ꓠꓬꓲꓸ ꓠꓬꓲ ꓐꓱ ꓶ ꓓꓳꓽ ꓫꓵꓽ

(1) ꓟꓲ-ꓚꓲ-ꓠ ꓢ-ꓢꓶ-ꓠꓽ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓔꓬ ꓟ ꓞꓳ ꓡꓯꓸ ꓐꓴ Futsal ꓑꓰꓹ ꓡꓴꓸ ꓑꓰꓹ ꓔꓯꓺ ꓡꓯ ꓘꓳꓹ ꓟ

ꓠꓬꓲꓸ ꓠꓬꓲ 5 ꓦ 13 ꓠꓬꓲ 2022 ꓘꓳꓼ ꓕꓯ ꓟꓲ-ꓚꓲ-ꓠ ꓢ-ꓢꓶ-ꓠꓽ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓔꓬ ꓟ ꓞꓳ ꓡꓯꓸ ꓐꓴ ꓑꓰꓹ ꓡꓴꓸ ꓑꓰ ꓔꓯ ꓡꓯ ꓘꓳꓹ ꓟ ꓑꓮꓲꓽ ꓔꓯ ꓠꓯꓼ 8 ꓙꓵꓹ ꓕꓯ ꓒꓴ ꓗꓷꓳ꓾ ꓐꓰ ꓢꓷꓸ ꓪˍ ꓡꓳ= ꓑꓰꓹ ꓔꓯꓺ ꓡꓯ ꓘꓳ ꓔꓶꓸ ꓠꓬ ꓣ-ꓓ-ꓗꓮꓳꓸ Aung Star Futsal ꓔꓯꓺ ꓡꓯ ꓘꓳ ꓔꓶꓸ ꓗꓪ ꓥ ꓡꓳ=

Futsal ꓑꓰꓹ ꓔꓯꓺ ꓡꓯ ꓘꓳˍ ꓟ ꓑꓮꓲꓽ ꓗꓪ ꓤ ꓑ ꓤ ꓐꓰ ꓤ ꓟꓶ ꓤ ꓐꓴ ꓔꓯꓺ ꓡꓯ ꓘꓳ ꓓꓴ ꓥ ꓡꓳ= ꓑꓮꓲꓽ ꓗꓪ ꓔꓺ ꓡ ꓢꓴ ꓞꓳ ꓡꓯꓸ ꓐꓴ ꓠꓬ ꓟꓲ-ꓚꓲ-ꓠ ꓡꓳ ꓒꓱ ꓘꓴꓽ ꓗꓪ ꓟ ꓘꓹ ꓮ ꓟꓬꓹ ꓗꓪ ꓐꓰ ꓥ ꓡꓳ꓾ ꓐꓰ ꓢꓷꓸ ꓪˍ ꓡꓳ=

ꓔꓯꓺ ꓡꓯ ꓘꓳ ꓑꓮꓲꓽ ꓔꓯ 3 ꓠꓬꓲ ꓔꓯꓺ ꓡꓯ ꓘꓳ ꓠꓹ ꓟ ꓥ ꓡꓳ= ꓬꓲ ꓔꓶꓺ ꓙꓱꓼ ꓠꓬ ꓞꓳ ꓡꓯꓸ ꓐꓴ ꓧꓪꓽ ꓖꓳ ꓓꓱꓽ ꓔꓬꓹ ꓢ ꓢꓲ ꓠꓬꓲ ꓠꓻ ꓓꓴ ꓟꓽ ꓙꓳ ꓠꓹ ꓟ ꓐꓰ ꓓꓻ ꓒ ꓓꓻ ꓟ ꓮ ꓟꓬꓹ ꓓꓳꓺ ꓡ ꓠꓹ ꓟ ꓥ ꓡꓳ꓾ ꓐꓰ ꓢꓷꓸ ꓪˍ ꓡꓳ=

(2) ꓟꓳ-ꓟꓮꓳ ꓡꓳꓲ-ꓙꓯ ꓙ ꓖꓴ ꓮ ꓘꓶꓸ ꓫ ꓡꓰ ꓟ ꓑꓶ ꓓꓴ ꓟꓳ-ꓓꓳ ꓑꓳꓹ ꓢꓴ ꓐꓴ ꓫꓸ ꓓꓴ ꓔꓳꓹ ꓜꓳꓽ ꓔꓬ ꓟ ꓓꓳꓽ

ꓗ-ꓛꓲ ꓗꓴꓷꓼ ꓫꓴ ꓟꓳ-ꓟꓮꓳ ꓡꓳ ꓒꓱ ꓗꓪ ꓐꓰ ꓧꓶꓽ ꓟꓵꓽ ꓫꓸ ꓗ ꓡꓳꓲ-ꓙꓯ ꓡꓳ ꓒꓱ ꓗꓪ ꓙꓰˍ ꓟ ꓟꓳ-ꓟꓮꓳ ꓡꓳꓲ-ꓙꓯ ꓙ ꓖꓴ ꓠꓬ ꓡꓳ ꓔ 47 ꓕꓷꓹ ꓗꓪ ꓛꓲ ꓮ ꓟꓬꓹ ꓫꓸ ꓡ ꓟ ꓪꓴꓸ ꓠꓬꓲ ꓟꓽ ꓠꓽ ꓠꓽ ꓟꓳ-ꓓꓳ ꓡꓱꓸ ꓙꓰ ꓔꓬ ꓠꓬꓲ ꓟꓳ-ꓓꓳ ꓓꓽ ꓟ ꓑꓳꓹ ꓢꓴ ꓐꓴ ꓮ ꓘꓶꓸ ꓫ ꓔꓬ ꓡꓳ꓾ ꓐꓰ ꓢꓷꓸ ꓪˍ ꓡꓳ=

ꓧꓶꓸ ꓕꓯ 2019 ꓘꓳꓼ ꓕꓯ ꓡꓳꓲ-ꓙꓯ ꓙ ꓖꓴ ꓫꓬꓹ ꓠꓹ ꓟ ꓕꓳꓽ ꓶ ꓫꓬꓹ ꓗꓷ ꓥˍ ꓟꓲ ꓠꓻ ꓫꓵꓽ ꓑꓶꓸ ꓓꓴ ꓟꓽ ꓫꓬꓹ ꓪ ꓡꓰ= ꓙ ꓖꓴ ꓕꓱ ꓟ ꓗꓪ ꓟꓳ-ꓓꓳ ꓡꓱꓸ ꓙꓰˍ ꓟ ꓟꓽ ꓠꓽ ꓠꓽ ꓒꓬꓱꓼ ꓡ ꓔꓬ ꓟ ꓪꓴꓸ ꓠꓬꓲ ꓙ ꓖꓴ ꓗꓪ ꓙꓰ ꓙꓰ ꓡ ꓡ ꓬꓰ ꓢꓴ ꓐꓴ ꓡꓰ ꓡꓳꓽ ꓢꓲ ꓠꓬꓲ ꓙ ꓖꓴ ꓮ ꓘꓶꓸ ꓫꓸ ꓟ ꓗꓪ ꓫꓬꓹ ꓗꓷ ꓥˍ ꓟꓲ ꓒꓴ ꓮ ꓟꓬꓹ ꓣꓱꓽ ꓞꓹ ꓟ ꓑꓶꓸ ꓓꓴ ꓙ ꓖꓴ ꓫꓬꓹ ꓟ ꓗꓪ ꓐꓰ ꓠꓽ ꓔ ꓡꓳ꓾ ꓐꓰ ꓙ ꓖꓴ ꓫꓬꓹ ꓟ ꓗꓪ ꓧꓳꓽ ꓣꓱꓽ ꓢꓴ ꓡꓰ ꓐꓯ ꓟ ꓔꓯ DVB ꓓꓳꓽ ꓗꓪ ꓐꓯ ꓔ ꓡꓳ=

(3) ꓮ-ꓢꓲ-ꓬꓯ ꓐꓱ ꓶ ꓓꓳ-ꓡ 1500 ꓫꓬꓹ ꓬꓰ ꓙˍ ꓥꓳ ꓐꓰ ꓮ-ꓟꓯ-ꓣꓲ-ꓗ ꓢꓲꓽ ꓒ ꓡꓰ ꓪꓵꓼ ꓘꓶꓽ ꓖꓶˍ ꓟ

ꓮ-ꓟꓯ-ꓣꓲ-ꓗ ꓐꓰ ꓮ-ꓢꓲ-ꓬꓯ ꓖꓪ ꓙꓱꓻ ꓜꓲꓼ ꓓꓴ ꓬꓲ ꓪꓴꓸ ꓕꓲ ꓠꓬꓲꓽ ꓗꓪ ꓡꓰꓽ ꓮ-ꓟꓯ-ꓣꓲ-ꓗ ꓗꓴꓷꓼ ꓢꓲꓽ ꓒ Joe Biden ꓠꓬ ꓮ-ꓢꓲ-ꓬꓯ ꓗꓴꓷꓼ ꓐꓴ ꓐꓱ ꓶ ꓓꓳ-ꓡ 1500 ꓫꓬꓹ ꓬꓰ ꓙˍ ꓥꓳ ꓐꓰ ꓪꓵꓼ ꓘꓶꓽ ꓖꓶ ꓗꓷꓳ=

ꓮ-ꓟꓯ-ꓣꓲ-ꓗ ꓐꓴ ꓬꓰ ꓙˍ ꓟ ꓠꓬ ꓑ ꓫꓬ ꓐꓱ ꓶ ꓣꓱꓽ ꓬꓯꓼ ꓟ ꓦꓲꓻ꓾ ꓫꓸ ꓑꓬ ꓖꓴ꓾ ꓠꓻ ꓫꓵꓽ ꓠꓻ ꓙꓰꓽ ꓗꓽ ꓕˍ ꓟ ꓐꓰ ꓧꓶꓽ ꓗꓴꓷꓼ ꓢꓴ ꓐꓴ ꓡꓰ ꓚꓲꓸ ꓛꓬ ꓗꓴꓷꓼ ꓔꓯ ꓙꓵꓽ ꓡˍ ꓟ ꓔꓯ ꓝꓮꓲ ꓕꓲ ꓧꓪꓹ ꓫꓬ ꓔꓱꓹ ꓠꓹ ꓟ ꓔꓶꓺ ꓙꓱꓼ ꓥ ꓡꓳ=

ꓮ-ꓟꓯ-ꓣꓲ-ꓗ ꓢꓲꓽ ꓒ ꓐꓰ ꓮ-ꓢꓲ-ꓬꓯ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓠꓬꓲꓽ ꓠꓬꓲ ꓬꓰˍ ꓟ ꓖꓪ ꓙꓱꓻ ꓜꓲꓼ ꓓꓴ ꓠꓬ ꓮ ꓟꓰ 5 ꓦ 12 ꓠꓬꓲ ꓕꓯ ꓪ-ꓫꓲ-ꓔꓮꓥ ꓢꓲꓽ ꓒ ꓦꓲꓻ ꓗꓪ ꓟꓶꓽ ꓘꓶꓽ ꓜ ꓜꓽ ꓑꓮꓲ ꓬꓰ ꓢꓲ ꓖꓪ ꓙꓱꓻ ꓜꓲꓼ ꓓꓴ ꓔꓯ ꓪꓴꓸ ꓔꓴ ꓔ ꓡꓳ=

ꓢꓲꓽ ꓒ Joe Biden ꓡꓰ ꓮ-ꓢꓲ-ꓬꓯ ꓗꓴꓷꓼ ꓗꓪ ꓟ ꓪꓴꓸ ꓓꓵ ꓣꓱꓽ ꓢꓴ ꓐꓴ ꓔꓯ ꓢꓲꓽ ꓒ ꓦꓲꓻ ꓗꓪ ꓜꓲ ꓡꓯ ꓘꓳꓹ ꓟ ꓠꓬ ꓬꓲ ꓪꓴꓸ ꓕꓲ ꓧꓪꓹ ꓟ ꓥ ꓢꓲ ꓮ-ꓟꓯ-ꓣꓲ-ꓗ ꓐꓰ ꓮ-ꓢꓲ-ꓬꓯ ꓗꓪ ꓟ ꓡ ꓞꓳ 10000 ꓫꓬꓹ ꓐꓱ ꓶ ꓫ ꓑꓬ ꓖꓴ꓾ ꓙꓳ ꓢ ꓔꓬ ꓢ ꓓꓴ ꓐꓰ ꓞꓳ ꓤ ꓪ ꓙꓵꓽ ꓪ ꓔꓯ ꓟꓳꓸ ꓦꓰꓼ ꓔꓴˍ ꓟ ꓗꓪ ꓕꓲ ꓠꓲꓹ ꓕꓲ ꓪ ꓬꓰ ꓠꓹ ꓟ ꓖꓪ ꓙꓱꓻ ꓔꓬ ꓟ ꓥ ꓡꓳ꓾ ꓐꓰ ꓢꓷꓸ ꓪˍ ꓡꓳ= ꓖꓪ ꓙꓱꓻ ꓜꓲꓼ ꓓꓴ ꓕꓱ ꓟ ꓗꓪ ꓮ-ꓢꓲ-ꓬꓯ ꓗꓴꓷꓼ ꓐꓴ ꓥ ꓟ Brunei, Indonesia, Cambodia, Singapore, Thai, Laos, Vietnam, Malaysia, Philippine ꓗꓪ ꓟ ꓙꓵꓽ ꓪ ꓙꓳ ꓢꓴ ꓬꓲ ꓞꓲꓺ ꓐꓴ ꓐꓹ ꓟ ꓥ ꓢꓲ ꓟꓬ-ꓟ ꓟꓯꓼ ꓪꓴꓸ ꓓꓴ ꓣꓱꓽ ꓢꓴ ꓠꓽ ꓖꓪ ꓙꓱꓻ ꓜꓲꓼ ꓓꓴ ꓗꓪ ꓐ ꓠꓹ ꓟ ꓙꓵꓽ ꓪ ꓟꓽ ꓟꓶ꓾ ꓐꓰ ꓢꓷꓸ ꓪˍ ꓡꓳ=

ꓠꓬꓲꓸ ꓠꓬꓲ 5 ꓦ 13 ꓠꓬꓲ ꓗꓪ ꓥˍ ꓟꓲ ꓖꓪ ꓙꓱꓻ ꓜꓲꓼ ꓓꓴ ꓙꓳˍ ꓢꓰꓽ ꓡꓳ꓾ ꓐꓰ DVB ꓓꓳꓽ ꓗꓪ ꓐꓯ ꓔ ꓡꓳ=