ꓔꓲ ꓒ ꓪ ꓔꓲ Francis ꓡꓰ “ꓙꓲꓻ ꓫꓬ ꓢꓴ ꓬꓳ-ꓢꓷ ꓬꓲ ꓘꓳꓼ” ꓔꓯ ꓐꓯ ꓑꓶ ꓖꓶˍ ꓟ

(8ꓸ12ꓸ2020) ꓗꓪ ꓐꓰ (8ꓸ12ꓸ2021) ꓗꓪ ꓛꓲ ꓔꓯ “ꓙꓲꓻ ꓫꓬ ꓢꓴ ꓬꓳ-ꓢꓷ ꓬꓲ ꓘꓳꓼ” ꓐꓯ ꓢꓲ ꓔꓲ ꓒ ꓪ ꓔꓲ Francis ꓡꓰ ꓐꓯ ꓑꓶ ꓗꓷ ꓢꓲ ꓾ ꓕꓱ ꓕꓲ ꓘꓳꓼ ꓠꓬ ꓣꓱꓽ ꓛꓰꓽ ꓡꓯꓼ ꓫꓴꓻ ꓐꓴ (indulgence) ꓟꓶˍ ꓟ ꓘꓳꓼ ꓥ ꓡꓳ=

ꓔꓲ ꓒ ꓪ ꓔꓲ Francis ꓠꓬ (8ꓸ12ꓸ2020) ꓗꓪ ꓐꓰ (8ꓸ12ꓸ2021) ꓗꓪ ꓛꓲ꓾ ꓕꓲꓽ ꓘꓳꓼ ꓡꓱꓸꓼ ꓔꓯ “ꓙꓲꓻ ꓫꓬ ꓢꓴ ꓬꓳ-ꓢꓷ ꓬꓲ ꓘꓳꓼ” ꓐꓰ ꓢꓷꓸ ꓙ ꓟꓳ ꓙ ꓗꓷ ꓟ ꓔꓯ ꓾ 8ꓸ12ꓸ2020꓾ ꓟꓹ ꓟ ꓟ-ꓡꓲ ꓝꓴꓲꓸ ꓟꓽ ꓙꓳ ꓙꓳ ꓖꓳ ꓓꓱꓽ ꓠꓬꓲꓽ ꓔꓱꓹ ꓐꓲˍ ꓟ ꓑꓮꓲꓽ ꓗꓪ ꓐꓯ ꓑꓶ ꓗꓷꓳ=

ꓬꓳ-ꓢꓷ ꓔꓯ “ ꓘꓴ-ꓜꓲ-ꓞꓳ ꓔꓯ ꓡꓳꓸ ꓙ ꓢꓴ” ꓐꓯ ꓢꓲ ꓔꓲꓺ ꓒ ꓪ ꓔꓲ ꓑꓲ-ꓴ(9) ꓡꓰ 1870 ꓘꓳꓼ ꓕꓯ ꓐꓯ ꓑꓶ ꓗꓷ ꓢꓲ꓾ ꓛꓲꓺ ꓠꓬꓲꓹ ꓘꓳꓼ ꓕꓯ ꓠꓬ ꓖꓳ ꓡꓱ ꓐꓰ ꓢꓷꓸ ꓙ ꓟꓳ ꓙ ꓗꓷ ꓟ ꓠꓬ (150) ꓘꓳꓼ ꓐꓲˍ ꓟ ꓔꓯ ꓝꓲꓸ ꓟꓶ ꓓꓴ ꓐꓯ ꓢꓲ ꓖꓳ ꓡꓱ ꓐꓰ ꓢꓷꓸ ꓙ ꓟꓳ ꓙ ꓗꓷ ꓟ ꓥꓳ꓾ꓐꓰ ꓢꓷꓸ ꓪˍ ꓡꓳ=

ꓠꓻ ꓫꓵꓽ ꓓꓽ ꓟ ꓔꓳꓹ ꓜꓳꓽ ꓔꓬ ꓟ ꓦꓬꓼ ꓠꓬꓲ ꓘꓴꓽ ꓗꓪ ꓐꓰ꓾ ꓞꓳ ꓤ ꓐꓴ ꓔꓯ ꓠꓬꓲ ꓟꓳ ꓓꓴ ꓖꓶˍ ꓟ꓾ ꓠꓲꓹ ꓟ ꓫꓵꓺ ꓖꓶˍ ꓟ ꓐꓰ ꓥꓳ ꓡꓳꓸ ꓓꓴ ꓟꓶ ꓠꓹ ꓟ꓾ ꓞꓳ ꓤ ꓐꓴ ꓚꓬꓴꓸ ꓟꓶˍ ꓟ ꓚꓺ ꓟꓲꓽ ꓗꓪ ꓞꓳ ꓤ ꓐꓴ ꓟꓽ ꓢꓷꓸ ꓢꓷꓸ ꓐꓰ ꓘꓳ ꓫꓱ ꓫꓱ ꓬꓰ ꓙ ꓗꓷ ꓟ ꓙꓲꓻ ꓫꓬ ꓢꓴ ꓬꓳ-ꓢꓷ ꓔꓯ꓾ ꓔꓯꓺ ꓢꓳ ꓢꓲ ꓣꓱꓽ ꓬꓰ ꓠꓹ ꓟ ꓥ ꓡꓳ=

ꓬꓲꓸ ꓠꓬ ꓚꓬꓴꓸ ꓢꓲ ꓒ ꓟꓲ-ꓢ-ꓬ ꓔꓯ ꓠꓵ ꓠꓲꓹ ꓒ ꓐꓲꓻ ꓐꓰ ꓣꓱꓽ ꓙ ꓗꓷ ꓢꓴ ꓥ ꓡꓳ=

ꓐꓹ ꓐ ꓪꓴ-ꓢ ꓔꓯ ꓠ ꓡꓳˍ ꓟ ꓠꓲꓹ ꓟ ꓗꓪ ꓐꓰ ꓟꓹ ꓟ ꓟ-ꓡꓲ ꓐꓰ ꓞꓳ ꓫꓵꓼ ꓤ ꓬꓰ-ꓢꓴ ꓔꓯ ꓡꓳꓸ ꓙ ꓖꓶ ꓗꓷ ꓢꓲ꓾ ꓤ ꓠꓱ ꓤ ꓬꓰ-ꓢꓴ ꓔꓯ ꓪꓴ-ꓢ ꓠꓲꓹ ꓡꓶꓽ ꓙꓳˍ ꓟ ꓡꓰ ꓐꓰ ꓪꓴꓽ ꓡ ꓝꓲ ꓢꓴ꓾ꓙꓲ-ꓢꓴ ꓬꓲꓸ ꓚꓬꓴꓸ ꓙˍ ꓟ ꓟꓬꓱꓽ ꓗꓪ ꓕꓲ ꓒꓳꓹ ꓗꓪ ꓔꓬ ꓢꓲ ꓢꓲꓺ ꓡꓲꓺ ꓐꓰ ꓬꓰ ꓙ ꓖꓶ ꓗꓷ ꓟ ꓬꓳ-ꓢꓷ ꓔꓯ ꓔꓯꓺ ꓢꓳ ꓡꓯ=

ꓙꓲꓻ ꓫꓬ ꓢꓴ ꓬꓳ-ꓢꓷ ꓠꓬ ꓒꓵꓽˍ ꓟ ꓞꓳ ꓤ ꓤꓶ ꓔꓯ ꓟꓸ ꓖꓶ ꓢꓴ꓾ ꓟꓬꓱꓽ ꓬꓰˍ ꓟ ꓗꓪ ꓐꓰ ꓟꓶˍ ꓟ ꓒꓵꓽ ꓶ꓾ ꓟꓬꓱꓼ ꓬꓰˍ ꓟ ꓗꓪ ꓗꓹ ꓛꓲꓽˍ ꓟ꓾ ꓟꓬꓱꓽ ꓬꓰˍ ꓟ ꓠꓬ ꓬꓳꓸ ꓚꓵˍ ꓟ ꓔꓯ ꓟꓳꓸ ꓖꓶ ꓢꓴ ꓥ ꓡꓳ= ꓟꓹ ꓟ ꓡꓲ-ꓐꓰ ꓤ ꓠꓱ ꓤ ꓬꓰ-ꓢꓴ ꓔꓯ ꓠꓬꓲꓸ ꓙ ꓡꓳꓸ ꓙ ꓖꓶ ꓢꓴ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓣꓳ ꓐꓴ ꓥˍ ꓟꓲ ꓬꓲ ꓔꓯ ꓔꓯꓺ ꓢꓳ ꓠ ꓗꓹ ꓡꓳ=

ꓝꓴꓲꓸ ꓣꓷꓠˍ ꓟ ꓔꓲꓺ ꓒ ꓪ ꓔꓲ ꓣꓳˍ ꓓꓽ ꓟ (The Apostolic Penitentiary) ꓠꓬ ꓾ ꓕꓱ ꓡꓰ ꓐꓰ ꓣꓱꓽ ꓛꓰꓽ ꓙꓳˍ ꓟ ꓘꓳꓼ ꓘꓴꓽ ꓗꓪ ꓢꓷꓸ ꓙ ꓟꓳ ꓙ ꓔ ꓟ ꓣꓱꓽ ꓛꓰꓽ ꓡꓯꓼ ꓫꓴꓻ ꓐꓴ (indulgence) ꓔꓯ ꓘꓳꓹ ꓣꓴ ꓐ ꓡˍ ꓟ ꓔꓯˍ ꓟꓲ꓾ ꓐꓯ ꓑꓶ ꓗꓷꓳ= ꓣꓱꓽ ꓛꓰꓽ ꓖꓳ ꓟ ꓡꓰꓽ ꓟ ꓞꓲꓺ ꓾ ꓘꓴ-ꓜꓲ-ꓞꓳ ꓢꓲ ꓤ ꓐꓴˍ ꓟꓲ “ꓙꓲꓻ ꓫꓬ ꓢꓴ ꓬꓳ-ꓢꓷ ꓘꓳꓼ’” ꓘꓴꓽ ꓗꓪ ꓢꓲꓽ ꓫꓬꓹ ꓟ ꓦꓲꓻ ꓙꓵꓽ ꓢꓴ ꓥ ꓟ ꓬꓳ-ꓢꓷ ꓬꓲꓸ ꓠꓬꓲ ꓙ ꓡꓳꓸ ꓙ ꓟ ꓗꓪ ꓐꓰ ꓪꓽ ꓘꓴˍ ꓟ꓾ ꓙꓲˍ ꓟ ꓟꓬꓱꓽ ꓬꓰˍ ꓟ ꓗꓪ ꓐꓰ꓾ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓔꓳꓹ ꓜꓳꓽ ꓔꓬ ꓟ ꓫꓸ ꓙꓵ ꓓꓴ ꓮ ꓙꓵꓽ ꓗꓪ ꓐꓰ ꓠꓲꓹ ꓗꓴ ꓖꓶˍ ꓟ ꓔꓯˍ ꓟꓲ ꓟꓶ ꓪˍ ꓟ ꓥ ꓡꓳ=

Photo credit to Vatican News

https://bit.ly/3gtIPDH