ꓔꓲꓺ ꓒ ꓪ ꓔꓲ ꓠꓬ Mongolia ꓗꓴꓷꓼ ꓗꓪ ꓛꓲ ꓡꓰ ꓟ ꓓꓳꓽ

#rvalisu #creditphoto #Pope Francis #Visiting #Mongolia

Monday, September 04, 2023

ꓔꓲꓺ ꓒ ꓪ ꓔꓲ ꓠꓬ Mongolia ꓗꓴꓷꓼ ꓗꓪ ꓛꓲ ꓡꓰ ꓟ ꓓꓳꓽ

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓠꓬ 9 ꓦ ꓟ 1 ꓠꓬꓲ 2023 ꓘꓳꓼ ꓕꓯ ꓟꓳꓠꓖꓳꓡꓲꓮ ꓗꓴꓷꓼ ꓗꓪ ꓛꓲ ꓡꓰꓳ ꓐꓰ ꓐꓯ ꓔ ꓡꓳ꓿ ꓔꓲꓺ ꓒ ꓪ ꓔꓲ ꓠꓬ ꓟꓳꓠꓖꓳꓡꓲꓮ ꓐꓬꓱ ꓦꓲꓻ ꓠꓽ ꓔꓶ. Chinggis Khaan ꓐꓬꓱ ꓦꓲꓻ ꓠꓽ ꓔꓶ. ꓗꓪ 9 ꓦ ꓟ 1 ꓠꓬꓲ ꓕꓯ ꓧꓪ. ꓧꓪ.ꓼ ꓛꓲ ꓡꓰꓳ ꓐꓰ ꓐꓯ ꓔ ꓡꓳ꓿ ꓟꓳꓠꓖꓳꓡꓲꓮ ꓐꓱ ꓶ ꓔꓲꓺ ꓒ ꓪ ꓔꓲ ꓝꓲ ꓓꓴ ꓐꓴ ꓐꓰ ꓟꓳꓠꓖꓳꓡꓲꓮ ꓗꓴꓷꓼ ꓝꓲ ꓓꓴ ꓐꓴ ꓜꓲꓼ ꓡꓯ ꓘꓳ ꓗꓷ ꓐꓰ ꓐꓯ ꓔ ꓡꓳ꓿

ꓔꓲꓺꓒ ꓪ ꓔꓲ ꓔꓯ ꓟꓳꓠꓖꓳꓡꓲꓮ ꓗꓴꓷꓼ ꓗꓪ ꓛꓲ ꓡ ꓟ ꓙꓵ, ꓕꓯ ꓘꓳ, ꓣꓴ ꓟ ꓙꓵ, ꓕꓯ ꓮꓽ ꓠꓬꓲꓽ ꓠꓳꓽ ꓠꓳꓽ ꓕꓲ ꓗꓶ. ꓖꓶ ꓓꓳꓻ ꓗꓷ ꓟ ꓥ ꓡꓳ꓿ ꓕꓲ ꓜ ꓟ ꓠꓬ ꓟꓳꓠꓖꓳꓡꓲꓮ ꓗꓴꓷʼꓼ ꓗꓪ ꓐꓰ ꓒꓵꓽ ꓡꓳ. ꓬꓰ ꓟ ꓡꓲꓼ ꓒꓲꓼ ꓚꓱ, ꓥ ꓡꓳ꓿ ꓝꓮꓲ ꓔꓲꓺ ꓒ ꓪ ꓔꓲ ꓠꓬ ꓟꓳꓠꓖꓳꓡꓲꓮ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓐꓰ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓔꓬ ꓢꓴ ꓐꓴ ꓐꓰ ꓥ ꓟꓲ ꓜꓲꓼ ꓡꓯ ꓘꓳ ꓓꓴ ꓙꓳ ꓟ ꓥ ꓡꓳ꓿

ꓔꓲꓺ ꓒ ꓪ ꓔꓲ ꓔꓯ ꓗꓳ. ꓗꓷ ꓟ 6 ꓦ ꓟ ꓔꓯ ꓟꓳꓠꓖꓳꓡꓲꓮ ꓗꓴꓷꓼ ꓗꓪ ꓛꓳꓽ ꓗ ꓡ ꓠ, ꓟ ꓙꓵꓽ ꓪ ꓙꓳˍ ꓢꓴ ꓐꓴ ꓡꓰ ꓘꓴꓽ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓳꓠꓖꓳꓡꓲꓮ ꓗꓴꓷꓼ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓔꓬ ꓟ ꓔꓲꓺ ꓒ ꓪ ꓔꓲ ꓛꓳꓽ ꓗ ꓡ ꓟ ꓠꓬ ꓮ ꓘꓶ. ꓛꓲ ꓒꓵꓽ ꓡꓳ. ꓬꓰ ꓟ ꓥ ꓡꓳ꓿

ꓟꓳꓠꓖꓳꓡꓲꓮ ꓗꓴꓷꓼ ꓗꓪ ꓪꓴ‐ꓢ ꓦꓻ ꓡꓱ ꓢꓴ ꓙꓲ‐ꓢꓴ ꓢꓲꓺ ꓤ ꓮ ꓟꓬ, ꓟꓽ ꓔꓬ ꓟ ꓥ ꓟꓲ ꓙꓲˍ ꓟ ꓮꓽ ꓣꓳ ꓡꓳ. ꓒꓽ ꓡꓰ ꓐꓰ ꓬꓲ. ꓘꓴ ꓜꓲꓼ ꓞꓳ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺꓤ ꓐꓴ ꓔꓯ ꓮ ꓘꓶ. ꓛꓲ ꓠꓲ, ꓟ ꓪꓴ. ꓠꓬꓲ ꓡ ꓟ ꓥ ꓡꓳ꓿ ꓝꓮꓲ ꓔꓲꓺ ꓒ ꓪ ꓠꓬ ꓗꓴꓷꓼ ꓙꓵꓽ ꓢꓴ ꓢꓲꓺ ꓒꓽ ꓐꓴ ꓡꓰ ꓜꓲꓼ ꓡꓯ ꓘꓳ, ꓗ. ꓠꓯ ꓠꓱ. ꓐꓯꓼ ꓙꓵꓻ ꓠꓲ, ꓚꓱ, ꓗꓪ ꓧꓳꓽ ꓣꓱ ꓔꓬ ꓢꓴ ꓐꓴ ꓐꓰ ꓜꓲꓼ ꓡꓯ ꓘꓳ ꓓꓴ ꓥꓳ ꓐꓰ ꓐꓯ ꓔ ꓡꓳ꓿

ꓗꓳ. ꓗꓷ ꓟ ꓙꓵꓻ ꓕꓯ ꓟꓳꓠꓖꓳꓡꓲꓮ ꓗꓴꓷꓼ ꓗꓪ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ ꓪꓴ‐ꓢ ꓟꓬꓱꓽ ꓟꓯ ꓢꓴ ꓐꓴ ꓮ ꓘꓶ. ꓛꓲ ꓔꓬ ꓫ. ꓟ ꓗꓴꓷꓼ ꓕꓲ ꓗꓴꓷꓼ ꓥ ꓡꓳ꓿ ꓖꓳ ꓡꓱ ꓥ ꓟꓲ 1992 ꓘꓳꓼ ꓗꓪ ꓐꓰ ꓗꓴꓷꓼ ꓙꓵꓽ ꓚꓱ, ꓦꓻ ꓡꓱ ꓚꓱ, ꓗꓪ ꓙꓵꓽ ꓪ ꓙꓳˍ ꓢꓴ ꓐꓴ ꓡꓰ ꓗ ꓘꓶꓽ ꓒꓴ ꓖꓶ ꓡ ꓗ. ꓠꓯ ꓠꓬ ꓪꓴ‐ꓢ ꓟꓬꓱꓽ ꓟꓯ ꓢꓴ ꓐꓴ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓘꓶ. ꓢꓽ ꓡꓰ ꓟ ꓥ ꓡꓳ꓿

ꓟꓳꓠꓖꓳꓡꓲꓮ ꓗꓴꓷꓼ ꓗꓪ ꓗ‐ꓔꓳ‐ꓡꓲ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓘꓶ. ꓟꓽ ꓡꓳˍ ꓥ ꓟꓲ ꓔꓲꓺ ꓒ ꓪ ꓔꓲ ꓔꓯ ꓘꓳ, ꓣꓴ ꓟ ꓠꓬ ꓮ ꓘꓶ. ꓛꓲ ꓠꓲ, ꓒꓴ ꓢ ꓓꓽ ꓟ ꓥ ꓡꓳ꓿ ꓝꓮꓲ ꓔꓲꓺ ꓒ ꓪ ꓔꓲ ꓠꓬ ꓗꓴꓷꓼ ꓗꓪ ꓪꓴꓽ ꓟꓴ ꓡ ꓚꓱ, ꓗꓪ ꓮ ꓡꓰ ꓐꓰ ꓬꓰ ꓙ ꓔꓳ, ꓙ ꓠ, ꓟ ꓐꓰ ꓘꓴ ꓜꓲꓼ ꓞꓳ ꓝꓮꓲ ꓤ ꓠꓱ ꓤ ꓐꓴ ꓟꓲ ꓠꓯ ꓢꓷ. ꓠꓲ, ꓮ ꓡꓰ ꓐꓰ ꓢꓳꓻ ꓣꓴ ꓟꓶ ꓠ, ꓟ ꓮ ꓟꓬꓽ ꓫꓵꓽ ꓔꓯ ꓙꓵꓽ ꓪ ꓙꓳˍ ꓢꓴ ꓐꓰ ꓖꓪꓽ ꓙꓱ ꓠ, ꓟ ꓙꓳˍ ꓟ ꓥ ꓡꓳ꓿

ꓔꓲꓺꓒ ꓪ ꓔꓲ ꓠꓬ 8 ꓦ ꓟ 31 ꓠꓬꓲ ꓗꓪ ꓐꓰ 9 ꓦ 4 ꓠꓬꓲ ꓗꓪ ꓛꓲ ꓟꓳꓠꓖꓳꓡꓲꓮ ꓗꓴꓷꓼ ꓗꓪ ꓔꓬ ꓓꓴ ꓥꓳ꓿ ꓔꓲꓺ ꓒ ꓪ ꓔꓲ ꓕꓲ ꓟꓵꓽ ꓡꓰ ꓕꓲ ꓟꓵꓽ ꓗꓪ ꓙꓲ‐ꓢꓴ ꓢꓲꓺ ꓤ ꓐꓴ ꓔꓬ ꓗꓪ ꓛꓳꓽ ꓙꓰ ꓟ ꓠꓬ ꓕꓲ ꓧꓪ, ꓗꓪ ꓠꓬ (43) ꓧꓪ ꓟ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓚꓺ ꓟ ꓙꓽ ꓖꓴ ꓥ ꓡꓳ꓿ ꓟꓳꓠꓖꓳꓡꓲꓮ ꓗꓴꓷꓼ ꓗꓪ ꓗ‐ꓔꓳ‐ꓡꓲ ꓙꓲ‐ꓢꓴ ꓢꓲꓺꓤ ꓠꓬ (1500) ꓣꓳꓔꓬ ꓟ ꓥ ꓡꓳ ꓐꓰ (ꓣꓦꓮ) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿