ꓘꓳ-ꓡ-ꓒꓶꓸ ꓡꓳ ꓒꓱ ꓗꓪ ꓟ ꓞꓳ ꓘꓹ ꓐꓴ ꓗꓪ ꓜꓻ ꓒꓴ ꓕꓲ ꓟꓳ-ꓠꓳ ꓟ ꓔꓯ ꓒꓴ ꓕꓲ ꓫꓬꓹ ꓒꓯꓼ ꓟꓽ ꓞꓲꓺ ꓬꓲ ꓒꓵꓽ ꓓꓯꓻ ꓡꓰ ꓟ ꓓꓳꓽ

ꓘꓳ-ꓡ-ꓒꓶꓸ ꓡꓳ ꓒꓱ ꓗꓪ ꓟ ꓞꓳ ꓘꓹ ꓐꓴ ꓗꓪ ꓜꓻ ꓒꓴ ꓕꓲ ꓟꓳ-ꓠꓳ ꓟ ꓔꓯ ꓒꓴ ꓕꓲ ꓫꓬꓹ ꓒꓯꓼ ꓟꓽ ꓞꓲꓺ ꓬꓲ ꓒꓵꓽ ꓓꓯꓻ ꓡꓰ ꓟ ꓓꓳꓽ

ꓑꓴ-ꓔ-ꓳ ꓘ-ꓬꓮꓲꓠꓖ ꓘꓳ-ꓡ-ꓒꓶꓸ ꓡꓳ ꓒꓱ ꓗꓪ ꓙꓳˍ ꓟ ꓡꓸ-ꓔ-ꓖꓳꓽ ꓞꓳ ꓘꓹ꓾ ꓜ-ꓠꓲ-ꓕꓲ ꓾ ꓜꓲꓹ-ꓕꓯꓠ꓾ ꓜ-ꓬꓳ ꓞꓳ ꓘꓹ ꓐꓴ ꓗꓪ ꓜ ꓒꓴ ꓕꓲ ꓟꓳ ꓠꓳ ꓔꓯ ꓒꓴ 1 ꓫꓬꓹ ꓒꓯꓼ ꓟꓽ ꓞꓲꓺ ꓖꓶꓽ ꓢꓲ ꓪꓴꓻ ꓜ ꓔꓬ ꓪˍ ꓡꓳ꓾ ꓐꓰ ꓖꓳ ꓗꓪ ꓟ ꓑ ꓫꓬ ꓕꓲ ꓣꓳ ꓡꓰ ꓐꓯ ꓡꓳ= ꓝꓮꓲ ꓑꓴ-ꓔ-ꓳ ꓗꓪ ꓟ ꓑ ꓫꓬ ꓕꓲ ꓐꓱ ꓥˍ ꓟꓲ ꓬꓲ ꓪ ꓝꓮꓚꓰꓐꓳꓳꓗ ꓗꓪ ꓚꓰꓹ ꓦ ꓔ ꓟ ꓙꓳˍ ꓡꓳ=

ꓙꓻ ꓖꓴ ꓫꓸ ꓟ ꓪꓴꓸ ꓠꓬꓲ ꓜꓻ ꓒꓴ ꓒꓵꓽ ꓮ ꓟꓬꓹ ꓟꓴꓺ ꓓꓯꓻ ꓙꓰ ꓟ ꓥ ꓢꓲ꓾ ꓞꓳ ꓘꓹ ꓗꓪ ꓐꓰ ꓘꓳ-ꓡ-ꓒꓶꓸ ꓗꓪ ꓙꓰ ꓢꓲ ꓜ ꓪꓴꓻ ꓙꓰˍ ꓠꓬ 3 ꓠꓬꓲ 4 ꓠꓬꓲ ꓛꓲꓺ ꓙꓰ ꓠ ꓗꓹ ꓡꓳ꓾ ꓐꓰ ꓢꓷꓸ ꓪ ꓡꓳ= ꓘꓳ-ꓡ-ꓒꓶꓸ ꓒ ꓕꓲꓺ ꓗꓪ ꓟ ꓕ-ꓡꓸ-ꓡꓳ ꓘꓹ ꓗꓪ ꓜꓻ ꓪꓴꓻ ꓪˍ ꓟ ꓥ ꓡꓳ= ꓞꓳ ꓘꓹ ꓗꓪ ꓐꓰ 3 ꓠꓬꓲ 4 ꓠꓬꓲ ꓛꓲꓺ ꓙꓰ ꓙ ꓖꓴ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓖꓳ ꓟ ꓠꓬ ꓪꓽ ꓖꓪ ꓪꓽ ꓙꓵꓽ ꓐꓰ ꓠꓶꓽˍ ꓟ ꓥ ꓢꓲ ꓟꓬꓽ ꓠꓬꓲ ꓠꓬ ꓘꓶꓽ ꓫ꓾ ꓞꓱꓼ ꓐꓰ ꓛ ꓗꓳꓼ ꓔꓶˍ ꓟ ꓟꓵꓽ ꓥ ꓢꓲ ꓠꓬꓲ꓾ ꓧꓶꓸ ꓕꓯ ꓧꓶꓽ ꓟꓵꓽ ꓫꓸ ꓗ ꓗ ꓗꓶꓽ ꓟꓽ ꓚꓵꓸ ꓗꓷ ꓕꓯ ꓠꓬ ꓧꓶꓽ ꓗꓴꓷꓼ ꓗꓪ ꓐꓰ ꓜꓻ ꓒꓴ ꓪꓴꓻ ꓜꓽ ꓔꓬꓹ ꓥˍ ꓟꓲ꓾ ꓚꓳꓦꓲꓓ ꓠꓻ ꓫꓵꓽ ꓒꓬꓱꓼ ꓡ ꓗ ꓠꓯꓸ ꓧꓶꓽ ꓟꓵꓽ ꓙꓻ ꓖꓴ ꓚꓵꓸ ꓗꓷ ꓠꓬꓲ ꓮ ꓟꓶ ꓟ ꓡꓰ ꓜꓻ ꓒꓵꓽ ꓓꓯꓻ ꓙꓰ ꓟ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓜꓻ ꓒꓵꓽ ꓡꓰꓽ ꓟꓽ ꓞꓲꓺ ꓧꓪꓽ ꓞꓶꓻ ꓞꓼ ꓐꓳ ꓥˍ ꓟꓲ ꓬꓲ ꓒꓵꓽ ꓠꓬꓲꓽ ꓝꓸ ꓖꓶ ꓔꓬ ꓪ ꓟ ꓥ ꓡꓳ= ꓧꓪꓽ ꓞꓶꓻ ꓕꓲ ꓕꓱꓹ ꓟ ꓔꓯ 2 ꓟꓶꓽ ꓒꓯꓼ ꓛꓲꓺ ꓗꓷ ꓡꓰ ꓟ ꓥꓳ= ꓕꓱ ꓡꓰ ꓬꓲ ꓒꓵꓽ ꓮ ꓟꓬꓹ ꓓꓯꓻ ꓡꓰ ꓟ ꓠꓬ ꓙꓻ ꓖꓴ ꓟꓽ ꓙꓲꓻ ꓟ ꓪꓴꓸ ꓠꓬꓲ ꓥ ꓢꓲ ꓙꓻ ꓖꓴ ꓙꓲꓻ ꓡꓰ ꓠ ꓫꓬꓹ ꓖꓶ ꓠꓹ ꓟ ꓠꓬ ꓑ ꓫꓬ ꓐꓴ ꓟꓬꓽ ꓠꓬꓲ ꓒꓬꓱꓼ ꓡ ꓠꓲꓹ ꓫꓵˍ ꓟ ꓠꓲꓹ ꓡꓶꓽ ꓥ ꓡꓳ꓾ ꓐꓰ ꓖꓳ ꓗꓪ ꓟ ꓑ ꓫꓬ ꓕꓲ ꓣꓳ ꓡꓰ ꓐꓯ ꓡꓳ=