ꓙꓲ-ꓢꓴ ꓢꓲ ꓤꓼ ꓓꓳꓽ

ꓲꓢꓡꓮꓟ ꓙꓵ ꓠꓲꓹ ꓔꓯ ꓙꓵ ꓔꓬ ꓢꓴ ꓟꓴꓢꓡꓲꓟ ꓐꓴ ꓧꓹ ꓙꓵ ꓠꓹ ꓟ ꓙꓽ ꓖꓶ ꓔ ꓟ ꓔꓯ ꓝꓣꓮꓠꓚꓰ (ꓳꓣ) ꓑꓬꓲꓠꓔꓧꓲꓔ (ꓳꓣ) ꓩꓽ-ꓖꓳꓹ ꓗꓴꓷ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓡꓰ ꓙꓵꓽ ꓗ ꓔꓶ ꓢꓲ ꓗꓽ ꓕˍ ꓟ

 

ꓩꓽ-ꓖꓳꓹ ꓘꓴꓷ ꓗꓪ ꓙꓵ ꓠꓲꓹ ꓠꓯꓸꓼ ꓗꓪ ꓙꓵꓽ ꓤꓽ ꓙꓵꓽ ꓔ ꓢꓴ ꓟꓴꓢꓡꓲꓟ ꓐꓴ ꓠꓬ ꓞꓳ ꓤꓽ ꓢꓰꓼ ꓠꓲ꓾ ꓗꓴꓷ ꓗꓪ ꓐꓰ ꓧꓹ ꓙꓵ ꓠꓹ ꓟ ꓙꓵꓽ ꓪꓽ ꓓꓰꓹ ꓟ ꓙꓳˍ ꓡꓳ= ꓟꓬ ꓠꓬꓲ ꓐꓶꓹ ꓠꓬꓲ ꓟꓴꓢꓡꓲꓟ ꓗꓪ ꓟ ꓫꓸ ꓢꓴ ꓐꓴ ꓔꓯ ꓢꓰꓼ ꓟ ꓬꓰˍ ꓡꓳ= ꓮ ꓟꓬ ꓟꓶ ꓟꓽ ꓡꓳꓼ ꓢꓰꓼ ꓕꓯ ꓟꓴꓧꓮꓟꓮꓓ ꓐꓬꓱꓽ ꓔꓯ ꓢꓷꓸ ꓠꓲꓹ ꓢꓳ ꓦꓲ ꓗꓪ ꓢꓳ ꓢꓴ ꓣꓱꓽ ꓠˍ ꓟ ꓐꓬꓱꓽ ꓪꓴꓸ ꓠꓬꓲ꓾ ꓞꓳ ꓤꓽ ꓕꓲ ꓣꓳ ꓔꓯ ꓢꓰꓼ ꓗꓷˍ ꓟ ꓙꓳˍ ꓡꓳ= ꓕꓱ ꓡꓱ ꓢꓰꓼ ꓗꓷˍ ꓟ ꓮꓽ ꓟꓬ ꓧꓪꓹ ꓙꓳˍ ꓟ ꓪꓴꓸ ꓠꓬꓲ ꓘꓴ-ꓜꓲ-ꓞꓳ 100 ꓟ ꓟꓽ ꓞꓲ ꓮ ꓟꓬ ꓠꓬ ꓗꓽ ꓕꓹ ꓟ ꓬꓰ ꓖꓶꓽ ꓠꓹ ꓟ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓔꓯ ꓓꓰꓽ ꓔ ꓟ ꓙꓳˍ ꓡꓳ=

ꓟꓸ ꓒꓽ ꓓꓽ Fꓣꓮꓠ-ꓚꓳꓲꓢ Clavairoly ꓡꓰ ꓐꓯ ꓟ ꓠꓬ ꓙꓵꓽ ꓠꓲꓹ ꓔꓯ ꓒꓴ ꓒꓴ ꓡꓯꓽ ꓡꓯꓽ ꓙꓴ ꓟꓽ ꓛꓲ ꓪꓽ ꓘꓴ ꓪ ꓠꓹ ꓟ ꓡꓳꓸ ꓖꓶ ꓗꓽ ꓕꓸ ꓖꓶˍ ꓟ ꓙꓵꓽ ꓗ ꓓꓳ ꓡꓹ ꓟ ꓠꓬ ꓬꓲ ꓪꓴ ꓥˍ ꓡꓳ= ꓕꓱ ꓡꓰꓹ ꓫꓵꓽ ꓒꓬꓱꓼ ꓡ ꓓꓳꓻ ꓐꓰ ꓟꓽ ꓓꓵꓽ ꓙꓽ ꓠꓬꓲ= ꓠꓬꓲꓹ ꓠꓬꓲ ꓠꓬ ꓚꓵ ꓚꓵ ꓒꓱꓼ ꓡꓺꓳ ꓐꓰ ꓐꓯ ꓡꓳ ꓬꓰꓳ= ꓕꓱ ꓡꓰ ꓙꓵꓽ ꓗ ꓔꓶ ꓠ ꓗꓪ ꓛꓲ ꓩꓽ ꓖꓳꓹ ꓗꓴꓷ ꓗꓪ ꓬꓰ ꓠ ꓗꓷ ꓡ ꓥꓳꓺ ꓐꓰ ꓕꓲ ꓧꓪꓹ ꓥˍ ꓟꓲ ꓟꓽ ꓓꓵꓽ ꓙ ꓠꓬꓲ=

ꓟꓴꓢꓡꓲꓟ ꓪꓴꓸ ꓓꓵ ꓣꓱꓽ ꓢꓴ ꓕꓲꓽ ꓣꓳ ꓡꓰ ꓐꓯ_ ꓟ ꓠꓬ “ꓕꓱ ꓟ ꓠꓬ ꓟꓲ ꓠꓯ ꓞꓳ ꓤꓽ ꓪ ꓙꓵꓽ ꓪꓽ ꓗꓪ ꓐꓰ ꓛꓳꓽ ꓠꓬꓲ ꓠꓬ ꓟꓽ ꓕꓱꓹ ꓟ ꓥꓹ ꓥˍ ꓟꓲ ꓬꓰ ꓙꓵꓽ ꓙꓳˍ ꓟ ꓕꓲꓽ ꓫꓵꓽ ꓥꓳ=

ꓗꓴꓷ ꓔꓯ ꓡꓳꓸ ꓢꓴ ꓢꓲꓽ ꓒꓽ ꓖꓰꓣꓮꓡꓓ ꓓꓮꓣꓟꓮꓠꓲꓠ ꓡꓰ ꓐꓯ ꓔ ꓟ ꓠꓬ ꓕꓱ ꓟ ꓠꓬ “ꓣꓳꓽ ꓟꓵꓽ ꓗꓪ ꓠꓲ ꓧꓳꓹ ꓫꓵꓽ ꓧꓳꓹ ꓡꓯꓽ ꓘꓳˍ ꓟ ꓔꓯ ꓐꓬ ꓡꓰ ꓠ ꓬꓰꓹ ꓟ ꓟꓽ ꓙꓵꓹ ꓟ ꓟꓴꓢꓡꓲꓟ ꓐꓴ ꓡꓯ ꓐꓯꓹ ꓗꓪ ꓐꓰ ꓡꓲꓹ ꓙꓲ ꓠꓹ ꓟ ꓐꓱ ꓶꓽ ꓔꓶ ꓠ ꓗꓷ ꓡꓰꓹ ꓟ ꓥˍ ꓡꓳ=

ꓕꓱ ꓟ ꓙꓵꓽ ꓗ ꓠꓬ ꓢꓲꓽ ꓒꓽ ꓐꓴ ꓜꓴ ꓠꓯꓸꓼ ꓗꓪ ꓮ ꓟꓬ ꓧꓪꓹ ꓖꓪ ꓙꓱ ꓟ ꓗꓪ ꓐꓰ ꓓꓳ ꓡꓹ ꓟ ꓙꓵꓽ ꓗ ꓥ ꓡꓳ=

 

ꓟꓬꓮꓠꓟꓮꓣ ꓗꓴꓷ ꓗꓪ ꓢꓲ ꓡꓲꓹ ꓗꓶ ꓡꓰ ꓠꓹ ꓟ ꓐꓱ ꓶꓽ ꓘꓴ-ꓜꓲꓼ-ꓞꓳ ꓮ ꓟꓬ ꓪꓽ ꓘꓴ ꓜ ꓚꓵꓸ ꓚꓵꓸꓔꓹ ꓟ ꓓꓳꓽ

ꓡꓳꓹ ꓬꓰ ꓟ 2 ꓦ ꓟ 1 ꓠꓬꓲ ꓕꓯꓽ ꓗꓴꓷ ꓬꓲ ꓓꓴ ꓣꓱꓽ ꓢꓴ ꓐꓴ ꓔꓯ ꓗꓴꓷ ꓡꓳꓸ ꓢꓴ ꓟꓯꓼ ꓐꓴ ꓡꓰ ꓙꓵꓽ ꓪꓽ ꓦꓳ ꓤꓼ ꓬꓰ ꓟ ꓑꓶ ꓓꓴ ꓑ ꓫꓯꓽ ꓮ ꓟꓬ ꓠꓬ ꓗꓴꓷ ꓟꓯꓼ ꓜꓴ ꓐꓴ ꓔꓯ ꓓꓹ ꓔꓳ ꓔ ꓟ ꓬꓰ ꓔꓬ ꓟ ꓥˍ ꓡꓳ= ꓕꓲꓽ ꓟꓵ ꓡꓲꓸ ꓕꓲꓽ ꓟꓵꓽ ꓕꓲꓽ ꓡꓳ ꓒꓱ ꓡꓲꓸ ꓕꓲꓸ ꓡꓳ ꓒꓱ ꓒꓳꓹ ꓔꓴꓹ ꓟ ꓬꓰ ꓔꓬ ꓟ ꓥˍ ꓡꓳ=

ꓖꓳ ꓡꓰ ꓬꓰꓹ ꓟ ꓠꓯꓸꓼ ꓗꓪ ꓙꓲ-ꓢꓴ ꓢꓲ ꓤꓼ ꓐꓴ ꓕꓲꓽ ꓟ ꓡꓰ ꓕꓲꓽ ꓟ ꓠꓬ ꓗꓴꓷ ꓢꓲ ꓡꓲꓺ ꓗꓷ ꓡꓰ ꓠꓹ ꓟ ꓐꓱ ꓶꓽ ꓪꓽ ꓘꓴˍ ꓟ ꓜ ꓚꓵꓸ ꓚꓵꓸ ꓢꓲ ꓢꓯꓼ ꓕꓵꓼ ꓔꓬ ꓟ ꓥ ꓪ= ꓘ-ꓕꓳ-ꓡꓲꓗ ꓘꓴ-ꓜꓲꓼ ꓞꓳ ꓠꓬ ꓡꓳ ꓬꓲ ꓟ 2 ꓦ 7 ꓠꓬꓲ ꓕꓯꓽ ꓕꓲꓽ ꓗꓴꓷ ꓡꓱꓸꓼ ꓜ ꓚꓵꓸ ꓚꓵꓸ ꓪꓽ ꓘꓴ ꓡꓳꓹꓬꓰ ꓟ ꓥ_ ꓡꓳ= ꓖꓳ ꓟ ꓡꓰ ꓮꓽ ꓞꓲ ꓒꓳꓹ ꓔꓴ ꓢꓲ ꓘꓴꓹ ꓟ ꓗꓪ ꓥˍ ꓟꓲ ꓕꓲꓽ ꓟꓵꓽ ꓡꓲꓸ ꓕꓲꓽ ꓟꓵꓽ ꓗꓪ ꓐ ꓔꓬ ꓟ ꓥˍ ꓡꓳ=

ꓘꓴ-ꓜꓲꓼ-ꓞꓳ ꓕꓲ ꓟ ꓡꓲꓸ ꓕꓲ ꓟ ꓠꓬ ꓚꓵꓸ ꓚꓬ ꓜ ꓚꓵꓸ ꓚꓵꓸ ꓪꓽ ꓘꓴ ꓙꓵꓹ ꓐꓰ ꓚꓵꓸ ꓚꓬ ꓘꓴ_ꓜꓲꓼˍ ꓞꓳ ꓐꓯ ꓑꓶ ꓘꓶꓽ ꓔꓯ ꓓꓳꓽ ꓮ ꓟꓬ ꓗꓪ ꓡꓳꓸ ꓟꓳ ꓪ ꓓꓹ ꓡꓳ=   

Add new comment

11 + 9 =