ꓔꓲꓺ ꓒ ꓪ ꓔꓲ Francis ꓠꓬ ꓣ‐ꓫ ꓗꓴꓷꓼ Moscow ꓡꓳ ꓒꓱ ꓗꓪ ꓫꓵꓻ ꓡꓰ ꓟ ꓑ ꓫꓬ ꓮ ꓟꓬ, ꓙꓳ ꓟ ꓪꓴ. ꓠꓬꓲ ꓬꓲ ꓪ ꓐꓱ ꓶ ꓪꓽ ꓘꓴ ꓙ ꓔꓬ ꓟ ꓐꓰ ꓠꓲ, ꓟ ꓫ. ꓔꓬ ꓡꓳ ꓐꓰ ꓐꓯ ꓔ ꓟ (Church news)

ꓔꓲꓺ ꓒ ꓪ ꓔꓲ Francis ꓠꓬ ꓣ‐ꓫ ꓗꓴꓷꓼ Moscow ꓡꓳ ꓒꓱ ꓗꓪ ꓫꓵꓻ ꓡꓰ ꓟ ꓑ ꓫꓬ ꓮ ꓟꓬ, ꓙꓳ ꓟ ꓪꓴ. ꓠꓬꓲ ꓬꓲ ꓪ ꓐꓱ ꓶ ꓪꓽ ꓘꓴ ꓙ ꓔꓬ ꓟ ꓐꓰ ꓠꓲ, ꓟ ꓫ. ꓔꓬ ꓡꓳ ꓐꓰ ꓐꓯ ꓔ ꓟ

3 ꓦ ꓟ 24 ꓠꓬꓲ 2024 ꓘꓳꓼ ꓕꓯ ꓔꓲꓺ ꓒ ꓪ ꓔꓲ ꓠꓬ ꓣ‐ꓫ ꓗꓴꓷꓼ ꓗꓪ Moscow ꓡꓳ ꓒꓱ ꓗꓪ ꓟꓽ ꓙꓲ ꓢꓴ ꓐꓴ ꓡꓰ ꓐꓳ ꓑꓳ ꓟ ꓪꓴ. ꓠꓬꓲ ꓑ ꓫꓬ ꓮ ꓟꓬ, ꓫꓵꓻ ꓡꓰ ꓟ ꓪꓴ. ꓠꓬꓲ ꓬꓲ ꓪ ꓐꓱ ꓶ ꓪꓽ ꓘꓴ ꓙ ꓔꓬ ꓟ ꓐꓰ ꓠꓲ, ꓟ ꓫ. ꓔꓬ ꓟ ꓔꓯ ꓦꓮꓔꓲꓚꓮꓡ ꓚꓲꓔꓬ ꓗꓪ ꓑꓮꓡꓟ ꓢꓴꓠꓓꓮꓬ ꓢꓲꓺ ꓒ ꓦꓬꓼ ꓠꓬꓲ ꓕꓯ ꓫ. ꓕꓱ ꓔ ꓟ ꓥ ꓡꓳ꓿

ꓔꓲꓺ ꓒ ꓪ ꓔꓲ ꓡꓰ ꓫꓵꓻ ꓡꓰ ꓢꓴ ꓑ ꓫꓬ ꓐꓴ ꓮ ꓙꓵꓽ ꓦꓻ ꓠꓬ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓯ, ꓗꓪ ꓛꓲ ꓡꓰ ꓠ, ꓟ ꓪꓴ‐ꓢ ꓔꓯ ꓶꓻ ꓓꓰꓽ ꓪꓽ ꓘꓴ ꓙ ꓔꓬ ꓟ ꓔꓯ ꓐꓯ ꓔ ꓟ ꓥ ꓡꓳ꓿ ꓝꓮꓲ ꓟꓲ ꓠꓯ ꓡ ꓞꓳ ꓮ ꓙꓵꓽ ꓠꓲ, ꓟ ꓠꓯ, ꓗꓪ ꓢꓲ ꓡꓲ ꓟꓶ ꓠ, ꓟ ꓪꓽ ꓘꓴ ꓙ ꓖꓶ ꓗꓷꓳ꓿

ꓟꓳꓢꓚꓳꓪ ꓡꓳ ꓒꓱ ꓗꓪ ꓡ ꓞꓳ ꓫꓵꓻ ꓗꓪ ꓛꓲ ꓒꓬꓱꓼ ꓡꓰ ꓟ ꓫꓵꓽ ꓪꓴꓽ ꓠꓬ ꓡ ꓚꓴ. ꓔꓯ ꓔ ꓢꓴ ꓡ ꓞꓳ ꓡꓲ ꓣꓳ ꓠꓬ ꓠꓽ ꓥꓪ ꓠꓬꓲ ꓟꓶ ꓘꓶꓼ ꓔꓯ ꓑ ꓫꓬ ꓐꓴ ꓟꓴ ꓖꓪ ꓖꓪ ꓟ ꓔꓯ ꓡꓳ. ꓔꓬ ꓟ ꓙꓵ, ꓕꓯ ꓡ ꓚꓴ. ꓑꓶ ꓡ ꓟ ꓪꓴ. ꓠꓬꓲ ꓑ ꓫꓬ (133) ꓣꓳ ꓫꓵꓻ ꓡꓰ ꓟ ꓥ ꓡꓳ꓿ ꓝꓮꓲ ꓕꓱ ꓟꓴ ꓖꓪ ꓖꓪ ꓔꓲ. ꓗꓪ ꓐꓳ ꓑꓶ ꓡ ꓟ ꓪꓴ. ꓠꓬꓲ ꓡ ꓞꓳ ꓮ ꓟꓬ, ꓠꓻ ꓓꓴ ꓡꓰ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓿

ꓝꓮꓲ ꓔꓲꓺ ꓒ ꓪ ꓔꓲ ꓡꓰ ꓴꓗꓣꓮꓲꓠꓰ ꓐꓱ ꓶ ꓥ ꓟꓲ ꓪꓽ ꓘꓴ ꓛꓲ ꓪꓽ ꓘꓴ ꓙ ꓠ, ꓟ ꓐꓰ ꓐꓯ ꓔ ꓟ ꓥ ꓡꓳ꓿ ꓴꓗꓣꓮꓲꓠꓰ ꓑ ꓫꓬ ꓮ ꓟꓬ, ꓠꓬ ꓜ ꓓꓴ ꓟꓽ ꓙꓳ ꓮ ꓔꓳ. ꓙ ꓟꓽ ꓙꓳ ꓐꓰ ꓮ ꓘꓶ. ꓛꓲ ꓫ. ꓫ. ꓡꓰ ꓢꓯ. ꓔꓬ ꓟ ꓪꓴ. ꓠꓬꓲ ꓬꓲ ꓪ ꓐꓱ ꓶ ꓬꓰ ꓙ ꓔ ꓙ ꓢꓲ ꓠ ꓬꓲ ꓪꓽ ꓘꓴ ꓙ ꓠ, ꓟ ꓔꓲꓺ ꓒ ꓪ ꓔꓲ  ꓡꓰ ꓫ. ꓕꓱ ꓔ ꓡꓳ꓿

ꓝꓮꓲ ꓔꓲꓺ ꓒ ꓪ ꓔꓲ ꓡꓰ ꓕꓲ ꓫꓵꓽ ꓠꓽ ꓠꓬ ꓢꓲꓽ ꓫꓬ ꓟ ꓦꓬꓼ ꓠꓬꓲ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓡ ꓐꓳ ꓔꓲ ꓓꓴ ꓗꓪ ꓫꓵꓻ ꓢꓲ ꓠꓬꓲ ꓝꓮꓲ ꓢꓯ. ꓬꓲꓼ ꓡ ꓟ ꓑꓮꓲꓽ ꓦꓬꓼ ꓠꓬꓲ ꓥ ꓟ ꓪꓴ. ꓠꓬꓲ ꓮ ꓘꓶ. ꓛꓲ ꓟꓲ ꓠꓯ ꓢꓲ ꓡꓲ ꓠ, ꓟ ꓪꓽ ꓘꓴ ꓠ, ꓟ ꓫ. ꓕꓱ ꓔ ꓡꓳ ꓐꓰ (Vatican news) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿