ꓠꓬꓲꓸ ꓠꓬꓲ ꓐꓱ ꓶ ꓓꓳꓽ ꓫꓵꓽ

ꓲ-ꓖ-ꓡꓲꓸ ~ ꓡꓲ-ꓢꓴ ꓥꓳꓽ ꓢꓳ ꓓꓴ English to Lisu Android App ꓕꓲ ꓟ ꓫꓬꓹ ꓓꓳ ꓩꓴ ꓡ ꓟ ꓓꓳꓽ

ꓲ-ꓖ-ꓡꓲꓸ~ ꓡꓲ-ꓢꓴ ꓥꓳꓽ ꓢꓳ ꓓꓴ English to Lisu Android App ꓕꓲ ꓟ ꓲ-ꓓꓲ-ꓬ ꓗꓴꓷꓼ ꓗꓪ ꓔꓬ ꓟ ꓡꓲ-ꓢꓴ ꓐꓴ ꓡꓰ ꓙꓽ ꓖꓶ ꓢꓲ ꓬꓲ ꓪꓴꓸ ꓕꓲ ꓧꓪꓹ ꓫꓬꓹ ꓓꓳ ꓡꓰꓳ= ꓕꓳ ꓶ ꓚꓱꓹ ꓜꓯꓻ ꓢꓴ ꓠꓬ Biyo Lisu ꓥ ꓡꓳ= ꓬꓲ ꓠꓬ Facebook, YouTube, Websites, WeChat ꓐꓴˍ ꓡꓰ ꓐꓰ application platforms ꓗꓪ ꓐꓰ ꓡꓲ-ꓢꓴ - ꓲ-ꓖ-ꓡꓲꓸ ꓥꓳꓽ ꓫꓵꓽ ꓟꓸ ꓖꓶ ꓔꓬ ꓢꓴ ꓕꓲ ꓣꓳ ꓥ ꓢꓲ꓾ ꓮ ꓟꓶ ꓠꓬ Android Application  ꓗꓪ ꓬꓲ ꓪꓴꓸ ꓕꓲꓽ ꓧꓪꓹ ꓫꓬꓹ ꓓꓳ ꓩꓴ ꓡ ꓟ ꓥ ꓡꓳ=

Phone ꓕꓲ ꓟ ꓙꓳ꓾ Internet ꓙꓳˍ ꓕꓯ ꓠꓽ ꓥꓳꓽ ꓫꓵꓽ ꓢꓳꓺ ꓙꓲ ꓡꓰꓳ= ꓧꓶꓸ ꓕꓯ ꓟ ꓡꓰ ꓐꓰ ꓟꓽ ꓫꓸ ꓓꓺꓳ= ꓢꓲꓽ ꓢꓲꓽ ꓢꓳ ꓔꓯ ꓢꓲ ꓬꓲ ꓙꓲ ꓟꓬꓱꓽ ꓬꓰ ꓙꓰ ꓡꓯ= Google Play Store ꓗꓪ ꓐꓰ ꓣꓳ Phone ꓗꓪ ꓚꓵꓹ ꓗꓷ ꓢꓲ ꓢꓳ ꓪ ꓡꓰ ꓝꓲ ꓡꓯ꓾ ꓐꓰ ꓢꓳ ꓚꓱꓹ ꓕꓳ ꓡ ꓐꓳ ꓢꓴ ꓐꓰ ꓟꓸ ꓖꓶꓽ ꓢꓴ Biyo Lisu ꓡꓰ ꓐꓯ ꓡꓳ=

ꓙꓼ ꓪꓴꓸ ꓠꓷꓸ ꓚꓱꓹ ꓗꓪ ꓜꓯꓻ ꓢꓴ ꓠꓬ Android Application ꓜꓯꓻ ꓚꓱꓹ ꓗꓪ ꓢꓷꓸ ꓠꓲꓹ ꓙꓳ ꓢꓴ ꓡꓯ-ꓟꓯ-ꓢꓶ. ꓥ ꓡꓳ= ꓢꓳ ꓚꓱꓹ ꓔꓯ ꓠꓳꓸ ꓠꓬ Education, Grammar, Idioms and Phrases, Short Sentences, Videos, Words Meaning ꓐꓯ ꓢꓲ ꓬꓲ ꓩꓴꓸ ꓓꓽ ꓟ ꓒꓯꓽ ꓔ ꓡꓳ= ꓕꓳ ꓶ ꓝꓳꓹ ꓡꓰꓽ ꓟꓽ ꓞꓲ꓾ ꓬꓲ ꓢꓯꓼ ꓥ ꓟꓲ꓾ ꓬꓲ ꓐꓬꓱꓽ ꓥ ꓟꓲ ꓜꓯꓻ ꓧꓳꓽ ꓔ ꓡꓳ=

21 ꓦꓬ ꓜꓴ ꓘꓳꓼ ꓗꓪ ꓡꓲ-ꓢꓴ ꓐꓴ ꓠꓬ ꓚꓲꓸ ꓛꓬ ꓔꓬ ꓟ ꓗꓴꓷꓼ ꓥꓳꓽ ꓫꓵꓽ ꓥ ꓟ ꓟꓬ-ꓟ꓾ ꓲ-ꓓꓲ-ꓬ꓾ ꓧꓶꓽ ꓾ ꓕꓮꓲꓽ ꓥꓳꓽ ꓢꓳ ˍ ꓟ ꓡꓰ ꓐꓰ ꓕꓲꓽ ꓟꓲ ꓠꓯ ꓙ ꓡꓯ ꓘꓳ ꓙꓲˍ ꓟ ꓧꓪꓽ ꓒꓴ ꓫꓵꓽ ꓥꓳꓽ ꓔꓯˍ ꓟꓲ ꓢꓳ ꓪꓴꓸ ꓔꓴ ꓡ ꓟ ꓗꓪ app ꓕꓱ ꓟ ꓠꓬ ꓬꓰ ꓙ ꓓꓴ ꓓꓽ ꓟ ꓕꓲ ꓚꓱꓹ ꓥ ꓡꓳ꓾ ꓐꓰ The Lisu Times ꓓꓳꓽ ꓗꓪ ꓐꓯ ꓔ ꓡꓳ=

ꓚꓬꓹ ꓟꓬꓱꓼ ꓐꓶ ꓝꓲꓸ ꓠꓻ ꓠꓷꓼ ꓡꓰ ꓢꓴ ꓕꓲ ꓟꓲ ꓠꓯ ꓡꓱꓸꓼ ꓗꓪ 219 ꓣꓳ ꓛꓺ ꓙꓳ ꓡˍ ꓐꓰ Europe ꓗꓴꓷꓼ ꓠꓻ ꓫꓵꓽ ꓜꓴꓻ ꓡꓰ ꓐꓯ ꓟ ꓓꓳꓽ

ꓠꓬꓲꓸ ꓠꓬꓲ ꓗꓪ ꓛꓲꓺ ꓢꓷꓸ ꓪˍ ꓟ ꓓꓳꓽ ꓗꓪ ꓟꓲ ꓠꓯ ꓗꓴꓷꓼ ꓗꓪ ꓚꓬꓹ ꓟꓬꓱꓼ ꓐꓶ ꓝꓲꓸ ꓠꓻ ꓠꓷꓼ ꓡꓰ ꓢꓴ 219 ꓣꓳ ꓗꓪ ꓛꓲꓺ ꓙꓳ ꓡ ꓔꓬ ꓟ ꓔꓯ Europe ꓠꓻ ꓫꓵꓽ ꓚꓱꓹ ꓔꓯ ꓟꓳꓸ ꓧꓪꓺ ꓟꓰꓹ ꓠꓬꓲ ꓜꓴꓻ ꓐꓴ ꓡꓰ ꓐꓯ ꓑꓶ ꓔ ꓡꓳ=

ꓠꓻ ꓕꓱ ꓟ ꓠꓬ Europe ꓗꓴꓷꓼ ꓮ ꓟꓬꓹ ꓗꓪ ꓒꓬꓱꓼ ꓔꓬ ꓟ ꓥ ꓢꓲ ꓠꓬꓲ ꓗꓴꓷꓼ 12 ꓗꓴꓷꓼ ꓟꓽ ꓞꓲꓺ ꓠꓷꓼ ꓔꓬ ꓟ ꓥ ꓡꓳ=

ꓕꓱ ꓟ ꓠꓬ Europe ꓗꓴꓷꓼ ꓐꓴ ꓗꓪ ꓬꓲ ꓪꓴꓸ ꓓꓽ ꓪꓴꓸ ꓒꓬꓱꓼ ꓡ ꓔꓬ ꓟ ꓥ ꓡꓳ= ꓠꓻ ꓕꓱ ꓟ ꓮ ꓟꓬꓹ ꓒꓬꓱꓼ ꓔꓬ ꓟ ꓐꓶ ꓓꓵꓽ Africa ꓐꓰ ꓔꓱꓹ ꓫꓵ ꓮ-ꓩ-ꓣꓸ-ꓗ ꓗꓴꓷꓼ ꓐꓴ ꓠꓬ ꓙ ꓡꓯ ꓘꓳꓹ ꓟ꓾ ꓕꓲ ꓗꓴꓷꓼ ꓐꓰ ꓕꓲ ꓗꓴꓷꓼ ꓓꓴ ꓓꓳˍ ꓟ ꓟꓽ ꓙꓳ ꓙꓳ ꓠꓻ ꓠꓷꓼ ꓬꓰ ꓔꓬ ꓟ ꓥ ꓡꓳ꓾ ꓐꓰ ꓠꓻ ꓫꓵꓽ ꓔꓯ ꓟꓳꓸ ꓧꓪꓺ ꓟꓰꓹ ꓠꓬꓲ ꓜꓴꓻ ꓐꓴ ꓡꓰ ꓐꓯ ꓑꓶ ꓔ ꓟ ꓗꓪ ꓐꓯ ꓔ ꓡꓳ꓾ ꓐꓰ Popular News Journal ꓓꓳꓽ ꓗꓪ ꓐꓯ ꓔ ꓡꓳ=

ꓛꓲ-ꓒꓪꓰ ꓐꓰ ꓢꓮꓪꓸ-ꓡꓮꓪꓽ ꓙ ꓖꓴ ꓗꓪ ꓡꓳꓽ ꓓꓳ ꓧꓳꓹ ꓡ ꓢꓲ ꓟꓳ ꓓꓳ ꓙ ꓖꓴ ꓛꓵꓽ ꓡꓰ ꓟ ꓓꓳꓽ

ꓗ-ꓛꓲ ꓗꓴꓷꓼ ꓫꓴ꓾ ꓛꓲ-ꓒꓪꓰ꓾ ꓒꓲ-ꓟꓮꓪ꓾ ꓢꓮꓪꓸ-ꓡꓮꓪꓽ ꓟꓳꓽ ꓓꓳ ꓙꓰ ꓙ ꓖꓴ ꓗꓪ ꓕꓱ ꓠꓬꓲꓽ ꓢ ꓠꓬꓲ ꓕꓯ ꓟꓶꓽ ꓦ ꓮ ꓟꓬꓹ ꓦ ꓡˍ ꓟ ꓪꓴꓸ ꓠꓬꓲ ꓡꓳꓽ ꓓꓳ ꓧꓳꓹ(ꓡꓽ ꓧꓳ ꓧꓳꓹ) ꓡ ꓢꓲ ꓟꓳ ꓓꓳ ꓙ ꓖꓴ ꓛꓵꓽ ꓡꓰ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓟꓶ ꓦ ꓦ ꓡ ꓠꓬ ꓡꓳꓽ ꓓꓳ ꓧꓳꓹ(ꓡꓽ ꓧꓳ ꓧꓳꓹ)  ꓡ ꓢꓲ ꓠꓬꓲ ꓙꓰ ꓟꓽ ꓓ= ꓙ ꓖꓴ ꓗꓪ ꓡꓰꓽ ꓬꓲꓼ ꓔ ꓪ ꓡꓰꓳ= ꓓꓯꓻˍ ꓟꓲ ꓓꓯꓻ ꓙꓰ ꓟꓽ ꓑꓶꓸ꓾ ꓙ ꓖꓴ ꓠꓯꓸ ꓘꓪ ꓬꓯꓼ ꓙꓰˍ ꓥˍ ꓟꓲ ꓙ ꓖꓴ ꓬꓲꓹ ꓡꓵꓼˍ ꓠꓬꓲ ꓙ ꓖꓴ ꓗꓪ ꓡꓰꓽ ꓔꓬ ꓠ ꓗꓷ ꓡꓰꓳ꓾ ꓐꓰ ꓓꓴ ꓓꓳ ꓙꓰ ꓢꓴ ꓕꓲ ꓣꓳ ꓡꓰ ꓐꓯ ꓔ ꓡꓳ=

ꓮ ꓟꓶ ꓠꓬ ꓟꓶ ꓦ ꓟꓽ ꓠꓽ ꓠꓽ ꓡꓲꓺ ꓔꓬ ꓟ ꓪꓴꓸ ꓠꓬꓲ ꓙ ꓖꓴ ꓠꓬ ꓕꓱ ꓟ ꓕꓯꓽ ꓢꓲꓺ ꓫꓸ ꓓꓴ ꓙꓳ ꓡ ꓟ ꓔꓯ ꓓꓴ ꓓꓳ ꓙꓰ ꓢꓴ ꓑ ꓫꓬ ꓐꓴ ꓙꓳꓺ ꓔꓬ ꓡꓳ꓾ ꓐꓰ Myitkyina News Journal ꓗꓪ ꓐꓯ ꓔ ꓡꓳ=

ꓟꓲ-ꓚꓲ-ꓠ ꓗꓪ ꓟ ꓟꓯꓼ ꓛꓰꓹ ꓑꓬ ꓢꓴ 600 ꓣꓳ ꓛꓲꓺ ꓚꓲꓸ ꓛꓬ ꓔꓬ ꓟꓵꓽ ꓗꓪ ꓬꓲꓼ ꓙꓰˍ ꓟ

ꓗ-ꓛꓲ ꓗꓴꓷꓼ ꓫꓴ ꓟꓲ-ꓚꓲ-ꓠꓽ ꓡꓳ ꓒꓱ ꓗꓪ 11 ꓘꓳꓼ ꓛꓲꓺ ꓛꓰꓹ ꓑꓬ ꓔꓬ ꓟ ꓑ ꓫꓬ 600 ꓣꓳ ꓛꓲꓺ ꓠꓬ ꓥꓪꓽ ꓦ 25 ꓠꓬꓲ ꓠꓯꓼ ꓕꓯ ꓚꓲꓸ ꓛꓬ ꓔꓬ ꓖꓴ ꓟꓵꓽ ꓗꓪ ꓬꓲꓼ ꓙꓰ ꓗꓷꓳ꓾ ꓐꓰ ꓟꓯꓼ ꓛꓰꓹ ꓑꓬ ꓢꓴ ꓔꓯ ꓬꓰ ꓙ ꓔꓬ ꓟ ꓗ-ꓛꓲ ꓖꓳ ꓓꓱꓽ ꓔꓲꓹ ꓘꓴ ꓜꓲꓼ ꓞꓳ ꓜꓴꓻ KBC ꓡꓰ ꓐꓯ ꓡꓳ=

ꓓꓶꓽ ꓡꓯ ꓘꓳ ꓢꓰꓼ ꓡꓯ ꓘꓳꓹ ꓟ ꓪꓴꓸ ꓠꓬꓲ ꓟꓲ-ꓚꓲ-ꓠ ꓡꓳ ꓒꓱ ꓗꓪ ꓛꓰꓹ ꓑꓬ ꓔꓬ ꓗꓷ ꓟ ꓑ ꓫꓬ ꓕꓲ ꓫꓬꓹ ꓟꓽ ꓛꓲꓺ ꓘꓴꓽ ꓗꓪ ꓐꓰ 600 ꓣꓳ ꓛꓲꓺ ꓬꓲ ꓪ ꓔꓬ ꓟꓵꓽ ꓗꓪ ꓬꓲꓼ ꓙꓰ ꓐ ꓡˍ ꓟ ꓥ ꓡꓳ꓾ ꓐꓰ KBC ꓜꓴꓻ ꓢꓽ ꓡ ꓙꓵꓽ Dr. Hka Lam Samsun ꓡꓰ ꓐꓯ ꓡꓳ=

ꓮ ꓟꓶ ꓬꓲ ꓪ ꓔꓬ ꓟꓵꓽ ꓗꓪ ꓬꓲꓼ ꓙꓰ ꓗꓷ ꓢꓴ ꓐꓴ ꓠꓬ ꓟꓲ-ꓚꓲ-ꓠ ꓡꓳ ꓒꓱ ꓗꓪ ꓙꓳˍ ꓟ ꓙꓬ-ꓟꓮꓲ-ꓗꓮꓳ ꓐꓰ ꓟꓯ-ꓘꓰꓠ ꓢ-ꓬ-ꓗ-ꓕꓮꓳ ꓐꓯ-ꓔ-ꓡꓲ ꓟꓯꓼ ꓛꓰꓹ ꓑꓬ ꓔꓶꓸ ꓗꓪ ꓔꓬ ꓢꓴ ꓥ ꓢꓲ ꓬꓲ ꓪ ꓔꓬ ꓖꓴ ꓥ ꓟ ꓬꓰ-ꓚꓬꓲ꓾ ꓗꓮꓳ-ꓣ꓾ ꓔꓮꓲ-ꓡꓯꓠꓸ꓾ ꓦꓳ-ꓗꓯꓸ ꓘꓹ ꓐꓴ ꓗꓪ ꓬꓲꓼ ꓙꓰ ꓗꓷ ꓟ ꓥ ꓡꓳ= ꓬꓲ ꓪ ꓠꓬ ꓗꓳꓸ ꓗꓷ ꓟ 2011 ꓘꓳꓼ ꓕꓯ ꓟꓯꓼ ꓐꓰ KIA ꓐꓴ ꓠꓬꓲꓽ ꓗꓴꓸ ꓚꓸꓼ ꓗꓪ ꓓꓶꓽ ꓡꓯ ꓘꓳˍ ꓟ ꓪꓴꓸ ꓠꓬꓲ ꓟꓲ-ꓚꓲ-ꓠ ꓡꓳ ꓒꓱ ꓗꓪ ꓛꓰꓹ ꓑꓬ ꓡ ꓟ ꓥ ꓡꓳ꓾ ꓐꓰ RFA ꓓꓳꓽ ꓗꓪ ꓐꓯ ꓔ ꓡꓳ=