ꓠꓬꓲꓸ ꓠꓬꓲ ꓐꓱ ꓶ ꓓꓳꓽ ꓫꓵꓽ

ꓒ-ꓗ ꓡꓳ-ꓓꓳ ꓧꓳˍ ꓟ(ꓡꓽ ꓧꓳꓹ ꓧꓳˍ ꓟ) ꓗꓪ ꓫꓵꓻ ꓟꓳ 17 ꓟ ꓟꓳ ꓡꓰ ꓟ ꓓꓳꓽ

ꓗ-ꓛꓲ ꓗꓴꓷꓼ ꓫꓴ ꓒ-ꓗ ꓡꓳ ꓒꓱ ꓟꓯꓸ-ꓡꓲ-ꓙꓬꓮꓳ ꓘꓹ ꓗꓪ ꓟ 111 ꓗꓳ-ꓟ-ꓠꓲ ꓟꓬꓱꓽ ꓗꓪ 2 ꓦ 28 ꓠꓬꓲ ꓕꓯ ꓡꓳ-ꓓꓳ ꓧꓳˍ ꓟ ꓪꓴꓸ ꓠꓬꓲ ꓞꓳ ꓤ 40 ꓣꓳ ꓛꓲꓺ ꓒꓲꓼ ꓬꓰ ꓟꓶꓽ ꓬꓰ ꓢꓲ ꓮ ꓟꓰ ꓗꓪ ꓛꓲꓺ ꓞꓳ ꓟꓳ 17 ꓟꓳ ꓔꓯ ꓟꓳ ꓡꓰꓳ꓾ ꓐꓰ ꓖꓳ ꓗꓪ ꓔꓬ ꓢꓴ ꓐꓴ ꓡꓰ ꓐꓯ ꓔ ꓡꓳ ꓐꓰ ꓢꓷꓸ ꓪˍ ꓡꓳ=

ꓡꓳ-ꓓꓳ ꓧꓳˍ ꓟ ꓗꓪ ꓐ ꓬꓰ ꓢꓴ ꓐꓴ ꓠꓬ ꓗꓳ-ꓟ-ꓠꓲ ꓗꓪ ꓑꓳꓪꓼ ꓧꓪ ꓢꓴ꓾ ꓒꓵꓽ ꓡꓳ ꓓꓰ ꓧꓪ ꓢꓴ ꓐꓴ ꓥ ꓡꓳ꓾ ꓐꓰ ꓢꓷꓸ ꓪˍ ꓡꓳ= ꓒ-ꓗ ꓡꓳ ꓒꓱ ꓗꓪ ꓗꓳꓸ ꓗꓷ ꓟ 12 ꓦ ꓡꓳꓹ ꓬꓰ ꓔꓬ ꓕꓯ ꓡꓳ-ꓓꓳ ꓧꓳˍ ꓟ ꓪꓴꓸ ꓠꓬꓲ ꓞꓳ ꓤ 80 ꓣꓳ ꓫꓵꓻ ꓗꓷ ꓢꓲ 2020 ꓘꓳꓼ 5 ꓦ 23 ꓠꓬꓲ ꓕꓯ ꓪꓰꓲ-ꓘ-ꓟꓮꓪ ꓗꓪ ꓡꓳ-ꓓꓳ ꓧꓳˍ ꓟ ꓪꓴꓸ ꓠꓬꓲ ꓑꓳꓪꓼ ꓧꓪ ꓢꓴ꓾ ꓒꓵꓽ ꓡꓳ ꓓꓰ ꓧꓪ ꓢꓴ ꓬꓲ ꓦꓬ ꓣꓳ ꓟꓽ ꓞꓲ ꓫꓵꓻ ꓗꓷ ꓟ ꓥꓳ꓾ ꓐꓰ ꓣꓝꓮ ꓓꓳꓽ ꓗꓪ ꓐꓯ ꓔ ꓡꓳ=

ꓟꓬ-ꓟ ꓐꓲ ꓜꓳ ꓠꓴꓽ ꓢꓯꓼ ꓢꓷ ꓠꓲꓹ ꓙꓳ ꓢꓴ 5 ꓣꓳ ꓡꓲꓹ ꓡ ꓟ ꓓꓳꓽ

ꓮ ꓟꓰ(2022 ꓘꓳꓼ 3 ꓦ 2 ꓠꓬꓲ) ꓕꓯ  ꓟꓬ-ꓟ ꓗꓴꓷꓼ ꓗꓪ ꓟꓬꓱ ꓓꓳꓽ ꓙꓳˍ ꓟ ꓐꓲ ꓜꓳꓽ ꓠꓴꓽ ꓢꓯꓼ ꓢꓷ ꓠꓲꓹ ꓙꓳ ꓢꓴ 5 ꓣꓳ ꓔꓯ ꓐꓱ ꓓꓴꓽ ꓗꓪ ꓐꓰ ꓡꓲꓹ ꓩꓴ ꓗꓷꓳ=

ꓡꓲꓹ ꓗꓷ  ꓟ (5) ꓣꓳ ꓠꓬ꓾ ꓑꓲ-ꓔꓲ-ꓳ꓾ ꓲ-ꓓ-ꓣ-ꓚꓳ-ꓜꓰ꓾ ꓡꓴ-ꓟꓰꓹ꓾ ꓑꓮꓲ-ꓔ-ꓘꓳ꓾ ꓪꓮꓲꓹ ꓐꓴ ꓥ ꓡꓳ꓿

“ꓗꓴꓷꓼ ꓫꓬ ꓜꓶˍ ꓟ ꓗꓪ ꓬꓲꓸ ꓪ ꓢꓷꓸ ꓠꓲꓹ ꓣꓱꓽ ꓢꓲꓸ ꓔꓺ ꓡ ꓠꓹ ꓟ ꓡꓲꓹ ꓖꓶˍ ꓟ ꓥ ꓡꓳ” ꓐꓰ ꓟꓪꓓ ꓫꓵꓽ ꓓꓳ ꓗꓪ ꓐꓯ ꓩꓴ ꓡ ꓡꓳ꓿

ꓪꓮꓲꓹ꓾ ꓪꓰꓹ-ꓟꓰꓹ-ꓔꓸ ꓔꓯ ꓠꓬ ꓐꓯ ꓟꓴ ꓕꓲ ꓚꓱꓹ ꓗꓪ ꓐꓰ ꓩꓴ ꓗꓷ ꓥ ꓟꓲ ꓠꓱꓸ ꓐꓯꓼ ꓕꓲ ꓚꓱꓹ ꓗꓪ ꓐꓰ ꓞꓳꓹ ꓡꓴꓽ ꓔꓸ ꓢꓰꓽ ꓡꓳ ꓐꓯ ꓡꓳ꓿

“ꓟꓽ ꓞꓳꓹ ꓠ ꓔ ꓟ ꓗꓪ ꓞꓳꓹ ꓡꓴꓽ ꓢꓲꓸ ꓡꓲꓹ ꓖꓶ ꓡ ꓟ ꓔꓯ ꓫꓸ ꓟꓳ ꓐꓯ ꓟꓽ ꓛꓵ” ꓐꓰ ꓙꓽ ꓘꓶꓽ ꓢꓴ ꓐꓴ ꓐꓰ ꓑ ꓫꓬ ꓐꓴ ꓡꓰ ꓐꓯ ꓔꓬ ꓡꓳ꓿

ꓟꓬꓱ ꓓꓳꓽ ꓙꓳˍ ꓟ ꓟꓴ ꓖꓪ ꓖꓪ ꓒꓽ ꓢꓳꓸ-ꓒꓳꓸ-ꓘꓪꓸ꓾ ꓑꓳ-ꓑꓳ꓾ ꓬꓯ-ꓔꓮꓲꓼ꓾ ꓕꓳ ꓶ ꓐꓳ ꓟ ꓪꓮꓲꓹ꓾ ꓪꓰꓹ-ꓟꓰꓹ-ꓔꓯꓸ ꓐꓴ ꓮ ꓟꓬꓹ ꓐꓱ ꓓꓴꓽ ꓗꓪ ꓔꓬ ꓢꓰꓽ ꓡꓳ꓾ ꓐꓰ The Lisu Times ꓓꓳꓽ ꓗꓪ ꓐꓯ ꓔ ꓡꓳ=

ꓜ ꓚꓲꓸ ꓚꓲˍ ꓟ ꓦꓬꓼ ꓠꓬꓲ ꓠꓬ ꓣꓳ ꓠꓲꓹ ꓟ ꓒꓳꓹ ꓡꓶꓸ ꓠꓹ ꓟ꓾ ꓒꓳꓹ ꓡꓲꓼ ꓡ ꓠꓹ ꓟ ꓬꓲ ꓙꓵꓹ ꓖꓶˍ ꓟ ꓦꓬꓼ ꓠꓬꓲ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓟ ꓓꓳꓽ

ꓮ ꓟꓰ ꓗꓪꓺ ꓒꓴ ꓟꓰ ꓑꓮꓲꓽ ꓘꓴꓽ ꓦ ꓟꓰ ꓑꓮꓲꓽ ꓗꓪ ꓐꓰ ꓪꓴꓸ ꓔꓴˍ ꓟ ꓜꓽ ꓓꓴ ꓚꓲꓸˍ ꓟ ꓦꓬꓼ ꓠꓬꓲ ꓔꓯ ꓬꓲ ꓙꓲꓻ ꓗꓳꓸ ꓙꓰ ꓐ ꓡ ꓠꓹ ꓟ ꓙ ꓖꓶ ꓡꓯ= ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓘꓳꓹ ꓣꓴˍ ꓟ꓾ ꓪꓽ ꓘꓴˍ ꓟ꓾ ꓣꓱꓼ ꓞꓹ ꓢꓴ ꓐꓴ ꓔꓯ ꓐꓱ ꓖꓶˍ ꓟ ꓗꓪ ꓐꓰ ꓫꓱꓸ ꓤ ꓓꓴ ꓟꓬꓱꓽ ꓬꓰ ꓢꓲ ꓣꓳ ꓠꓲꓹ ꓟ ꓔꓯ ꓒꓳꓹ ꓡꓲꓼ ꓠꓹ ꓟ ꓬꓲ ꓙꓵꓹ ꓖꓶˍ ꓟ ꓦꓬꓼ ꓠꓬꓲ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ Francis ꓡꓰ ꓐꓯ ꓔ ꓡꓳ=

ꓝꓮꓲ ꓜꓽ ꓓꓴ ꓚꓲꓸˍ ꓟ ꓦꓬꓼ ꓠꓬꓲ ꓪꓴꓸ ꓔꓴˍ ꓟ 3 ꓦ 2 ꓠꓬꓲ ꓠꓬ Ukraine ꓗꓴꓷꓼ ꓢꓲꓺ ꓡꓲ ꓡꓰ ꓠꓹ ꓟ ꓐꓱ ꓶ ꓜꓽ ꓓꓴ ꓚꓲꓸ ꓢꓲ ꓪꓽ ꓘꓴ ꓖꓶ ꓠꓹ ꓟ ꓐꓱ ꓶ ꓢꓷꓸ ꓙ ꓟꓳ ꓙ ꓔ ꓟ ꓦꓬꓼ ꓠꓬꓲˍ ꓟꓲ ꓥ ꓡꓳ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ ꓐꓰ꓾ ꓚꓠꓮ(Catholic News Agency) ꓓꓳꓽ ꓗꓪ ꓐꓯ ꓔ ꓡꓳ=

Add new comment

1 + 2 =