ꓔꓲꓺ ꓒ ꓪ ꓔꓲ Francis ꓠꓬ ꓟꓵꓽ ꓙꓴꓽ ꓚꓵꓹˍ ꓟ ꓗꓪ ꓚꓬꓼ ꓗꓷ ꓢꓴ ꓐꓴ ꓐꓱ ꓶ ꓔꓴ-ꓣ-ꓗꓲ ꓗꓴꓷꓼ ꓗꓪ ꓠꓯꓻ ꓞꓲꓼ ꓬꓲꓸ ꓔꓴ ꓬꓲꓸ ꓟꓶꓽ ꓬꓰ ꓙˍ ꓟ ꓓꓳꓽ

Wednesday, March 29, 2023

ꓔꓲꓺ ꓒ ꓪ ꓔꓲ Francis ꓠꓬ 2 ꓦ ꓕꓯ ꓟꓵꓽ ꓙꓴꓽ ꓚꓵꓹ ꓗꓷ ꓟ ꓑꓶꓸ ꓓꓴ ꓠꓻ ꓓꓴ ꓓꓴ ꓡꓰ ꓟ ꓗꓪ ꓐꓰ ꓓꓻ ꓡꓰ ꓔꓬ ꓢꓴ ꓐꓴ ꓐꓱ ꓶ ꓔꓴ-ꓣ-ꓗꓲ ꓗꓴꓷꓼ ꓗꓪ ꓠꓯꓻ ꓞꓲꓼ 10ꓹ000 ꓖꓶꓽ ꓗꓷꓳ= ꓔꓲꓺ ꓒ ꓪ ꓔꓲ ꓬꓲꓸ ꓬꓰ ꓙ ꓟꓬꓱꓽ ꓬꓰ ꓔꓶꓸ ꓗꓪ ꓐꓰ ꓔꓴ-ꓣ-ꓗꓲ ꓑ ꓫꓬꓼ ꓐꓴ ꓐꓱ ꓶ ꓠꓯꓻ ꓞꓲꓼ ꓐꓴ ꓔꓯ Vatican ꓗꓪ ꓙꓳˍ ꓟ ꓔꓴ-ꓣ-ꓗꓲ ꓗꓴꓷꓼ ꓝꓲ ꓓꓴ ꓬꓳꓹ ꓗꓪ ꓐꓰ ꓕꓲ ꓝꓸ ꓖꓶ ꓩꓴ ꓗꓷ ꓟ ꓥ ꓡꓳ= ꓖꓳ ꓕꓲ ꓙꓵꓹ ꓗꓪ ꓲ-ꓔ-ꓡꓲ ꓔꓲ ꓒ ꓓꓽ ꓐꓴ ꓠꓬ ꓢꓲ-ꓡꓲ-ꓬ ꓐꓰ ꓔꓴ-ꓣ-ꓗꓲ ꓑ ꓫꓬꓼ ꓐꓴ ꓔꓯ ꓬꓰ ꓙ ꓠꓹ ꓟ ꓒꓴ ꓧꓪꓹˍ ꓟ ꓟꓬꓱꓽ ꓔꓯ ꓬꓰ ꓪꓴꓸ ꓔꓴ ꓗꓷꓳ=

ꓔꓴ-ꓣ-ꓗꓲ ꓗꓴꓷꓼ ꓗꓪ 2 ꓦ ꓕꓯ ꓟꓵꓽ ꓙꓵꓽ ꓚꓵꓹ ꓗꓷ ꓗ ꓠꓯꓸ ꓕꓯ ꓠꓬ Dicastery for the Service of Charity ꓜꓴꓻ ꓐꓴ ꓡꓰ ꓠꓯꓻ ꓞꓲꓼ ꓡꓰꓽ ꓟꓽ ꓞꓲꓺ ꓜꓻ ꓐꓰ ꓣꓱꓽ ꓫꓵꓽ ꓣꓱꓽ ꓙꓰꓽ ꓮ ꓟꓬꓹ ꓐꓴ ꓔꓯ ꓖꓶꓽ ꓩꓴ ꓗꓷꓳ= ꓖꓳ ꓕꓲ ꓙꓵꓹ ꓗꓪ ꓡꓰꓽ Eastern Churches ꓗꓪ ꓧꓳꓽ ꓣꓱꓽ ꓔꓬ ꓟ ꓔꓲꓺ ꓒ ꓓꓽ Claudio Gugerotti ꓠꓬ ꓢꓲ-ꓡꓲ-ꓬ ꓐꓰ ꓔꓴ-ꓣ-ꓗꓲ ꓐꓴ ꓗꓪ ꓬꓰ ꓙˍ ꓟ ꓟꓬꓱꓽ ꓔꓯ ꓬꓰ ꓪꓴꓸ ꓔꓴ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓲ-ꓔ-ꓡꓲ ꓕꓲ ꓗꓴꓷꓼ ꓡꓱꓸꓼ ꓗꓪ ꓗꓳꓸ ꓗꓷ ꓟ ꓠꓽ ꓦꓬꓼ ꓠꓬꓲ ꓕꓯ ꓔꓴ-ꓣ-ꓗꓲ ꓐꓰ ꓢꓲ-ꓡꓲ-ꓬ ꓗꓴꓷꓼ ꓗꓪ ꓟ ꓑ ꓫꓬ ꓐꓴ ꓐꓱ ꓶ ꓔꓶ ꓙꓱꓼ ꓗꓷ ꓔ ꓟ ꓔꓲꓺ ꓒꓴ ꓔꓯ ꓣꓴ ꓡꓳꓽ ꓗꓷ ꓢꓲ꓾ ꓟꓵꓽ ꓙꓴꓽ ꓚꓵꓹ ꓟ ꓫꓵꓽ ꓪꓴ ꓗꓪ ꓚꓬꓼ ꓗꓷ ꓢꓴ ꓐꓴ ꓐꓱ ꓶ ꓬꓰ ꓙ ꓠꓹ ꓟ ꓙꓽ ꓖꓶ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓔꓴ-ꓣ-ꓗꓲ ꓐꓰ ꓢꓲ-ꓡꓲ-ꓬ ꓗꓴꓷꓼ ꓗꓪ ꓠꓬ 2 ꓦ ꓕꓯ ꓢꓯꓼ ꓮ ꓘꓶꓸ ꓪꓽ ꓠꓬꓲˍ ꓟ ꓟꓵꓽ ꓙꓴꓽ ꓕꓲ ꓟ ꓚꓵꓹ ꓗꓷ ꓟ ꓑꓶꓸ ꓓꓴ ꓑ ꓫꓬꓼ ꓬꓲ ꓔꓴ꓾ ꓬꓲ ꓟꓶꓽ ꓣꓳ ꓟꓽ ꓞꓲꓺ ꓫꓵꓻ ꓗꓷ ꓟ ꓥ ꓡꓳ=

ꓓꓳꓽ ꓚꓰꓺ ꓽVatican News