ꓟꓬ‐ꓟ ꓗꓴꓷꓼ ꓘꓴꓽ ꓗꓪ ꓟ ꓓꓳꓽ

ꓟꓲ-ꓚꓲ-ꓠ Pre Major Seminary ꓢꓳꓺ ꓦꓲꓻ ꓗꓪ ꓢꓳꓺ ꓣꓴ ꓔꓬ ꓢꓴ 11 ꓣꓳ ꓡꓱꓸꓼ ꓮ ꓙꓵꓽ ꓧꓪꓸ ꓡꓰ ꓟ ꓓꓳꓽ

ꓟꓲ-ꓚꓲ-ꓠ ꓡꓳ ꓒꓱ ꓢꓲ-ꓔ-ꓑꓴ ꓘꓹ ꓗꓪ ꓒꓴ ꓔ ꓟ ꓙꓲꓻ ꓫꓬ ꓢꓴ Patrick ꓔꓲꓺ ꓒ ꓢꓳꓺ ꓙꓳꓽ ꓗꓪ ꓐꓰ ꓔꓲꓺ ꓒ ꓒꓬꓱꓼ ꓠꓹ ꓟ ꓙꓳꓽ ꓦꓲ ꓗꓪ ꓓꓵꓽ ꓠꓹ ꓟ ꓐꓱ ꓶ English Entrance Exam ꓔꓯ 2022 ꓘꓳꓼ ꓐꓱ ꓶ 11 ꓣꓳ ꓢꓳꓺ ꓔꓬ ꓟ ꓗꓪ ꓮ ꓙꓵꓽ ꓧꓪꓸ ꓡꓰꓳ꓾ ꓐꓰ ꓢꓷꓸ ꓪˍ ꓡꓳ= ꓡ ꓠꓹ ꓟ 5 ꓦ ꓗꓪ ꓑꓬꓲꓠ‐ꓳ‐ꓡꓪꓲꓠ ꓗꓪ ꓙꓰ ꓢꓲ Philosophy ꓔꓯ ꓢꓳꓺ ꓬꓰ ꓠꓹ ꓟ ꓥ ꓡꓳ=

ꓬꓲ ꓪ ꓗꓪ ꓟ 3 ꓣꓳ ꓠꓬ ꓐ-ꓟꓮꓪ ꓢ-ꓢꓶ-ꓠ ꓗꓪ ꓐꓰ ꓥ ꓢꓲ꓾ ꓝꓮꓲ 8 ꓣꓳ ꓠꓬ ꓟꓲ-ꓚꓲ-ꓠ ꓢ-ꓢꓶ-ꓠ ꓗꓪ ꓐꓰ ꓥ ꓡꓳ= ꓢꓳꓺ ꓦꓲ ꓔꓯ ꓧꓳꓽ ꓪꓴꓸ ꓟꓴ ꓢꓴ ꓠꓬ ꓔꓲꓺ ꓒ Patrick Brang Dee ꓥ ꓡꓳ=

ꓬꓲ ꓪ ꓔꓯ ꓫꓱꓸ ꓖꓶˍ ꓟ ꓟꓶꓽ ꓘꓶꓽ ꓜꓻ ꓜꓽ ꓑꓮꓲ ꓬꓰ ꓖꓶˍ ꓟ꓾ ꓮꓽ ꓟꓰ ꓟꓶꓽ ꓘꓶꓼ ꓗꓪ ꓔꓲꓺ ꓒ ꓓꓽ Cardinal Charles Mg Bo ꓡꓰ ꓓꓽ ꓪꓴꓸ ꓠꓬ ꓪꓴ-ꓢ ꓔꓯ ꓫ ꓟꓳˍ ꓡꓳ= ꓬꓲ ꓪ ꓐꓴ ꓠꓬ ꓟꓵꓽ ꓘꓳꓼ ꓫꓵꓽ ꓪꓴ ꓐꓰ ꓠꓻ ꓫꓵꓽ ꓠꓬꓲꓽ ꓗꓴꓸ ꓚꓸꓼ ꓗꓪ ꓮ ꓘꓶꓸ ꓢꓯꓼ ꓕꓵꓼˍ ꓟ ꓪꓴꓸ ꓠꓬꓲ ꓪꓴ-ꓢ ꓡꓰ ꓶꓼ ꓥꓳ ꓙꓱꓽ ꓖꓶˍ ꓟ ꓥꓳ= ꓕꓱ ꓡꓰ ꓧꓪꓸ ꓡꓰˍ ꓟ ꓠꓬ ꓝꓮꓲ ꓕꓲ ꓝ ꓙꓰ ꓠꓹ ꓟ ꓥ ꓡꓳ= ꓮ ꓕꓯ ꓟꓲ ꓧꓪꓽ ꓒꓴ ꓥꓳꓽ ꓔꓯ ꓟꓬꓽ ꓠꓬꓲ ꓫ ꓕꓱ ꓠꓹ ꓟ ꓕꓵꓼ ꓪ ꓖꓶ ꓗꓷꓳ= Language is speaking ꓥꓳꓽ ꓫꓵꓽ ꓠꓬ ꓫ ꓕꓱ ꓓꓴ ꓥ ꓾ Faith is a living ꓙꓵꓻ ꓠꓲꓹ ꓠꓬ ꓛꓳꓽ ꓫꓱꓽ ꓓꓴ ꓥ ꓡꓳ꓾ ꓐꓰ Cardinal ꓡꓰ ꓐꓯ ꓡꓳ= ꓖꓳ ꓗ ꓠꓯ ꓬꓲ ꓡꓰ ꓖꓳ ꓗꓪ 4 ꓘꓳꓼ ꓛꓲ ꓔꓲꓺ ꓖꓶ ꓟꓬꓱꓽ ꓬꓰ ꓢꓯꓼ ꓕꓵꓼ ꓗꓷ ꓟ ꓔꓲꓺ ꓒ Patrick Brang Dee ꓔꓯ ꓫꓸ ꓟꓳˍ ꓡꓳ= ꓬꓰ ꓙ ꓔꓳꓹ ꓙ ꓢꓴ ꓔꓲꓺ ꓒ ꓐꓰ ꓟꓸ ꓒ ꓟꓸ ꓟ ꓐꓴ ꓔꓯ ꓫ ꓟꓳˍ ꓡꓳ꓾ ꓐꓯ ꓢꓲ ꓬꓲ ꓟꓶꓽ ꓢꓰꓼ ꓗꓷꓳ=

ꓕꓱ ꓡꓱ ꓟꓵꓽ ꓘꓳꓼ ꓾ ꓠꓻ ꓫꓵꓽ ꓫ ꓙꓵꓻ ꓔꓬ ꓟ ꓦꓬꓼ ꓠꓬꓲ ꓗꓪ ꓥꓪ ꓠꓴꓽ ꓐꓱ ꓶ ꓢꓳꓺ ꓦꓲꓻ ꓒꓴ ꓖꓶꓽ ꓡ꓾ ꓘꓳꓹ ꓣꓴ ꓖꓶ ꓡ ꓗꓷꓳ= ꓟꓸ ꓒ ꓟꓸ ꓟ ꓐꓴ꓾ ꓔꓲꓺ ꓒ ꓔꓲꓺ ꓟ ꓐꓴ ꓥˍ ꓟꓲ ꓢꓷꓸ ꓠꓲꓹ ꓮ ꓟꓬꓹ ꓟꓸ ꓖꓶ ꓡ ꓟ ꓪꓴꓸ ꓠꓬꓲ ꓮ ꓟꓬꓹ ꓗꓹ ꓛꓲꓽˍ ꓡꓳ꓾ ꓐꓰ ꓢꓳꓺ ꓤ ꓘꓴꓽ ꓗꓪ ꓕꓲ ꓣꓳ ꓥ ꓟ Augustine Numle La Ring ꓡꓰ ꓐꓯ ꓡꓳ=

ꓧꓶꓸ ꓕꓯ ꓕꓯ ꓠꓬ ꓑꓬꓲꓠ‐ꓳ‐ꓡꓪꓲꓠ ꓗꓪ 5 ꓦ ꓕꓯ ꓙꓰˍ ꓟ ꓥ ꓢꓲ ꓝꓮꓲ ꓕꓲ ꓘꓳꓼ 3 ꓦ ꓕꓯ ꓢꓳꓺ ꓡꓳꓹ ꓬꓰ ꓟ ꓥ ꓡꓳ= ꓮ ꓟꓶ ꓠꓬ ꓟꓵꓽ ꓘꓳꓼ ꓘꓶ ꓡꓶꓽˍ ꓟ ꓪꓴꓸ ꓠꓬꓲ ꓬꓲ ꓦꓬꓼ ꓠꓬꓲ ꓔꓯ ꓒꓳꓹ ꓡꓶꓸ ꓔ ꓟ ꓙꓳˍ ꓡꓳ꓾ ꓐꓰ ꓟꓲ ꓢꓷꓸ ꓪˍ ꓡꓳ=

(2) ꓟꓬ-ꓟ ꓗꓴꓷꓼ ꓡꓲ-ꓢꓴ ꓙꓲ-ꓢꓴ ꓘꓴ ꓜꓲꓼ ꓞꓳ ꓗꓪ ꓟ ꓟꓸ ꓒ ꓜꓴꓻ ꓐꓴ ꓡꓰ ꓤꓲꓸ-ꓡꓴ ꓬꓲꓻ ꓙꓬ ꓘꓶꓽ ꓡꓳ ꓚꓺ ꓗꓪ ꓟ ꓫ ꓢꓴ ꓐꓴ ꓔꓯ ꓶꓼ ꓓꓳ ꓫꓱꓹ ꓓꓳ ꓚꓺ ꓖꓶˍ ꓟ ꓓꓳꓽ

ꓠꓬꓲꓸ ꓠꓬꓲ 4 ꓦ 1 ꓠꓬꓲ ꓟꓳꓼ ꓡꓳ ꓙꓵꓹ ꓕꓯ ꓟꓬ-ꓟ ꓗꓴꓷꓼ ꓡꓲ-ꓢꓴ ꓙꓲ-ꓢꓴ ꓘꓴ ꓜꓲꓼ ꓞꓳ ꓗꓪ ꓟ ꓟꓸ ꓒ ꓟꓸ ꓟ ꓜꓴꓻ ꓐꓴ ꓡꓰ ꓤꓲꓸ-ꓡꓴ ꓬꓲꓻ ꓙꓬ ꓘꓶꓽ ꓡꓳꓺ ꓚ ꓗꓪ ꓔꓬ ꓟ ꓫ ꓢꓴ ꓐꓴ ꓔꓯ ꓶꓼ ꓓꓳ ꓫꓱꓹ ꓓꓳ ꓚꓺ ꓟꓸ ꓖꓶ ꓗꓷꓳ=

ꓥꓪ ꓠꓴꓽ ꓠꓬ ꓶꓼ ꓓꓳ ꓫꓱꓹ ꓓꓳ ꓔꓯ ꓮ ꓡꓰ ꓫꓵꓽ ꓞꓳ ꓫꓵꓽ ꓐꓴ ꓥˍ ꓟꓲ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓟ ꓪꓴꓸ ꓠꓬꓲ ꓟꓬꓱꓽ ꓕꓱ ꓟ ꓔꓯ ꓬꓰ ꓔꓬ ꓟ ꓥ ꓡꓳ꓾ ꓐꓰ ꓬꓲ ꓪ ꓜꓴꓻ ꓗꓪ ꓟ ꓟꓸ ꓒ ꓕꓲ ꓣꓳ ꓡꓰ ꓐꓯ ꓡꓳ= ꓖꓳ ꓗꓪ ꓔꓬ ꓢꓴ ꓐꓴ ꓥˍ ꓟꓲ ꓠꓲꓹ ꓒꓵꓽ ꓠꓲꓹ ꓗꓪ ꓐꓰ ꓗꓪ ꓐꓰ ꓬꓲ ꓪ ꓔꓯ ꓘꓳꓹ ꓣꓴ ꓖꓶˍ ꓡꓳ꓾ ꓐꓰ ꓢꓷꓸ ꓪˍ ꓡꓳ= ꓤꓲꓸ-ꓡꓴ ꓬꓲꓻ ꓙꓬ ꓘꓶꓽ ꓡꓳ ꓚꓺ ꓗꓪ ꓠꓬ ꓞꓳ ꓤ 200 ꓣꓳ ꓛꓲꓺ ꓔꓬ ꓟ ꓥ ꓢꓲ ꓞꓳ ꓦꓲꓻ ꓠꓬ 50 ꓦꓲꓻ ꓛꓲꓺ ꓙꓳˍ ꓡꓳ꓾ ꓐꓰ ꓢꓷꓸ ꓪˍ ꓟ ꓥ ꓡꓳ=

(3) ꓜꓪꓰ-ꓗ-ꓑꓰ ꓪ ꓚꓲ ꓗꓪ ꓓꓯ ꓙꓰ ꓟ ꓬꓲ ꓞꓲꓼ 20 ꓘꓳꓼ ꓛꓲꓺ ꓙꓳˍ ꓟ ꓤ ꓟꓶ ꓡꓯꓸ ꓤ ꓕꓲ ꓣꓳ ꓒꓲꓼ ꓓˍ ꓟ ꓓꓳꓽ

ꓗ-ꓬꓲ ꓗꓴꓷꓼ ꓫꓴ꓾ ꓐꓸ-ꓯꓸ ꓡꓳ ꓒꓱ ꓗꓪ ꓟꓬꓱꓺ ꓓꓳꓽ ꓙꓳˍ ꓟ ꓘꓴꓽ ꓗꓪ ꓕꓲ ꓖ ꓥ ꓟ ꓜꓪꓰ-ꓗ-ꓑꓰ ꓪ ꓚꓲꓺ ꓗꓪ ꓓꓯꓻ ꓙꓰ ꓗꓷ ꓟ ꓤ ꓟꓶ ꓤ ꓕꓲ ꓣꓳ ꓠꓬ ꓮ ꓟꓰ ꓗꓪ ꓛꓲꓺ ꓪ ꓚꓲ ꓛꓲꓺ ꓔꓲ ꓗꓪ ꓟꓽ ꓛꓲꓺ ꓡ ꓢꓰꓽ꓾ ꓒꓲꓼ ꓓˍ ꓡꓳ꓾ ꓐꓰ ꓐꓯ ꓔ ꓡꓳ=

ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ 3 ꓦ 30 ꓠꓬꓲ (ꓮ ꓟꓰ ꓫꓵ ꓟꓰ) ꓟꓳꓼ ꓡꓳ ꓝꓲꓸ ꓕꓯ ꓪ ꓚꓲ ꓗꓪ ꓓꓯꓻ ꓙꓰ ꓢꓲ ꓮ ꓟꓰ ꓟꓶꓽ ꓘꓶꓽ ꓟꓰꓻ ꓡˍ ꓗꓪ ꓛꓲꓺ ꓟꓽ ꓬꓯꓼ ꓡ꓾ ꓒꓲꓼ ꓓꓹ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓮ ꓟꓰ ꓠꓯꓼ ꓕꓯ ꓡꓳ ꓒꓱ ꓗꓪ ꓟ ꓚꓬꓴꓸ ꓙ ꓜꓴꓻ ꓐꓴ ꓡꓰ ꓧꓪ ꓗꓷ ꓥˍ ꓟꓲ ꓟꓽ ꓟꓳꓻ=

ꓜꓪꓰ-ꓗ-ꓑꓰ ꓪ ꓚꓲ ꓗꓪ 2020 ꓘꓳꓼ 6 ꓦ ꓘꓴꓽ ꓗꓪ ꓐꓸ-ꓯꓸ ꓟꓴ ꓕꓲꓸ ꓢꓳꓺ ꓦꓲꓻ ꓗꓪ ꓢꓷꓸ ꓠꓲꓹ ꓢꓳ ꓣꓴ ꓔꓬ ꓢꓴ ꓕꓲ ꓣꓳ ꓪ ꓚꓲꓺ ꓗꓪ ꓐꓰ ꓞꓰꓻ ꓫꓵꓻ ꓗꓷ ꓟ ꓡꓰꓽ ꓟꓽ ꓞꓲꓺ ꓖꓳ ꓕꓲ ꓘꓳꓼ 7 ꓦ ꓘꓴꓽ ꓗꓪ ꓟꓴ ꓕꓲꓸ ꓢꓳꓺ ꓦꓲꓻ ꓗꓪ ꓢꓳ ꓔꓬ ꓢꓴ ꓙꓳꓽ ꓟ ꓕꓲ ꓣꓳ ꓞꓰꓻ ꓫꓵꓻ ꓟ ꓥ ꓡꓳ= ꓖꓳ ꓟ ꓡꓰꓽ ꓟꓽ ꓞꓲ ꓠꓱꓸ ꓐꓯ ꓗꓴꓷꓼ ꓢꓴ ꓕꓲ ꓣꓳ ꓥˍ ꓟꓲ ꓪ ꓚꓲꓺ ꓖꓳ ꓟ ꓕꓯꓽ ꓢꓲ ꓗꓪ ꓐꓰ ꓞꓰꓻ ꓡꓰ ꓟˍ ꓟꓲ ꓙꓳˍ ꓡꓳ꓾ ꓐꓰ Popular News Journal ꓗꓪ ꓐꓯ ꓔ ꓡꓳ=