ꓖ-ꓟꓶ-ꓓꓲ (Putao) ꓗꓪ ꓙꓼ ꓧꓪ ꓞꓶꓻ ꓒꓵꓽ ꓐꓰ ꓶ ꓤ ꓶ ꓟꓲ ꓒꓵꓽ ꓮ ꓘꓶꓸ ꓓꓯ ꓡ ꓟ꓾

Thursday, April 25, 2024

ꓖ-ꓟꓶ-ꓓꓲ (Putao) ꓗꓪ ꓙꓼ ꓧꓪ ꓞꓶꓻ ꓒꓵꓽ ꓐꓰ ꓶ ꓤ ꓶ ꓟꓲ ꓒꓵꓽ ꓮ ꓘꓶꓸ ꓓꓯ ꓡ ꓟ꓾

ꓗ-ꓛꓲ ꓗꓴꓷꓼ ꓫꓴꓻ ꓑꓴꓔꓮꓳ ꓡꓳ ꓒꓱ ꓗꓪ ꓙꓼ ꓧꓪ ꓞꓶꓻ ꓕꓲ ꓐꓵꓹ 2 ꓟꓶꓽ ꓗꓪ ꓛꓲ ꓙꓳ ꓡꓰ ꓢꓲ꓾ ꓜ ꓓꓴ ꓓꓳ ꓓꓴ ꓶꓻ ꓤ ꓒꓵꓽ ꓥ ꓟꓲ ꓮ ꓘꓶꓸ ꓓꓯ ꓔꓬ ꓡꓳ ꓐꓰ ꓢꓷꓸꓪ ꓡꓳ=

ꓑꓴꓔꓮꓳ꓾ꓟꓶ-ꓚꓲ-ꓠ ꓟꓳ ꓓꓳ ꓙꓻ ꓖꓴ ꓐꓲꓸ ꓦ ꓟ ꓦ ꓐ 1 ꓟ ꓛꓲ ꓡꓳꓼ ꓡꓰ ꓟ ꓑꓶ ꓓꓴ ꓙꓼ ꓧꓪ ꓞꓶ ꓐꓰ ꓶ ꓤ ꓶ ꓟꓲ ꓖꓴ ꓡꓰ ꓡ ꓟ ꓑꓶ ꓓꓴ ꓮ ꓟꓶ ꓬꓲ ꓞꓰ ꓞꓰ ꓟ ꓶ ꓤ ꓶ ꓟꓲ ꓔꓯ ꓪꓴꓽ ꓔꓬ ꓢꓴ ꓥ ꓟꓲ ꓬꓲꓸ ꓒꓵ ꓔꓯ ꓮ ꓘꓶꓸ ꓟꓬ ꓢꓲ ꓪꓴꓽ ꓔꓬ ꓟ ꓥꓳ꓾ ꓙꓼ ꓧꓪ ꓞꓶ ꓕꓲ ꓐꓵꓹ 2 ꓟꓶꓽ ꓗꓪ ꓛꓲ ꓪꓴ ꓔꓬ ꓡꓳ ꓐꓰ ꓡꓳꓠꓰ-ꓢꓴꓔ ꓗꓪ ꓔꓬ ꓢꓴ ꓞꓳ ꓘꓹ ꓢꓴ ꓕꓲ ꓣꓳ ꓡꓰ ꓐꓯ ꓔ ꓡꓳ=

ꓑꓴꓔꓮꓳ ꓡꓳ ꓒꓱ ꓘꓴꓽ ꓗꓪ ꓧꓪ ꓞꓶ ꓙꓵ ꓓꓽ ꓠꓬ ꓐꓲꓸ ꓦ ꓟ 2 ꓫꓵꓽ ꓠꓽ ꓛꓲ ꓡꓳꓼ ꓡꓰ ꓟ ꓥ ꓢꓲ꓾ ꓮ ꓟꓶ ꓬꓲꓸ ꓐꓵꓹ ꓐꓰ ꓪꓴꓽ ꓔꓬ ꓢꓴ ꓠꓬ ꓬꓲꓸ ꓪꓴꓸ ꓙ ꓖꓴ ꓐꓲꓸ ꓔ ꓟ ꓙꓵꓹ ꓕꓯ ꓧꓪ ꓞꓶ ꓙꓵ ꓓꓽ ꓗꓪ ꓐꓰ ꓪꓴꓽ ꓦ ꓢꓴ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ= ꓖꓳ ꓟ ꓡꓰ ꓐꓰ ꓜ ꓒꓴ ꓐꓰ ꓠꓱꓸ ꓐꓯꓼ ꓜ ꓓꓴ ꓓꓳ ꓓꓴ ꓶ ꓤ ꓤ ꓟꓲ ꓥ ꓟꓲ ꓬꓲꓸ ꓒꓵ 10 ꓩꓴꓸ ꓛꓲ ꓓꓯ ꓡꓰꓳ ꓐꓰ ꓞꓳ ꓘꓹ ꓢꓴ ꓗꓪ ꓐꓰ ꓢꓷꓸ ꓪ ꓡꓳ= ꓶ ꓤ ꓶ ꓟꓲ ꓠꓬ ꓙꓱꓻ ꓦꓲꓻ ꓐꓰ ꓔꓯꓹ ꓡ ꓟ ꓑꓶ ꓓꓴ ꓟꓽ ꓙꓳ ꓫꓵ ꓠꓬ ꓟꓽ ꓙꓳ꓾ ꓖꓳ ꓡꓱ ꓥ ꓟꓲ ꓬꓲꓸ ꓒꓵ ꓮ ꓘꓶꓸ ꓠꓯꓸ ꓢꓲ ꓪꓴꓻ ꓜ ꓠ ꓗꓹ ꓡꓳ ꓐꓰ ꓢꓷꓸ ꓪ ꓡꓳ=

ꓝꓮꓲ ꓦ ꓟꓲ ꓬꓰ ꓜ ꓢꓴ ꓥ ꓟꓲ 5 ꓦ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓦ ꓟꓲ ꓟꓽ ꓙꓵꓹ ꓥ ꓥ ꓟꓲ ꓮ ꓟꓶ ꓡꓰ ꓐꓰ ꓧꓪ ꓞꓶ ꓒꓵ ꓮ ꓘꓶꓸ ꓠꓯꓸ ꓠꓬ ꓣꓱꓽ ꓬꓯꓼ ꓟ ꓡꓰ ꓐꓰ ꓪꓴ ꓟꓽ ꓓ ꓐꓰ ꓞꓳ ꓘꓹ ꓢꓴ ꓗꓪ ꓐꓰ ꓢꓷꓸ ꓪ ꓡꓳ=