ꓡꓲ-ꓢꓴ ꓟꓴꓽ ꓖꓪ ꓜꓯꓻ/ꓐꓳ ꓠꓲꓹ ꓡꓱ ꓢꓴ ꓡꓲ-ꓢꓴ ꓫꓵꓽ ꓐꓴ ꓔꓯ ꓔꓯꓺ ꓡꓯ ꓘꓳ ꓠꓹ ꓟ ꓘꓴ ꓔꓬ ꓡꓳ

ꓟꓸ ꓒ ꓮ-ꓢꓲ ꓐꓰ Joy Digital Sound Studio ꓗꓪ ꓐꓰ ꓧꓳꓽ ꓪꓴꓸ ꓟꓴ ꓢꓲ ꓛꓲ ꓡˍ ꓟ 6 ꓦ ꓗꓪ ꓡꓲ-ꓢꓴ ꓟꓴꓽ ꓖꓪ ꓜꓯꓻ/ꓐꓳ ꓔꓯꓺ ꓡꓯ ꓘꓳ ꓓꓴ ꓕꓲ ꓟ ꓬꓰ ꓓꓴ ꓥꓳ꓾ ꓐꓰ ꓢꓷꓸ ꓪ ꓡꓳ=

ꓔꓯꓺ ꓡꓯ ꓘꓳꓹ ꓟ ꓗꓪ ꓜꓯꓻ/ꓐꓳ ꓐ ꓡˍ ꓟ ꓟꓴꓽ ꓖꓪ ꓐꓴ ꓠꓬ ꓡꓲ-ꓢꓴ ꓓꓳ ꓟꓴ ꓟꓴꓽ ꓖꓪ꓾ ꓟꓽ ꓥ ꓠꓬ꓾ ꓠꓵꓻ ꓠꓲꓹ ꓟꓴꓽ ꓖꓪ꓾ ꓟꓽ ꓥ ꓠꓬ ꓡꓲ-ꓢꓴ ꓫꓵꓽ ꓟꓴꓽ ꓖꓪ꓾ ꓠꓲꓹ ꓫꓵˍ ꓟ ꓕꓲ ꓚꓱꓹ ꓐꓳ ꓢꓲ ꓔꓯꓺ ꓐ ꓡˍ ꓟ ꓥ ꓡꓳ= ꓔꓯꓺ ꓡꓯ ꓘꓳꓹ ꓟ ꓗꓪ ꓬꓲ ꓧꓶꓹ ꓖꓶ ꓢꓴ ꓐꓴ ꓠꓬ꓾ ꓟꓸ ꓒ ꓮ-ꓢꓲ꓾ ꓟꓳ-ꓫꓲ꓾ Jesse Khaw Lay꓾ ꓢꓲ-ꓢꓲ-ꓒꓬꓴ꓾ ꓢ-ꓟꓴ-ꓬꓰ ꓐꓴ ꓥ ꓡꓳ=

ꓔꓯꓺ ꓡꓯ ꓘꓳ ꓢꓴ ꓐꓴ ꓠꓬ ꓟꓬꓱ ꓐꓰ ꓕꓲ ꓪ ꓟꓴꓽ ꓖꓪ ꓔꓯ ꓮ4 ꓕꓳꓽ ꓶ ꓒꓬꓽ ꓗꓪ ꓫꓬꓽ ꓫꓬꓽ ꓡꓰ ꓐꓳ ꓢꓲ ꓾ ꓖꓪ ꓧꓳꓽ ꓔ ꓟ ꓢꓯꓼ Audio File ꓐꓰ ꓕꓲ ꓪ ꓖꓶ ꓩꓴ ꓠꓯꓹ ꓟ ꓥ ꓡꓳ= ꓟꓽ ꓥ ꓠꓬ Video ꓥˍ ꓟꓲ ꓖꓶ ꓩꓴ ꓐ ꓡˍ ꓡꓳ=

ꓔꓯꓺ ꓡꓯ ꓘꓳꓹˍ ꓟ ꓗꓪ ꓓꓵꓽ ꓒꓵꓽ ꓠꓬ ꓕꓲ ꓣꓳ (20ꓹ000) ꓖꓶ ꓠꓯꓹ ꓡꓳ ꓐꓰ ꓢꓷꓸ ꓪ ꓟ ꓥ ꓡꓳ= ꓮ ꓟˍ ꓟꓲ ꓔꓯꓺ ꓡꓯ ꓘꓳ ꓐ ꓡˍ ꓟ ꓥ ꓢꓲ ꓠꓬꓲ꓾ ꓐꓳ/ꓜꓯꓻ ꓔ ꓟ ꓟꓴꓽ ꓖꓪ Audio/Video File ꓔꓯ (1ꓸ6ꓸ2023-30ꓸ6ꓸ2023) ꓘꓴꓽ ꓗꓪ ꓖꓶ ꓩꓴ ꓠ ꓔ ꓟ ꓥ ꓡꓳ=

ꓔꓯꓺ ꓡꓯ ꓘꓳꓹ ꓟ ꓗꓪ ꓬꓲ ꓔꓲꓸ ꓟꓶ ꓡꓰ ꓢꓴ ꓔꓯ ꓠꓬ 7 ꓦ ꓠꓬꓲ ꓠꓽ ꓕꓲ ꓠꓽ ꓘꓴꓽ ꓗꓪ ꓐꓯ ꓑꓶ ꓩꓴ ꓓꓴ ꓥꓳ= ꓬꓲ ꓕꓲꓸ (1) ꓟꓶ ꓢꓴ ꓔꓯ ꓠꓬ 5 ꓫꓬꓹ ꓐꓰ ꓬꓲ ꓕꓲꓸ (2) ꓟꓶ ꓢꓴ ꓔꓯ ꓠꓬ 3 ꓫꓬꓹ ꓖꓶ ꓓꓴ ꓥꓳ꓾ ꓐꓰ ꓢꓷꓸ ꓪ ꓡꓳ=

ꓜꓯꓻ/ꓐꓳ ꓔ ꓟ ꓟꓴꓽ ꓖꓪ ꓔꓯ ꓠꓬ Joy Digital Sound Studio Facebook Page ꓗꓪ ꓐꓰ ꓥ ꓟꓲ꓾ Viber ꓾ Telegram ꓐꓰ Email ꓗꓪ ꓖꓶ ꓩꓴ ꓐ ꓡˍ ꓟ ꓥ ꓡꓳ= ꓬꓲ ꓒꓵꓽ ꓔꓯ ꓠꓬ ꓗ-ꓑꓮꓬ꓾ ꓪꓮꓦꓰ ꓑꓮꓬ ꓗꓪ ꓚꓳꓸ ꓖꓶ ꓩꓴ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ=