦꓬꓼ ꓠꓬꓲ ꓗꓪˍ ꓟꓲ꓾ ꓣꓳꓽ ꓟꓵꓽ ꓣꓳꓽ ꓡꓳ ꓗꓪ ꓫꓵꓽ ꓮ ꓟꓬˍ ꓛꓲ ꓞꓰ ꓙꓰꓳ꓾ ꓐꓰ ꓐꓯˍ ꓡꓳ= ꓖꓳ ꓡꓱ ꓠꓬꓲ ꓢꓲ ꓡꓰ ꓟ ꓙ ꓖꓴ ꓢꓲꓸꓸ ꓢꓲ꓾ ꓬꓰ ꓠꓹ ꓟ꓾ ꓟꓽ ꓓꓶꓽ ꓟꓽ ꓔꓲꓸ ꓡꓯꓽ ꓘꓳ ꓘꓳ ꓐꓰ ꓢꓷꓸ ꓠꓲꓹ ꓙꓳ ꓙꓳ ꓡꓰ ꓬꓰ ꓠꓹ ꓟ꓾ ꓬꓲꓸ ꓡꓰ ꓐꓯ ꓗꓷꓳ=

            ꓟꓯꓼ ꓙꓵꓽ ꓒ ꓔꓯ ꓠꓬ꓾ ꓕꓱ ꓡꓱ ꓕꓽ ꓬꓰ ꓠꓹ ꓟ꓾ ꓕꓱ ꓡꓱ ꓬꓰˍ ꓟ ꓠꓬ ꓟꓵꓽ ꓗꓳ ꓓꓵ ꓓꓵ ꓔꓯ ꓓꓵꓽ ꓙ ꓮ’ ꓡꓰ ꓝꓲ ꓢꓲ꓾ ꓑ ꓫꓬ ꓡ ꓞꓳ ꓐꓴ ꓔꓯ ꓫꓸ ꓙꓵ ꓓꓴ ꓒꓬꓱꓼ ꓬꓰ ꓝꓲˍ ꓡꓳ ꓾ ꓬꓲꓸ ꓪ ꓡꓰ ꓜꓲꓽ ꓜꓲꓽ ꓑꓰꓹ ꓑꓰꓹ ꓞꓳꓹ ꓔˍ ꓟ ꓞꓳꓽ ꓪꓴꓽ ꓐꓴ ꓔꓯ ꓝꓮꓲꓸ ꓩꓴ ꓗꓷ ꓖꓶꓽ꓾ ꓗꓳꓸ ꓡˍ ꓟ ꓦꓬꓼ ꓠꓬꓲ ꓔꓯ ꓓꓵꓽ ꓙ ꓠꓬꓲ ꓢꓲ꓾ ꓕꓱ ꓡꓱ ꓬꓰˍ ꓟ꓾ ꓮ ꓫꓵꓽ ꓙꓲꓻ ꓖꓴ ꓟꓽ ꓙꓳ ꓐꓰ ꓐꓯ ꓗꓷꓳ=

             ꓟꓯꓼ ꓙꓵꓽ ꓢꓴ ꓐꓴ ꓡꓰ ꓞꓳꓹ ꓔ ꓖꓶꓽˍ ꓟ ꓞꓳ ꓪꓴꓽ ꓞꓳ ꓔꓲꓸꓸ ꓐꓴ ꓥ ꓟ꓾ ꓮꓴꓠꓖ-ꓢꓴꓠ-ꓢꓴ-ꓗꓬꓲ ꓐꓯ ꓫꓵꓽ ꓜꓴꓻ ꓙꓵꓽ ꓪ ꓔꓲꓸ ꓪꓲꓠ-ꓟꓬꓲꓠꓔ ꓔꓯ꓾ ꓠꓴ ꓪ ꓐꓴ ꓠꓬ ꓑ ꓫꓬ ꓐꓴ ꓐꓱ ꓶ ꓬꓲꓸ ꓢꓯꓼ ꓥꓳ= ꓑ ꓫꓬꓼ ꓐꓴ ꓐꓱ ꓶ ꓐꓰ ꓗꓴꓷꓼ ꓐꓱ ꓶ ꓦ ꓡꓱ ꓖꓴ ꓥꓳ= ꓥꓪ ꓥˍ ꓟꓲ ꓠꓴ ꓪ ꓐꓱ ꓶ ꓪꓽ ꓘꓴ ꓙ ꓖꓶꓽ ꓔꓬˍ ꓥꓳ= ꓪꓴ-ꓢ ꓠꓬ ꓔꓱꓹ ꓜꓳˍ ꓟ ꓪꓴ-ꓢ ꓥꓳ꓾ ꓐꓰ ꓬꓲꓸ ꓡꓰ ꓢꓯꓼ ꓖꓶꓽ ꓗꓷꓳ=  ꓝꓮꓲ꓾ ꓬꓲ ꓡꓰ ꓮꓴꓠꓖ-ꓢꓴꓠ-ꓢꓴ-ꓗꓬꓲ ꓔꓯ ꓾ “ꓥꓪ ꓓꓵꓽ ꓙˍ ꓟ ꓠꓬ꓾ ꓕꓱ ꓡꓱ ꓗꓷ ꓡꓰ ꓟ ꓠꓬ꓾ ꓕꓲꓽ ꓣꓳ ꓛꓳꓽ ꓕꓲ ꓣꓳ ꓟꓽ ꓫ ꓕꓱ ꓡꓯꓽ ꓘꓳ ꓟ ꓑꓶꓸ ꓓꓴ ꓕꓱ ꓡꓱ ꓒꓬꓱꓼ ꓡˍ ꓟ ꓥ ꓡꓳ= ꓖꓳ ꓡꓱ ꓠꓬꓲ꓾ ꓮꓽ ꓟ ꓐꓰ ꓥˍ ꓟꓲ ꓔꓽ ꓔꓽ ꓧꓳꓽ ꓧꓳꓽ ꓬꓰ꓾ ꓖꓪ ꓖꓪ ꓙꓱꓻ ꓙꓱꓻ ꓡꓰ ꓬꓰ꓾ ꓐꓰ ꓥꓪ ꓠꓴ ꓔꓯ ꓐꓯ ꓖꓶꓽ ꓠꓲꓹ ꓫꓵˍ ꓡꓳ꓾” ꓐꓰ ꓐꓯ ꓖꓶꓽˍ ꓡꓳ=

            ꓟꓵꓽ ꓗꓳ ꓓꓵ ꓓꓵ ꓗꓪ ꓟ ꓗꓴꓷꓼ ꓜꓴ ꓔꓯ ꓥˍ ꓟꓲ꓾ ꓟꓬ-ꓟ ꓗꓴꓷꓼ ꓔꓯ ꓬꓰꓹ ꓙ ꓖꓶꓽ ꓠꓹ ꓟ꓾ ꓗꓳꓸ ꓗꓷ ꓟ ꓦꓬꓼ ꓠꓬꓲ ꓔꓯ ꓡꓳꓸ ꓠꓬꓲˍ ꓠꓬ ꓬꓲꓸ ꓪ ꓐꓴ ꓬꓰ ꓙˍ ꓟ ꓠꓬ ꓮ ꓘꓶꓸ ꓟꓽ ꓥ ꓢꓰꓽ=  ꓐꓲꓸꓸ ꓐꓲꓸꓸ ꓜꓲꓼ ꓜꓲꓼ ꓡꓰ ꓬꓰ ꓙ ꓖꓶꓽ ꓡꓯ ꓾ ꓟꓬ-ꓟ ꓑ ꓫꓬ ꓐꓴ ꓔꓯ ꓮ ꓘꓶꓸ ꓟꓽ ꓘꓶꓻ ꓙꓵꓸꓸ ꓙꓵꓸꓸ  ꓐꓰ ꓫꓱꓸ ꓤ ꓖꓶꓽ ꓡꓯ꓾ ꓐꓰ ꓬꓲꓸ ꓡꓰ ꓐꓯ ꓒꓬꓱꓸꓸ ꓗꓷꓳ=

Add new comment

3 + 5 =