ꓡꓲ.-ꓐꓬꓹ ꓗꓪ ꓟꓲꓽ ꓦꓲ ꓕꓳꓽ ꓥꓳꓽ ꓑꓶꓸ ꓓꓴ ꓞꓳ ꓤ 2000 ꓣꓳ ꓛꓲ ꓫꓵꓻ ꓢꓲ꓾ 10ꓹ000 ꓣꓳ ꓛꓲ ꓒꓲꓼ ꓓꓹ ꓟ

ꓡꓲꓸ-ꓐꓬꓹ ꓗꓴꓷꓼ ꓗꓪ ꓓꓯ-ꓠꓲ-ꓬꓯ ꓟꓲꓽ ꓦꓲ ꓕꓳꓽ ꓥꓳꓽ ꓪꓴꓸ ꓠꓬꓲ ꓞꓳ ꓤ 2ꓹ000 ꓣꓳ ꓟꓽ ꓞꓲ ꓫꓵꓻ ꓢꓲ꓾ 10ꓹ000 ꓣꓳ ꓛꓲ ꓒꓲꓼ ꓓꓹ ꓢꓲ ꓠꓬꓲ꓾ ꓬꓲꓻ ꓡꓴꓽ ꓐꓱ ꓓꓽ ꓟ ꓗꓪ ꓟ ꓫꓵꓻ ꓟꓳ ꓐꓴ ꓔꓯ ꓣꓴˍ ꓟ ꓗꓪ ꓬꓰ ꓙ ꓠꓹ ꓟ ꓣꓱꓽ ꓞꓹ ꓔꓬ ꓟ ꓔꓯ ꓡꓲꓸ-ꓐꓬꓹ ꓢꓲꓽ ꓒ ꓓꓽ ꓯ-ꓐ-ꓓꓴ-ꓦ-ꓟꓲꓼ ꓯ-ꓓꓲ-ꓐꓰꓹ-ꓐ ꓡꓰ 9 ꓦ 12 ꓠꓬꓲ ꓕꓯ ꓐꓯ ꓗꓷꓳ=

ꓡꓲꓸ-ꓐꓬꓹ ꓗꓪ ꓠꓯꓻ ꓞꓲꓼ ꓔꓯ ꓟꓳꓸ ꓬꓰ ꓙ ꓔꓳꓹ ꓙˍ ꓟ ꓐꓰ ꓫꓵꓻ ꓟꓳ ꓣꓴ ꓓꓳˍ ꓟ ꓗꓪ ꓣꓱꓽˍ ꓟ ꓙꓼ ꓡꓳꓼ ꓠ ꓛꓲ ꓙꓳˍ ꓟ ꓥ ꓢꓲ꓾ ꓫꓵꓻ ꓟꓳ ꓐꓴ ꓔꓯ ꓬꓲꓻ ꓡꓴꓽ ꓐꓱ ꓓꓽ ꓟ ꓗꓪ ꓐꓰ ꓣꓴ ꓓꓳ ꓠꓹ ꓟ ꓬꓰ ꓙ ꓢꓴ ꓜꓴ ꓐꓴ ꓡꓰ ꓮ ꓘꓶꓸ ꓢꓯꓼ ꓕꓵꓼ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓠꓽ-ꓦꓬꓼ-ꓠꓬꓲ ꓕꓯ ꓡꓰ ꓪꓴꓸ ꓔꓴ ꓗꓷ ꓟ ꓟꓲ-ꓠꓯ-ꓔꓱ-ꓦꓲ-ꓬꓲ-ꓡꓴꓽ-ꓐꓱ ꓟꓲꓽ ꓦꓲ ꓕꓳꓽ ꓥꓳꓽ ꓓꓽ ꓟ ꓑꓶꓸ ꓓꓴ ꓬꓲꓻ ꓙꓬ ꓐꓱ ꓔ ꓟ ꓬꓲꓻ ꓐꓱ ꓐꓴ ꓐꓶꓽ ꓓꓳ ꓡ ꓢꓲ ꓦꓲ ꓮ ꓟꓬꓹ ꓬꓲꓻ ꓙꓬ ꓐꓴ ꓙꓰ ꓢꓲ ꓠꓬꓲ ꓬꓲꓻ ꓙꓬ ꓘꓶꓽ ꓡꓳ ꓒꓱ ꓓꓯ-ꓠ ꓡꓳ ꓒꓱ 4 ꓑꓳ ꓕꓲꓽ ꓑꓳ ꓗꓪ ꓛꓲ ꓐꓬ ꓡꓰ ꓗꓷ ꓟ ꓥ ꓡꓳ=

ꓓꓯ-ꓠ ꓡꓳ ꓒꓱ ꓕꓲ ꓟˍ ꓗꓪ ꓡꓰꓽ ꓫꓵꓻ ꓟꓳ 1000 ꓟꓽ ꓞꓲ ꓔꓯ ꓣꓴ ꓟꓶ ꓡꓰ ꓢꓲ꓾ ꓗꓴꓷꓼ ꓗꓪ ꓫꓵꓻ ꓢꓴ ꓮ ꓟꓬꓹ ꓟꓬꓽ ꓡ ꓓꓴ ꓙꓳˍ ꓡꓳ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓥꓳ ꓡꓳꓸ ꓔ ꓡꓳ꓾ ꓐꓰ ꓢꓷꓸ ꓪ ꓡꓳ=