ꓣꓱꓽ ꓬꓯꓼ ꓣꓱꓽ ꓞꓹ ꓔꓬ ꓟ ꓘꓴ ꓜꓲ ꓞꓳ ꓔꓯ ꓬꓰ ꓙˍ ꓟ (ꓮꓚꓠ) ꓗꓪ ꓐꓰ ꓟꓬ-ꓟ ꓗꓴꓷꓼ ꓐꓱ ꓶ ꓪꓽ ꓘꓴ ꓙ ꓖꓶ ꓠꓹ ꓟ ꓓꓰꓽˍ ꓟ

ꓣꓱꓽ ꓬꓯꓼ ꓣꓱꓽ ꓞꓹ ꓔꓬ ꓟ ꓘꓴ ꓜꓲ ꓞꓳ ꓔꓯ ꓬꓰ ꓙˍ ꓟ (ꓮꓚꓠ) ꓗꓪ ꓐꓰ ꓟꓬ-ꓟ ꓗꓴꓷꓼ ꓐꓱ ꓶ ꓪꓽ ꓘꓴ ꓙ ꓖꓶ ꓠꓹ ꓟ ꓓꓰꓽˍ ꓟ

ꓣꓱꓽ ꓬꓯꓼ ꓣꓱꓽ ꓞꓹ ꓔꓬ ꓟ ꓘꓴ ꓜꓲ ꓞꓳ ꓔꓯ ꓬꓰ ꓙˍ ꓟ (ꓮꓚꓠ) ꓗꓪ ꓐꓰ ꓟꓬ-ꓟ ꓗꓴꓷꓼ ꓐꓱ ꓶ ꓪꓽ ꓘꓴ ꓙ ꓖꓶ ꓠꓹ ꓟ ꓓꓰꓽˍ ꓟ

ꓔꓲꓺ ꓒ ꓪ ꓔꓲ ꓐꓴ foundation ꓗꓪ ꓐꓰ ꓐꓶ ꓓꓳ ꓖꓴ ꓟꓶꓸ Asia ꓗꓴꓷꓼ ꓐꓴ ꓘꓴꓽ ꓗꓪ ꓟꓽ ꓓ ꓟꓽ ꓞ ꓬꓰˍ ꓟ ꓠꓽ ꓗꓷ ꓠꓹ ꓟ ꓐꓱ ꓶ ꓔꓲꓺ ꓒ ꓪ ꓔꓲ Francis ꓬꓲ ꓓꓰꓽ ꓘꓶꓽ ꓔꓯ ꓝꓮꓲ ꓕꓲ ꓧꓪꓹ ꓐꓯ ꓗꓷꓳ= ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓘꓶ ꓙꓵˍ ꓟ ꓐꓰ ꓠꓬꓲꓸ ꓤꓲˍ ꓟ ꓟꓶ ꓔꓬ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓔꓯ ꓬꓰ ꓙ ꓔꓳꓹ ꓙˍ ꓟ ꓟꓵꓽ ꓗꓳꓹ ꓓꓵꓺ ꓓꓵꓺ ꓗ-ꓕꓳ-ꓡꓲꓗ ꓘꓴ ꓜꓲ ꓞꓳ ꓜꓴꓻ ꓗꓪ ꓐꓰ ꓟꓬ-ꓟ ꓗꓴꓷꓼ ꓐꓱ ꓶ ꓪꓽ ꓘꓴ ꓙ ꓖꓶ ꓠꓹ ꓟ ꓓꓰꓽ ꓗꓷꓳ=

ꓟꓬ-ꓟ ꓗꓴꓷꓼ ꓗꓪ ꓑ ꓫꓬ ꓐꓴ ꓡꓰ ꓢꓲꓺ ꓔ ꓟ ꓗꓴꓷꓼ ꓙꓵꓽ ꓢꓴ ꓔꓯ 2 ꓦ 1 ꓠꓬꓲ ꓕꓯ ꓣꓴ ꓞꓰꓹ ꓗꓷ ꓟ ꓙꓵꓽ ꓪ ꓦꓴꓻ ꓔꓯꓹ ꓙꓰ ꓗꓷ ꓗꓸ ꓠꓯꓸ ꓦ ꓐ ꓠꓬꓲꓽ ꓟ ꓟꓶ ꓫꓵ ꓡꓰˍ ꓗꓪ ꓛꓲꓽ ꓗꓴꓷꓼ ꓟꓽ ꓢꓲꓺ ꓡꓲꓺ ꓗꓷ ꓡꓰ ꓟ ꓥꓳ= “ꓟꓵꓽ ꓗꓳꓹ ꓓꓵꓺ ꓓꓵꓺ ꓗꓪ ꓔꓬ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓡꓰ ꓟꓬ-ꓟ ꓗꓴꓷꓼ ꓐꓱ ꓶ ꓠꓲꓹ ꓟ ꓫꓸ ꓢꓲ ꓡꓳꓸ ꓔꓬ ꓕꓲ ꓖꓺꓼ ꓡꓰꓼ ꓐ ꓡˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓔꓲꓺ ꓒ ꓪ ꓔꓲ Francis ꓬꓲ ‘ꓟꓽ ꓓ ꓟꓽ ꓞ ꓬꓰˍ ꓟ ꓔꓯ ꓠꓽ ꓗꓷ’ ꓐꓰ ꓓꓰꓽ ꓔ ꓟ ꓔꓯ ꓥꓪ ꓠꓴꓽ ꓢꓷꓸ ꓙ ꓟꓳ ꓙˍ ꓡꓳ= ꓟꓬꓽ ꓠꓬꓲ ꓢꓯꓸ ꓬꓲꓼ ꓡ ꓑꓮꓲꓽ ꓦꓬꓼ ꓠꓬꓲ ꓘꓴꓽ ꓗꓪ ꓪꓽ ꓘꓴ ꓙ ꓡꓯ” ꓕꓱ ꓡꓰ ꓓꓰꓽ ꓔ ꓟ ꓔꓯ ꓗ-ꓕꓳ-ꓡꓲꓗ ꓢ-ꓢꓶ-ꓠ ꓬꓲ ꓔꓲꓺ ꓒ ꓪ ꓔꓲ ꓐꓴ foundation ꓥ ꓟ꓾ ꓣꓱꓽ ꓬꓯꓼ ꓣꓱꓽ ꓞꓹ ꓔꓬ ꓟ ꓘꓴ ꓜꓲ ꓞꓳ ꓔꓯ ꓬꓰ ꓙˍ ꓟ (Aid to the Church in Need - ACN) ꓗꓪ ꓟ ꓢꓽ ꓡ ꓙꓵꓽ Thomas Heine-Geldern ꓗꓪ ꓐꓯ ꓗꓷꓳ=

“3 ꓦ ꓘꓴꓽ ꓕꓯ Asia ꓗꓴꓷꓼ ꓤ ꓤ ꓗꓪ democracy ꓟꓶ ꓠ ꓢꓯꓼ ꓕꓵꓼ ꓔꓬ ꓟ ꓔꓯ ꓙꓵꓽ ꓪ ꓦꓴꓻ ꓔꓯꓹ ꓙꓰ ꓗꓷ ꓟ ꓟꓯꓼ ꓐꓴ ꓗꓪ ꓐꓰ ꓟꓽ ꓓ ꓟ ꓞ ꓘꓶ ꓙꓵˍ ꓟ ꓬꓰˍ ꓟ ꓕꓯꓽ ꓢꓲ ꓗꓪ ꓔꓲꓺ ꓒ ꓪ ꓔꓲ Francis ꓡꓰ ‘ ꓟꓽ ꓓ ꓟꓽ ꓞ ꓬꓰˍ ꓟ ꓔꓯ ꓠꓽ ꓗꓷ ꓠꓹ ꓟ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓒꓬꓱꓽ ꓔꓳꓹ ꓟꓬ ꓔꓳꓹ ꓟꓳ ꓡꓯ ꓘꓳ ꓢꓲ ꓖꓪ ꓙꓱ ꓜꓲꓼ ꓠꓹ ꓟ’ ꓔꓯ ꓓꓰꓽ ꓗꓷꓳ” ꓐꓰ Heine-Geldern ꓗꓪ ꓐꓰ ꓠꓽ-ꓥꓪꓽ-ꓠꓬꓲ ꓕꓯ (ꓮꓚꓠ) website ꓗꓪ ꓐꓳ ꓔ ꓡꓳ=

ꓢꓯꓼ ꓟꓬ ꓖꓶ ꓗꓷ ꓢꓴ ꓠꓬ (618) ꓣꓳ ꓙꓳ ꓡ ꓗꓷꓳ

ꓚꓲ ꓛꓬ ꓠꓲꓹ ꓡꓶꓽ ꓔꓯ ꓟꓳꓸ ꓖꓶ ꓔꓬ ꓟ ꓑ ꓫꓬ ꓡ ꓞꓳ ꓐꓴ ꓕꓯꓽ ꓢꓲ ꓟꓬ-ꓟ ꓟꓯꓼ ꓐꓴ ꓗꓪ ꓐꓰ ꓫꓵꓽ ꓬꓲ ꓡꓰˍ ꓗꓪ ꓛꓲ ꓘꓶ ꓔꓬ ꓟ ꓗꓪ ꓫꓵꓻ ꓢꓴ ꓐꓴ ꓔꓯ ꓞꓳ ꓵ ꓟꓬꓱ ꓐꓳ ꓔ ꓟ ꓗꓴꓷꓼ ꓫꓵ ꓪꓴ ꓐꓱ ꓶ ꓐꓱ ꓓꓴꓽ ꓗꓪ ꓐꓱ ꓟꓶ ꓢꓴ ꓐꓴ ꓔꓯ ꓬꓰ ꓙ ꓔꓬ ꓟ ꓜꓴꓻ (ꓮꓮꓑꓑ) ꓗꓪ ꓐꓰ ꓡꓳꓹ ꓬꓰ ꓟ ꓠꓽ-ꓥꓪꓽ-ꓠꓬꓲ ꓗꓪ ꓛꓲꓺ ꓫꓵꓻ ꓗꓷ ꓢꓴ ꓠꓬ (618) ꓣꓳ ꓙꓳˍ ꓟ ꓔꓯ ꓐꓯ ꓖꓶ ꓗꓷꓳ=

ꓑ ꓫꓬꓼ (2931) ꓔꓯ ꓐꓱ ꓔ ꓢꓲ꓾ (54) ꓣꓳ ꓐꓴ ꓠꓬ ꓐꓱ ꓓꓴ ꓗꓪ ꓝ ꓢꓲ ꓐꓱ ꓔ ꓠꓹ ꓟ ꓝꓴꓲꓸ ꓓꓰꓺˍ ꓟ ꓟꓶ ꓗꓷ ꓢꓲ ꓠꓬꓲ꓾ (520) ꓣꓳ ꓔꓯ ꓖꓼ ꓣꓴ ꓠꓹ ꓟ ꓕꓵꓼ ꓪ ꓖꓶ ꓔ ꓡꓳ= (ꓮꓮꓑꓑ) ꓗꓪ ꓐꓰ ꓫꓵꓻ ꓗꓷ ꓟ ꓫꓵꓽ ꓪꓴ ꓮ ꓙꓵꓽ ꓔꓯ ꓞꓳ ꓵ ꓟꓬꓱꓺ ꓐꓳ ꓟꓽ ꓖꓴ ꓡꓰ ꓟ ꓪꓴꓸ ꓠꓬꓲ ꓫꓵꓻ ꓗꓷ ꓢꓴ ꓐꓴ ꓠꓬ (618) ꓣꓳ ꓟꓽ ꓞꓲ ꓙꓳˍ ꓟꓲ ꓙꓳˍ ꓥꓳ ꓐꓰ ꓐꓯ ꓔ ꓡꓳ=

(ꓮꓚꓠ) ꓢꓽ ꓡ ꓙꓵꓽ ꓡꓰ “ ꓟꓬ-ꓟ ꓗꓴꓷꓼ ꓗꓪ ꓟ ꓓꓳꓽ ꓔꓯ ꓑ ꓙˍ ꓕꓯ ꓥꓪ ꓮ ꓘꓶꓸ ꓙꓳꓺ ꓛꓱꓽ ꓡꓰꓳ” ꓐꓰ ꓐꓯˍ ꓡꓳ= “ꓕꓱ ꓠꓽ-ꓛꓳꓼ-ꓠꓬꓲ꓾ ꓠꓽ-ꓦꓬ-ꓠꓬꓲ ꓕꓯ ꓙꓵꓽ ꓪ ꓦꓴꓻ ꓔꓯꓹ ꓙꓰ ꓗꓷ ꓟ ꓟꓯꓼ ꓐꓴ ꓠꓬ ꓧꓶꓸ ꓕꓯ ꓟ ꓕꓯꓽ ꓢꓲ ꓜꓲꓽ ꓜꓲꓽ ꓑꓰꓹ ꓑꓰꓹ ꓬꓰˍ ꓡꓳ= ꓬꓲ ꓪ ꓐꓴ ꓠꓬ ꓡꓽ-ꓞꓬꓴꓸ (ꓑꓳ) ꓐꓴ ꓔꓯꓹ ꓢꓲ ꓙ ꓖꓴ ꓗꓪ ꓟꓳˍ ꓕ ꓑꓳꓸꓼ ꓔꓯ ꓑꓳ ꓠꓹ ꓟ ꓐꓶ ꓠꓹ ꓟ ꓙ ꓖꓶ ꓔꓬ ꓟ ꓔꓯ ꓚꓬꓹ ꓪˍ ꓡꓳ” ꓐꓰ ꓐꓯ ꓖꓶ ꓗꓷꓳ=

ꓕꓱ ꓟ ꓠꓬ ꓮꓸ ꓟꓰꓸ ꓟꓰꓸ ꓟꓽ ꓠꓽ ꓗꓷ

ꓬꓲ ꓡꓰ ꓠꓲꓹ ꓟ ꓫꓸ ꓫꓸ ꓡꓰ “ꓗꓴꓷꓼ ꓙꓵꓽ ꓗ ꓚꓱꓹ ꓔꓯ ꓢꓷꓸ ꓢꓴ ꓡꓰ ꓐꓯ ꓟ ꓔꓯ ꓡꓳꓸ ꓠꓬꓲ ꓗꓷ ꓠꓬ ꓟꓯꓼ ꓐꓴ ꓐꓰ democracy ꓠꓵˍ ꓟ ꓑ ꓜꓬꓼ ꓐꓴ ꓠꓬ ꓗꓸ ꓠꓯꓸ ꓢꓲꓺ ꓗꓪ ꓚꓱꓹ ꓬꓲꓼ ꓙꓰ ꓠꓹ ꓟ ꓟꓽ ꓙ ꓖꓶ ꓔ= ꓟꓯꓼ ꓐꓴ ꓠꓬ ꓢꓲꓺ ꓡꓲꓺ ꓗꓷ ꓡꓰ ꓠꓹ ꓟ ꓐꓱ ꓶ ꓑ ꓫꓬ ꓐꓴ ꓔꓯ ꓘꓶ ꓙꓵˍ ꓟ ꓐꓰ ꓟꓽ ꓓ ꓟꓽ ꓞ ꓬꓰ ꓙꓵꓽ ꓪ ꓙꓳˍ ꓡꓳ ꓐꓰ ꓬꓲ ꓪ ꓚꓲ ꓛꓬ ꓬꓲ ꓪ ꓙꓵꓻ ꓔꓬ ꓡꓳ” ꓐꓰ ꓐꓯˍ ꓡꓳ=

ꓖꓳ ꓡꓱ ꓥˍ ꓟꓲ ꓞꓳ ꓡꓱ ꓐꓴ ꓧꓳꓽ ꓪꓴꓸ ꓟꓴ ꓔꓬ ꓟ ꓙꓻ ꓖꓴ ꓕꓯꓽ ꓢꓲ ꓗꓪ ꓬꓰ ꓔꓬ ꓟ ꓠꓬ ꓚꓲ ꓛꓬ ꓗꓴꓷꓼ ꓔꓯ ꓟꓽ ꓓ ꓟꓽ ꓞ ꓬꓰˍ ꓟ ꓟꓯꓼ ꓙꓵꓽ ꓚꓱꓹ ꓗꓪ ꓐꓰ ꓡꓲꓹ ꓗꓷ ꓟꓶ ꓠꓹ ꓟ ꓐꓰ ꓓꓵꓽ ꓙ ꓞꓷꓹ ꓗꓷ ꓟ ꓥꓳ= “ꓫꓵꓽ ꓪꓴ ꓠꓬ ꓧꓶꓸ ꓕꓯ ꓟ ꓕꓯꓽ ꓢꓲ ꓪꓴꓽ ꓡ ꓔꓬ ꓡꓳ” ꓐꓰ Heine-Geldern ꓡꓰ ꓐꓯ ꓖꓶ ꓗꓷꓳ= ꓕꓱ ꓟ ꓑꓶꓸ ꓓꓴ ꓬꓲ ꓠꓬ ꓦ ꓕꓲ ꓒꓳꓹ ꓗꓪ ꓫꓱꓸ ꓤˍ ꓟ ꓔꓯ ꓓꓰꓽ ꓔꓬ ꓟ ꓥ ꓡꓳ= “ꓣꓳ ꓐꓴ ꓟꓬꓽ ꓠꓬꓲ ꓪꓽ ꓘꓴ ꓠ ꓗꓹ ꓡꓳ= ꓢꓲꓺ ꓡꓲꓺ ꓟ ꓐꓰ ꓝꓮꓲ ꓕꓲ ꓧꓪꓹ ꓠꓲꓹ ꓧꓳ ꓫꓵꓽ ꓧꓳꓹ ꓟ ꓔꓯ ꓣꓳ ꓣꓱꓽ ꓞꓹ ꓡꓳ= ꓫꓸ ꓟꓳ ꓠꓬꓲ ꓠꓴ ꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓽ ꓘꓴˍ ꓟ ꓗꓪ ꓟꓬ-ꓟ ꓞꓳ ꓫꓵꓽ ꓐꓴ ꓐꓱ ꓶˍ ꓟꓲ ꓪ ꓘꓴ ꓖꓶ ꓡꓯ” ꓐꓰ ꓓꓰꓽ ꓗꓷꓳ=

ꓥꓳ ꓡꓳꓸˍ ꓟ ꓬꓲ ꓢꓷꓸ ꓡꓰ ꓓꓴ

ꓖꓳ ꓡꓱ ꓥˍ ꓟꓲ Heine-Geldern ꓠꓬ ꓟꓬ-ꓟ ꓗ-ꓕꓳ-ꓡꓲꓗ ꓢ-ꓢꓶ-ꓠ ꓗꓪ ꓐꓰ ꓢꓷꓸ ꓙ ꓟꓳ ꓙˍ ꓟ ꓔꓯ ꓟꓳ ꓡꓰ ꓟ ꓪꓴꓸ ꓠꓬꓲ ꓥꓳ ꓡꓳꓸ ꓓꓴ ꓒ ꓐꓲ ꓙꓳˍ ꓡꓳ= “ꓗ-ꓕꓳ-ꓡꓲꓗ ꓔꓲꓺ ꓟ ꓕꓲ ꓣꓳ ꓡꓰ ꓟꓽ ꓓ ꓟꓽ ꓞ ꓬꓰˍ ꓟ ꓡ ꓞꓳ ꓢꓰꓼˍ ꓟ ꓠꓽ ꓗꓷ ꓠꓹ ꓟ ꓔꓯ ꓐꓯ ꓖꓶ ꓢꓲ ꓟꓯꓼ ꓐꓴ ꓙꓰˍ ꓟ ꓚꓱꓹ ꓔꓯ ꓗꓽ ꓔ ꓢꓲ ꓛꓲ ꓝꓲꓸ ꓖꓶꓽ ꓔꓬ ꓟ ꓐꓬꓱꓽ ꓐꓴ ꓠꓬ ꓥꓪ ꓠꓲꓹ ꓟ ꓔꓯ ꓡꓵꓹ ꓫꓴ ꓖꓶ ꓔꓬ ꓡꓳ= ꓟꓯꓼ ꓐꓰ ꓑ ꓫꓬ ꓐꓴ ꓠꓬꓲꓽ ꓗꓴꓸ ꓝ ꓗꓪ ꓙꓲ-ꓢꓴ ꓘꓴ ꓜꓲ ꓞꓳ ꓟꓸ ꓒ ꓕꓲ ꓣꓳ ꓐꓰ ꓕꓲ ꓪꓽ ꓙꓰ ꓢꓲ ꓫꓸ ꓕꓱ ꓖꓶ ꓧꓪꓸ ꓡꓰ ꓟ ꓗ-ꓕꓳ-ꓡꓲꓗ ꓔꓲꓺ ꓒ ꓕꓲ ꓣꓳˍ ꓟꓲ ꓪꓽ ꓠꓬꓲˍ ꓟ ꓢꓷꓸ ꓡꓰ ꓓꓴ ꓝꓮꓲ ꓕꓲ ꓟ ꓥꓳ= ꓔꓲꓺ ꓒ ꓔꓲꓺ ꓟ ꓐꓴ ꓬꓰ ꓗꓷ ꓟ ꓠꓬ ꓙꓵꓽ ꓪ ꓙꓳ ꓢꓴ ꓐꓴ ꓠꓲꓹ ꓟ ꓔꓯ ꓠꓴꓽ ꓡꓰ ꓝꓲˍ ꓥꓳ ꓐꓰ ꓥꓳ ꓡꓳꓸˍꓡꓳ” ꓐꓰ Heine-Geldern  ꓡꓰ ꓐꓯ ꓗꓷꓳ=

https://bit.ly/3g3lZ84

Cred: CBCM-OSC

Add new comment

2 + 1 =