ꓢꓴ-ꓑꓲ-ꓬꓯꓥ ꓞꓳ ꓘꓹ ꓘꓴꓽ ꓗꓪ ꓙꓼ ꓧꓪꓽ ꓞꓶꓻ ꓫꓸ ꓡ ꓟ ꓑꓶꓸ ꓓꓴ ꓠꓻ ꓢꓴ ꓒꓬꓽ ꓢꓴ ꓐꓴ ꓔꓯ ꓠꓯꓻ ꓞꓲꓼ ꓦꓲ ꓗꓪ ꓧꓳꓽ ꓙꓰ ꓠꓹ ꓟ ꓮ ꓘꓶꓸ ꓫꓸ ꓔꓬ ꓟ ꓓꓳꓽ

Wednesday, April 24, 2024

ꓟꓲ-ꓚꓲ-ꓠ ꓐꓰ ꓑꓴ-ꓔ-ꓳ ꓟꓳ-ꓓꓳ ꓙꓻ ꓖꓴ ꓚꓵꓸ ꓔ ꓟ ꓪꓴꓸ ꓠꓬꓲ ꓢꓴ-ꓑꓲ-ꓬꓯꓥ ꓞꓳ ꓘꓹ ꓘꓴꓽ ꓗꓪ ꓟꓽ ꓙꓳ ꓟꓽ ꓓ ꓟ ꓜꓽ ꓫꓵꓽ ꓜꓽ ꓙꓰꓽ ꓫꓸ ꓡꓰ ꓔꓬ ꓟ ꓡꓰꓽ ꓟꓽ ꓞꓲꓺ꓾ ꓙꓼ ꓧꓪꓽ ꓞꓶꓻ ꓥˍ ꓟꓲ ꓫꓸ ꓡ ꓔꓬ ꓟ ꓑꓶꓸ ꓓꓴ ꓮ ꓘꓶꓸ ꓠꓻ ꓔꓬ ꓢꓴ ꓐꓴ ꓔꓯ ꓠꓯꓻ ꓞꓲꓼ ꓦꓲ ꓗꓪ ꓧꓳꓽ ꓙꓰ ꓠꓹ ꓟ ꓫꓸ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓢꓴ-ꓑꓲ-ꓬꓯꓥ ꓞꓳ ꓘꓹ ꓘꓴꓽ ꓗꓪ ꓶꓻ ꓤ (ꓚꓬ ꓢꓲꓸ)꓾ ꓣꓱꓽ ꓫꓵꓽ ꓣꓱꓽ ꓙꓰꓽ ꓪꓴꓽ ꓔꓬ ꓖꓴ ꓮ ꓟꓬꓹ ꓦꓲꓻ ꓙꓳˍ ꓥ ꓟꓲ꓾ ꓮ ꓟꓶ ꓕꓯ ꓠꓬ ꓶꓻ ꓤ ꓚꓬ ꓢꓲꓸ ꓪꓴꓽ ꓖꓴ ꓡꓰ ꓔꓬ ꓠꓬꓲ꓾ ꓝꓸ ꓢꓲ ꓪꓴꓽ ꓓꓴ ꓟꓽ ꓙꓳ ꓗꓷ ꓡꓰ ꓔꓬꓳ꓾ ꓐꓰ ꓑ ꓫꓬ ꓕꓲ ꓣꓳ ꓡꓰ ꓐꓯ ꓡꓳ=

ꓢꓴ-ꓑ-ꓣ-ꓐꓴꓟ ꓡꓳ ꓒꓱ ꓗꓪ ꓠꓬꓲꓽ ꓛꓱꓽ ꓟꓯꓼ ꓢꓰꓼ ꓡꓯ ꓘꓳ ꓗꓷ ꓗ ꓠꓯꓸ꓾ 3 ꓦ 9 ꓠꓬꓲ ꓕꓯ ꓡꓰ ꓪꓴꓸ ꓔꓴ ꓢꓲ꓾ ꓟꓲ-ꓚꓲ-ꓠ ꓢꓴ-ꓑ-ꓣ-ꓐꓴꓟ ꓑꓴ-ꓔ-ꓳ ꓙꓻ ꓖꓴ ꓔꓯ ꓚꓵꓸ ꓗꓷ ꓠꓬꓲ꓾ ꓮ ꓟꓶ ꓠꓬ ꓦ ꓐ ꓕꓲ ꓟ ꓟꓽ ꓞꓲ ꓙꓳ ꓡꓰ ꓟ ꓥ ꓡꓳ=

ꓢꓴ-ꓑꓲ-ꓬꓯꓥ ꓞꓳ ꓘꓹ ꓗꓪ ꓡꓰꓽ ꓟꓽ ꓞꓲꓺ ꓑꓴ-ꓔ-ꓳ ꓡꓳ ꓒꓱ ꓘꓴꓽ ꓗꓪ ꓥˍ ꓟꓲ ꓙꓼ ꓧꓪꓽ ꓞꓶꓻ ꓟꓽ ꓙꓳ ꓗꓷ ꓡ ꓔꓬ ꓟ ꓑꓶꓸ ꓓꓴ ꓙꓼ ꓣꓱꓽ ꓢꓲ ꓬꓰ ꓔꓬ ꓪˍ ꓟ ꓟꓬꓱꓽ ꓗꓪ ꓟꓬꓱꓽ ꓟꓽ ꓒꓬꓱꓼ ꓠꓬꓲ ꓫꓸ ꓔꓬ ꓡꓳ꓾ ꓐꓰ ꓡꓳ ꓒꓱ ꓑ ꓫꓬ ꓐꓴ ꓡꓰ ꓐꓯ ꓡꓳ=

ꓟꓲ-ꓚꓲ-ꓠ ꓑꓴ-ꓔ-ꓳ ꓟꓳ-ꓓꓳ ꓙ ꓖꓴ ꓠꓬ ꓮ ꓡꓲ ꓕꓯ ꓒꓴ ꓖꓶˍ ꓡ꓾ ꓐꓯ ꓟ ꓔꓯ ꓠꓬ ꓟꓽ ꓢꓷꓸ= ꓑ ꓫꓬ ꓐꓴ ꓠꓬ ꓙ ꓖꓴ ꓒꓴ ꓖꓶ ꓡꓹˍ ꓟ ꓔꓯ ꓥꓳ ꓡꓳꓸ ꓔꓬ ꓡꓳ꓾ ꓐꓰ ꓢꓷꓸ ꓪ ꓡꓳ=