ꓠꓬꓲꓸ ꓠꓬꓲ ꓟ ꓐꓱ ꓶ ꓓꓳꓽ

(1) ꓟꓬ-ꓟ ꓗꓴꓷꓼ ꓡꓲ-ꓢꓴ ꓕꓳ ꓶ ꓐꓰ ꓡꓲꓽ ꓒꓰ ꓜꓴ ꓚꓰ ꓘꓳꓼ ꓚꓳ ꓖꓪ ꓙꓱ ꓜꓲꓼ ꓓꓴ ꓬꓰˍ ꓟ ꓓꓳꓽ

ꓟꓬ-ꓟ ꓗꓴꓷꓼ ꓡꓲ-ꓢꓴ ꓕꓳꓽ ꓶ ꓐꓰ ꓡꓲꓽ ꓒꓰ ꓜꓴꓻ ꓚꓰ ꓘꓳꓼ ꓚꓳ ꓖꓪ ꓙꓱ ꓜꓲꓼ ꓓꓴ ꓔꓯ ꓠꓬꓲꓸ ꓠꓬꓲ 3 ꓦ 25 ꓠꓬꓲ ꓕꓯ ꓟꓶ-ꓚꓲ-ꓠ ꓡꓳ ꓒꓱ ꓡꓲ-ꓢꓴ ꓡꓲꓽ ꓒꓰꓼ ꓟꓵꓽ ꓔꓶꓸ ꓗꓪ ꓬꓰ ꓗꓷꓳ=

ꓖꓪ ꓙꓱ ꓜꓲꓼ ꓓꓴ ꓗꓪ ꓟꓶ-ꓚꓲ-ꓠ꓾ ꓖ-ꓟꓶ-ꓓꓲ꓾ ꓪꓮꓲ-ꓟꓳ꓾ ꓔ-ꓠꓮꓲ꓾ ꓘꓳꓥ-ꓡ-ꓒꓷ꓾ ꓐ-ꓟꓳ꓾ ꓢꓲ-ꓓꓳ꓾ ꓑꓬꓲ-ꓳ-ꓡꓪꓲꓠ꓾ ꓒ-ꓗꓸ ꓗꓪ ꓐꓰ ꓜꓲꓼ ꓛꓲ ꓡ ꓢꓲ ꓮ ꓙꓵꓽ 85 ꓣꓳ ꓥ ꓡꓳ= ꓝꓮꓲ 26 ꓠꓬꓲ ꓗꓪ ꓠꓬ ꓡꓲꓽ ꓒꓰ ꓜꓴ ꓚꓰ ꓟꓬꓱꓽ ꓟꓯꓻ ꓢꓴ ꓔꓯ ꓢꓲꓺ ꓠꓹ ꓟ ꓥ ꓡꓳ꓾ ꓐꓰ ꓢꓷꓸ ꓪˍ ꓡꓳ=

(2) ꓗꓽ-ꓬꓸ ꓗꓴꓷꓼ ꓫꓴ ꓘꓴꓽ ꓗꓪ ꓗꓴꓷꓼ ꓫꓵꓽ ꓪꓴ ꓪꓴꓸ ꓠꓬꓲ ꓛꓰꓹ ꓑꓬ ꓔꓬ ꓢꓴ ꓬꓲ ꓫꓬꓹ ꓟꓽ ꓞꓲꓺ ꓠꓬ ꓜꓽ ꓓꓴ ꓫꓸ ꓡꓰ ꓔꓬ ꓟ ꓔꓯ ꓔꓳꓹ ꓜꓳꓽ ꓔꓬ ꓟ

ꓗꓴꓷꓼ ꓫꓴ ꓑ ꓫꓬ 3 ꓫꓬꓹ ꓛꓲꓺ ꓙꓳˍ ꓟ ꓗꓽ-ꓬꓸ ꓗꓴꓷꓼ ꓫꓴ ꓗꓪ ꓟꓯꓼ ꓛꓰꓹ ꓑꓬ ꓔꓬ ꓪ ꓢꓴ 2 ꓫꓬꓹ ꓗꓪ ꓛꓲꓺ ꓙꓳ ꓡ ꓟ ꓥ ꓢꓲ ꓬꓲ ꓪ ꓐꓴ ꓠꓬ ꓜꓽ ꓓꓴ ꓓꓳ ꓓꓴ ꓫ ꓡꓰ ꓔꓬ ꓟ ꓔꓯ ꓔꓳꓹ ꓜꓳꓽ ꓔꓬ ꓪˍ ꓡꓳ=

ꓓꓶꓽ ꓡꓯ ꓘꓳ ꓟꓯꓼ ꓐꓴ ꓡꓰ ꓥꓪ ꓠꓴꓽ ꓗꓴꓷꓼ ꓫꓴ ꓘꓴꓽ ꓗꓪ ꓜꓻ ꓒꓴ ꓔꓯꓹ ꓓꓵꓽ ꓡˍ ꓟ ꓔꓯ ꓗꓽ ꓔ ꓡꓳ= ꓮ ꓡꓲ ꓕꓲ ꓜꓴꓻ ꓗꓪ ꓐꓰˍ ꓟꓲ ꓜꓻ ꓒꓴ ꓔꓯꓹ ꓓꓵꓽ ꓡ ꓟ ꓓ ꓟ ꓡꓰꓽ ꓟꓽ ꓞꓲꓺ ꓶꓻ ꓡꓯꓼ ꓬꓰ ꓢꓴ ꓮ ꓡꓲ ꓕꓲ ꓣꓳˍ ꓟꓲ ꓚꓬꓻ ꓢꓲ (ꓳ ꓚꓬꓼ) ꓮ ꓟꓬꓹ ꓣꓴꓻ ꓓꓵꓽ ꓡ ꓟꓽ ꓓ= ꓥꓪ ꓠꓴꓽ ꓔꓳꓹ ꓙ ꓜꓴꓻ ꓐꓴ ꓡꓰ ꓟꓯꓼ ꓛꓰꓹ ꓑꓬ ꓔꓬ ꓢꓴ ꓐꓴ ꓔꓯ ꓠꓬꓲꓽ ꓠꓽ ꓕꓲ ꓧꓪꓹ ꓜꓽ ꓓꓴ ꓐꓱꓻ ꓖꓶ ꓔꓬ ꓟ ꓥ ꓢꓲ ꓠꓬꓲ꓾ ꓬꓲ ꓪ ꓐꓴ ꓐꓱ ꓶ ꓠꓬꓲꓽ ꓠꓽ ꓗꓪ ꓐꓰ ꓦ ꓐ ꓕꓲ ꓟ ꓐꓱ ꓶˍ ꓡꓰꓽ ꓙꓳˍ ꓡꓳ꓾ ꓐꓰ ꓗꓽ-ꓬꓲ-ꓠꓲ ꓞꓳ ꓤ ꓪ ꓙꓵꓽ ꓪ ꓜꓴꓻ ꓗꓪ ꓟ ꓓ-ꓣꓮꓲ-ꓔ ꓐ-ꓠꓬꓸ-ꓧꓯ ꓡꓰ ꓐꓯ ꓔ ꓡꓳ꓾ ꓐꓰ ꓐꓐꓚ ꓓꓳꓽ ꓗꓪ ꓐꓯ ꓔ ꓡꓳ=

(3) ꓟꓳꓸ-ꓠꓯꓸ ꓡꓳ ꓒꓱ ꓗꓳꓸ-ꓟ-ꓜꓲ-ꓡꓰ ꓘꓹ ꓗꓪ ꓡꓲ-ꓢꓴ ꓤ ꓠꓱ ꓤ ꓐꓴ ꓔꓯ ꓡꓲ-ꓢꓴ ꓕꓳ ꓶꓽ ꓐꓰ ꓟꓴꓽ ꓖꓪ ꓟꓸ ꓖꓶ ꓔꓬ ꓟ ꓓꓳꓽ

Taunggyi ꓢꓽ-ꓢꓶ-ꓠ ꓟꓳꓸ-ꓠꓯꓸ ꓡꓳ ꓒꓱ꓾ ꓗꓳꓸ-ꓟ-ꓜꓲ-ꓡꓰ ꓘꓹ ꓗꓪ 3 ꓦ 23 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓟꓸ ꓒ ꓐꓬ-ꓔ Francis ꓡꓰ ꓧꓳꓽ ꓪꓴꓸ ꓟꓴ ꓢꓲ ꓠꓬꓲ ꓘꓹ ꓗꓪ ꓟ ꓡꓲ-ꓢꓴ ꓤ ꓠꓱ ꓤ ꓐꓴ ꓔꓯ ꓡꓲ-ꓢꓴ ꓕꓳ ꓶ ꓐꓰ ꓟꓴꓽ ꓖꓪ ꓟꓸ ꓖꓶ ꓔꓬ ꓡꓳ=

Taunggyi ꓢꓽ-ꓢꓶ-ꓠ ꓟꓳꓸ-ꓠꓯꓸ ꓡꓳ ꓒꓱ꓾ ꓗꓳꓸ-ꓟ-ꓜꓲ-ꓡꓰ ꓘꓹ ꓗꓪ ꓙꓰ ꓢꓲ ꓡꓲ-ꓢꓴ ꓕꓳꓽ ꓶ ꓟꓸ ꓖꓶ ꓔꓬ ꓟ ꓟꓸ ꓒ ꓟꓸ ꓟ ꓐꓴ ꓠꓬ ꓡ-ꓫꓬꓳ ꓢꓽ-ꓢꓶ-ꓠ꓾ ꓡ-ꓫꓬꓳ ꓡꓳ ꓒꓱ ꓗꓪ ꓐꓰ ꓟꓸ ꓒ ꓐꓬ-ꓔ Francis ꓾ ꓟꓸ ꓟ Regina GU-S-MI꓾ ꓐꓬ-ꓡꓴ-ꓡꓴ-ꓤ꓾ ꓠ-ꓟ-ꓔꓴ ꓡꓳ ꓒꓱ ꓗꓪ ꓐꓰ ꓟꓸ ꓟ ꓡꓲꓽ-ꓔ-ꓟꓲ꓾ ꓟꓸ ꓟ ꓡꓲꓺ-ꓡꓰ-ꓟꓲ꓾ ꓟꓴ-ꓖꓴ ꓡꓳ ꓒꓱ ꓗꓪ ꓐꓰ ꓟꓸ ꓟ ꓡꓲꓽ-ꓢꓲ-ꓟꓲ꓾ ꓡꓲ-ꓠ ꓖꓴ-ꓔ-ꓟꓲ ꓐꓴ ꓬꓲ ꓪ ꓫꓵꓽ ꓣꓳ ꓗꓪ ꓐꓰ ꓟꓸ ꓖꓶ ꓔꓬ ꓟ ꓥ ꓡꓳ=

ꓡꓲ-ꓢꓴ ꓕꓳꓽ ꓶ ꓟꓸ ꓔꓬ ꓟ ꓠꓬ ꓢꓯꓸ ꓬꓲꓼ ꓡ ꓑꓮꓲꓽ ꓥ ꓟ 4 ꓦ 17 ꓠꓬꓲ ꓗꓪ ꓛꓲꓺ ꓟꓸ ꓓꓴ ꓥꓳ꓾ ꓐꓰ ꓢꓷꓸ ꓪˍ ꓡꓳ=

(4) ꓔꓲꓺ ꓒ ꓪ ꓔꓲ Francis ꓠꓬ ꓣ-ꓫ ꓐꓰ ꓬꓴ-ꓗ-ꓣꓲꓸ ꓔꓯ ꓢꓲꓽ ꓫꓬꓹ ꓟ ꓟꓹ ꓟ ꓟ-ꓡꓲ ꓠꓲꓹ ꓟ ꓠꓯꓸꓼ ꓗꓪ ꓡꓯ ꓙꓱ ꓓꓴ ꓬꓰ ꓠꓹ ꓟ ꓐꓯ ꓔ ꓟ ꓓꓳꓽ

ꓔꓲꓺ ꓒ ꓪ ꓔꓲ Francis ꓠꓬ ꓠꓬꓲꓸ ꓠꓬꓲ 3 ꓦ 25 ꓠꓬꓲ ꓕꓯ ꓣ-ꓫ ꓐꓰ ꓬꓴ-ꓗ-ꓣꓲꓸ ꓔꓯ ꓢꓲꓽ ꓫꓬꓹ ꓟ ꓟꓹ ꓟ ꓟ-ꓡꓲ ꓠꓲꓹ ꓟ ꓠꓯꓸꓼ ꓗꓪ ꓡꓯ ꓙꓱ ꓓꓴ ꓬꓰ ꓠꓹ ꓟ ꓔꓯ 3 ꓦ 15 ꓠꓬꓲ꓾ ꓠꓽ ꓠꓬꓲꓽ ꓠꓬꓲ ꓕꓯ Vatican ꓓꓳꓽ ꓣꓳꓸˍ ꓗꓪ ꓐꓯ ꓑꓶ ꓗꓷꓳ=

3 ꓦ 25 ꓠꓬꓲ꓾ ꓠꓬꓲꓸ ꓠꓬꓲ ꓠꓬ ꓟꓴ ꓗꓪ ꓝꓲ ꓓꓴ ꓡꓰ ꓟ-ꓡꓲ-ꓬ ꓔꓯ ꓶꓼ ꓓꓳꓽ ꓫꓱꓹ ꓓꓳꓽ ꓐꓯ ꓖꓶˍ ꓟ ꓑꓮꓲꓽ ꓥ ꓡꓳ= ꓠꓬꓲꓸ ꓠꓬꓲ ꓟꓶꓽ ꓘꓶꓽ ꓲ-ꓔ-ꓡꓲ ꓫꓵꓽ ꓫꓵ 5 ꓙꓵꓹ꓾ ꓟꓬ-ꓟ ꓙꓵꓹ ꓟꓶꓽ ꓘꓶꓽ 10ꓽ30 ꓕꓯ꓾ ꓙꓲꓻ ꓫꓬ ꓢꓴ ꓒꓲ-ꓕꓱ ꓐ-ꓢꓲ-ꓡꓲ-ꓗ ꓪꓽ ꓘꓴ ꓦꓲ ꓗꓪ ꓝꓴꓲꓸ ꓐꓱ ꓶ ꓠꓲꓹ ꓟ ꓡꓶˍ ꓟ ꓙꓵꓹ ꓔꓯ ꓔꓲꓺ ꓒ ꓪ ꓔꓲ ꓡꓰ ꓧꓳꓽ ꓣꓱꓽ ꓢꓲ ꓠꓬꓲ ꓔꓲꓺ ꓖꓶ ꓡꓯꓼ ꓙꓱ ꓓꓴ ꓔꓯ ꓬꓰ ꓠꓹ ꓟ ꓥ ꓡꓳ=

1984 ꓘꓳꓼ 3 ꓦ 25 ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓬꓳ-ꓦ ꓒꓳ-ꓡꓳ(2) ꓥˍ ꓟꓲ ꓣ-ꓫ ꓗꓴꓷꓼ ꓐꓰ ꓟꓲ ꓠꓯ ꓔꓯ ꓟꓹ ꓟ ꓟ-ꓡꓲ ꓬꓲ ꓠꓲꓹ ꓟ ꓔꓯ ꓡꓯꓼ ꓙꓱ ꓗꓷꓳ= ꓟꓽ ꓟꓶ ꓫꓵ ꓟ ꓦꓬꓼ ꓠꓬꓲ ꓕꓯ ꓬꓴ-ꓗ-ꓣꓲꓸ ꓔꓲꓺ ꓒ ꓓꓽ ꓐꓴ ꓡꓰ ꓣ-ꓫ ꓐꓰ ꓬꓴ-ꓗ-ꓣꓲꓸ ꓗꓴꓷꓼ ꓐꓴ ꓔꓯ ꓢꓲꓽ ꓫꓬꓹ ꓟ ꓟꓹ ꓟ ꓟ-ꓡꓲ ꓠꓲꓹ ꓟ ꓠꓯꓸꓼ ꓗꓪ ꓡꓯꓼ ꓙꓱ ꓖꓶ ꓠꓹ ꓟ ꓔꓲꓺ ꓒ ꓪ ꓔꓲ ꓔꓬ ꓗꓪ ꓕꓳꓽ ꓶ ꓐꓳ ꓩꓴ ꓔ ꓟˍ ꓟꓲ ꓙꓳˍ ꓡꓳ꓾ ꓐꓰ Vatican ꓓꓳꓽ ꓗꓪ ꓐꓯ ꓔ ꓡꓳ=