ꓟꓲ ꓠꓯ ꓗꓴꓷꓼ ꓢꓲꓺ ꓡꓲꓺ ꓟ ꓙꓳ ꓓꓴ ꓐꓱ ꓶ ꓪꓽ ꓘꓴˍ ꓟ ꓗꓪ ꓔꓲꓺ ꓒ ꓪ ꓔꓲˍ ꓟꓲ ꓪꓽ ꓘꓴ ꓔ ꓙˍ ꓥꓳ꓾

ꓟꓲ ꓠꓯ ꓗꓴꓷꓼ ꓢꓲꓺ ꓡꓲꓺ ꓟ ꓙꓳ ꓓꓴ ꓐꓱ ꓶ ꓪꓽ ꓘꓴˍ ꓟ ꓗꓪ ꓔꓲꓺ ꓒ ꓪ ꓔꓲˍ ꓟꓲ ꓪꓽ ꓘꓴ ꓔ ꓙˍ ꓥꓳ꓾

ꓟꓲ ꓠꓯ ꓗꓴꓷꓼ ꓢꓲꓺ ꓡꓲꓺ ꓟ ꓙꓳ ꓓꓴ ꓐꓱ ꓶ ꓪꓽ ꓘꓴˍ ꓟ ꓗꓪ ꓔꓲꓺ ꓒ ꓪ ꓔꓲˍ ꓟꓲ ꓪꓽ ꓘꓴ ꓔ ꓙˍ ꓥꓳ= ꓪꓽ ꓘꓴˍ ꓟ ꓙꓵꓹ ꓔꓯ 10 ꓦ 2ꓠꓬꓲ (ꓠꓽ-ꓠꓬꓲꓽ-ꓠꓬꓲ) ꓗꓪ ꓬꓰ ꓓꓴ ꓥꓳ=

ꓪꓽ ꓘꓴˍ ꓟ ꓬꓲꓸ ꓕꓲ ꓟꓴꓽ ꓠꓬ “ꓕꓲ ꓣꓳ ꓔꓵꓸꓼ ꓡꓰꓽ ꓚꓬꓴꓸ ꓙˍ ꓟ ꓟꓽ ꓟꓶ꓾ ꓢꓲꓺ ꓡꓲꓺ ꓟ ꓐꓰ ꓬꓲꓼ ꓤ ꓠꓬꓲ ꓤ ꓐꓴ” ꓐꓰ ꓟꓬꓱꓺ ꓖꓶ ꓔ ꓡꓳ=

ꓣꓳ-ꓟ ꓗꓪ ꓔꓶꓻ ꓔ ꓟ ꓙꓲꓻ ꓫꓬ ꓢꓴ Egidio ꓜꓴꓻ ꓗꓪ ꓐꓰ ꓧꓳꓽ ꓪꓴꓸ ꓟꓴ ꓔ ꓟ ꓥ ꓡꓳ=ꓕꓱ ꓡꓰ ꓪꓽ ꓘꓴˍ ꓟ ꓠꓬ ꓗ-ꓔꓳ-ꓡꓲ ꓘꓴ-ꓜꓲ-ꓞꓳ ꓡꓰꓽ ꓬꓰˍ ꓟ ꓟꓽ ꓥ ꓥ ꓾ ꓠꓱꓸ ꓐꓯꓼ ꓘꓴ-ꓜꓲ-ꓞꓳ ꓐꓴˍ ꓟꓲ ꓪꓽ ꓘꓴ ꓔ ꓙˍ ꓥꓳ=

ꓪꓽ ꓘꓴˍ ꓟ ꓔꓯ ꓣꓳ-ꓟ ꓡꓳ ꓒꓱ Capitoline ꓗꓪ ꓟ Saint Mary in Aracoeli basilica ꓗꓪ ꓬꓰ ꓓꓴ ꓥꓳ= ꓕꓱ ꓕꓲ ꓡꓰꓹꓼ ꓪꓽ ꓘꓴˍ ꓟ ꓐꓰ ꓕꓲ ꓪꓽ ꓙꓲ-ꓢꓴ ꓢꓲ ꓤ ꓟꓽ ꓥ ꓟ ꓠꓱꓸ ꓐꓯꓼ ꓙꓵꓻ ꓠꓲꓹ ꓪꓴꓸ ꓓꓵꓺ ꓣꓱꓽ ꓢꓴ ꓐꓴˍ ꓟꓲ ꓪꓽ ꓔꓹ ꓘꓴ ꓓꓴ ꓥ ꓟ ꓔꓯ꓾ Vatican ꓓꓳꓽ ꓦ ꓖꓴ ꓗꓪ ꓐꓰ ꓐꓯ ꓔ ꓡꓳ=

ꓮ ꓟꓶ ꓕꓲ ꓧꓪꓹ ꓟ ꓠꓬ (34) ꓧꓪꓹ ꓪꓽ ꓘꓴˍ ꓟ ꓥ ꓡꓳ= ꓪꓽ ꓘꓴ ꓓꓴ ꓬꓰ ꓠꓹ ꓟ ꓪꓴꓸ ꓔꓴ ꓗꓷ ꓢꓴ ꓠꓬ ꓙꓲꓻ ꓫꓬ ꓢꓴ John Paul II ꓥ ꓢꓲ꓾ 1986 ꓘꓳꓼ ꓕꓯ ꓡꓰ ꓪꓴꓸ ꓔꓴ ꓗꓷ ꓟ ꓥꓳ=ꓕꓱ ꓡꓰ ꓬꓰˍ ꓟ ꓠꓬ ꓙꓲꓻ ꓫꓬ ꓢꓴ ꓮ-ꓢꓲ-ꓢꓲ ꓬꓲ ꓠꓲꓹ ꓟ ꓡꓰ ꓐꓰ ꓾ ꓔꓲꓺ ꓒ ꓪ ꓔꓲ ꓬꓲꓸ ꓬꓲꓼ ꓤ ꓠꓬꓲ ꓤ ꓮ ꓙꓵꓽ ꓔꓯ ꓕꓳꓽ ꓶ ꓗꓪ ꓟ ꓡꓰ ꓐꓰ ꓢꓲꓺ ꓡꓲꓺ ꓟ ꓐꓱ ꓶ ꓪꓽ ꓘꓴˍ ꓟ ꓥ ꓡꓳ=

COVID-19 ꓠꓻ ꓒꓬꓱꓼ ꓔꓬ ꓟ ꓦꓬꓼ ꓠꓬꓲ ꓘꓴꓽ ꓗꓪ ꓬꓰ ꓪˍ ꓟ ꓪꓴꓸ ꓠꓬꓲ ꓾ ꓞꓳ ꓤ ꓮꓽ ꓟꓬꓹ ꓡꓳꓽˍ ꓟ ꓗꓪ ꓐꓰ ꓗꓽ ꓕꓸ ꓠꓹ ꓟ ꓬꓰ ꓢꓲ ꓞꓳ ꓫꓵꓽ ꓥꓳꓽ 8 ꓙꓰꓽ ꓗꓪ ꓐꓰ ꓦ ꓖꓶ ꓩꓴ ꓡˍ ꓥꓳ= ꓖꓳ ꓟ ꓡꓰ ꓐꓰ Internet ꓐꓰ TV Line ꓐꓴ ꓗꓪˍ ꓟꓲ ꓚꓰꓹ ꓖꓶꓽ ꓩꓴ ꓡˍ ꓥꓳ=

ꓔꓲꓺ ꓒ ꓪ ꓔꓲ ꓬꓲꓸ No.3 ꓕꓳꓽ ꓶ  ꓡꓲꓺ ꓥ ꓟ “ꓬꓲꓼ ꓤ ꓠꓬꓲ ꓤ ꓐꓴ ꓮ ꓙꓵꓽ” ꓐꓯˍ ꓟ ꓕꓳꓽ ꓶ ꓔꓯ ꓟꓳꓸ ‘ꓚꓲꓸ ꓛꓬ ꓙꓵꓻ ꓔꓬꓹ ꓟ ꓦ ꓡꓱꓻ ꓚꓱꓹ ꓗꓪ ꓐꓰ ꓮ ꓙꓵꓽ ꓠꓬ ꓪꓴ-ꓢ ꓤ ꓠꓱ ꓒꓬꓱꓼ ꓡ ꓠꓹ ꓟ ꓘꓴ ꓔ ꓟ ꓟꓶ ꓗꓷꓳ= ꓬꓲꓼ ꓤ ꓠꓬꓲ ꓤ ꓠꓲꓹ ꓟ ꓔꓯ ꓫꓬꓹ ꓦꓵꓻ ꓠꓹ ꓟ ꓐꓰ ꓞꓳ ꓤ ꓗꓳꓺ ꓡꓳꓺ ꓘꓴꓽ ꓗꓪ ꓕꓲꓽ ꓠꓲꓹ ꓕꓲ ꓪ ꓗꓷ ꓡꓰ ꓠ꓾ ꓟꓽ ꓫꓱꓸ ꓡꓯꓽ ꓘꓳ ꓟꓽ ꓪꓽ ꓡꓯ ꓘꓳ ꓟ ꓚꓺ ꓟꓲꓽ ꓗꓪ ꓫꓸ ꓙꓵ ꓟꓶꓽ ꓙꓵ ꓓꓴ ꓗꓪ ꓐꓰ ꓾ ꓟꓯꓼ ꓓꓶꓽ ꓡꓯ ꓘꓳˍ ꓟ ꓗꓪ ꓐꓰ꓾ Syria ꓗꓪ ꓟꓯꓼ ꓓꓶꓽ ꓡꓯꓽ ꓘꓳ ꓔꓬꓹ ꓟ ꓠꓬ ꓞꓲꓺ ꓘꓳꓼ ꓛꓲꓺ ꓙꓳ ꓡ ꓟ ꓡꓰꓽ ꓟ ꓛꓲꓺ ꓾ Nagorno-Karabakh ꓗꓪ ꓮ ꓟꓶ ꓟꓯꓼ ꓓꓶ ꓡꓯ ꓘꓳ ꓔꓬ ꓟ ꓪꓴꓸ ꓠꓬꓲ ꓪꓽ ꓘꓴˍ ꓟ ꓐꓰ꓾ ꓙꓵꓻ ꓠꓲꓹ ꓚꓱꓹ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓜꓲꓼ ꓡꓯꓽ ꓘꓳˍ ꓟ ꓠꓬ ꓾ ꓢꓲꓺ ꓡꓲꓺ ꓟ ꓣꓱꓽ ꓞꓹ ꓔꓬ ꓟ ꓔꓯ ꓟꓲꓺ ꓠꓯꓺ ꓔꓯ Europe ꓠꓲꓹ ꓟ ꓗꓪ ꓐꓰ ꓾ ꓡ ꓠꓹ ꓟ ꓙꓲꓻˍ ꓟ ꓥꓳ ꓡꓳꓸ ꓓꓴ ꓓꓳꓽ ꓥ ꓟ  ꓢꓲꓺ ꓡꓲꓺ ꓟ ꓬꓲꓸ ꓟꓬꓱꓺ ꓠꓯꓸ ꓗꓪ ꓐꓰ ꓢꓷꓸ ꓙ ꓟꓳ ꓙ ꓠꓲꓹ ꓫꓵˍ ꓟ꓾ ꓞꓳ ꓤ ꓮ ꓙꓵꓽ ꓪꓽ ꓘꓴˍ ꓟ ꓔꓯ Online ꓗꓪ ꓐꓰ ꓪꓽ ꓘꓴ ꓔ ꓙ ꓠꓹ ꓟ ꓘꓴˍ ꓟ ꓔꓯ ꓾ ꓙꓲꓻ ꓫꓬ ꓢꓴ Egidio ꓜꓴꓻ ꓗꓪ ꓐꓰ ꓐꓯ ꓟꓸ ꓖꓶ ꓗꓷ ꓟ ꓥꓳ=     

ꓠꓽ-ꓠꓬꓲꓽ-ꓠꓬꓲ ꓟꓳꓽ ꓡꓳ ꓕꓯ ꓙꓵꓻ ꓠꓲꓹ ꓚꓱꓹ ꓮ ꓙꓵꓽ ꓗꓪ ꓟ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓠꓬ ꓚꓲꓸ ꓛꓬꓼ ꓪꓽ ꓘꓴ ꓚꓱꓹ ꓡꓰ ꓐꓰ ꓪꓽ ꓘꓴ ꓠꓹ ꓟ ꓥꓳ=

ꓔꓲꓺ ꓒ ꓪ ꓔꓲ Francis꓾ Constantinople ꓙꓵꓻ ꓠꓲꓹ ꓚꓱꓹ ꓪꓴꓸ ꓓꓵꓺ ꓣꓱꓽ ꓢꓴ Bartholomew I ꓐꓰ Orthodox꓾ Protestant ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓠꓬ basilica ꓪꓽ ꓘꓴ ꓦꓲꓻ ꓗꓪ ꓪꓽ ꓘꓴ ꓠꓹ ꓟ ꓥꓳ=  Jews ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓠꓬ ꓜꓲꓼ ꓦꓲꓻ ꓗꓪ꓾ Muslim꓾ Buddhist꓾ Eastern ꓗꓪ ꓟ ꓙꓵꓻ ꓠꓲꓹ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓠꓬ Capitoline Museum ꓗꓪ ꓪꓽ ꓘꓴ ꓓꓴ ꓥꓳ=

ꓪꓽ ꓘꓴˍ ꓟ ꓗꓪ ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓟ ꓜꓴꓻ ꓪꓴꓸ ꓓꓵꓺ ꓣꓱꓽ ꓢꓴ ꓐꓴ ꓥ ꓟ Europe ꓢꓽ ꓡ ꓙꓵꓽ Ursula von der Leyen ꓾ ꓲ-ꓔ-ꓡꓲ ꓢꓲꓽ ꓒ Sergio Mattarella ꓐꓴ ꓔꓯˍ ꓟꓲ ꓪꓽ ꓘꓴˍ ꓟ ꓗꓪ ꓔ ꓙ ꓠꓹ ꓟ ꓕꓵꓼ ꓪ ꓖꓶ ꓔ ꓡꓳ= ꓪꓽ ꓘꓴ ꓔꓬꓹ ꓟ ꓘꓴꓽ ꓗꓪ covid ꓠꓻ ꓫꓵꓽ ꓪꓴꓸ ꓠꓬꓲ ꓫꓵꓻ ꓗꓷ ꓢꓴ ꓐꓴ ꓐꓱ ꓶ 1 ꓧꓶꓹ ꓛꓲꓺ ꓢꓲꓺ ꓡꓲꓺ ꓐꓰ ꓔꓬ ꓢꓲ ꓪꓽ ꓘꓴˍ ꓟ ꓗꓪ ꓐꓰ ꓾ ꓪꓽ ꓘꓴ ꓙꓵꓹ ꓔꓯ ꓠꓽ ꓗꓷ ꓓꓴ ꓥꓳ=

https://bit.ly/2T5eXmq

Add new comment

6 + 2 =