ꓡꓳꓲ-ꓗꓮꓪ ꓟꓯꓼ ꓛꓰꓹ ꓑꓬ ꓢꓴ ꓞꓳ ꓦꓲꓻ ꓕꓲꓽ ꓔꓴ ꓟꓽ ꓞꓲ ꓐꓱ ꓶ ꓗ-ꓬꓹ-ꓡꓲ-ꓒꓴꓸꓼ ꓞꓳ ꓡꓱ ꓐꓴ ꓜꓻ ꓒꓴ ꓬꓰ ꓙˍ ꓟ

ꓗ-ꓬꓹ ꓗꓴꓷꓼ ꓫꓴ꓾ ꓡꓳꓲ-ꓗꓮꓪ ꓡꓳ ꓒꓱ꓾ ꓐꓶ ꓓꓳ ꓕꓲ ꓛꓱꓽ ꓟꓯꓼ ꓛꓰꓹ ꓟꓯꓼ ꓑꓬ ꓔꓶꓸ 2 ꓟ ꓗꓪ ꓔꓬ ꓟ ꓞꓳ ꓦꓲꓻ (1182) ꓦꓲꓻ ꓐꓱ ꓶ ꓗ-ꓬꓹ-ꓡꓲ-ꓒꓴꓸꓼ ꓞꓳ ꓡꓱ ꓐꓴ ꓡꓰ ꓕꓲ ꓦꓲ ꓔꓯ ꓜꓻ ꓒꓴ ꓕꓲꓽ ꓟꓳ-ꓠꓳ ꓬꓰ ꓙ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓗ-ꓬꓹ-ꓡꓲ-ꓒꓴꓸꓼ ꓐꓴ ꓠꓬ ꓟꓯꓼ ꓛꓰꓹ ꓑꓬ ꓢꓴ ꓐꓴ ꓔꓯ ꓮ ꓟꓬꓹ ꓧꓪꓹ ꓬꓰ ꓙ ꓐ ꓡˍ ꓟ ꓟꓽ ꓙꓳ= ꓧꓶꓸ ꓕꓯ ꓕꓯ ꓠꓬ ꓬꓲ ꓪ ꓡꓰ ꓬꓰ ꓙ ꓢꓴ ꓔꓯ ꓓꓰꓽ ꓔ ꓟ ꓜꓽ ꓓꓴ ꓮ ꓔꓲꓸ ꓤ ꓔꓯ ꓡꓰꓽ ꓣꓱꓽ ꓞꓹ ꓟ ꓗꓪ ꓙꓰ ꓢꓲ ꓬꓰ ꓙ ꓖꓶ ꓔꓬ ꓟ ꓡꓰꓽ ꓙꓳˍ ꓡꓳ= ꓖꓳ ꓡꓱ ꓥ ꓟꓲ ꓗ-ꓬꓹ-ꓡꓲ-ꓒꓴꓸꓼ ꓞꓳ ꓡꓱ ꓐꓴ ꓠꓬ ꓮ ꓟꓶ ꓟ ꓡꓰ ꓜꓻ ꓒꓴ ꓮ ꓟꓬꓹ ꓬꓰ ꓙ ꓐ ꓡˍ ꓟ ꓠꓬ ꓬꓲ ꓪꓴꓸ ꓕꓲ ꓧꓪꓹ ꓟ ꓥ ꓢꓲ꓾ ꓬꓲ ꓪ ꓐꓴ ꓠꓬ ꓢꓷꓸ ꓠꓲꓹ ꓕꓲ ꓛꓱꓽ ꓗꓪˍ ꓟꓲ ꓟꓬꓽ ꓠꓬꓲ ꓬꓰ ꓙ ꓖꓶ ꓔꓬ ꓡꓳ=

ꓡꓳꓲ-ꓗꓮꓪ ꓐꓶ ꓓꓳ ꓕꓲ ꓛꓱꓽ ꓗꓪ ꓟ ꓟꓯꓼ ꓛꓰꓹ ꓑꓬ ꓔꓶꓸ ꓐꓴ ꓗꓪ ꓙꓰ ꓠꓹ ꓟ ꓙ ꓖꓴ ꓮ ꓘꓶꓸ ꓫꓸ ꓟ ꓡꓰꓽ ꓟꓽ ꓞꓲꓺ ꓬꓰ ꓙ ꓢꓴ ꓐꓴ ꓟꓽ ꓛꓲ ꓡ ꓟ ꓟꓶ ꓤ ꓗꓷ ꓡꓰ ꓟ ꓑꓶꓸ ꓓꓴ ꓜꓻ ꓠꓬ ꓪ ꓜꓲ ꓫꓸ ꓔꓬ ꓟ ꓥ ꓡꓳ꓾ ꓐꓰ ꓗ-ꓬꓹ-ꓡꓲ-ꓒꓴꓸꓼ ꓞꓳ ꓡꓱ ꓜꓴ ꓗꓪ ꓟ ꓐꓯ ꓙꓵꓽ ꓪ ꓙꓳ ꓢꓴ ꓕꓲ ꓣꓳ ꓡꓰ ꓐꓯ ꓡꓳ=

ꓗꓳꓸ ꓡ ꓟ ꓘꓳꓼ ꓗꓪ ꓟꓯꓼ ꓓꓶꓽ ꓡꓯ ꓘꓳ ꓔꓬ ꓟ ꓑꓶꓸ ꓓꓴ ꓛꓰꓹ ꓑꓬ ꓔꓬ ꓪ ꓟ ꓡꓳꓲ-ꓗꓮꓪ ꓡꓳ ꓒꓱ ꓒ ꓕꓲ ꓔꓬ ꓢꓴ ꓐꓴ ꓐꓰ ꓓꓲ-ꓟꓮꓪ-ꓢꓳ ꓡꓳ ꓒꓱ ꓐꓰ ꓠꓱꓸ ꓐꓯ ꓗꓪ ꓐꓰ ꓡˍ ꓟ ꓟꓯꓼ ꓛꓰꓹ ꓑꓬ ꓢꓴ ꓐꓴ ꓥ ꓢꓲ꓾ ꓮ ꓙꓵꓽ ꓠꓬ 5000 ꓣꓳ ꓛꓲ ꓙꓳˍ ꓡꓳ꓾ ꓐꓰ ꓢꓷꓸ ꓪ ꓡꓳ=