ꓖꓴ ꓟꓶꓸ Korea ꓗ-ꓔꓳ-ꓡꓲ ꓔꓲꓺ ꓒ ꓓꓽ ꓐꓴ ꓡꓰ “ꓢꓯꓼ ꓟꓬ ꓔꓯ ꓗꓽ ꓔ ꓙ ꓠꓹ ꓟ” ꓔꓯ ꓝ ꓢꓲ ꓓꓰꓽˍ ꓟ

ꓖꓴ ꓟꓶꓸ Korea ꓗ-ꓔꓳ-ꓡꓲ ꓔꓲꓺ ꓒ ꓓꓽ ꓐꓴ ꓡꓰ “ꓢꓯꓼ ꓟꓬ ꓔꓯ ꓗꓽ ꓔ ꓙ ꓠꓹ ꓟ” ꓔꓯ ꓝ ꓢꓲ ꓓꓰꓽˍ ꓟ

ꓤ ꓘꓶꓻ ꓗꓪ ꓟ ꓤ ꓠꓱ ꓤ ꓐꓴ ꓔꓯ ꓒꓬꓹ ꓞꓰ ꓐ ꓡˍ ꓟ ꓕꓵꓼ ꓪ ꓔꓯ ꓗꓴꓷꓼ ꓙꓵꓽ ꓗ ꓗꓪ ꓧꓳꓽ ꓗꓷ ꓗꓸ ꓠꓯꓸ (2) ꓘꓳꓼ ꓛꓲꓺ ꓕꓯ “ꓞꓳ ꓤ ꓢꓯꓼ ꓟꓬ ꓗꓽ ꓔ ꓙˍ ꓟ ꓗꓳ-ꓟꓲ-ꓔꓲ” ꓗꓪ ꓐˍ ꓟ Korea ꓗ-ꓔꓳ-ꓡꓲ ꓔꓲꓺ ꓒ ꓓꓽ ꓐꓴ ꓗꓪ ꓐꓰ ꓓꓳ ꓕꓲ ꓟ ꓦ ꓗꓷꓳ= ꓖꓳ ꓟ ꓘꓴꓽ ꓗꓪ “ꓟꓽ ꓦꓵꓻ ꓡ ꓗꓷ ꓟ ꓤ ꓠꓱ ꓤ ꓐꓴ ꓔꓯ ꓚꓬꓴꓸ ꓙ ꓠꓹ ꓟ ꓓꓰꓽ ꓔ ꓡꓳ= ꓕꓲ ꓘꓳꓼ ꓡꓰ ꓕꓲ ꓘꓳꓼ ꓬꓲꓸ ꓫꓬꓹ ꓟꓽ ꓛꓲꓺ ꓟ ꓤ ꓠꓱ ꓤ ꓐꓴ ꓠꓬ ꓮꓸ ꓫꓵꓽ ꓗꓽ ꓔ ꓙˍ ꓟ ꓟꓽ ꓟꓶ ꓟꓶ꓾ ꓟꓽ ꓙꓳ ꓙꓳ ꓐꓰ ꓒꓬ ꓞꓰꓹ ꓟ ꓟꓶ ꓔꓬ ꓖꓴˍ ꓡꓳ” ꓐꓰˍ ꓟꓲ ꓧꓳꓽ ꓔ ꓟ ꓥ ꓡꓳ=

ꓢꓯꓼ ꓟꓬ ꓠꓬ ꓒꓵꓽˍ ꓡꓳ=

ꓤ ꓘꓶꓻ ꓗꓪ ꓟ ꓤ ꓠꓱ ꓔꓯ ꓐꓲ ꓜꓲꓼˍ ꓟ ꓔꓶ ꓙꓱꓼ ꓟꓽ ꓙꓳ ꓙꓳ ꓚꓲ ꓛꓬ ꓠꓲꓹ ꓡꓶꓽ ꓡꓰ ꓒꓬ ꓞꓰ ꓔꓬ ꓟ ꓠꓬ ꓞꓳ ꓤ ꓟꓲꓽ ꓙꓬ ꓗꓪ ꓛꓬꓻ ꓟꓬꓱꓽ꓾ꓥꓳꓽ ꓡꓰ ꓓꓴ ꓟꓬꓱꓽ ꓬꓰ ꓔꓬ ꓟ ꓥ ꓡꓳ= ꓒꓵꓽˍ ꓟ ꓞꓳ ꓤ ꓤꓶꓻ ꓔꓯ ꓡꓳꓺ ꓔ ꓟ ꓥ ꓡꓳ= ꓢꓯꓼ ꓟꓬ ꓠꓬ ꓢꓲꓽ ꓫꓬ ꓡꓳ= ꓖꓳ ꓟ ꓪꓴꓸ ꓠꓬꓲ ꓞꓳ ꓤ ꓬꓲꓸ ꓒꓵꓽ ꓔꓯ ꓖꓴ ꓢꓲ ꓒꓵꓽ ꓗꓴꓸ ꓠꓯꓹ ꓡꓳ= ꓤ ꓘꓶꓻ ꓗꓪ ꓔꓬ ꓕꓯ ꓡꓰ ꓪꓴꓸ ꓔꓴ ꓢꓲ ꓗꓽ ꓔ ꓖꓶ ꓠ ꓗꓹ ꓡꓳ꓾ ꓐꓰ ꓐꓯ ꓔ ꓡꓳ= ꓖꓳ ꓟ ꓡꓰ ꓐꓰ ꓞꓳ ꓤ ꓢꓯꓼ ꓟꓬ ꓔꓯ ꓗꓽ ꓔ ꓚꓬꓴꓸ ꓙˍ ꓟ ꓐꓰ ꓗꓴꓸ ꓙꓲ ꓙꓳ ꓢꓲ ꓘꓴ-ꓜꓲ-ꓞꓳ ꓙꓵꓽ ꓗ ꓐꓴ ꓔꓯˍ ꓟꓲ ꓖꓴ ꓟꓶꓸ Korea ꓗꓪ ꓟ ꓗ-ꓔꓳ-ꓡꓲ ꓢ-ꓢꓲ-ꓠ ꓮ ꓙꓵꓽ ꓗꓪ ꓟꓽ ꓟꓶ ꓫꓵ ꓕꓯ “ꓞꓳ ꓤ ꓢꓯꓼ ꓟꓬ ꓐꓰ ꓕꓲ ꓦꓲꓻ ꓘꓴꓽ” ꓐꓱ ꓶ ꓔꓶ ꓙꓱꓼ ꓗꓶ ꓢꓲ ꓟꓲ-ꓢ ꓪꓽ ꓘꓴ ꓖꓶ ꓓꓴ ꓥꓳ=  ꓦ ꓠꓬ “ꓞꓳ ꓦꓲꓻ ꓐꓱ ꓶ ꓪꓽ ꓘꓴ ꓖꓶˍ ꓟ ꓦ ꓐ” ꓥ ꓟ ꓪꓴꓸ ꓠꓬꓲ꓾ ꓕꓱ ꓕꓲ ꓦ ꓗꓪ “ꓞꓳ ꓤ ꓢꓯꓼ ꓟꓬ꓾ ꓞꓳ ꓤ ꓒꓵꓽ ꓶ ꓔꓯ ꓗꓽ ꓔ ꓚꓬꓴꓸ ꓙ ꓗꓴˍ ꓟ ꓡꓲꓽ ꓒꓰꓼ” ꓔꓯ ꓫꓬꓹ ꓠꓹ ꓟ ꓬꓰˍ ꓥꓳ=

ꓬꓲ ꓜꓶ ꓗꓳꓹ_ ꓡꓳ

ꓮ ꓟꓶ ꓐꓯ ꓔ ꓟ 2020 ꓘꓳꓼ 8 ꓦ ꓕꓯ ꓤ ꓠꓱ ꓒꓬ ꓞꓰꓹ ꓟ ꓕꓵꓼ ꓪ ꓔꓯ ꓗꓴꓷꓼ ꓙꓵꓽ ꓗ ꓗꓪ ꓧꓳꓽ ꓗꓷ ꓟ ꓔꓯ ꓬꓲ ꓜꓲ ꓗꓳꓹˍ ꓟ ꓔꓯ ꓟꓸ ꓖꓶ ꓠꓹ ꓟ ꓥ ꓡꓳ= (20ꓸ4ꓸ2020) ꓕꓯ Seoul ꓢ-ꓢꓲ-ꓠꓽ ꓗꓪ ꓟ Cardinal Andrew Yeom Soo-jung ꓐꓰ ꓕꓲ ꓪꓺꓼ ꓗ-ꓔꓳ-ꓡꓲ ꓗꓪ ꓟ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓠꓬ ꓖꓴ ꓟꓶꓸ Korea ꓗꓴꓷꓼ ꓙꓵꓽ ꓢꓲꓽ ꓒ Moon Jae-in ꓐꓰ ꓜꓲ ꓡꓯꓽ ꓘꓳ ꓢꓲ ꓢꓷꓸ ꓙ ꓟꓳ ꓙ ꓗꓷ ꓟ ꓤ ꓠꓱ ꓤ ꓒꓬ ꓞꓰꓹ ꓟ ꓕꓵꓼ ꓪ ꓐꓰ ꓗꓴꓸ ꓙꓲ ꓙꓳ ꓢꓲ ꓟꓽ ꓙꓲ ꓟ ꓔꓯ ꓖꓪ ꓙꓱ ꓗꓷꓳ= ꓗꓴꓷꓼ ꓙꓵꓽ ꓢꓲꓽ ꓒ ꓐꓴ ꓔꓯ ꓖꓶ ꓩꓴ ꓗꓷ ꓟ ꓕꓳꓽ ꓶ ꓗꓪˍ ꓟꓲ ꓤ ꓠꓱ ꓒꓬ ꓞꓰ ꓠꓹ ꓟ ꓡˍ ꓟ ꓤ ꓟꓶ ꓤ ꓐꓴ ꓔꓯ ꓟꓽ ꓒꓬ ꓞꓰ ꓕꓯ ꓬꓲꓸ ꓠꓲꓹ ꓟ꓾ ꓧꓪꓽ ꓖꓳ ꓓꓱ꓾ ꓓꓵꓽ ꓙ ꓚꓱꓹ ꓔꓯ ꓖꓪ ꓙꓱ ꓢꓲ꓾ ꓮꓸ ꓫꓵꓽ ꓪꓴꓸ ꓠꓬꓲ꓾ ꓮ ꓡꓰ ꓗꓹ ꓠꓬꓲ ꓒꓬ ꓞꓰ ꓠꓲꓹ ꓫꓵˍ ꓟ ꓐꓰ꓾ ꓮ ꓡꓰ ꓕꓲ ꓫꓵꓽ ꓠꓬ ꓬꓲ ꓔꓯ ꓒꓬ ꓞꓰ ꓝꓲˍ ꓡ꓾ ꓐꓯ ꓟ ꓔꓯ ꓠ ꓠꓬꓲ ꓢꓲ ꓖꓪ ꓙꓱ ꓠꓹ ꓟ ꓐꓯ ꓖꓶ ꓔ ꓡꓳ=

ꓦꓬꓼ ꓠꓬꓲ ꓬꓲꓸ ꓙꓵꓹ

ꓖꓴ ꓟꓶꓸ Korea ꓗꓴꓷꓼ ꓗꓪ ꓤ ꓠꓱ ꓒꓬ ꓞꓰꓹ ꓟ ꓐꓰ ꓗꓴꓸ ꓙꓲ ꓙꓳ ꓢꓲ ꓖꓪ ꓙꓱ ꓡꓯ ꓘꓳˍ ꓟ ꓠꓬ ꓤ ꓠꓱ ꓤ ꓐꓴ ꓔꓯ ꓒꓬꓹ ꓞꓰ ꓐ ꓡˍ ꓟ ꓕꓵꓼ ꓪ ꓫꓬꓹ ꓗꓷ ꓟ (11ꓸ4ꓸ2019) ꓕꓯ ꓡꓰ ꓪꓴꓸ ꓔꓴ ꓗꓷ ꓟ ꓥꓳ=

https://bit.ly/2QXEzUj

Add new comment

1 + 1 =