ꓠꓬꓲꓸ ꓠꓬꓲ ꓟ ꓓꓳꓽ

ꓟꓶꓽ-ꓚꓲ-ꓠꓽ ꓗꓪ ꓛꓰꓹ ꓑꓬ ꓡ ꓟ (ꓘꓰꓹ ꓑꓬ ꓡ ꓟ) ꓑꓴ-ꓔ-ꓳ ꓑ ꓫꓬ ꓐꓴ ꓜꓽ ꓓꓴ ꓐꓰ ꓠꓯꓻ ꓞꓲꓼ ꓣꓱꓽ ꓞꓹ ꓔꓬ ꓟ

ꓟꓯꓼ ꓓꓶꓽ ꓡꓯ ꓘꓳꓹ ꓟ ꓪꓴꓸ ꓠꓬꓲ ꓟꓶꓽ-ꓚꓲ-ꓠꓽ ꓗꓪ ꓛꓰꓹ ꓑꓬ ꓡ ꓟ ꓑꓴ-ꓔ-ꓳ ꓡꓳ ꓒꓱ ꓡꓴ-ꓫꓬ-ꓬꓮꓥ ꓘꓹ ꓗꓪ ꓟ ꓑ ꓫꓬ 800 ꓣꓳ ꓟꓽ ꓞꓲꓺ ꓐꓱ ꓶ ꓜꓽ ꓓꓴ ꓐꓰ ꓠꓯꓻ ꓞꓲꓼ ꓣꓱꓽ ꓞꓹ ꓔꓬ ꓡꓳ꓾ ꓐꓰ ꓢꓷ ꓪˍ ꓡꓳ=

ꓟꓶꓽ-ꓚꓲ-ꓠꓽ ꓡꓳ ꓒꓱ ꓗꓪ ꓟꓯꓼ ꓘꓶꓽ ꓗꓪ ꓐꓰ ꓛꓰꓹ ꓑꓬ ꓡ ꓢꓴ ꓐꓴ ꓐꓱ ꓶ ꓔꓬ ꓖꓴ ꓟꓽ ꓙ ꓖꓶ ꓔ ꓟ ꓪꓴꓸ ꓠꓬꓲ ꓬꓲ ꓪ ꓐꓴ ꓐꓰ ꓠꓶꓽ ꓞꓹ ꓟ ꓗꓪ ꓔꓬ ꓪˍ ꓟ ꓥ ꓢꓲ꓾ ꓞꓳ ꓫꓵꓽ ꓜꓴꓻ ꓗꓪ ꓐꓰ ꓬꓰ ꓙˍ ꓟ ꓙꓳˍ ꓥ ꓟꓲ ꓟꓶ ꓤ ꓐꓱ ꓶ ꓠꓬ ꓓꓵꓽ ꓙ ꓫꓸ ꓓꓴ ꓙꓳˍ ꓡꓳ꓾ ꓐꓰ ꓬꓲ ꓪ ꓐꓴ ꓔꓯ ꓬꓰ ꓙ ꓢꓴ ꓡꓰ ꓐꓯ ꓡꓳ=

“ꓞꓳ ꓫꓵꓽ ꓜꓴꓻ ꓗꓪ ꓐꓰ ꓜꓻ꓾ ꓧꓪꓽ ꓞꓶꓻ꓾ ꓮꓸ ꓡꓴꓽ ꓖꓪ ꓓꓴ ꓬꓰ ꓙ ꓡꓻꓳ= ꓘꓴ-ꓜꓲ-ꓞꓳ ꓗꓪ ꓐꓰˍ ꓟꓲ ꓬꓰ ꓙ ꓡˍ ꓟ ꓙꓳˍ ꓡꓳ= ꓔꓳꓹ ꓙ ꓡ ꓟ ꓜ ꓠꓬ ꓕꓲ ꓫꓵꓽ ꓠꓽ ꓐꓱ ꓶ ꓡꓳꓼˍ ꓥ ꓟꓲ ꓟꓶ ꓤ ꓐꓱ ꓶ ꓠꓽ ꓫˍ ꓡꓳ= ꓦꓲꓻ ꓘꓴ ꓡ ꓞꓳ ꓟꓬꓽ ꓢꓴ ꓐꓱ ꓶ ꓠꓽ ꓟꓽ ꓡꓳꓼ꓾” ꓐꓰ ꓐꓯ ꓡꓳ=

ꓮ ꓟꓶ ꓠꓬ ꓡꓴ-ꓫꓬ-ꓬꓮꓥ ꓗꓪ ꓐꓰ ꓟꓯꓼ ꓛꓰꓹ ꓑꓬ ꓡ ꓢꓴ ꓐꓴ ꓠꓬ ꓟꓶꓽ-ꓚꓲ-ꓠꓽ ꓡꓳ ꓒꓱ ꓔꓯꓸ꓾ꓗꓳꓸ ꓣ-ꓓ-ꓗꓮꓳ꓾ ꓕꓳꓲ-ꓢꓮꓠ꓾ ꓣꓮꓠ-ꓑꓴ ꓾ ꓢꓲ-ꓔ-ꓑꓴ ꓘꓹ ꓐꓰ ꓴ-ꓐꓲꓸꓼ ꓗꓪ ꓟ ꓪꓽ ꓘꓴ ꓦꓲꓻ꓾ ꓫꓵꓽ ꓤ ꓧꓪ ꓤ ꓦꓲ ꓐꓰ ꓔꓬ ꓖꓴ ꓦꓲꓻ ꓥꓪꓸ ꓢꓲ ꓔꓬ ꓪˍ ꓡꓳ꓾ ꓐꓰ ꓢꓷꓸ ꓪˍ ꓡꓳ=

ꓟꓶꓽ-ꓚꓲ-ꓠ ꓡꓳ ꓒꓱ ꓗꓪ ꓟꓯꓼ ꓛꓰꓹ ꓑꓬ ꓔꓬ ꓟ ꓡꓴ-ꓫꓬ-ꓬꓮꓥ ꓗꓪ ꓐꓰ ꓡ ꓢꓴ ꓞꓳ ꓦꓲꓻ ꓮ ꓙꓵꓽ ꓠꓬ 280 ꓦꓲꓻ ꓥ ꓢꓲ꓾ ꓞꓳ ꓤ ꓮ ꓙꓵꓽ ꓠꓬ 800 ꓣꓳ ꓟꓽ ꓞꓲꓺ ꓙꓳˍ ꓡꓳ꓾ ꓐꓰ The 74 Media ꓓꓳꓽ ꓗꓪ ꓐꓯ ꓔ ꓡꓳ=

2023 ꓘꓳꓼ ꓟꓵꓽ ꓗꓳꓹ ꓓꓵ ꓓꓵ ꓞꓳ ꓡꓱ ꓦꓬꓼ ꓠꓬꓲ ꓐꓱ ꓶ ꓙ ꓖꓶ ꓔꓬ ꓟ ꓡꓲ-ꓐꓴꓠ ꓞꓳ ꓡꓱ ꓐꓴ ꓔꓯ ꓔꓲꓺ ꓒ ꓪ ꓔꓲ Francis ꓡꓰ ꓢꓯꓼ ꓖꓶ ꓫ ꓕꓱˍ ꓟ

2019 ꓘꓳꓼ ꓑ-ꓠꓹ-ꓟꓸ ꓗꓪ ꓟꓵꓽ ꓗꓳꓹ ꓓꓵ ꓓꓵ ꓞꓳ ꓡꓱ ꓐꓴ ꓑꓮꓲꓽ ꓔꓯ ꓘꓳꓹ ꓣꓴ ꓢꓲ ꓬꓰ ꓔꓬ ꓕꓯ ꓔꓲꓺ ꓒ ꓪ ꓔꓲ ꓡꓰ ꓡ ꓠꓹ ꓟ 2023 ꓘꓳꓼ ꓟꓵꓽ ꓗꓳꓹ ꓓꓵ ꓓꓵ ꓞꓳ ꓡꓱ ꓐꓴ ꓑꓮꓲꓽ ꓔꓯ ꓑꓳꓪ-ꓔꓴ-ꓖꓲ ꓗꓴꓷꓼ ꓡꓲ-ꓐꓴꓠ ꓡꓳ ꓒꓱ ꓗꓪ ꓬꓰ ꓠꓹ ꓟ ꓢꓷꓸ ꓙ ꓟꓳ ꓙ ꓗꓷ ꓟ ꓔꓯ ꓮ ꓟꓶ ꓕꓯ ꓡꓰ ꓙ ꓖꓶ ꓔꓬ ꓟ ꓡꓲ-ꓐꓴꓠ ꓡꓳ ꓒꓱ ꓢꓴ ꓐꓴ꓾ ꓣꓱꓽ ꓙ ꓞꓳ ꓡꓱ ꓐꓴ꓾ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓘꓶꓽ ꓫ ꓕꓱ ꓗꓷꓳ=

ꓫ ꓓꓴ ꓮ ꓟꓬꓹ ꓔꓳꓹ ꓜꓳꓽ ꓡˍ ꓟ ꓬꓲ ꓘꓴꓽ ꓗꓪ 2023 ꓘꓳꓼ 8 ꓦ ꓐꓱ ꓶ ꓙ ꓖꓶ ꓔꓬ ꓢꓴ ꓐꓴ ꓐꓱ ꓶ ꓠꓬ ꓚꓵ ꓚꓵ ꓓꓵꓽ ꓙ ꓪꓴꓽ ꓧꓶˍ ꓥꓳ= COVID ꓠꓻ ꓫꓵꓽ ꓗꓪ ꓐꓰ ꓫ ꓓꓴ꓾ ꓧꓪ ꓜꓽ ꓧꓪ ꓓꓳ ꓫˍ ꓟ ꓐꓰ ꓮ ꓟꓶ ꓠꓬ ꓟꓵꓽ ꓘꓳꓼ ꓘꓶ ꓡꓶꓽˍ ꓟ ꓟꓯꓼ ꓘꓶꓽ ꓗꓪ ꓣꓳ ꓐꓴ ꓛꓲꓺ ꓡꓻꓳ= ꓖꓳ ꓡꓱ ꓥˍ ꓟꓲ ꓫ ꓓꓴ ꓮ ꓙꓵꓽ ꓔꓯ ꓣꓳ ꓐꓴ ꓕꓲ ꓠꓲꓹ ꓕꓲ ꓪ ꓧꓪꓸ ꓡꓰ ꓠ ꓢꓯꓼ ꓕꓵꓼ ꓡꓯ꓾ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=

ꓫ ꓙꓵ ꓓꓴ ꓔꓳꓹ ꓜꓳꓽ ꓡˍ ꓟ ꓠꓬ ꓞꓳ ꓤ ꓐꓴ ꓔꓯ ꓪ ꓙꓲ ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓠ ꓫꓵꓽ ꓠꓬꓲˍ ꓟ ꓕꓲ ꓟ ꓥ ꓡꓳ꓾ ꓐꓰ ꓐꓯ ꓢꓲ ꓞꓳ ꓡꓱ ꓐꓴ ꓐꓱ ꓶ ꓪꓽ ꓘꓴ ꓖꓶ ꓔꓬ ꓡꓳ꓾ ꓐꓯ ꓢꓲ ꓠꓬꓲ ꓢꓯꓼ ꓖꓶ ꓫ ꓕꓱ ꓘꓶꓽ ꓔꓯ ꓬꓲ ꓟꓶꓽ ꓢꓰꓼ ꓗꓷꓳ=

ꓡꓲ-ꓐꓴꓠ ꓡꓳ ꓒꓱ ꓠꓬ ꓩ-ꓔꓲ-ꓟ ꓐꓰ ꓡꓳ ꓔ 75 ꓕꓷꓹ ꓛꓲˍ ꓡꓰꓽ ꓶꓽˍ ꓟ ꓥ ꓢꓲ ꓞꓳ ꓤ ꓥꓪꓽ ꓫꓬꓹ ꓟꓽ ꓞꓲꓺ ꓔꓬ ꓟ ꓡꓳ ꓒꓱ ꓕꓲ ꓟ ꓥ ꓡꓳ=

ꓟꓵꓽ ꓗꓳꓹ ꓓꓵ ꓓꓵ ꓞꓳ ꓡꓱ ꓐꓴ ꓑꓮꓲꓽ ꓦꓬꓼ ꓠꓬꓲ ꓔꓯ 1985 ꓘꓳꓼ ꓕꓯ ꓙꓲꓻ ꓫꓬ ꓢꓴ ꓔꓲꓺ ꓒ ꓪ ꓔꓲ ꓬꓳ-ꓦ ꓒꓳ-ꓡꓳ 2 ꓡꓰ ꓬꓰ ꓪꓴꓸ ꓔꓴ ꓗꓷ ꓟ ꓥ ꓢꓲ꓾ ꓠꓬꓲꓽ ꓘꓳꓼ ꓥ ꓠꓬ ꓢ ꓘꓳꓼ ꓕꓲ ꓧꓪꓹ ꓐꓰ ꓟꓲ ꓠꓯ ꓗꓴꓷꓼ ꓗꓪ ꓬꓰ ꓔꓬ ꓟ ꓥ ꓡꓳ= ꓕꓲ ꓟꓲ ꓠꓯ ꓡꓱꓸꓼ ꓗꓪ ꓟ ꓗ-ꓕꓳ-ꓡꓲꓗ ꓞꓳ ꓡꓱ ꓐꓴ ꓐꓰ ꓜꓲ ꓡꓯ ꓘꓳ ꓪˍ ꓟ ꓥ ꓡꓳ=

ꓮ ꓔꓳꓸ ꓟꓽ ꓡ ꓟ ꓪꓴꓸ ꓠꓬꓲ ꓬꓮꓥ-ꓖꓳ ꓡꓳ ꓒꓱ ꓑ ꓫꓬ ꓐꓴ ꓓꓳ ꓓꓴ ꓬꓲꓻ ꓙꓬ ꓫ ꓡꓰ ꓟ

ꓬꓮꓥ-ꓖꓳ ꓡꓳ ꓒꓱ ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓮ ꓔꓳꓸ ꓟꓽ ꓡ ꓟ ꓪꓴꓸ ꓠꓬꓲ ꓡꓳ ꓒꓱ ꓗꓪ ꓟ ꓑ ꓫꓬ ꓐꓴ ꓠꓬ ꓓꓳꓻ ꓓꓴ ꓬꓲ ꓙꓬ ꓮ ꓘꓶꓸ ꓫ ꓔꓬ ꓡꓳ=

ꓬꓮꓥ-ꓖꓳ ꓡꓳ ꓒꓱ꓾ ꓖꓴ ꓪꓴꓸ ꓓ-ꓖꓳ ꓟ-ꓦ-ꓟꓬꓮꓲ ꓦꓲ ꓜꓴꓻ ꓗꓪ ꓔꓬ ꓢꓴ ꓐꓴ ꓔꓯ ꓫꓲꓠ-ꓔꓮꓠ-ꓬꓰꓸ ꓬꓰ ꓙ ꓜꓴꓻ ꓡꓰ ꓮ ꓟꓰ 3 ꓦ 9 ꓠꓬꓲ ꓕꓯ ꓓꓳꓻ ꓓꓴ ꓬꓲꓻ ꓙꓬ ꓬꓰ ꓙ ꓗꓷꓳ꓾ ꓐꓰ ꓣꓝꓮ ꓓꓳꓽ ꓗꓪ ꓐꓯ ꓔ ꓡꓳ=

Add new comment

5 + 15 =